ຉພ຺ພິສຕິໂມ ປຣິຈ຺ເຉໂທ

໒໖. ວຸຏ຺ຐານວິສຸທ຺ຘິກຖາ

໑໐໑໙. ຕສ຺ເສວໍ ປຏິປນ຺ນສ຺ສ, ສິຂາປຕ຺ຕາ ວິປສ຺ສນາ;

ວຸຏ຺ຐານຄາມິນີ ນາມ, ຍທາ ໂຫຕິ ຕທາ ປນ.

໑໐໒໐. ປຣິກມ຺ໂມປຈາຣານຸໂລມໂຄຕ຺ຣຠຸໂຕ ປຣໍ;

ມຄ຺ໂຄ ຕໂຕ ຜລໍ ໂຫຕິ, ຠວງ຺ຄາ ປຈ຺ຈເວກ຺ຂຓາ.

໑໐໒໑. ປຣິກມ຺ໂມປຈາຣານຸໂລມສງ຺ຂາຕໂຄຈຣາ;

ມຄ຺ຄສ຺ສາວຊ຺ຊນໍ ຫຸຕ຺ວາ, ນິພ຺ພາເນ ໂຫຕິ ໂຄຕ຺ຣຠຸ.

໑໐໒໒. ຈຕຸຕ຺ຖໍ ປຎ຺ຈມໍ ວາຖ, ຉຏ຺ຐໍ ວາປິ ຍຖາຣຫໍ;

ອປ຺ເປຕິ ມຄ຺ຄຊວນໍ, ນິພ຺ພາເນ ສກິເມວ ຕໍ.

໑໐໒໓. ຕໂຕ ຜລານິ ຕີຓິ ທ຺ເວ, ເອກໍ ວາຖ ຍຖາກ຺ກມໍ;

ມຄ຺ຄາວເສສນິໂຣຘມຄ຺ຄວຸຏ຺ຐານວີຖິຍໍ.

໑໐໒໔. ຕໂຕ ຠວງ຺ຄປາໂຕວ,

ຕໍ ເຉຕ຺ວາ ປຈ຺ຈເວກ຺ຂຓາ;

ຕິສ຺ໂສ ປຎ຺ຈວິຘາ ໂຫນ຺ຕິ,

ຍຖາໂຍຄໍ ຕຖາ ຫິ ຈ.

໑໐໒໕. ມຄ຺ຄໍ ຜລຎ຺ຈ ນິພ຺ພານໍ, ອວສ຺ສໍ ປຈ຺ຈເວກ຺ຂຕິ;

ຫີເນ ກິເລເສ ເສເສ ຈ, ປຈ຺ຈເວກ຺ຂຕິ ວາ ນ ວາ.

໑໐໒໖. ຕໂຕ ຈ ປຸນ ສງ຺ຂາເຣ, ວິປສ຺ສນ຺ໂຕ ຍຖາ ປຸເຣ;

ອປ຺ເປຕິ ອນຸປຸພ຺ເພນ, ເສສມຄ຺ຄຜລານິ ຈ.

໑໐໒໗. ຕຕ຺ຖ ວຸຈ຺ຈນ຺ຕິ ນິພ຺ພານ-ຜລມຄ຺ຄວິປສ຺ສນາ;

ສຸຎ຺ຎຕາ ຈານິມິຕ຺ຕາ ຈ, ຕຖາປຓິຫິຕານິ ຈ.

໑໐໒໘. ສຸຎ຺ຎຕາວິປສ຺ສນາທິນາເມນ ຫິ ວິປສ຺ສຕິ;

ວິໂມກ຺ຂມຸຂຠູຕາຕິ, ຕິວິຘາ ຠາຊິຕາ ຕຖາ.

໑໐໒໙. ສຸຎ຺ຎຕາທິກນາເມນ, ວິໂມກ຺ຂາ ຕິວິຘາ ມຕາ;

ນິພ຺ພານຜລມຄ຺ຄາ ຈ, ສມາປຕ຺ຕິສມາຘໂຍ.

໑໐໓໐. ຕຕ຺ເຖວ ປຐມຠູມິໍ, ປຕ຺ໂຕ ອຣິຍປຸຄ຺ຄໂລ;

ສຕ຺ຕກ຺ຂຕ຺ຕຸປຣໂມ ໂສ, ໂສຕາປນ຺ໂນຕິ ວຸຈ຺ຈຕິ.

໑໐໓໑. ປຕ຺ໂຕ ທຸຕິຍຠູມິຎ຺ຈ, ສກທາຄາມິນາມໂກ;

ສກິເມວ ອິມໍ ໂລກໍ, ອາຄນ຺ຕ຺ວາ ໂຫຕິ ມານຸສໍ.

໑໐໓໒. ປຕ຺ໂຕ ຕຕິຍຠູມິຎ຺ຈ, ອນາຄາມີຕິ ວຸຈ຺ຈຕິ;

ພ຺ຣຫ຺ມໂລກາ ອນາຄນ຺ຕ຺ວາ, ອິຘກາໂມປປຕ຺ຕິຍາ.

໑໐໓໓. ປຕ຺ໂຕ ຈຕຸຕ຺ຖຠູມິຎ຺ຈ, ອຣຫາ ອຄ຺ຄປຸຄ຺ຄໂລ;

ທິຏ຺ເຐວ ຘມ຺ເມ ທຸກ຺ຂຄ຺ຄິໍ, ນິພ຺ພາເປຕີຕິ ວຸຈ຺ຈຕິ.

໑໐໓໔. ອິຕິ ມຄ຺ຄຜລຏ຺ຐານໍ, ວສາ ອຣິຍປຸຄ຺ຄລາ;

ທ຺ວິຘາປິ ຈຕຸຘາ ຍຸຄ຺ຄາ, ອຏ຺ຐ ໂຫນ຺ຕິ ວິຠາຄໂຕ.

໑໐໓໕. ອຸຠໂຕຠາຄວິມຸຕ຺ຕ-

ວິຠາຄາທິວສາ ປນ;

ວິຠຕ຺ຕາ ໂຫນ຺ຕິ ສຕ຺ເຕເຕ,

ຍຖາໂຍຄໍ ຕຖາ ຫິ ຈ.

໑໐໓໖. ສທ຺ຘາຘຸຣສ຺ສານິຈ຺ຈໂຕ, ວຸຏ຺ຐານໍ ທຸກ຺ຂໂຕປິ ຈ;

ປຎ຺ຎາຘຸຣສ຺ສານຕ຺ຕໂຕ, ອິຕິ ທີເປນ຺ຕິ ປຓ຺ຑິຕາ.

໑໐໓໗. ສທ຺ຘານຸສາຣິ ອາທິມ຺ຫິ, ມຊ຺ເຌ ສທ຺ຘາວິມຸຕ຺ຕໂກ;

ອນ຺ເຕ ປຎ຺ຎາວິມຸຕ຺ໂຕວ, ຕສ຺ມາ ສທ຺ຘາຘຸໂຣ ສິຍາ.

໑໐໓໘. ຘມ຺ມານຸສາຣິ ອາທິມ຺ຫິ, ທິຏ຺ຐິປ຺ປຕ຺ໂຕ ຕໂຕປຣິ;

ອນ຺ເຕ ປຎ຺ຎາວິມຸຕ຺ໂຕວ, ໂຫຕິ ປຎ຺ຎາຘຸໂຣປິ ຈ.

໑໐໓໙. ສມຖຍານິກາ ເຈວ, ຣູປານຸຕ຺ຕຣປາທກາ;

ວິປສ຺ສນາຍານິກາ ຈ, ສພ຺ເພ ສຸກ຺ຂວິປສ຺ສກາ.

໑໐໔໐. ຘຸຣວຸຏ຺ຐານເຠເທນ, ໂຫນ຺ຕິ ປຎ຺ເຈວ ສພ຺ພຖາ;

ອາຣຸປ຺ປປາທກາ ຈາປິ, ອາທິມ຺ຫິ ທຸວິຘາ ຕຖາ.

໑໐໔໑. ຉສຸ ຐາເນສຸ ມຊ຺ຌເກ, ກາຍສກ຺ຂີຕິ ຠາຊິຕາ;

ອຸຠໂຕຠາຄວິມຸຕ຺ໂຕ, ອຣຫຕ຺ເຕ ປຕິຏ຺ຐິໂຕ.

໑໐໔໒. ອິຕ຺ຖໍ ວຸຕ຺ຕຍານຘຸຣ-ວຸຏ຺ຐານານໍ ວິຠາຄໂຕ;

ມຄ຺ຄປ຺ຜລຠູມິໂຍ ຈ, ສຕ຺ຕຏ຺ຐາຣິຍປຸຄ຺ຄລາ.

໑໐໔໓. ຕຕ຺ຖ ຈານຸຕ຺ຕຣຎາຓໍ, ສຈ຺ຈານໍ ປຏິເວຘກໍ;

ສມຸຈ຺ເຉທປ຺ປຫາເນນ, ກ຺ເລສານຸສຍໂສຘນໍ.

໑໐໔໔. ຈຕຸມຄ຺ຄວິຠາເຄນ, ວຸຏ຺ຐານນ຺ຕິ ປກິຕ຺ຕິຕໍ;

ຎາຓທສ຺ສນວິສຸທ຺ຘິ, ນາມ ໂຫຕິ ຕຖາປິ ຈ.

໑໐໔໕. ມຄ຺ໂຄ ຈ ປຣິຊານາຕິ, ທຸກ຺ຂໍ ເຕຠູມກໍ ຕຖາ;

ຍຖາໂຍຄໍ ປຊຫຕິ, ຕຓ຺ຫາສມຸທຍມ຺ປິ ຈ.

໑໐໔໖. ນິໂຣຘໍ ສຈ຺ຉິກໂຣຕິ, ມຄ຺ຄສຈ຺ຈມນຸຕ຺ຕຣໍ;

ຠາວນາວີຖິໂມຕິຓ຺ໂຓ, ຠາເວຕີຕິ ປວຸຈ຺ຈຕິ.

໑໐໔໗. ທິຏ຺ຐິຄ຺ຄຕວິຈິກິຈ຺ຉາ-ສີລພ຺ພຕມເສສໂຕ;

ອປາຍຄມນີຍຎ຺ຈ, ຣາຄໂທສາທິກຕ຺ຕຍໍ.

໑໐໔໘. ຕເທກຏ຺ເຐ ກິເລເສ ຈ, ສຫຊາຕປ຺ປຫານໂຕ;

ປຊຫາຕິ ໂສຕາປຕ຺ຕິ-ມຄ຺ໂຄ ປຐມຠູມິໂກ.

໑໐໔໙. ຕເທກຏ຺ເຐ ປຊຫຕິ, ຣາຄໂທສາທິເກປິ ຈ;

ຖູເລ ຕຸ ສກທາຄາມິ-ມຄ຺ໂຄ ທຸຕິຍຠູມິໂກ.

໑໐໕໐. ປຊຫາຕິ ອນາຄາມິ-ມຄ຺ໂຄ ນິຣວເສສໂຕ;

ກາມຣາຄພ຺ຍາປາເທ ຈ, ຕເທກຏ຺ເຐ ຈ ສມ຺ຠວາ.

໑໐໕໑. ຣູປາຣູປຣາຄມານຸ-ທ຺ຘຈ຺ຈາວິຊ຺ຊາຕິ ປຎ຺ຈກໍ;

ອຄ຺ຄມຄ຺ໂຄ ປຊຫຕິ, ກ຺ເລເສ ເສເສ ຈ ສພ຺ພຖາ.

໑໐໕໒. ອິຕິ ສຈ຺ຈປຏິເວຘໍ, ກ຺ເລສກ຺ຂຍຜລາວຫໍ;

ມຄ຺ຄຎາຓໍ ປກາເສນ຺ຕິ, ວິສຸທ຺ຘິໍ ສຕ຺ຕມໍ ພຸຘາ.

໑໐໕໓. ຉພ຺ພິສຸທ຺ຘິກເມເນວໍ, ສພ຺ພຖາຍ ວິສຸທ຺ຘິຍາ;

ສຕ຺ຕມາຍານຸປຕ຺ຕພ຺ພໍ, ນິພ຺ພານນ຺ຕິ ປວຸຈ຺ຈຕິ.

໑໐໕໔. ກ຺ເລສກ຺ຂຍກຣໍ ຕາຓໍ, ສໍສາຣາຕິກ຺ກມໍ ປຣໍ;

ປາຣິມໍ ຕີຣມຠຍໍ, ສພ຺ພສງ຺ຂາຣນິສ຺ສຏໍ.

໑໐໕໕. ເຕນມ຺ມທນິມ຺ມທນໍ, ປິປາສວິນຍາທິນາ;

ກ຺ເລສສໍສາຣສງ຺ຂາຣ-ປຏິປກ຺ຂນິທສ຺ສິຕໍ.

໑໐໕໖. ອຊຣາມຣມຈ຺ຈນ຺ຕ-ມນຸປ຺ປາທມສງ຺ຂຕໍ;

ອນຸຕ຺ຕຣມສງ຺ຂາຣໍ, ອນນ຺ຕມຕຸລຎ຺ຈ ຕໍ.

໑໐໕໗. ປຣມຕ຺ຖມໂນປມ຺ມໍ, ສນ຺ຕິ ອປ຺ປຏິມໍ ສຸຂໍ;

ນິໂຣຘສຈ຺ຈ ນິພ຺ພານໍ, ເອກນ຺ຕໍ ອມຕໍ ປທໍ.

໑໐໕໘. ໂສປາທິເສສນິພ຺ພານ-ຘາຕຸ ເຈວ ຕຖາປຣາ;

ອນຸປາທິເສສາ ເຈຕິ, ທຸວິຘາ ປຣິຍາຍໂຕ.

໑໐໕໙. ສຸຎ຺ຎຕໍ ຈານິມິຕ຺ຕຎ຺ຈ, ຕຖາປຓິຫິຕນ຺ຕິ ຈ;

ອຕ຺ຕາທິຄາຫາຠາເວນ, ຕິວິຘາປິ ຈ ຠາຊິຕໍ.

໑໐໖໐. ກ຺ເລສສໍສາຣສງ຺ຂາຣ-ປຈ຺ຈນີກວິຠາຄໂຕ;

ຠວກ຺ຂຍາທິເຠເທຫິ, ພຫຸຘາປິ ປວຸຈ຺ຈຕິ.

໑໐໖໑. ຕເທວມຈ຺ຈຸຕໍ ຘມ຺ມໍ, ໂລກຸຕ຺ຕຣມກາລິກໍ;

ວານາຠາວາ ວານາຕີໂຕ, ‘‘ນິພ຺ພານ’’ນ຺ຕິ ປກິຕ຺ຕິຕໍ.

ອິຕິ ນິພ຺ພານວິຠາເຄ ວຸຏ຺ຐານວິສຸທ຺ຘິກຖາ ນິຏ຺ຐິຕາ.

ຉພ຺ພີສຕິໂມ ປຣິຈ຺ເຉໂທ.

ນິຏ຺ຐິໂຕ ຈ ສພ຺ພຖາປິ ນິພ຺ພານວິຠາໂຄ.