ສຕ຺ຕວີສຕິໂມ ປຣິຈ຺ເຉໂທ
໕. ປຎ຺ຎຕ຺ຕິວິຠາໂຄ
໒໗. ປເຠທກຖາ
໑໐໖໒. ຈິຕ຺ຕໍ ເຈຕສິກໍ ຣູປໍ, ນິພ຺ພານມ຺ປິ ຈ ຠາຊິຕໍ;
ຕສ຺ມາ ທານິ ຍຖາໂຍຄໍ, ປຎ຺ຎຕ຺ຕິປິ ປວຸຈ຺ຈຕິ.
໑໐໖໓. ສາ ຈາຍໍ ອຕ຺ຖປຎ຺ຎຕ຺ຕິ-ນາມປຎ຺ຎຕ຺ຕິເຠທໂຕ;
ທຸວິຘາ ໂຫຕິ ປຎ຺ຎຕ຺ຕິ, ອຕ຺ຖປຎ຺ຎຕ຺ຕິ ຕຕ຺ຖ ຈ.
໑໐໖໔. ສຕ຺ຕສມ຺ຠາຣສຓ຺ຐານ-ສງ຺ຆາຏປຣິຓາມໂຕ;
ວິກປ຺ປຸປຏ຺ຐານາກາຣໂວຫາຣາຠິນິເວສໂຕ.
໑໐໖໕. ຕຖາ ປວຕ຺ຕສງ຺ເກຕສິທ຺ຘາ ອຕ຺ຖາ ປກປ຺ປິຕາ;
ປຎ຺ຎາປີຍນ຺ຕິ ນາມາຕິ, ປຎ຺ຎຕ຺ຕີຕິ ປກິຕ຺ຕິຕາ.
໑໐໖໖. ອຕ຺ຖາ ຫິ ປຣມຕ຺ຖຕ຺ຖາ, ປຎ຺ຎຕ຺ຕຕ຺ຖາຕິ ຈ ທ຺ວິຘາ;
ຕຕ຺ຖ ຈ ປຣມຕ຺ຖຕ຺ຖາ, ສຈ຺ຈິກຏ຺ຐາ ສລກ຺ຂຓາ.
໑໐໖໗. ປຎ຺ຎຕ຺ຕຕ຺ຖາ ສຈ຺ຈິກຏ຺ຐສລກ຺ຂຓສຠາວໂຕ;
ອຎ຺ຎຖາ ຄຫິຕາ ຕໍຕມຸປາທາຍ ປກປ຺ປິຕາ.
໑໐໖໘. ຕສ຺ມາ ອຸປາທາປຎ຺ຎຕ຺ຕິ, ອຕ຺ຖປຎ຺ຎຕ຺ຕິນາມກາ;
ປຎ຺ຎເປຕພ຺ພນາມາວ, ປຎ຺ຎຕ຺ຕຕ຺ຖາວ ສພ຺ພຖາ.
໑໐໖໙. ປຣມຕ຺ຖາ ຍຖາວຸຕ຺ຕາ, ຈິຕ຺ຕເຈຕສິກາທໂຍ;
ປຎ຺ຎຕ຺ຕາ ອິຕ຺ຖິປຸຣິສມຎ຺ຈປີຐປຏາທໂຍ.
໑໐໗໐. ເຍນ ວຸຈ຺ຈຕິ ຕໍ ນາມໍ, ປຎ຺ຎເປຕີຕິ ວຸຈ຺ຈຕິ;
ປຎ຺ຎຕ຺ຕີຕິ ຈ ສາ ນາມປຎ຺ຎຕ຺ຕີຕິ ຕໂຕ ມຕາ.
໑໐໗໑. ສງ຺ຂາ ສມຎ຺ຎາ ປຎ຺ຎຕ຺ຕິ, ໂວຫາໂຣຕິ ຈ ຠາຊິຕາ;
ຈຕຸຘາ ປຎ຺ຎເປຕພ຺ພປຎ຺ຎຕ຺ຕີຕິ ຫິ ວຓ຺ຓິຕາ.
໑໐໗໒. ຕໂຕ ນາມໍ ນາມກມ຺ມໍ, ນາມເຘຍ຺ຍໍ ອຖາປຣໍ;
ນິຣຸຕ຺ຕິ ພ຺ຍຎ຺ຊນມຠິລາໂປຕິ ປນ ຠາຊິຕາ.
໑໐໗໓. ນາມປຎ຺ຎຕ຺ຕິ ນາມາຕິ, ປຎ຺ຎຕ຺ຕິ ທຸວິຘາ ກຕາ;
ສພ຺ເພວ ຘມ຺ມາ ປຎ຺ຎຕ຺ຕິປຖາຕິ ປນ ຠາຊິຕາ.
໑໐໗໔. ປຣມຕ຺ຖປຎ຺ຎຕ຺ຕຕ຺ຖາ, ທຸວິຘາ ໂຫນ຺ຕິ ຕຕ຺ຖ ຈ;
ປຎ຺ຎຕ຺ຕິປຖາວ ໂຫນ຺ຕິ, ປຣມຕ຺ຖາ ສລກ຺ຂຓາ.
໑໐໗໕. ປຎ຺ຎຕ຺ຕຕ຺ຖາ ປຎ຺ຎຕ຺ຕິ ຈ, ປຎ຺ຎເປຕພ຺ພມຕ຺ຕໂຕ;
ປຎ຺ຎຕ຺ຕິປຖາ ຈ ນາມປຎ຺ຎຕ຺ຕິປຖຠາວໂຕ.
໑໐໗໖. ນາມມ຺ປິ ປຎ຺ຎາເປຕພ຺ພເມວ ກິຎ຺ຈາປິ ເກນຈິ;
ນາມເມວມ຺ເປຕໍ ຕຕ຺ຖ, ປຎ຺ຎຕ຺ຕິຈ຺ເຈວ ວຓ຺ຓິຕໍ.
໑໐໗໗. ປຎ຺ຎເປຕພ຺ພຘມ຺ມາ ຈ, ເຕສໍ ປຎ຺ຎາປິຕາປິ ຈ;
ອິຈ຺ຉິຕພ຺ພາປິ ປຎ຺ຎຕ຺ຕິປຖາ ປຎ຺ຎຕ຺ຕິນານຕາ.
໑໐໗໘. ອິຕິ ວຸຕ຺ຕານຸສາເຣນ, ວຸຕ຺ຕໍ ອຏ຺ຐກຖານເຍ;
ນຍໍ ຄເຫຕ຺ວາ ເອຕ຺ຖາປິ, ປຎ຺ຎຕ຺ຕິ ທຸວິຘາ ກຕາ.
໑໐໗໙. ຕສ຺ມິມ຺ປິ ປຣມຕ຺ຖາ ຈ, ສຈ຺ຈິກຏ຺ຐສລກ຺ຂຓາ;
ອຕ຺ຖາ ປຎ຺ຎຕ຺ຕິມຕ຺ຕາ ຈ, ອຕ຺ຖປຎ຺ຎຕ຺ຕິນາມກາ.
໑໐໘໐. ເຕສໍ ປຎ຺ຎາປິກາ ເຈວ, ນາມປຎ຺ຎຕ຺ຕິນາມິກາ;
ອິຈ຺ເຈວໍ ວຓ຺ຓນາມຄ຺ເຄ, ເຎຍ຺ຍຕ຺ຕາ ຕິວິຘາ ກຕາ.
໑໐໘໑. ປຣມຕ຺ຖສຈ຺ຈໍ ນາມ, ປຣມຕ຺ຖາວ ຕຕ຺ຖ ຈ;
ສຈ຺ຈິກຏ຺ຐສຠາວຕ຺ຕາ, ອວິສໍວາທກາ ຫິ ເຕ.
໑໐໘໒. ສມ຺ມຸຕິສຈ຺ຈໍ ປຎ຺ຎຕ຺ຕິທ຺ວຍໍ ໂວຫາຣວຸຕ຺ຕິຍາ;
ໂລກສມຎ຺ຎາຘິປ຺ປາຍາວິສໍວາທກຠາວໂຕ.
໑໐໘໓. ອິຕິ ສຈ຺ຈທ຺ວຍມ຺ເປຕໍ, ອກ຺ຂາສິ ປຸຣິສຸຕ຺ຕໂມ;
ເຕນາປິ ນາມສໍວິຎ຺ຎູ, ໂວຫເຣຍ຺ຍຸຠຍມ຺ປິ ວາ.
ອິຕິ ປຎ຺ຎຕ຺ຕິວິຠາເຄ ປເຠທກຖາ ນິຏ຺ຐິຕາ.
ສຕ຺ຕວີສຕິໂມ ປຣິຈ຺ເຉໂທ.