໑໓. ເຕຣສໂມ ປຣິຈ຺ເຉໂທ

ນິສ຺ສນ຺ທຜລວິຠາໂຄ

໑໗໙໒. ວິປສ຺ສນາຍ ນິສ຺ສນ຺ທມິຕິ ວຸຕ຺ຕມິໂຕ ປຣໍ;

ສຈ຺ຈານໍ ປຏິເວຘາທິໍ, ປວກ຺ຂາມິ ຍຖາກ຺ກມໍ.

໑໗໙໓. ປຣິຎ຺ຎາ ຈ ປຫານຎ຺ຈ, ສຈ຺ຉິກິຣິຍາ ຈ ຠາວນາ;

ອິຕິ ທຸກ຺ຂາທິສຈ຺ເຈສຸ, ກິຈ຺ຈມາຫຸ ຈຕຸພ຺ພິຘໍ.

໑໗໙໔. ຕໍ ສພ຺ພໍ ມຄ຺ຄກາລມ຺ຫິ, ກຣິສ຺ສຕິ ຕໂຕ ປຣໍ;

ປຏິປສ຺ສທ຺ຘກິຈ຺ຈຕ຺ຕາ, ກຕໍ ໂຫຕິ ຜເລ ກຖໍ.

໑໗໙໕. ຉິນ຺ນຕາໂລ ຜລສ຺ເສວ, ຉິນ຺ນານຸສຍມູລກາ;

ຂນ຺ຘາ ນາລມຘິຏ຺ຐານໍ, ວິປລ຺ລາສປວຕ຺ຕິຍາ.

໑໗໙໖. ອຈ຺ຈນ຺ຕປຏິປກ຺ຂຕ຺ຕາ, ຈຕຸມຄ຺ຄປວຕ຺ຕິຍາ;

ປຣໍ ກ຺ເລສາ ນ ຊາຍນ຺ຕິ, ທຑ຺ຒພີຊງ຺ກຸຣໍ ຍຖາ.

໑໗໙໗. ນິຍ຺ຍານຏ຺ຐວິເສເສນ, ອຎ຺ຎມຎ຺ຎສ຺ສ ປຈ຺ຈໂຍ;

ມຄ຺ໂຄວ ມຄ຺ຄໍ ຠາເວຕິ, ຊາຍມາໂນຖ ວາ ປຸນ.

໑໗໙໘. ມຄ຺ຄປ຺ປວຕ຺ຕິສນ຺ຕາເນ, ຠາວນາຕິ ປວຸຈ຺ຈຕິ;

ວຕ຺ຕມາເນນ ຕໍ ກິຈ຺ຈໍ, ນິປ຺ຜາທິຕມເສສໂຕ.

໑໗໙໙. ອິຕິ ຕີຓິປິ ສຈ຺ຈານິ, ກິຈ຺ຈໂຕ ປຏິວິຊ຺ຌຕິ;

ນິພ຺ພານໍ ສຈ຺ຉິກຸພ຺ພນ຺ໂຕ, ມຄ຺ໂຄ ເອກກ຺ຂເຓ ສຫ.

໑໘໐໐. ກິຈ຺ຈປ຺ປວຕ຺ຕິໂຕ ເຈຕ຺ຖ, ປຏິເວໂຘຕິ ວຸຈ຺ຈຕິ;

ຕຎ຺ຈ ສາເຘຕິ ມຄ຺ໂຄຍໍ, ນິຍ຺ຍນ຺ໂຕ ສນ຺ຕິໂຄຈໂຣ.

໑໘໐໑. ປຣິຈ຺ຈຊິຕ຺ວາ ສງ຺ຂາເຣ, ມຄ຺ຄສ຺ສາຣພ຺ຠ ນິພ຺ພຸຕິໍ,

ນິຍ຺ຍານເມວ ສຈ຺ເຈສຸ, ກິຈ຺ຈສາຘນມີຣິຕໍ.

໑໘໐໒. ມຄ຺ໂຄ ເອວ ຫິ ນິຍ຺ຍາຕິ, ເສສາ ຕສ຺ໂສປກາຣກາ;

ອປ຺ເປນ຺ຕາ ຌານຘມ຺ມາ ຈ, ພຸຊ຺ຌນ຺ຕາ ໂພຘິປກ຺ຂິຍາ.

໑໘໐໓. ຕສ຺ມາ ຕສ຺ເສວ ວຸຏ຺ຐານໍ, ປກາເສນ຺ຕິ ວິເສສໂຕ;

ຂນ຺ເຘຫິ ຈ ກິເລເສຫິ, ວິໂມກ຺ຂຕ຺ຕຍໂຕ ກຖໍ.

໑໘໐໔. ກຕ຺ວານາຠິນິເວສໍ ຕຸ, ຍຕ຺ຖ ຕຕ຺ຖ ຍຖາ ຕຖາ;

ຠູມິຘມ຺ມໍ ປຣິຄ຺ຄຍ຺ຫ, ວິປສ຺ສິຕ຺ວາ ຕໂຕ ປຣໍ.

໑໘໐໕. ຍໂຕ ກຸໂຕຈິ ວຸຏ຺ຐານໍ, ຍທິ ໂຫຕິ ອນິຈ຺ຈໂຕ;

ຫຸຕ຺ວາຘິໂມກ຺ຂພຫຸໂລ, ສທ຺ຘິນ຺ທ຺ຣິຍວິເສສໂຕ.

໑໘໐໖. ອນິມິຕ຺ຕວິໂມກ຺ເຂນ, ນິຍ຺ຍນ຺ໂຕ ສຕ຺ຕປຸຄ຺ຄໂລ;

ສທ຺ຘານຸສາຣີ ປຐເມ, ມຊ຺ເຌ ສທ຺ຘາວິມຸຕ຺ຕໂກ.

໑໘໐໗. ອນ຺ເຕ ປຎ຺ຎາວິມຸຕ຺ໂຕຕິ, ຕມີເຣນ຺ຕິ ຕຖາຄຕາ;

ສງ຺ຂາເຣ ທຸກ຺ຂໂຕ ທິສ຺ວາ, ວຸຏ຺ຐຫນ຺ໂຕ ສ ປຸຄ຺ຄໂລ.

໑໘໐໘. ປສ຺ສທ຺ຘິພຫຸໂລ ຫຸຕ຺ວາ, ສມາຘິນ຺ທ຺ຣິຍລາຠໂຕ;

ຕເຖວາປ຺ປຓິຫິເຕນ, ນິຍ຺ຍນ຺ໂຕ ຕິວິໂຘ ຠເວ.

໑໘໐໙. ອນຕ຺ຕໂຕ ວຸຏ຺ຐຫິຕ຺ວາ, ເວທພາຫຸລ຺ຍໂຍຄໂຕ;

ສຸຎ຺ຎເຕນາຖ ນິຍ຺ຍນ຺ໂຕ, ປຎ຺ຎິນ຺ທ຺ຣິຍວິເສສໂຕ.

໑໘໑໐. ຘມ຺ມານຸສາຣີ ປຐເມ, ທິຏ຺ຐິປ຺ປຕ຺ໂຕ ຕໂຕ ປຣໍ;

ອນ຺ເຕ ປຎ຺ຎາວິມຸຕ຺ໂຕຕິ, ຕມ຺ປິ ທີເປນ຺ຕິ ປຓ຺ຑິຕາ.

໑໘໑໑. ອາເນຎ຺ຊປາທກຊ຺ຌານ-ນາມກາຍວິເສສໂຕ;

ສຈ຺ຉິກຕ຺ວານ ນິພ຺ພານໍ, ມຊ຺ເຌ ຉ ກາຍສກ຺ຂິໂນ.

໑໘໑໒. ອຣູປໂຕ ຈ ມຄ຺ເຄນ, ອາເນຎ຺ເຊນ ຈ ຣູປໂຕ;

ວິມຸຕ຺ໂຕ ອຸຠໂຕຠາຄ-ວິມຸຕ຺ໂຕ ອຣຫາ ຠເວ.

໑໘໑໓. ຕິວິໂມກ຺ຂມຸຂີຠູຕາ, ອິຕິ ວຸຏ຺ຐານສາຘິກາ;

ສຕ຺ຕປຸຄ຺ຄລເຠທຎ຺ຈ, ສມ຺ປາເທຕິ ວິປສ຺ສນາ.

໑໘໑໔. ອຘິມຸຈ຺ຈຕິ ສທ຺ຘາ ຈ, ຍຖາວຕ຺ຖຸສຠາວໂຕ;

ເຎຍ຺ຍຘມ຺ເມສຸ ສພ຺ພຕ຺ຖ, ປຎ຺ຎາ ຈ ປຏິວິຊ຺ຌຕິ.

໑໘໑໕. ຕສ຺ມາ ສທ຺ຘາ ຈ ປຎ຺ຎາ ຈ, ວຕ຺ຖຸນິຈ຺ຉຍລກ຺ຂຓາ;

ວຕ຺ຖຸປ຺ປຕິຏ຺ຐິຕາ ຈາຍໍ, ຕິລກ຺ຂຓວິປສ຺ສນາ.

໑໘໑໖. ຕສ຺ມາ ສທ຺ຘາຘຸໂຣ ໂຍຄີ, ທິສ຺ໂວຬາຣິກລກ຺ຂຓໍ;

ຕໂຕ ປຣມນຕ຺ຕາຕິ, ສຸຂຸເມ ອຘິມຸຈ຺ຈຕິ.

໑໘໑໗. ຕສ຺ເສວມຘິມຸຕ຺ຕສ຺ສ, ສທ຺ຘາ ວາ ປນ ເກວລາ;

ສມາຘິນ຺ທ຺ຣິຍາຘິກາ ຈ, ວຸຏ຺ຐານຆຏິກາ ຠເວ.

໑໘໑໘. ຖູລລກ຺ຂຓໂມຫາຍ, ປຎ຺ຎາຘຸເຣ ວິປສ຺ສໂຕ;

ຘມ຺ມສຠາວມາຫຈ຺ຈ, ສຸຂຸມໍ ປຏິວິຊ຺ຌຕິ.

໑໘໑໙. ຕສ຺ມາ ສທ຺ຘາຘຸຣສ຺ເສວ, ວຸຏ຺ຐານທ຺ວຍມາທິໂຕ;

ອນ຺ເຕ ສທ຺ຘານຸຄຕສ຺ສ, ປຎ຺ຎາ ສຸປຣິປູຣຕິ.

໑໘໒໐. ປຎ຺ຎາຘຸຣສ຺ສ ເສສນ຺ຕິ, ເກຈິ ອາຈຣິຍາ ປນ;

ຘຸຣສໍສນ຺ທນໍ ນາມ, ວຸຏ຺ຐາເນສຸ ວິຠາວຍຸໍ.

໑໘໒໑. ສຕ຺ຕກ຺ຂຕ຺ຕຸປຣໂມ ຈ,

ໂກລໍໂກໂລ ຕຖາປໂຣ;

ເອກພີຊີຕິ ຕິວິໂຘ,

ໂສຕາປນ຺ໂນ ປວຸຈ຺ຈຕິ.

໑໘໒໒. ສກິໍເທວ ອິມໍ ໂລກໍ, ອາຄນ຺ຕ຺ວາ ປຸນ ປຸຄ຺ຄໂລ;

ສກທາຄາມິນາເມນ, ທຸຕິໂຍປິ ປກາສິໂຕ.

໑໘໒໓. ອນ຺ຕຣາປຣິນິພ຺ພາຍີ, ອຸປຫຈ຺ຈາປໂຣ ຕຖາ;

ອສງ຺ຂາຣໍ ສສງ຺ຂາຣໍ, ອຸທ຺ຘໍໂສໂຕຕິ ປຎ຺ຈຘາ.

໑໘໒໔. ອນາຄາມີ ຈ ຕຕິໂຍ, ຈຕຸຕ຺ໂຖ ອຣຫາຕິ ຈ;

ອິຕ຺ຖໍ ຜລຏ຺ຐາ ຈຕ຺ຕາໂຣ, ມຄ຺ຄຏ຺ຐາ ຈ ຕໂຕປເຣ.

໑໘໒໕. ຠາວນາປຣິຍາເຍນ, ປຏິເວຘານຸຣູປໂຕ;

ຈຕ຺ຕາໂຣ ຈ ຍຸຄາ ໂຫນ຺ຕິ, ອຏ຺ຐ ຈາຣິຍປຸຄ຺ຄລາ.

໑໘໒໖. ທິຏ຺ຐິກງ຺ຂາ ປຫີຍນ຺ຕິ, ອາທິມຄ຺ເຄນ ສພ຺ພຖາ;

ອປາຍຄມນີຍມ຺ປິ, ປາປມຎ຺ຎໍ ປຫີຍຕິ.

໑໘໒໗. ສກທາຄາມິມຄ຺ເຄນ, ຂີຍນ຺ໂຕຬາຣິກາ ຕຖາ;

ອນາຄາມິກມຄ຺ເຄນ, ກາມໂທສາວ ສພ຺ພຖາ.

໑໘໒໘. ອຣຫຕ຺ເຕນ ສພ຺ເພປິ, ກ຺ເລສາ ຂີຍນ຺ຕິ ສພ຺ພຖາ;

ກ຺ເລສຫານິ ຍຖາໂຍຄ-ມິຕິ ເຎຍ຺ຍາ ວິຠາວິນາ.

໑໘໒໙. ປຏິສມ຺ຠິທາ ຈຕສ຺ໂສ, ອຕ຺ເຖ ຘມ຺ເມ ນິຣຸຕ຺ຕິຍໍ;

ປຏິຠາເນ ຈ ຠາສນ຺ຕິ, ຎາຓໍ ເຠທຄຕໍ ພຸຘາ.

໑໘໓໐. ເຫຕຸປ຺ຜລຎ຺ຈ ນິພ຺ພານໍ, ຠາສິຕຕ຺ໂຖ ຕຖາປໂຣ;

ປາກາກ຺ຣິຍາຕິ ປຎ຺ເຈເຕ, ອຕ຺ຖນາເມນ ຠາສິຕາ.

໑໘໓໑. ເຫຕຸ ຈາຣິຍມຄ຺ໂຄ ຈ, ຠາສິຕຎ຺ຈ ຕຖາປຣໍ;

ກຸສລາກຸສລຎ຺ເຈຕິ, ປຎ຺ຈ ຘມ຺ໂມ ປກາສິໂຕ.

໑໘໓໒. ຕຕ຺ເຖວໍ ທສຘາ ເຠເທ, ອຕ຺ຖຘມ຺ເມ ຍຖາຣຫໍ;

ໂຍ ໂວຫາໂຣ ສຠາເວນ, ສາ ນິຣຸຕ຺ຕີຕິ ສມ຺ມຕາ.

໑໘໓໓. ຕໍຕໍໂຄຈຣກິຈ຺ຈາທິ-ເຠທຠິນ຺ນໍ ຕຫິໍ ຕຫິໍ;

ປວຕ຺ຕມານໍ ຍໍ ຎາຓໍ, ປຏິຠານໍ ຕມີຣິຕໍ.

໑໘໓໔. ປຸພ຺ພໂຍໂຄ ພາຫຸສ຺ສຈ຺ຈໍ,

ເທສຠາສາ ຕຖາຄໂມ;

ປຣິປຸຈ຺ຉາ ຈາຘິຄໂມ,

ນິສ຺ສໂຍ ມິຕ຺ຕສມ຺ປທາ.

໑໘໓໕. ອິຈ຺ຈູປນິສ຺ສຍໍ ລທ຺ຘາ, ຠິຊ຺ຊຕິ ປຏິສມ຺ຠິທາ;

ອເສກ຺ຂຠູມິຍໍ ວາຖ, ເສກ຺ຂຠູມິຍເມວ ວາ.

໑໘໓໖. ສຣສ຺ສໂຕ ອາຄມໂຕ, ຕຖາລມ຺ພຓໂຕປິ ຈ;

ນາມຸປ຺ປຕ຺ຕິໍ ປກາເສນ຺ຕິ, ຜລສ຺ສ ຕິວິຘໍ ພຸຘາ.

໑໘໓໗. ຕິຘາ ຕໂຕ ສມາປຕ຺ຕິ, ໂສຕາປຕ຺ຕິຜລາທິກາ;

ສຸຎ຺ຎຕາ ຈານິມິຕ຺ຕາ ຈ, ຕຖາປ຺ປຓິຫິຕາຕິ ຈ.

໑໘໓໘. ຕຎ຺ຈ ວຸຕ຺ຕນເຍເນວ, ສມາປຊ຺ຊິຕຸມິຈ຺ຉໂຕ;

ວິປສ຺ສນ຺ຕສ຺ສ ສງ຺ຂາເຣ, ຜລມປ຺ເປຕິ ອຕ຺ຕໂນ.

໑໘໓໙. ນິໂຣຘໍ ຕຸ ສມາປຕ຺ຕິໍ, ຣູປາຣູປສ຺ສ ລາຠໂກ;

ສມາປຊ຺ຊຕານາຄາມີ, ອຣຫາ ຈ ຍຖາ ຕຖາ.

໑໘໔໐. ຣູປາຣູປສມາປຕ຺ຕິໍ, ສມາປຊ຺ຊ ຍຖາກ຺ກມໍ;

ວຸຏ຺ຐຫິຕ຺ວາ ວິປສ຺ສນ຺ໂຕ, ຕຕ຺ຖ ຕຕ຺ເຖວ ສງ຺ຂເຕ.

໑໘໔໑. ຍຸຄນນ຺ຘໍ ປວຕ຺ເຕຕ຺ວາ, ສມຖຎ຺ຈ ວິປສ຺ສນໍ;

ຍາວາກິຎ຺ຈຎ຺ຎາຍຕນ-ມິຕ຺ຖໍ ປຕ຺ວາ ຕໂຕ ປຣໍ.

໑໘໔໒. ອຘິຏ຺ເຐຍ຺ຍມຘິຏ຺ຐາຍ, ກຕ຺ວາໂຠຄໍ ຍຖາຣຫໍ;

ມຄ຺ຄາຣູປສມາປຕ຺ຕິໍ, ສມາປຊ຺ຊຕິ ປຓ຺ຑິໂຕ.

໑໘໔໓. ຕໂຕ ນິໂຣຘໍ ຜຸສຕິ, ຈິຕ຺ຕຸປ຺ປາທທ຺ວຍາ ປຣໍ;

ຕສ຺ເສວໍ ມນສາຠາໂວ, ນິໂຣໂຘຕິ ປວຸຈ຺ຈຕິ.

໑໘໔໔. ຜລຈິຕ຺ຕສມຸປ຺ປາທາ, ວຸຏ຺ຐານໍ ຕສ຺ສ ທີປິຕໍ;

ຕໂຕ ຠວງ຺ຄໍ ເຉຕ຺ວານ, ປຈ຺ຈເວກ຺ຂຕິ ພຸທ຺ຘິມາ.

໑໘໔໕. ອິຈ຺ຈາເນກຄຸຓາຘາຣໍ, ປຎ຺ຎາຠາວນມຸຕ຺ຕມໍ;

ຠາເວຍ຺ຍ ມຕິມາ ໂຍຄີ, ປຕ຺ເຖນ຺ໂຕ ຫິຕມຕ຺ຕໂນ.

໑໘໔໖. ອິຕ຺ຖໍ ສຸສມ຺ປາທິຕສີລຈິຕ຺ຕ-

ປຎ຺ຎາວິສຸທ຺ຘີ ປຏິປາທຍນ຺ຕາ;

ປຕ຺ວານ ສມ຺ໂພຘິມເປຕໂສກາ,

ປາເລນ຺ຕິ ໂສຕ຺ຖິໍ ປຣມໍ ຈິຣາຍ.

໑໘໔໗. ເຕ ປຕ຺ຕິປຕ຺ຕາ ປຣມປ຺ປຕີຕາ,

ປກ຺ຂາລິຕກ຺ເລສມລາ ມເຫສີ;

ອຈ຺ຈນ຺ຕໂວທາຕຄຸໂຓທິຕຕ຺ຕາ,

ໂລກສ຺ສ ໂຫນ຺ຕຸຕ຺ຕມທກ຺ຂິເຓຍ຺ຍາ.

ອິຕິ ນາມຣູປປຣິຈ຺ເຉເທ ນິສ຺ສນ຺ທຜລວິຠາໂຄ ນາມ

ເຕຣສໂມ ປຣິຈ຺ເຉໂທ.

ນິຏ຺ຐິໂຕ ຈ ສພ຺ພຖາປິ ວິປສ຺ສນາວິຠາໂຄ.

ນິຄມນກຖາ

໑໘໔໘. ເອຕ຺ຕາວຕາ ປຏິຎ຺ຎາໂຕ, ປວກ຺ຂາມີຕິ ອາທິໂຕ;

ນາມຣູປປຣິຈ຺ເຉໂທ, ປຣິນິຏ຺ຐາປິໂຕ ມຍາ.

໑໘໔໙. ເຕຣເສວ ປຣິຈ຺ເຉທາ, ວິຠຕ຺ຕາ ສຕ຺ຕ ສາຘິກາ;

ນາມຣູປປຣິຈ຺ເຉເທ, ຠາຓວາຣາ ປກາສິຕາ.

໑໘໕໐. ອຠິຘມ຺ມປຣມຕ຺ຖາ, ສມໂຖ ຈ ວິປສ຺ສນາ;

ວິສຸໍ ວິສຸໍ ວິຠຕ຺ຕາຕິ, ວິຠາເຄຕ຺ຖ ຕິຘາ ມຕາ.

໑໘໕໑. ໂສຍໍ ວິຊ຺ຊາວິໂມກ຺ຂາ ຈ, ຫທເຍສຸ ວິຠາວິນໍ;

ວລ຺ລຠຕ຺ຕມຘິຏ຺ຐາຍ, ສາສເນຕ຺ຖ ຄເວສິນໍ.

໑໘໕໒. ມໂນຄຕຕມຸທ຺ຘໍສີ, ຣວິຣໍສີວ ປຓ຺ຑິໂຕ;

ທສ຺ເສຕຸ ຈິຣມາໂລກໍ, ສທ຺ຘມ຺ມຣຕນາລເຍ.

໑໘໕໓. ປຓ຺ຑິຈ຺ຈໍ ປຣມຕ຺ເຖສຸ, ປາຏວໍ ປຏິປຕ຺ຕິຍໍ;

ປຕ຺ຖຍນ຺ເຕນ ຠິກ຺ຂູນ-ມິຕ຺ຖໍ ສຸຄຕສາສເນ.

໑໘໕໔. ນາມຣູປປຣິຈ຺ເຉທ-ມສໍກິຓ຺ຓມນາກຸລໍ;

ກຸພ຺ພຕາ ຫິຕກາເມນ, ສຸກເຕນ ກເຕນ ເມ.

໑໘໕໕. ມຫາເມຣຸນິຠໍ ເຄຫໍ, ມຫາເຈຕິຍຠູສິຕໍ;

ມຫາວິຫາຣມາຣຸຬ຺ຫ-ມຫາໂພຘິມຫຸສ຺ສວໍ.

໑໘໕໖. ອລງ຺ກາຕຸໍ ປໂຫນ຺ຕາລໍ, ຈິຣກາລໍ ຕໂປຘນາ;

ລງ຺ກາທີປສ຺ສລງ຺ກາຣໍ, ກລງ຺ກາປຄຕາລຍໍ.

໑໘໕໗. ນາມຣູປປຣິຈ຺ເຉໂທ,

ອນ຺ຕຣາຍໍ ວິນາ ຍຖາ;

ນິຏ຺ຐິໂຕຍໍ ຕຖາ ໂລເກ,

ນິຏ຺ຐນ຺ຕຊ຺ຌາສຍາ ສຸຠາ.

ອິຕິ ອນຸຣຸທ຺ຘາຈຣິເຍນ ວິຣຈິຕໍ

ນາມຣູປປຣິຈ຺ເຉທປກຣຓໍ ນິຏ຺ຐິຕໍ.