ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ອຠິຘມ຺ມາວຕາໂຣ

ຄນ຺ຖາຣມ຺ຠກຖາ

໑. ອນນ຺ຕກຣຸຓາປຎ຺ຎໍ, ຕຖາຄຕມນຸຕ຺ຕຣໍ;

ວນ຺ທິຕ຺ວາ ສິຣສາ ພຸທ຺ຘໍ, ຘມ຺ມໍ ສາຘຸຄຓມ຺ປິ ຈ.

໒. ປຓ຺ຑຸກມ຺ພລນາມາຍ, ສິລາຍາຕຸລວິກ຺ກໂມ;

ນິສິນ຺ໂນ ເທວຣາຊສ຺ສ, ວິມເລ ສີຕເລ ຕເລ.

໓. ຍໍ ເທວເທໂວ ເທວານໍ, ເທວເທເວຫິ ປູຊິໂຕ;

ເທເສສິ ເທວໂລກສ຺ມິໍ, ຘມ຺ມໍ ເທວປຸຣກ຺ຂໂຕ.

໔. ຕຕ຺ຖາຫໍ ປາຏວຕ຺ຖາຍ, ຠິກ຺ຂູນໍ ປິຏກຸຕ຺ຕເມ;

ອຠິຘມ຺ມາວຕາຣນ຺ຕຸ, ມຘຸຣໍ ມຕິວຑ຺ຒນໍ.

໕. ຕາຬໍ ໂມຫກວາຏສ຺ສ, ວິຆາຏນມນຸຕ຺ຕຣໍ;

ຠິກ຺ຂູນໍ ປວິສນ຺ຕານໍ, ອຠິຘມ຺ມມຫາປຸຣໍ.

໖. ສຸທຸຕ຺ຕຣໍ ຕຣນ຺ຕານໍ, ອຠິຘມ຺ມມໂຫທຘິໍ;

ສຸທຸຕ຺ຕຣໍ ຕຣນ຺ຕານໍ, ຕຣໍວ ມກຣາກຣໍ.

໗. ອາຠິຘມ຺ມິກຠິກ຺ຂູນໍ, ຫຕ຺ຖສາຣມນຸຕ຺ຕຣໍ;

ປວກ຺ຂາມິ ສມາເສນ, ຕໍ ສຸຓາຖ ສມາຫິຕາ.

໑. ປຐໂມ ປຣິຈ຺ເຉໂທ

ຈິຕ຺ຕນິທ຺ເທໂສ

໘. ຈິຕ຺ຕໍ ເຈຕສິກໍ ຣູປໍ, ນິພ຺ພານນ຺ຕິ ນິຣຸຕ຺ຕໂຣ;

ຈຕຸຘາ ເທສຍີ ຘມ຺ເມ, ຈຕຸສຈ຺ຈປ຺ປກາສໂນ.

ຕຕ຺ຖ ຈິຕ຺ຕນ຺ຕິ ວິສຍວິຊານນໍ ຈິຕ຺ຕໍ, ຕສ຺ສ ປນ ໂກ ວຈນຕ຺ໂຖ? ວຸຈ຺ຈເຕ – ສພ຺ພສງ຺ຄາຫກວເສນ ປນ ຈິນ຺ເຕຕີຕິ ຈິຕ຺ຕໍ, ອຕ຺ຕສນ຺ຕານໍ ວາ ຈິໂນຕີຕິປິ ຈິຕ຺ຕໍ.

໙. ວິຈິຕ຺ຕກຣຓາ ຈິຕ຺ຕໍ, ອຕ຺ຕໂນ ຈິຕ຺ຕຕາຍ ວາ;

ປຎ຺ຎຕ຺ຕິຍມ຺ປິ ວິຎ຺ຎາເຓ, ວິຈິຕ຺ເຕ ຈິຕ຺ຕກມ຺ມເກ;

ຈິຕ຺ຕສມ຺ມຸຕິ ທຏ຺ຐພ຺ພາ, ວິຎ຺ຎາເຓ ອິຘ ວິຎ຺ຎຸນາ.

ຕໍ ປນ ສາຣມ຺ມຓໂຕ ເອກວິຘໍ, ສວິປາກາວິປາກໂຕ ທຸວິຘໍ. ຕຕ຺ຖ ສວິປາກໍ ນາມ ກຸສລາກຸສລໍ, ອວິປາກໍ ອພ຺ຍາກຕໍ. ກຸສລາກຸສລາພ຺ຍາກຕຊາຕິເຠທໂຕ ຕິວິຘໍ.

ຕຕ຺ຖ ກຸສລນ຺ຕິ ປເນຕສ຺ສ ໂກ ວຈນຕ຺ໂຖ?

໑໐. ກຸຈ຺ຉິຕານໍ ສລນໂຕ, ກຸສານໍ ລວເນນ ວາ;

ກຸເສນ ລາຕພ຺ພຕ຺ຕາ ວາ, ກຸສລນ຺ຕິ ປວຸຈ຺ຈຕິ.

໑໑. ເຉເກ ກຸສລສທ຺ໂທຍໍ, ອາໂຣຄ຺ເຍ ອນວຊ຺ຊເກ;

ທິຏ຺ໂຐ ອິຏ຺ຐວິປາເກປິ, ອນວຊ຺ຊາທິເກ ອິຘ.

ຕສ຺ມາ ອນວຊ຺ຊອິຏ຺ຐວິປາກລກ຺ຂຓໍ ກຸສລໍ, ອກຸສລວິທ຺ຘໍສນຣສໍ, ໂວທານປຈ຺ຈຸປຏ຺ຐານໍ. ວຊ຺ຊປຏິປກ຺ຂຕ຺ຕາ ອນວຊ຺ຊລກ຺ຂຓໍ ວາ ກຸສລໍ, ໂວທານຠາວຣສໍ, ອິຏ຺ຐວິປາກປຈ຺ຈຸປຏ຺ຐານໍ, ໂຍນິໂສມນສິກາຣປທຏ຺ຐານໍ. ສາວຊ຺ຊານິຏ຺ຐວິປາກລກ຺ຂຓມກຸສລໍ. ຕທຸຠຍວິປຣີຕລກ຺ຂຓມພ຺ຍາກຕໍ, ອວິປາກາຣຫໍ ວາ.

ຕຕ຺ຖ ກຸສລຈິຕ຺ຕໍ ເອກວີສຕິວິຘໍ ໂຫຕິ, ຕທິທໍ ຠູມິໂຕ ຈຕຸພ຺ພິຘໍ ໂຫຕິ – ກາມາວຈຣໍ, ຣູປາວຈຣໍ, ອຣູປາວຈຣໍ, ໂລກຸຕ຺ຕຣຎ຺ເຈຕິ.

ຕຕ຺ຖ ກາມາວຈຣກຸສລຈິຕ຺ຕໍ ຠູມິໂຕ ເອກວິຘໍ, ສວຕ຺ຖຸກາວຕ຺ຖຸກເຠທໂຕ ທຸວິຘໍ, ຫີນມຊ຺ຌິມປຓີຕເຠທໂຕ ຕິວິຘໍ, ໂສມນສ຺ສຸເປກ຺ຂາຎາຓປ຺ປໂຍຄເຠທໂຕ ອຏ຺ຐວິຘໍ ໂຫຕິ. ເສຍ຺ຍຖິທໍ – ໂສມນສ຺ສສຫຄຕໍ ຎາຓສມ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກໍ, ໂສມນສ຺ສສຫຄຕໍ ຎາຓວິປ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກໍ, ອຸເປກ຺ຂາສຫຄຕໍ ຎາຓສມ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກໍ, ອຸເປກ຺ຂາສຫຄຕໍ ຎາຓວິປ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກນ຺ຕິ ອິທໍ ອຏ຺ຐວິຘມ຺ປິ ກາມາວຈຣກຸສລຈິຕ຺ຕໍ ນາມ.

໑໒. ອຸທ຺ທານໂຕ ທຸເວ ກາມາ, ກ຺ເລສວຕ຺ຖຸວສາ ປນ;

ກິເລໂສ ຉນ຺ທຣາໂຄວ, ວຕ຺ຖຸ ເຕຠູມວຏ຺ຏກໍ.

໑໓. ກິເລສກາໂມ ກາເມຕິ, ວຕ຺ຖຸ ກາມີຍຕີຕິ ຈ;

ສິຊ຺ຌຕິ ທຸວິໂຘເປສ, ກາໂມ ໂວ ກາຣກທ຺ວເຍ.

໑໔. ຍສ຺ມິໍ ປນ ປເທເສ ໂສ, ກາໂມຍໍ ທຸວິໂຘປິ ຈ;

ສມ຺ປຕ຺ຕີນໍ ວເສນາວ-ຈຣຕີຕິ ຈ ໂສ ປນ.

໑໕. ປເທໂສ ຈຕຸປາຍານໍ, ຉນ຺ນໍ ເທວານເມວ ຈ;

ມນຸສ຺ສານໍ ວເສເນວ, ເອກາທສວິໂຘ ປນ.

໑໖. ກາໂມວຈຣຕີເຕຕ຺ຖ, ກາມາວຈຣສຎ຺ຎິໂຕ;

ອສ຺ສາຠິລກ຺ຂິຕຕ຺ຕາ ຫິ, ສສຕ຺ຖາວຈໂຣ ວິຍ.

໑໗. ສ຺ວາຍໍ ຣູປຠໂວ ຣູປໍ, ເອວໍ ກາໂມຕິ ສຎ຺ຎິໂຕ;

ອຸຕ຺ຕຣສ຺ສ ປທສ຺ເສວ, ໂລປໍ ກຕ຺ວາ ອຸທີຣິໂຕ.

໑໘. ຕສ຺ມິໍ ກາເມ ອິທໍ ຈິຕ຺ຕໍ, ສທາວຈຣຕີຕິ ຈ;

ກາມາວຈຣມິຈ຺ເຈວໍ, ກຖິຕໍ ກາມຆາຕິນາ.

໑໙. ປຏິສນ຺ຘິໍ ຠເວ ກາເມ, ອວຈາຣຍຕີຕິ ວາ;

ກາມາວຈຣມິຈ຺ເຈວໍ, ປຣິຍາປນ຺ນນ຺ຕິ ຕຕ຺ຣ ວາ.

໒໐. ອິທໍ ອຏ຺ຐວິຘໍ ຈິຕ຺ຕໍ, ກາມາວຈຣສຎ຺ຎິຕໍ;

ທສປຸຎ຺ຎກ຺ຣິຍວຕ຺ຖຸ-ວເສເນວ ປວຕ຺ຕຕິ.

໒໑. ທານໍ ສີລໍ ຠາວນາ ປຕ຺ຕິທານໍ,

ເວຍ຺ຍາວຈ຺ຈໍ ເທສນາ ຈານຸໂມໂທ;

ທິຏ຺ຐິຊ຺ຊຸຕ຺ຕໍ ສໍສຸຕິຈ຺ຈາປຈາໂຍ,

ເຎຍ຺ໂຍ ເອວໍ ປຸຎ຺ຎວຕ຺ຖຸປ຺ປເຠໂທ.

໒໒. ຄຈ຺ຉນ຺ຕິ ສງ຺ຄຫໍ ທາເນ, ປຕ຺ຕິທານານຸໂມທນາ;

ຕຖາ ສີລມເຍ ປຸຎ຺ເຎ, ເວຍ຺ຍາວຈ຺ຈາປຈາຍນາ.

໒໓. ເທສນາ ສວນໍ ທິຏ຺ຐິ-ອຸຊຸກາ ຠາວນາມເຍ;

ປຸນ ຕີເຓວ ສມ຺ໂຠນ຺ຕິ, ທສ ປຸຎ຺ຎກ຺ຣິຍາປິ ຈ.

໒໔. ສພ຺ພານຸສ຺ສຕິປຸຎ຺ຎຎ຺ຈ, ປສໍສາ ສຣຓຕ຺ຕຍໍ;

ຍນ຺ຕິ ທິຏ຺ຐິຊຸກມ຺ມສ຺ມິໍ, ສງ຺ຄຫໍ ນຕ຺ຖິ ສໍສໂຍ.

໒໕. ປຸຣິມາ ມຸຎ຺ຈນາ ເຈວ, ປຣາ ຕິສ຺ໂສປິ ເຈຕນາ;

ໂຫຕິ ທານມຍໍ ປຸຎ຺ຎໍ, ເອວໍ ເສເສສຸ ທີປເຍ.

ອິທານິ ອສ຺ສ ປນຏ຺ຐວິຘສ຺ສາປິ ກາມາວຈຣກຸສລຈິຕ຺ຕສ຺ສ ອຍມຸປ຺ປຕ຺ຕິກ຺ກໂມ ເວທິຕພ຺ໂພ. ຍທາ ຫິ ໂຍ ເທຍ຺ຍຘມ຺ມປ຺ປຏິຄ຺ຄາຫກາທິສມ຺ປຕ຺ຕິໍ, ອຎ຺ຎໍ ວາ ໂສມນສ຺ສເຫຕຸໍ ອາຄມ຺ມ ຫຏ຺ຐປຫຏ຺ໂຐ ‘‘ອຕ຺ຖິ ທິນ຺ນ’’ນ຺ຕິ ອາທິນຍປ຺ປວຕ຺ຕໍ ສມ຺ມາທິຏ຺ຐິໍ ປຸຣກ຺ຂຕ຺ວາ ປເຣຫິ ອນຸສ຺ສາຫິໂຕ ທານາທີນິ ປຸຎ຺ຎານິ ກໂຣຕິ, ຕທາສ຺ສ ໂສມນສ຺ສສຫຄຕໍ ຎາຓສມ຺ປຍຸຕ຺ຕໍ ອສງ຺ຂາຣິກໍ ປຐມໍ ມຫາກຸສລຈິຕ຺ຕໍ ອຸປ຺ປຊ຺ຊຕິ. ຍທາ ປນ ວຸຕ຺ຕນເຍເນວ ຫຏ຺ຐປຫຏ຺ໂຐ ສມ຺ມາທິຏ຺ຐິໍ ປຸຣກ຺ຂຕ຺ວາ ປເຣຫິ ອຸສ຺ສາຫິໂຕ ກໂຣຕິ, ຕທາສ຺ສ ຕເມວ ຈິຕ຺ຕໍ ສສງ຺ຂາຣິກໍ ໂຫຕິ. ອິມສ຺ມິໍ ປນຕ຺ເຖ ສງ຺ຂາໂຣຕິ ອຕ຺ຕໂນ ວາ ປຣສ຺ສ ວາ ປວຕ຺ຕສ຺ສ ປຸພ຺ພປ຺ປໂຍຄສ຺ສາຘິວຈນໍ. ຍທາ ປນ ຎາຕິຊນສ຺ສ ປຏິປຕ຺ຕິທສ຺ສເນນ ຊາຕປຣິຈຍາ ພາລກາ ຠິກ຺ຂູ ທິສ຺ວາ ໂສມນສ຺ສຊາຕາ ສຫສາ ຍໍ ກິຎ຺ຈິ ຫຕ຺ຖຄຕໍ ທທນ຺ຕິ ວາ ວນ຺ທນ຺ຕິ ວາ, ຕທາ ເຕສໍ ຕຕິຍຈິຕ຺ຕມຸປ຺ປຊ຺ຊຕິ. ຍທາ ປນ ເຕ ‘‘ເທຖ ວນ຺ທຖ, ອຍ຺ເຍ’’ຕິ ວທນ຺ຕິ, ເອວໍ ຎາຕິຊເນນ ອຸສ຺ສາຫິຕາ ຫຸຕ຺ວາ ຫຕ຺ຖຄຕໍ ທທນ຺ຕິ ວາ ວນ຺ທນ຺ຕິ ວາ, ຕທາ ເຕສໍ ຈຕຸຕ຺ຖຈິຕ຺ຕມຸປ຺ປຊ຺ຊຕິ. ຍທາ ປນ ເທຍ຺ຍຘມ຺ມປ຺ປຏິຄ຺ຄາຫກາທີນໍ ອສມ຺ປຕ຺ຕິໍ ວາ ອຎ຺ເຎສໍ ວາ ໂສມນສ຺ສເຫຕູນໍ ອຠາວໍ ອາຄມ຺ມ ຈຕູສຸປິ ວິກປ຺ເປສຸ ໂສມນສ຺ສຣຫິຕາ ໂຫນ຺ຕິ, ຕທາ ເສສານິ ຈຕ຺ຕາຣິ ອຸເປກ຺ຂາສຫຄຕານິ ອຸປ຺ປຊ຺ຊນ຺ຕິ. ເອວໍ ໂສມນສ຺ສຸເປກ຺ຂາຎາຓປ຺ປໂຍຄເຠທໂຕ ອຏ຺ຐວິຘໍ ກາມາວຈຣກຸສລຈິຕ຺ຕໍ ເວທິຕພ຺ພໍ.

໒໖. ທສປຸຎ຺ຎກ຺ຣິຍາທີນໍ, ວເສນ ຈ ພຫູນິປິ;

ເອຕານິ ປນ ຈິຕ຺ຕານິ, ຠວນ຺ຕີຕິ ປກາສເຍ.

໒໗. ສຕ຺ຕຣສ ສຫສ຺ສານິ, ທ຺ເວ ສຕານິ ອສີຕິ ຈ;

ກາມາວຈຣປຸຎ຺ຎານິ, ຠວນ຺ຕີຕິ ວິນິທ຺ທິເສ.

ຕໍ ປນ ຍຖານຸຣູປໍ ກາມາວຈຣສຸຄຕິຍໍ ຠວໂຠຄສມ຺ປຕ຺ຕິໍ ອຠິນິປ຺ຜາເທຕິ.

ອິຕເຣສຸ ປນ ຣູປາວຈຣກຸສລຈິຕ຺ຕໍ ສວຕ຺ຖຸກໂຕ ເອກວິຘໍ, ທ຺ວີສຸ ຠເວສຸ ອຸປ຺ປຊ຺ຊນໂຕ ທຸວິຘໍ, ຫີນມຊ຺ຌິມປຓີຕເຠທໂຕ ຕິວິຘໍ, ປຏິປທາທິເຠທໂຕ ຈຕຸພ຺ພິຘໍ, ຌານງ຺ຄໂຍຄເຠທໂຕ ປຎ຺ຈວິຘໍ. ເສຍ຺ຍຖິທໍ – ກາມຈ຺ຉນ຺ທພ຺ຍາປາທຖິນມິທ຺ຘອຸທ຺ຘຈ຺ຈກຸກ຺ກຸຈ຺ຈວິຈິກິຈ຺ຉາວິປ຺ປຫີນໍ ວິຕກ຺ກວິຈາຣປີຕິສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ປຐມໍ, ວິຕກ຺ກວິປ຺ປຫີນໍ ວິຈາຣປີຕິສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ທຸຕິຍໍ, ວິຕກ຺ກວິຈາຣວິປ຺ປຫີນໍ ປີຕິສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ຕຕິຍໍ, ວິຕກ຺ກວິຈາຣປີຕິວິປ຺ປຫີນໍ ສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ຈຕຸຕ຺ຖໍ, ວິຕກ຺ກວິຈາຣປີຕິສຸຂວິປ຺ປຫີນໍ ອຸເປກ຺ຂາຈິຕ຺ເຕກຄ຺ຄຕາສມ຺ປຍຸຕ຺ຕໍ ປຎ຺ຈມນ຺ຕິ ອິທໍ ປຎ຺ຈວິຘໍ ຣູປາວຈຣກຸສລຈິຕ຺ຕໍ ນາມ.

ຕໍ ປນ ຍຖາສມ຺ຠວໍ ປຖວີກສິຓາທີສຸ ອາຣມ຺ມເຓສຸ ປວຕ຺ຕິວເສນ ອເນກວິຘໍ ໂຫຕິ. ສພ຺ພໍ ປເນຕໍ ຣູປາວຈຣຠາວນາປຸຎ຺ຎວສປ຺ປວຕ຺ຕໍ ຍຖານຸຣູປໍ ຣູປາວຈຣູປປຕ຺ຕິນິປ຺ຜາທກໍ ໂຫຕິ. ເອວໍ ຕາວ ຣູປາວຈຣກຸສລໍ ເວທິຕພ຺ພໍ.

ເສເສສຸ ປນ ທ຺ວີສຸ ອຣູປາວຈຣກຸສລຈິຕ຺ຕໍ ຕາວ ອຸເປກ຺ຂາເວທນາໂຍຄເຠທໂຕ ເອກວິຘໍ, ສວຕ຺ຖຸກາວຕ຺ຖຸກເຠທໂຕ ທຸວິຘໍ, ຫີນມຊ຺ຌິມປຓີຕເຠທໂຕ ຕິວິຘໍ, ອາຣມ຺ມຓເຠທໂຕ ຈຕຸພ຺ພິຘໍ. ກສິຓຸຄ຺ຆາຏິມາກາສໍ, ຕຕ຺ຖ ປວຕ຺ຕວິຎ຺ຎາຓໍ, ຕສ຺ສ ອປຄໂມ, ອາກິຎ຺ຈຎ຺ຎາຍຕນນ຺ຕິ ອິທມສ຺ສ ຈຕຸພ຺ພິຘມາຣມ຺ມຓໍ. ຍຖາປຏິປາຏິຍາ ເອຕສ຺ສາຣມ຺ມຓສ຺ສ ເຠທໂຕ ຈຕຸພ຺ພິຘໍ ໂຫຕິ. ເສຍ຺ຍຖິທໍ – ສພ຺ພໂສ ຣູປສຎ຺ຎານໍ ສມຕິກ຺ກມາ ປຏິຆສຎ຺ຎານໍ ອຕ຺ຖງ຺ຄມາ ນານຕ຺ຕສຎ຺ຎານໍ ອມນສິກາຣາ ອາກາສານຎ຺ຈາຍຕນສຎ຺ຎາສຫຄຕໍ, ວິຎ຺ຎາຓຎ຺ຈາຍຕນສຎ຺ຎາສຫຄຕໍ, ອາກິຎ຺ຈຎ຺ຎາຍຕນສຎ຺ຎາສຫຄຕໍ, ເນວສຎ຺ຎານາສຎ຺ຎາຍຕນສຎ຺ຎາສຫຄຕນ຺ຕິ ອິທໍ ຈຕຸພ຺ພິຘໍ ອຣູປາວຈຣກຸສລຈິຕ຺ຕໍ ນາມ. ສພ຺ພໍ ປເນຕໍ ອຣູປາວຈຣຠາວນາປຸຎ຺ຎວສປ຺ປວຕ຺ຕໍ ຍຖານຸຣູປໍ ອຣູປູປປຕ຺ຕິນິປ຺ຜາທກໍ ໂຫຕິ. ເອວໍ ອຣູປາວຈຣກຸສລຈິຕ຺ຕໍ ເວທິຕພ຺ພໍ.

ອິຕຣໍ ປນ ໂລກຸຕ຺ຕຣກຸສລຈິຕ຺ຕໍ ນິພ຺ພານາຣມ຺ມຓໂຕ ເອກວິຘໍ, ນິຍຕານິຍຕວຕ຺ຖຸກເຠທໂຕ ທຸວິຘໍ, ຕີຫິ ວິໂມກ຺ຂມຸເຂຫິ ປຕ຺ຕພ຺ພໂຕ ຕິວິຘໍ, ຈຕຸມຄ຺ຄໂຍຄເຠທໂຕ ຈຕຸພ຺ພິຘໍ. ເສຍ຺ຍຖິທໍ – ສກ຺ກາຍທິຏ຺ຐິວິຈິກິຈ຺ຉາສີລພ຺ພຕປຣາມາສສຎ຺ໂຎຊນປ຺ປຫານກຣໍ ໂສຕາປຕ຺ຕິມຄ຺ຄຈິຕ຺ຕໍ, ຣາຄໂທສໂມຫານໍ ຕນຸຕ຺ຕກຣໍ ສກທາຄາມິມຄ຺ຄຈິຕ຺ຕໍ, ກາມຣາຄພ຺ຍາປາທານໍ ນິຣວເສສປ຺ປຫານກຣໍ ອນາຄາມິມຄ຺ຄຈິຕ຺ຕໍ, ຣູປຣາຄອຣູປຣາຄມານອຸທ຺ຘຈ຺ຈອວິຊ຺ຊາປຫານກຣໍ ອຣຫຕ຺ຕມຄ຺ຄຈິຕ຺ຕນ຺ຕິ ອິທໍ ຈຕຸພ຺ພິຘໍ ໂລກຸຕ຺ຕຣກຸສລຈິຕ຺ຕໍ ນາມ. ເອເກກໍ ປເນຕ຺ຖ ຌານງ຺ຄໂຍຄເຠທໂຕ ປຎ຺ຈວິຘໍ ໂຫຕິ, ຕສ຺ມາ ວີສຕິວິຘໍ ໂຫຕິ. ສພ຺ພໍ ປເນຕໍ ໂລກຸຕ຺ຕຣຠາວນາປຸຎ຺ຎວສປ຺ປວຕ຺ຕໍ ມຄ຺ຄານຸຣູປຜລປ຺ປວຕ຺ຕິຍາ ຈຕ຺ຕາໂຣ ອຣິຍປຸຄ຺ຄເລ ອຠິນິປ຺ຜາເທຕິ. ເອວໍ ໂລກຸຕ຺ຕຣກຸສລໍ ເວທິຕພ຺ພໍ.

໒໘. ກາເມ ອຏ຺ເຐວ ຣູເປ ຈ, ປຎ຺ຈ ຈຕ຺ຕາຣິຣູປິສຸ;

ຈຕ຺ຕາຣານຸຕ຺ຕຣາເນວໍ, ກຸສລາເນກວີສຕິ.

໒໙. ກຸສລາກຸສລາປຄເຕນ ສຕາ,

ກຸສເລ ກຸສເລນ ຈ ຍໍ ກຸສລໍ;

ຈຕຸຠູມິຄຕໍ ມຸນິນາ ວສິນາ,

ລປິຕໍ ລປິຕໍ ສກລມ຺ປິ ມຍາ.

ອກຸສລໍ ປນ ຠູມິໂຕ ເອກວິຘໍ ກາມາວຈຣເມວ, ນິຍຕານິຍຕວຕ຺ຖຸວເສນ ຈ ເອກເຫຕຸກທຸເຫຕຸກວເສນ ຈ ປຏິສນ຺ຘິຊນກາຊນກວເສນ ຈ ທຸວິຘໍ, ຕີຫິ ເວທນາຫິ ໂຍຄໂຕ ຈ ໂລຠມູລໍ ໂທສມູລໍ ໂມຫມູລນ຺ຕິ ມູລໂຕ ຈ ຕິວິຘໍ ໂຫຕິ. ຕຕ຺ຖ ໂລຠມູລໍ ປນ ໂສມນສ຺ສຸເປກ຺ຂາທິຏ຺ຐິປ຺ປໂຍຄເຠທໂຕ ອຏ຺ຐວິຘໍ ໂຫຕິ. ເສຍ຺ຍຖິທໍ – ໂສມນສ຺ສສຫຄຕໍ ທິຏ຺ຐິຄຕສມ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກໍ, ໂສມນສ຺ສສຫຄຕໍ ທິຏ຺ຐິຄຕວິປ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກໍ, ອຸເປກ຺ຂາສຫຄຕໍ ທິຏ຺ຐິຄຕສມ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກໍ, ອຸເປກ຺ຂາສຫຄຕໍ ທິຏ຺ຐິຄຕວິປ຺ປຍຸຕ຺ຕໍ ອສງ຺ຂາຣິກເມກໍ, ສສງ຺ຂາຣິກເມກນ຺ຕິ.

ຍທາ ຫິ ‘‘ນຕ຺ຖິ ກາເມສຸ ອາທີນໂວ’’ຕິອາທິນາ ນເຍນ ມິຈ຺ຉາທິຏ຺ຐິໍ ປຸຣກ຺ຂຕ຺ວາ ເກວລໍ ຫຏ຺ຐຕຸຏ຺ໂຐ ກາເມ ວາ ປຣິຠຸຎ຺ຊຕິ, ທິຏ຺ຐມງ຺ຄລາທີນິ ວາ ສາຣໂຕ ປຈ຺ເຈຕິ ສຠາວຕິກ຺ເຂເນວ ອນຸສ຺ສາຫິເຕນ ຈິຕ຺ເຕນ, ຕທາສ຺ສ ປຐມໍ ອກຸສລຈິຕ຺ຕໍ ອຸປ຺ປຊ຺ຊຕິ. ຍທາ ປນ ມນ຺ເທນ ສມຸສ຺ສາຫິເຕນ, ຕທາ ທຸຕິຍໍ. ຍທາ ມິຈ຺ຉາທິຏ຺ຐິໍ ອປຸຣກ຺ຂຕ຺ວາ ເກວລໍ ຫຏ຺ຐຕຸຏ຺ໂຐ ເມຖຸນໍ ຘມ຺ມໍ ວາ ປຣິຠຸຎ຺ຊຕິ, ປຣສມ຺ປຕ຺ຕິໍ ວາ ອຠິຊ຺ຌາຍຕິ, ປຣສ຺ສ ຠຓ຺ຑໍ ວາ ຫຣຕິ ສຠາວຕິກ຺ເຂເນວ ອນຸສ຺ສາຫິເຕນ ຈິຕ຺ເຕນ, ຕທາ ຕຕິຍໍ. ຍທາ ມນ຺ເທນ ສມຸສ຺ສາຫິເຕນ, ຕທາ ຈຕຸຕ຺ຖໍ ອຸປ຺ປຊ຺ຊຕິ. ຍທາ ປນ ກາມານໍ ວາ ອສມ຺ປຕ຺ຕິໍ ອາຄມ຺ມ ອຎ຺ເຎສໍ ວາ ໂສມນສ຺ສເຫຕູນໍ ອຠາເວນ ຈຕູສຸປິ ວິກປ຺ເປສຸ ໂສມນສ຺ສຣຫິຕາ ໂຫນ຺ຕິ, ຕທາ ເສສານິ ຈຕ຺ຕາຣິ ອຸເປກ຺ຂາສຫຄຕານິ ອຸປ຺ປຊ຺ຊນ຺ຕີຕິ. ເອວໍ ໂສມນສ຺ສຸເປກ຺ຂາທິຏ຺ຐິປ຺ປໂຍຄເຠທໂຕ ອຏ຺ຐວິຘໍ ໂລຠມູລໍ ເວທິຕພ຺ພໍ.

ໂທສມູລໍ ປນ ເອກນ຺ຕສວຕ຺ຖຸກໂຕ ເອກວິຘໍ, ອສງ຺ຂາຣສສງ຺ຂາຣເຠທໂຕ ທຸວິຘໍ ໂທມນສ຺ສສຫຄຕໍ ປຏິຆສມ຺ປຍຸຕ຺ຕໍ ອສງ຺ຂາຣໍ, ສສງ຺ຂາຣນ຺ຕິ. ອສ຺ສ ປນ ປາຓາຕິປາຕາທີສຸ ຕິກ຺ຂມນ຺ທປ຺ປວຕ຺ຕິກາເລ ອຸປ຺ປຕ຺ຕິ ເວທິຕພ຺ພາ.

ໂມຫມູລມ຺ປິ ວິຈິກິຈ຺ຉຸທ຺ຘຈ຺ຈໂຍຄໂຕ ທຸວິຘໍ ໂຫຕິ ອຸເປກ຺ຂາສຫຄຕໍ ວິຈິກິຈ຺ຉາສມ຺ປຍຸຕ຺ຕໍ, ອຸເປກ຺ຂາສຫຄຕໍ ອຸທ຺ຘຈ຺ຈສມ຺ປຍຸຕ຺ຕນ຺ຕິ. ຕສ຺ສ ອສນ຺ນິຏ຺ຐານວິກ຺ເຂປກາເລສຸ ປວຕ຺ຕິ ເວທິຕພ຺ພາຕິ.

ເອວໍ ຕາວ ທ຺ວາທສວິຘໍ ອກຸສລຈິຕ຺ຕໍ ເວທິຕພ຺ພໍ, ສພ຺ພໍ ປເນຕໍ ຍຖານຸຣູປໍ ອປາເຍສຸ ອຸປປຕ຺ຕິຍາ, ສຸຄຕິຍມ຺ປິ ທຸກ຺ຂວິເສສສ຺ສ ອຠິນິປ຺ຜາທກໍ ໂຫຕິ.

໓໐. ໂລຠມູລວເສນຏ຺ຐ, ໂທສມູລວສາ ທຸເວ;

ໂມຫມູລວເສນ ທ຺ເວ, ເອວໍ ທ຺ວາທສຘາ ສິຍຸໍ.

໓໑. ປາປາປາເປສ຺ວປາເປນ, ຍໍ ວຸຕ຺ຕໍ ປາປມານສໍ;

ປາປາປາປປ຺ປຫີເນນ, ຕໍ ມຍາ ສມຸທາຫຏໍ.

ອິຕຣໍ ປນ ອພ຺ຍາກຕມວິປາກາຣຫໂຕ ເອກວິຘໍ ໂຫຕິ, ຊາຕິເຠທໂຕ ທຸວິຘໍ ວິປາກຈິຕ຺ຕໍ ກິຣິຍຈິຕ຺ຕນ຺ຕິ. ຕຕ຺ຖ ວິປາກຈິຕ຺ຕໍ ຠູມິເຠທໂຕ ຈຕຸພ຺ພິຘໍ ກາມາວຈຣໍ ຣູປາວຈຣໍ ອຣູປາວຈຣໍ ໂລກຸຕ຺ຕຣນ຺ຕິ. ຕຕ຺ຖ ກາມາວຈຣໍ ທຸວິຘໍ ກຸສລວິປາກໍ ອກຸສລວິປາກນ຺ຕິ. ກຸສລວິປາກໍ ທຸວິຘໍ ສເຫຕຸກມເຫຕຸກຎ຺ເຈຕິ.

ຕຕ຺ຖ ສເຫຕຸກວິປາກຈິຕ຺ຕໍ ສກກຸສລໍ ວິຍ ໂສມນສ຺ສຸເປກ຺ຂາຎາຓປ຺ປໂຍຄເຠທໂຕ ອຏ຺ຐວິຘໍ. ເສຍ຺ຍຖິທໍ – ໂສມນສ຺ສສຫຄຕໍ ຎາຓສມ຺ປຍຸຕ຺ຕໍ ອສງ຺ຂາຣໍ, ສສງ຺ຂາຣໍ, ໂສມນສ຺ສສຫຄຕໍ ຎາຓວິປ຺ປຍຸຕ຺ຕໍ ອສງ຺ຂາຣໍ, ສສງ຺ຂາຣໍ, ອຸເປກ຺ຂາສຫຄຕໍ ຎາຓສມ຺ປຍຸຕ຺ຕໍ ອສງ຺ຂາຣໍ, ສສງ຺ຂາຣໍ, ອຸເປກ຺ຂາສຫຄຕໍ ຎາຓວິປ຺ປຍຸຕ຺ຕໍ ອສງ຺ຂາຣໍ, ສສງ຺ຂາຣນ຺ຕິ ອິທໍ ອຏ຺ຐວິຘໍ ສເຫຕຸກວິປາກໍ ນາມ.

ຍຖາ ປນສ຺ສ ກຸສລໍ ທານາທິວເສນ ຉສຸ ອາຣມ຺ມເຓສຸ ປວຕ຺ຕຕິ, ນ ອິທໍ ຕຖາ. ອິທໍ ຫິ ປຏິສນ຺ຘິຠວງ຺ຄຈຸຕິຕທາຣມ຺ມຓວເສນ ປຣິຕ຺ຕຘມ຺ມປຣິຍາປນ຺ເນສຸເຍວ ຉສຸ ອາຣມ຺ມເຓສຸ ປວຕ຺ຕຕິ. ສມ຺ປຍຸຕ຺ຕຘມ຺ມານຎ຺ຈ ວິເສເສ ອສຕິປິ ອາທາສຕລາທີສຸ ມຸຂນິມິຕ຺ຕໍ ວິຍ ນິຣຸສ຺ສາຫໍ ວິປາກໍ, ມຸຂໍ ວິຍ ສອຸສ຺ສາຫໍ ກຸສລນ຺ຕິ ເວທິຕພ຺ພໍ. ອິເມສໍ ປນ ວິປຈ຺ຈນຏ຺ຐານໍ ເວທິຕພ຺ພໍ. ອິມານິ ຫິ ປຏິສນ຺ຘິຠວງ຺ຄຈຸຕິຕທາຣມ຺ມຓານິ ຫຸຕ຺ວາ ວິປຈ຺ຈນ຺ຕິ.

໓໒. ກາມາວຈຣເທວານໍ, ມນຸສ຺ສານໍ ອິເມ ປນ;

ທຸເຫຕຸກຕິເຫຕູນໍ, ຠວນ຺ຕິ ປຏິສນ຺ຘິໂຍ.

໓໓. ຕໂຕ ປວຕ຺ຕິຍໍ ຫຸຕ຺ວາ, ຠວງ຺ຄໍ ຍາວຕາຍຸກໍ;

ພລວາຣມ຺ມເຓ ຫຸຕ຺ວາ, ຕທາຣມ຺ມຓເມວ ຈ.

໓໔. ຕໂຕ ມຣຓກາລສ຺ມິໍ, ຈຸຕິ ຫຸຕ຺ວາ ປວຕ຺ຕເຣ;

ເອວໍ ຈຕູສຸ ຐາເນສຸ, ວິປຈ຺ຈນ຺ຕີຕິ ນິທ຺ທິເສ.

໓໕. ສຠູມິກຸສເລເຫວ, ມຫາປາກາ ສມາ ວິນາ;

ກມ຺ມທ຺ວາຣຎ຺ຈ ກມ຺ມຎ຺ຈ, ປຸຎ຺ຎານໍ ກ຺ຣິຍວຕ຺ຖຸກໍ.

໓໖. ອວິຎ຺ຎຕ຺ຕິຊນຕ຺ຕາ ຫິ, ອວິປາກສຠາວໂຕ;

ອປ຺ປວຕ຺ຕນໂຕ ເຈວ, ປາກາ ປຸຎ຺ເຎຫິ ໂນ ສມາ.

໓໗. ປຣິຕ຺ຕາຣມ຺ມຓຕ຺ຕາ ຫິ, ເຕສເມກນ຺ຕໂຕ ປນ;

ກຣຸຓາມຸທິຕາ ເຕສຸ, ນ ຊາຍນ຺ຕິ ກທາຈິປິ.

໓໘. ຕຖາ ວິຣຕິໂຍ ຕິສ຺ໂສ, ນ ປເນເຕສຸ ຊາຍເຣ;

ປຎ຺ຈ ສິກ຺ຂາປທາ ວຸຕ຺ຕາ, ກຸສລາຕິ ຫິ ສຕ຺ຖຸນາ.

໓໙. ຕຖາຘິປຕິໂນເປຕ຺ຖ, ນ ສນ຺ຕີຕິ ວິນິທ຺ທິເສ;

ຉນ຺ທາທີນິ ຘຸຣໍ ກຕ຺ວາ, ອນຸປ຺ປຊ຺ຊນໂຕ ປນ.

໔໐. ອສງ຺ຂາຣສສງ຺ຂາຣ-ວິຘານໍ ປນ ປຸຎ຺ຎໂຕ;

ເຎຍ຺ຍໍ ປຈ຺ຈຍໂຕ ເຈວ, ວິປາເກສຸ ຈ ວິຎ຺ຎຸນາ.

໔໑. ຫີນາທີນໍ ວິປາກຕ຺ຕາ, ປຸຎ຺ຎານໍ ປຸຎ຺ຎວາທິນາ;

ຫີນາທໂຍ ຠວນ຺ຕີຕິ, ວິປາກາ ປຣິທີປິຕາ.

໔໒. ອິທໍ ອຏ຺ຐວິຘໍ ຈິຕ຺ຕໍ, ເອກນ຺ເຕນ ສວຕ຺ຖຸກໍ;

ຊາຍເຕ ກາມໂລກສ຺ມິໍ, ນ ປນຎ຺ຎຕ຺ຖ ຊາຍເຕ.

ເອວໍ ຕາວ ສເຫຕຸກວິປາກຈິຕ຺ຕໍ ເວທິຕພ຺ພໍ.

ອເຫຕຸກວິປາກຈິຕ຺ຕໍ ປນ ອໂລຠາທິເຫຕຸວິຣຫິຕໍ ອຸເປກ຺ຂາສຫຄຕໍ ຈກ຺ຂຸວິຎ຺ຎາຓໍ, ອຸເປກ຺ຂາສຫຄຕໍ ໂສຕວິຎ຺ຎາຓໍ, ອຸເປກ຺ຂາສຫຄຕໍ ຆານວິຎ຺ຎາຓໍ, ອຸເປກ຺ຂາສຫຄຕໍ ຊິວ຺ຫາວິຎ຺ຎາຓໍ, ສຸຂສຫຄຕໍ ກາຍວິຎ຺ຎາຓໍ, ອຸເປກ຺ຂາສຫຄຕໍ ອເຫຕຸກມໂນຘາຕຸສມ຺ປຏິຈ຺ຉນໍ, ໂສມນສ຺ສສຫຄຕໍ ອເຫຕຸກມໂນວິຎ຺ຎາຓຘາຕຸສນ຺ຕີຣຓໍ, ອຸເປກ຺ຂາສຫຄຕໍ ອເຫຕຸກມໂນວິຎ຺ຎາຓຘາຕຸສນ຺ຕີຣຓນ຺ຕິ ອິທໍ ປນ ອຏ຺ຐວິຘໍ ອເຫຕຸກວິປາກຈິຕ຺ຕໍ ນາມ.

ອິທໍ ປນ ອຏ຺ຐວິຘໍ ນິຍຕວຕ຺ຖຸກໂຕ ເອກວິຘໍ, ນິຍຕານິຍຕາຣມ຺ມຓໂຕ ທຸວິຘໍ. ຕຕ຺ຖ ວິຎ຺ຎາຓປຎ຺ຈກໍ ນິຍຕາຣມ຺ມຓໍ, ເສສຕ຺ຕຍໍ ອນິຍຕາຣມ຺ມຓໍ. ສຸຂໂສມນສ຺ສຸເປກ຺ຂາເວທນາໂຍຄໂຕ ຕິວິຘໍ. ຕຕ຺ຖ ສຸຂສຫຄຕໍ ກາຍວິຎ຺ຎາຓໍ, ທ຺ວິຏ຺ຐານິກໍ ສນ຺ຕີຣຓໍ ໂສມນສ຺ສຸເປກ຺ຂາຍຸຕ຺ຕໍ, ເສສມຸເປກ຺ຂາຍຸຕ຺ຕນ຺ຕິ.

ທິຏ຺ຐາຣມ຺ມຓສຸຕາຣມ຺ມຓມຸຕາຣມ຺ມຓທິຏ຺ຐສຸຕມຸຕາຣມ຺ມຓທິຏ຺ຐ-ສຸຕມຸຕວິຎ຺ຎາຕາຣມ຺ມຓວເສນ ປຎ຺ຈວິຘໍ. ຕຕ຺ຖ ທິຏ຺ຐາຣມ຺ມຓໍ ຈກ຺ຂຸວິຎ຺ຎາຓໍ, ສຸຕາຣມ຺ມຓໍ ໂສຕວິຎ຺ຎາຓໍ, ມຸຕາຣມ຺ມຓໍ ຆານຊິວ຺ຫາກາຍວິຎ຺ຎາຓຕ຺ຕຍໍ, ທິຏ຺ຐສຸຕມຸຕາຣມ຺ມຓໍ ມໂນຘາຕຸສມ຺ປຏິຈ຺ຉນໍ, ທິຏ຺ຐສຸຕມຸຕວິຎ຺ຎາຕາຣມ຺ມຓໍ ເສສມໂນວິຎ຺ຎາຓຘາຕຸທ຺ວຍນ຺ຕິ.

ວຕ຺ຖຸໂຕ ຉພ຺ພິຘໍ. ກຖໍ? ຈກ຺ຂຸວິຎ຺ຎາຓສ຺ສ ຈກ຺ຂຸເມວ ວຕ຺ຖຸ, ຕຖາ ໂສຕຆານຊິວ຺ຫາກາຍວິຎ຺ຎາຓານໍ ໂສຕຆານຊິວ຺ຫາກາຍວຕ຺ຖຸ, ອວເສສຕ຺ຕຍສ຺ສ ຫທຍວຕ຺ຖຸເມວາຕິ.

ອາຣມ຺ມຓໂຕ ສຕ຺ຕວິຘໍ ໂຫຕິ. ກຖໍ? ຣູປາຣມ຺ມຓເມວ ຈກ຺ຂຸວິຎ຺ຎາຓໍ, ຕຖາ ສທ຺ທຄນ຺ຘຣສໂຜຏ຺ຐພ຺ພາຣມ຺ມຓານິ ປຏິປາຏິຍາ ໂສຕຆານຊິວ຺ຫາກາຍວິຎ຺ຎາຓານິ, ຣູປາທິປຎ຺ຈາຣມ຺ມຓາ ມໂນຘາຕຸ, ເສສມໂນວິຎ຺ຎາຓຘາຕຸທ຺ວຍໍ ຉຬາຣມ຺ມຓນ຺ຕິ.

ຕໍ ສພ຺ພໍ ປນ ອເຫຕຸກວິປາກຈິຕ຺ຕໍ ກິຈ຺ຈໂຕ ອຏ຺ຐວິຘໍ ໂຫຕິ. ກຖໍ? ທສ຺ສນກິຈ຺ຈໍ ຈກ຺ຂຸວິຎ຺ຎາຓໍ, ສວນຆາຍນສາຍນຜຸສນສມ຺ປຏິຈ຺ຉນສນ຺ຕີຣຓຕທາຣມ຺ມຓກິຈ຺ຈານິ ອວເສສານິ.

ຕຕ຺ຖ ຈກ຺ຂຸໂຕ ປວຕ຺ຕໍ ວິຎ຺ຎາຓໍ, ຈກ຺ຂຸມ຺ຫິ ສນ຺ນິສ຺ສິຕໍ ວິຎ຺ຎາຓນ຺ຕິ ວາ ຈກ຺ຂຸວິຎ຺ຎາຓໍ, ຕຖາ ໂສຕວິຎ຺ຎາຓາທີນິ. ຕຕ຺ຖ ຈກ຺ຂຸສນ຺ນິສ຺ສິຕຣູປວິຊານນລກ຺ຂຓໍ ຈກ຺ຂຸວິຎ຺ຎາຓໍ, ຣູປມຕ຺ຕາຣມ຺ມຓຣສໍ, ຣູປາຠິມຸຂຠາວປຈ຺ຈຸປຏ຺ຐານໍ, ຣູປາຣມ຺ມຓາຍ ກິຣິຍາມໂນຘາຕຸຍາ ອປຄມປທຏ຺ຐານໍ. ຕຖາ ໂສຕຆານຊິວ຺ຫາກາຍວິຎ຺ຎາຓານິ ໂສຕາທິສນ຺ນິສ຺ສິຕສທ຺ທາທິວິຊານນລກ຺ຂຓານິ, ສທ຺ທາທິມຕ຺ຕາຣມ຺ມຓຣສານິ, ສທ຺ທາທີສຸ ອຠິມຸຂຠາວປຈ຺ຈຸປຏ຺ຐານານິ, ສທ຺ທາທິອາຣມ຺ມຓານໍ ກິຣິຍາມໂນຘາຕູນໍ ອປຄມປທຏ຺ຐານານິ. ມໂນຘາຕຸສມ຺ປຏິຈ຺ຉນໍ ປນ ຈກ຺ຂຸວິຎ຺ຎາຓາທີນໍ ອນນ຺ຕຣາ ຣູປາທິວິຊານນລກ຺ຂຓໍ, ຣູປາທິສມ຺ປຏິຈ຺ຉນຣສໍ, ຕຖາຠາວປຈ຺ຈຸປຏ຺ຐານໍ, ຈກ຺ຂຸວິຎ຺ຎາຓາທີນໍ ອປຄມປທຏ຺ຐານໍ.

ເສສາ ປນ ທ຺ເວ ອເຫຕຸກມໂນວິຎ຺ຎາຓຘາຕຸໂຍ ຉຬາຣມ຺ມຓວິຊານນລກ຺ຂຓາ, ສນ຺ຕີຣຓາທິຣສາ, ຕຖາຠາວປຈ຺ຈຸປຏ຺ຐານາ, ຫທຍວຕ຺ຖຸປທຏ຺ຐານາຕິ ເວທິຕພ຺ພາ. ຕຕ຺ຖ ປຐມາ ເອກນ຺ຕມິຏ຺ຐາຣມ຺ມເຓ ປວຕ຺ຕິສພ຺ຠາວໂຕ ໂສມນສ຺ສຍຸຕ຺ຕາວ ຫຸຕ຺ວາ ປຎ຺ຈທ຺ວາເຣ ສນ຺ຕີຣຓກິຈ຺ຈໍ ສາຘຍມານາ ປຎ຺ຈສຸ ທ຺ວາເຣສຸ ຐຕ຺ວາ ວິປຈ຺ຈຕິ, ຉສຸ ປນ ທ຺ວາເຣສຸ ພລວາຣມ຺ມເຓ ຕທາຣມ຺ມຓໍ ຫຸຕ຺ວາ ວິປຈ຺ຈຕິ. ທຸຕິຍາ ປນ ອິຏ຺ຐມຊ຺ຌຕ຺ຕາຣມ຺ມເຓ ປວຕ຺ຕິສພ຺ຠາວໂຕ ອຸເປກ຺ຂາສຫຄຕາ ຫຸຕ຺ວາ ສນ຺ຕີຣຓຕທາຣມ຺ມຓປຏິສນ຺ຘິຠວງ຺ຄຈຸຕິວເສນ ປວຕ຺ຕນໂຕ ປຎ຺ຈສຸ ຐາເນສຸ ວິປຈ຺ຈຕິ. ກຖໍ? ມນຸສ຺ສໂລເກ ຕາວ ຊຈ຺ຈນ຺ຘຊຈ຺ຈພຘິຣຊຈ຺ຈຊຬຊຈ຺ຈຸມ຺ມຕ຺ຕກປຓ຺ຑກອຸຠໂຕພ຺ຍຎ຺ຊນນປຸໍສກາທີນໍ ປຏິສນ຺ຘິຄ຺ຄຫຓກາເລ ປຏິສນ຺ຘິ ຫຸຕ຺ວາ ວິປຈ຺ຈຕິ. ປຏິສນ຺ຘິຍາ ວີຕິວຕ຺ຕາຍ ປວຕ຺ຕິຍໍ ຍາວຕາຍຸກໍ ຠວງ຺ຄໍ ຫຸຕ຺ວາ ວິປຈ຺ຈຕິ. ອິຏ຺ຐມຊ຺ຌຕ຺ເຕ ປຎ຺ຈາຣມ຺ມຓວີຖິຍາ ສນ຺ຕີຣຓໍ ຫຸຕ຺ວາ, ພລວາຣມ຺ມເຓ ຉທ຺ວາເຣ ຕທາຣມ຺ມຓໍ ຫຸຕ຺ວາ, ມຣຓກາເລ ຈຸຕິ ຫຸຕ຺ວາຕິ ອິເມສຸ ປນ ປຎ຺ຈສຸ ຐາເນສຸ ວິປຈ຺ຈຕີຕິ. ເອວໍ ຕາວ ອເຫຕຸກວິປາກຈິຕ຺ຕານິ ເວທິຕພ຺ພານິ.

໔໓. ກາມາວຈຣປຸຎ຺ຎສ຺ສ, ວິປາກາ ໂຫນ຺ຕິ ໂສຬສ;

ຕໍ ຕິເຫຕຸກປຸຎ຺ຎສ຺ສ, ວເສນ ປຣິທີປເຍ.

ອິທານິ ຣູປາວຈຣວິປາກຈິຕ຺ຕານິ ວຸຈ຺ຈນ຺ຕິ. ຕານິ ນິຍຕວຕ຺ຖຸກໂຕ ເອກວິຘານິ, ຌານງ຺ຄໂຍຄເຠທໂຕ ປຎ຺ຈວິຘານິ. ກຖໍ? ວິຕກ຺ກວິຈາຣປີຕິສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ປຐມໍ, ວິຈາຣປີຕິສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ທຸຕິຍໍ, ປີຕິສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ຕຕິຍໍ, ສຸຂຈິຕ຺ເຕກຄ຺ຄຕາສມ຺ປຍຸຕ຺ຕໍ ຈຕຸຕ຺ຖໍ, ອຸເປກ຺ຂາຈິຕ຺ເຕກຄ຺ຄຕາສມ຺ປຍຸຕ຺ຕໍ ປຎ຺ຈມນ຺ຕິ ອິມານິ ປຎ຺ຈປິ ຣູປາວຈຣວິປາກຈິຕ຺ຕານິ ອຸປປຕ຺ຕິຍໍ ປຏິສນ຺ຘິຠວງ຺ຄຈຸຕິວເສນ ປວຕ຺ຕນ຺ຕິ.

ອິທານິ ອຣູປາວຈຣວິປາກຈິຕ຺ຕານິ ວຸຈ຺ຈນ຺ຕິ. ຕານິ ສກກຸສລານິ ວິຍ ອາຣມ຺ມຓເຠທໂຕ ຈຕຸພ຺ພິຘານິ ໂຫນ຺ຕິ. ກຖໍ? ອາກາສານຎ຺ຈາຍຕນສຎ຺ຎາສຫຄຕໍ, ວິຎ຺ຎາຓຎ຺ຈາຍຕນສຎ຺ຎາສຫຄຕໍ, ອາກິຎ຺ຈຎ຺ຎາຍຕນສຎ຺ຎາສຫຄຕໍ, ເນວສຎ຺ຎານາສຎ຺ຎາຍຕນສຎ຺ຎາສຫຄຕນ຺ຕິ ອິມານິ ຈຕ຺ຕາຣິ ອຣູປາວຈຣວິປາກຈິຕ຺ຕານິ.

໔໔. ກຸສລານຸຄຕໍ ກຕ຺ວາ, ຠາຊິຕໍ ກິໍ ມຫຄ຺ຄຕໍ;

ກາມາວຈຣປຸຎ຺ຎໍວ, ນາສມານຜລໍ ຍໂຕ.

໔໕. ອຕ຺ຕໂນ ກຸສເລເຫວ, ສມານໍ ສພ຺ພຖາ ອິທໍ;

ຄຊາທີນໍ ຍຖາ ຉາຍາ, ຄຊາທິສທິສາ ຕຖາ.

໔໖. ກາມາວຈຣປຸຎ຺ຎໍວ, ນາປຣາປຣິຍເວທນໍ;

ຌານາ ອປຣິຫີນສ຺ສ, ສຕ຺ຕສ຺ສ ຠວຄາມິໂນ.

໔໗. ກຸສລານນ຺ຕຣໍເຍວ, ຜລໍ ອຸປ຺ປຊ຺ຊຕີຕິ ຈ;

ຎາປນຕ຺ຖໍ ປເນຕສ຺ສ, ກຸສລານຸຄຕໍ ກຕໍ.

໔໘. ປຏິປ຺ປທາກ຺ກໂມ ເຈວ, ຫີນາທີນຎ຺ຈ ເຠທໂຕ;

ຌານາຄມນໂຕ ເຈຕ຺ຖ, ເວທິຕພ຺ໂພ ວິຠາວິນາ.

໔໙. ອຠາໂວຘິປຕີນຎ຺ຈ, ອຍເມວ ວິເສສໂກ;

ເສສໍ ສພ຺ພໍ ຈ ເສເສນ, ກຸສເລນ ສມໍ ມຕໍ. –

ເອວໍ ຣູປາວຈຣາຣູປາວຈຣວິປາກາ ເວທິຕພ຺ພາ.

ອິທານິ ໂລກຸຕ຺ຕຣວິປາກຈິຕ຺ຕານິ ໂຫນ຺ຕິ. ຕານິ ຈຕຸມຄ຺ຄຍຸຕ຺ຕຈິຕ຺ຕຜລຕ຺ຕາ ຈຕຸພ຺ພິຘານິ ໂຫນ຺ຕິ. ກຖໍ? ໂສຕາປຕ຺ຕິມຄ຺ຄຜລຈິຕ຺ຕໍ, ສກທາຄາມິມຄ຺ຄຜລຈິຕ຺ຕໍ, ອນາຄາມິມຄ຺ຄຜລຈິຕ຺ຕໍ, ອຣຫຕ຺ຕມຄ຺ຄຜລຈິຕ຺ຕນ຺ຕິ. ເອວໍ ປເນຕ຺ຖ ເອເກກໍ ຌານງ຺ຄໂຍຄເຠທໂຕ ປຎ຺ຈວິຘໍ, ປຸນ ມຄ຺ຄວີຖິຜລສມາປຕ຺ຕິວເສນ ປວຕ຺ຕິໂຕ ທຸວິຘໍ. ເອວໍ ໂລກຸຕ຺ຕຣກຸສລວິປາກຈິຕ຺ຕານິ ເວທິຕພ຺ພານິ.

໕໐. ສຸຎ຺ຎຕໍ ອນິມິຕ຺ຕນ຺ຕິ, ຕຖາປຓິຫິຕນ຺ຕິປິ;

ເອຕານິ ຕີຓິ ນາມານິ, ມຄ຺ຄສ຺ສານນ຺ຕເຣ ຜເລ.

໕໑. ລພ຺ຠນ຺ຕິ ປຣຠາຄສ຺ມິໍ, ວຬຎ຺ຊນຜເລສຸ ນ;

ວິປສ຺ສນາວເສເນວ, ຕານິ ນາມານິ ລພ຺ຠເຣ.

໕໒. ໂຫນ຺ຕິ ສາຘິປຕີເນວ, ໂລກຸຕ຺ຕຣຜລານິ ຕຸ;

ວິປາເກຘິປຕີ ນຕ຺ຖິ, ຐເປຕ຺ວາ ຕຸ ອນາສເວ.

໕໓. ອຕ຺ຕໂນ ມຄ຺ຄຠາເວນ, ມຄ຺ໂຄ ‘‘ມຄ຺ໂຄ’’ຕິ ວຸຈ຺ຈຕິ;

ຜລໍ ມຄ຺ຄມຸປາທາຍ, ມຄ຺ໂຄ ນາມາຕິ ວຸຈ຺ຈຕິ. –

ເອວໍ ໂລກຸຕ຺ຕຣວິປາກາ ເວທິຕພ຺ພາ.