ອຏ຺ຐວີສຕິໂມ ປຣິຈ຺ເຉໂທ

໒໘. ອຕ຺ຖປຎ຺ຎຕ຺ຕິກຖາ

໑໐໘໔. ຕຕ຺ຖ ຈ ປຸພ຺ພາປຣິຍ-ປວຕ຺ຕກ຺ຂນ຺ຘສມ຺ມຕາ;

ວິຎ຺ຎຕ຺ຕິນ຺ທ຺ຣິຍວິປ຺ຜາຣ-ວິເສໂສປນິພນ຺ຘນາ.

໑໐໘໕. ເທວຍກ຺ຂມນຸສ຺ສາທິ-ນານາເຠທາ ສລກ຺ຂິກາ;

ສຕ຺ຕປຎ຺ຎຕ຺ຕິ ນາມາຍໍ, ສ຺ວາຍໍ ສຕ຺ໂຕຕິ ສມ຺ມໂຕ.

໑໐໘໖. ວຏ຺ຏຕ຺ຕຍມຸປາທາຍ,

ຂນ຺ຘາຍຕນວຸຕ຺ຕິຍາ;

ກາຣໂກ ເວທໂກ ວາຍໍ,

ສນ຺ຘາວຕິ ຠເວ ຠເວ.

໑໐໘໗. ຕສ຺ມາ ສໍສາຣມາປນ຺ໂນ, ສຕ຺ໂຕ ນາມ ສ ປຸຄ຺ຄໂລ;

ອຫມຕ຺ຕາປຣາ ອິຕ຺ຖີ, ປຸຣິໂສຕິ ຈ ກປ຺ປິໂຕ.

໑໐໘໘. ສ຺ວາຍໍ ຂນ຺ຘາທິໂຕ ສຕ຺ໂຕ, ອຎ຺ໂຎຕິ ຈ ນ ວຸຈ຺ຈຕິ;

ຂນ຺ຘາທິວິນິມຸຕ຺ຕສ຺ສ, ສຕ຺ຕສ຺ເສວ ອຠາວໂຕ.

໑໐໘໙. ຂນ຺ຘາ ຂນ຺ຘານເມວາຍໍ, ສຕ຺ໂຕຕິ ຈ ນ ວຸຈ຺ຈຕິ;

ຂນ຺ຘໂວຫາຣໂຕ ຕສ຺ສ, ອຎ຺ຎໂວຫາຣສມ຺ຠວາ.

໑໐໙໐. ອິຈ຺ເຈວໍ ຂນ຺ຘນານຕ຺ເຕ-ກຕ຺ຕມຸຕ຺ໂຕປິ ອຕ຺ຖໂຕ;

ຕພ຺ພິເສສາວຈຣິຕ-ໂວຫາໂຣ ຈ ຕຸ ທິສ຺ສຕິ.

໑໐໙໑. ເຕນາຍໍ ປຸຄ຺ຄໂລ ສຕ຺ໂຕ, ຊາຍຕິຊ຺ຊິຍ຺ຍຕີຕິ ຈ;

ມີຍຕີຕິ ຈ ຕສ຺ສາຍໍ, ສໍສາໂຣຕິ ປວຸຈ຺ຈຕິ.

໑໐໙໒. ມໂຕ ຊາໂຕ ຈ ນ ສ຺ເວວ, ຂນ຺ຘເຠໂທປຈາຣໂຕ;

ນາປໂຣ ສ຺ເວວ ສນ຺ຕານເຠທາຠາໂວປຈາຣໂຕ.

໑໐໙໓. ນານຕ຺ເຕກຕ຺ຕມິຈ຺ເຈວໍ, ປຸຄ຺ຄລສ຺ໂສປຈາຣໂຕ;

ອຸຈ຺ເຉທສສ຺ສຕຕ຺ຕໍ ວາ, ຕສ຺ມາ ໂນເປຕິ ປຸຄ຺ຄໂລ.

໑໐໙໔. ອິຈ຺ຈາຍໍ ປຸຄ຺ຄໂລ ນາມ, ສຕ຺ໂຕ ສໍສາຣກາຣໂກ;

ຂນ຺ຘາທິກມຸປາທາຍ, ປຎ຺ຎຕ຺ໂຕຕິ ປວຸຈ຺ຈຕິ.

໑໐໙໕. ຕສ຺ມາ ປຸຄ຺ຄລສງ຺ຂາຕາ, ສໍສາໂຣປນິພນ຺ຘນາ;

ສຕ຺ຕປຎ຺ຎຕ຺ຕິ ນາມາຕິ, ວິຎ຺ຎາຕພ຺ພາ ວິຠາວິນາ.

໑໐໙໖. ອຊ຺ຌຕ຺ຕິກາ ຈ ເກສາທິໂກຏ຺ຐາສາ ພາຫິເຣສຸ ຈ;

ຠູມິປພ຺ພຕປາສາຓຕິຓຣຸກ຺ຂລຕາທິກາ.

໑໐໙໗. ຠູຕສມ຺ຠາຣນິພ຺ພຕ຺ຕິວິຠາຄປຣິກປ຺ປິຕາ;

ຕມຸປາທາຍ ສມ຺ຠາຣປຎ຺ຎຕ຺ຕີຕິ ປວຸຈ຺ຈຕິ.

໑໐໙໘. ຠູຕສມ຺ຠາຣສຓ຺ຐານວິຠາຄປຣິກປ຺ປິຕາ;

ສຓ຺ຐານປຎ຺ຎຕ຺ຕິ ນາມ, ຖມ຺ຠກຸມ຺ຠາທິກາ ມຕາ.

໑໐໙໙. ຠູຕສມ຺ຠາຣສງ຺ຆາຕວິເສສປຣິກປ຺ປິຕາ;

ສງ຺ຆາຕປຎ຺ຎຕ຺ຕິ ນາມ, ຣຖເຄຫາທິກາ ມຕາ.

໑໑໐໐. ຠູຕສມ຺ຠາຣວິເສສປຣິຓາມປກປ຺ປິຕາ;

ປຣິຓາມປຎ຺ຎຕ຺ຕີຕິ, ທຘິຠຕ຺ຕາທິກາ ມຕາ.

໑໑໐໑. ອິຕ຺ຖມຊ຺ຌຕ຺ຕພຫິທ຺ຘາ, ຘມ຺ມາ ສມ຺ຠາຣສມ຺ຠູຕາ;

ສນ຺ຕານວຸຕ຺ຕິ ສງ຺ເກຕສິທ຺ຘາ ປຎ຺ຎຕ຺ຕິ ປຎ຺ຈຘາ.

໑໑໐໒. ຕຖາ ຕຖາ ສມຸປ຺ປນ຺ນວິກປ຺ປາໂຠຄສມ຺ມຕາ;

ວິກປ຺ປປຎ຺ຎຕ຺ຕິ ນາມ, ກາລາກາສທິສາທິກາ.

໑໑໐໓. ຕໍ ຕໍ ນິມິຕ຺ຕມາຄມ຺ມ, ຕໂຕປຏ຺ຐານກປ຺ປິຕາ;

ອຸປຏ຺ຐານປຎ຺ຎຕ຺ຕີຕິ, ປຏິຠາຄາທິກາ ມຕາ.

໑໑໐໔. ວິເສສາກາຣມຕ຺ຕາປິ, ອຕ຺ຖນ຺ຕຣປກປ຺ປິຕາ;

ອາກາຣປຎ຺ຎຕ຺ຕິ ນາມ, ວິຎ຺ຎຕ຺ຕິລຫຸຕາທິກາ.

໑໑໐໕. ຕໍ ຕໍ ກາຣຓມາຄມ຺ມ, ຕຖາ ໂວຫາຣກປ຺ປິຕາ;

ໂວຫາຣປຎ຺ຎຕ຺ຕິ ນາມ, ກຖິນາປຕ຺ຕິອາທິກາ.

໑໑໐໖. ພາໂລ ໂຍ ໂສ ຈ ເມ ອຕ຺ຕາ,

ໂສ ຠວິສ຺ສາມິ ມໍ ຈ ຕຸ;

ນິຈ຺ໂຈ ຘຸໂວ ສສ຺ສໂຕຕິ-

ອາທິກາ ປນ ສພ຺ພຖາ.

໑໑໐໗. ຕພ຺ໂພຫາຣນິມິຕ຺ຕານໍ, ອຠາເວປິ ປວຕ຺ຕິໂຕ;

ອຠິນິເວສປຎ຺ຎຕ຺ຕິ, ນາມ ຕິຕ຺ຖິຍກປ຺ປິຕາ.

໑໑໐໘. ອິຈ຺ເຈວໍ ໂລກສາສນຕິຕ຺ຖາຍຕນກປ຺ປິຕາ;

ສນ຺ຕານມຸຕ຺ຕສງ຺ເກຕສິທ຺ຘາ ອຕ຺ຖາປິ ປຎ຺ຈຘາ.

໑໑໐໙. ສງ຺ການວຸຕ຺ຕິສນ຺ຕານມຸຕ຺ຕເຠທວສາ ທ຺ວິຘາ;

ອຕ຺ຖປຎ຺ຎຕ຺ຕິ ນາມາຍໍ, ທສຘາ ປຣິທີປິຕາ.

໑໑໑໐. ອິຕິ ວຸຕ຺ຕປ຺ປກາເຣສຸ, ປຎ຺ຎຕ຺ຕຕ຺ເຖສຸ ປຓ຺ຑິຕາ;

ປຎ຺ຎຕ຺ຕິມຕ຺ຕໍ ສນ຺ຘາຍ, ໂວຫຣນ຺ຕິ ຍຖາກຖໍ.

໑໑໑໑. ຕທຎ຺ເຎ ປນ ພາລາ ຈ, ຕິຕ຺ຖິຍາປິ ອໂກວິທາ;

ປຎ຺ຎຕ຺ຕິມຕິຘາວິຕ຺ວາ, ຄຓ຺ຫນ຺ຕິ ປຣມຕ຺ຖໂຕ.

໑໑໑໒. ເຕ ຕຖາ ຄຫິຕາກາຣາ, ອຎ຺ຎາຓຄຫິຕາ ຊນາ;

ມິຈ຺ຉຕ຺ຕາຠິນິວິຏ຺ຐາ ຈ, ວຑ຺ຒນ຺ຕິ ຠວພນ຺ຘນໍ.

໑໑໑໓. ທຸວິເຘສຸປິ ອຕ຺ເຖສຸ, ຕສ຺ມາ ປຓ຺ຑິຕຊາຕິໂກ;

ປຣມຕ຺ຖປຎ຺ຎຕ຺ຕີສຸ, ວິຠາຄມິຕິ ລກ຺ຂເຍຕິ.

ອິຕິ ປຎ຺ຎຕ຺ຕິວິຠາເຄ ອຕ຺ຖປຎ຺ຎຕ຺ຕິກຖາ ນິຏ຺ຐິຕາ.

ອຏ຺ຐວີສຕິໂມ ປຣິຈ຺ເຉໂທ.