ໂສຓາເຖຣີວຕ຺ຖຸ

໒໔໑. ສຕ຺ຕເມ ສພ຺ເພປິ ວິສຸໍ ວິສຸໍ ຆຣາວາເສ ປຕິຏ຺ຐາເປສີຕິ ເອຕ຺ຖ ສພ຺ເພປິ ວິສຸໍ ວິສຸໍ ຆຣາວາເສ ປຕິຏ຺ຐາເປຕ຺ວາ ‘‘ປຸຕ຺ຕາວ ມໍ ປຏິຊຄ຺ຄິສ຺ສນ຺ຕິ, ກິໍ ເມ ວິສຸໍ ກຸຏຸມ຺ເພນາ’’ຕິ ສພ຺ພໍ ສາປເຕຍ຺ຍມ຺ປິ ວິຠຊິຕ຺ວາ ອທາສີຕິ ເວທິຕພ຺ພໍ. ເຕເນວ ຫິ ຕໂຕ ປຏ຺ຐາຍ ‘‘ອຍໍ ອມ຺ຫາກໍ ກິໍ ກຣິສ຺ສຕີ’’ຕິ ອຕ຺ຕໂນ ສນ຺ຕິກໍ ອາຄຕໍ ‘‘ມາຕາ’’ຕິ ສຎ຺ຎມ຺ປິ ນ ກຣິໍສຸ. ຕຖາ ຫິ ນໍ ກຕິປາຫຈ຺ຈເຍນ ເຊຏ຺ຐປຸຕ຺ຕສ຺ສ ຠຣິຍາ ‘‘ອໂຫ ອມ຺ຫາກໍ ອຍໍ ເຊຏ຺ເຐປຸຕ຺ໂຕ ເມຕິ ທ຺ເວ ໂກຏ຺ຐາເສ ທຕ຺ວາ ວິຍ ອິມເມວ ເຄຫໍ ອາຄຈ຺ຉຕີ’’ຕິ ອາຫ. ເສສປຸຕ຺ຕານໍ ຠຣິຍາໂຍປິ ເອວເມວໍ ວທິໍສຸ. ເຊຏ຺ຐຘີຕຣໍ ອາທິໍ ກຕ຺ວາ ຕາສໍ ເຄຫໍ ຄຕກາເລ ຕາປິ ນໍ ເອວເມວ ວທິໍສຸ. ສາ ອວມານປ຺ປຕ຺ຕາ ຫຸຕ຺ວາ ‘‘ກິໍ ເມ ອິເມສໍ ສນ຺ຕິເກ ວຸຕ຺ເຖນ, ຠິກ຺ຂຸນີ ຫຸຕ຺ວາ ຊີວິສ຺ສາມີ’’ຕິ ຠິກ຺ຂຸນີອຸປສ຺ສຍໍ ຄນ຺ຕ຺ວາ ປພ຺ພຊ຺ຊໍ ຍາຈິ, ຕາ ນໍ ປພ຺ພາເຊສຸໍ. ອິມເມວ ວຕ຺ຖຸໍ ທສ຺ເສນ຺ໂຕ ‘‘ພຫຸປຸຕ຺ຕິກໂສຓາ ເຕສໍ ອຕ຺ຕນິ ອຄາຣວຠາວໍ ຎຕ຺ວາ ‘ຆຣາວາເສນ ກິໍ ກຣິສ຺ສາມີ’ຕິ ນິກ຺ຂມິຕ຺ວາ ປພ຺ພຊີ’’ຕິ ອາຫ.

ວິຫາຣໍ ຄຈ຺ຉນ຺ຕິໂຍຕິ ຠິກ຺ຂຸວິຫາຣໍ ຄຈ຺ຉນ຺ຕິໂຍ. ຘມ຺ມມຸຕ຺ຕມນ຺ຕິ ນວວິຘໂລກຸຕ຺ຕຣຘມ຺ມໍ. ໂສ ຫິ ອຸຕ຺ຕມຘມ຺ໂມ ນາມ ໂຍ ຫິ ຕໍ ນ ປສ຺ສຕິ, ຕສ຺ສ ວສ຺ສສຕມ຺ປິ ຊີວນໂຕ ຕໍ ຘມ຺ມໍ ປສ຺ສນ຺ຕສ຺ສ ປຏິວິຊ຺ຌນ຺ຕສ຺ສ ເອກາຫມ຺ປິ ເອກກ຺ຂຓມ຺ປິ ຊີວິຕໍ ເສຍ຺ໂຍ. ອາຄນ຺ຕຸກຊໂນຕິ ວິຫາຣຄຕໍ ຠິກ຺ຂຸນີຊນໍ ສນ຺ຘາຍ ວທຕິ. ອນຸປຘາເຣຕ຺ວາຕິ ອສລ຺ລກ຺ເຂຕ຺ວາ.