ສິກ຺ຂາປທວິຠງ຺ຄມາຕິກຕ຺ຖວຓ຺ຓນາ

ສິກ຺ຂາປທວິຠງ຺ຄມາຕິກາຍ ປນ ອຕ຺ຖໂຕ ຕາວ – ສິກ຺ຂາປທານີຕິ ສິກ຺ຂິຕພ຺ພປທານິ, ສິກ຺ຂາໂກຏ຺ຐາສາຕິ ອຕ຺ໂຖ. ອປິຈ ສພ຺ເພປິ ກຸສລາ ຘມ຺ມາ ສິກ຺ຂິຕພ຺ພໂຕ ສິກ຺ຂາ, ຕາສໍ ປຕິຏ຺ຐານຏ຺ເຐນ ປທໍ, ປຎ຺ຈສຸ ປນ ສີລງ຺ເຄສຸ ຍໍ ກິຎ຺ຈິ ອງ຺ຄໍ. ປາຓາຕິປາຕາທີສຸ ປາຓສ຺ສ ອຕີວ ປາໂຕ ປາຓາຕິປາໂຕ, ປາຓວໂຘຕິ ອຕ຺ໂຖ. ປາໂຓຕິ ເຈຕ຺ຖ ໂວຫາຣໂຕ ສຕ຺ໂຕ, ປຣມຕ຺ຖໂຕ ຊີວິຕິນ຺ທ຺ຣິຍໍ, ຕສ຺ມິໍ ປນ ປາເຓ ປາຓສຎ຺ຎິໂນ ຊີວິຕິນ຺ທ຺ຣິຍຸປຈ຺ເຉທກອຸປກ຺ກມສມຸຏ຺ຐາປິກາ ກາຍວຈີທ຺ວາຣານໍ ອຎ຺ຎຕຣທ຺ວາຣປ຺ປວຕ຺ຕາ ວຘກເຈຕນາ ປາຓາຕິປາໂຕ, ຕສ຺ມາ ປາຓາຕິປາຕາ. ເວຣມຓີຕິ ວິຣຕິ, ສາ ເອວ ວຸຕ຺ຕນເຍນ ສິກ຺ຂາປທນ຺ຕິ ເວຣມຓິສິກ຺ຂາປທໍ. ອທິນ຺ນນ຺ຕິ ນ ທິນ຺ນໍ, ປຣປຣິຄ຺ຄຫິຕໍ, ປຣປຣິຄ຺ຄຫິຕສ຺ສ ອທິນ຺ນສ຺ສ ອາທານໍ ອທິນ຺ນາທານໍ. ປຣສ຺ສ ຫຣຓໍ ເຖຍ຺ຍໍ ໂຈຣິກາຕິ ວຸຕ຺ຕໍ ໂຫຕິ. ອຕ຺ຖໂຕ ປນ ປຣປຣິຄ຺ຄຫິເຕ ຕຖາສຎ຺ຎິໂນ ຕທາທາຍກອຸປກ຺ກມສມຸຏ຺ຐາປິກາ ເຖຍ຺ຍເຈຕນາ ອທິນ຺ນາທານໍ. ກາເມສູຕິ ວຕ຺ຖຸກາເມສຸ. ມິຈ຺ຉາຈາຣາຕິ ກິເລສກາມວເສນ ລາມກາຈາຣາ, ປຸຣິສສ຺ສ ມາຕຸຣກ຺ຂິຕາທິສງ຺ຂາຕາສຸ, ອິຕ຺ຖິຍາ ອຕ຺ຕໂນ ນິຍມິຕປຸຣິສໂຕ ປຣປຸຣິສສງ຺ຂາເຕສຸ ຈ ອຄມນີຍຏ຺ຐາເນສຸ ວີຕິກ຺ກມາຈາຣາຕິ ວຸຕ຺ຕໍ ໂຫຕິ. ອຕ຺ຖໂຕ ປນ ອຄມນີຍວຕ຺ຖູສຸ ມຄ຺ເຄນມຄ຺ຄປ຺ປຏິປາທໂນປກ຺ກມສມຸຏ຺ຐາປິກາ, ອຘິວາສນາກາຣປ຺ປວຕ຺ຕາ ວາ ເມຖຸນເຈຕນາ ກາເມສຸມິຈ຺ຉາຈາໂຣ. ມຸສາຕິ ອຠູຕໍ ອຕຈ຺ຉໍ ວຕ຺ຖຸ, ວາໂທຕິ ຕສ຺ສ ອຠູຕຕໍ ຎຕ຺ວາວ ຠູຕໂຕ ຕຈ຺ຉໂຕ ວິຎ຺ຎາປນໍ. ລກ຺ຂຓໂຕ ປນ ອຕຖໍ ວຕ຺ຖຸໍ ຎຕ຺ວາ ຕຖໂຕ ປຣໍ ວິຎ຺ຎາເປຕຸກາມສ຺ສ ອຕ຺ຖຠຎ຺ຊກກາຍວຈີປໂຍຄສມຸຏ຺ຐາປິກາ ເຈຕນາ ມຸສາວາໂທ. ສຸຣາຕິ ປິຏ຺ຐສຸຣາ ປູວສຸຣາ ໂອທນສຸຣາ ກິຓ຺ຓປກ຺ຂິຕ຺ຕາ ສມ຺ຠາຣສໍຍຸຕ຺ຕາຕິ ປຎ຺ຈ ສຸຣາ. ເມຣຍນ຺ຕິ ປຸປ຺ຜາສໂວ ຜລາສໂວ ຄຸຬາສໂວ ມຘ຺ວາສໂວ ສມ຺ຠາຣສໍຍຸຕ຺ໂຕຕິ ປຎ຺ຈ ອາສວາ. ຕທຸຠຍມ຺ປິ ມທນີຍຏ຺ເຐນ ມຊ຺ຊໍ, ຍາຍ ເຈຕນາຍ ຕໍ ມຊ຺ຊໍ ປິວຕິ, ສາ ປມາທກາຣຓຕ຺ຕາ ປມາທຏ຺ຐານໍ, ຕສ຺ມາ ສຸຣາເມຣຍມຊ຺ຊປມາທຏ຺ຐານາ. ເສສໍ ສຸວິຎ຺ເຎຍ຺ຍເມວາຕິ ອຍໍ ຕາເວຕ຺ຖ ປທຕ຺ໂຖ.

ຘມ຺ມເຠໂທ ປນ ວິຠງ຺ຄນເຍ ປາກໂຏ ຠວິສ຺ສຕິ. ເອວໍ ອຸປຣິປິ. ວິຠງ຺ຄນເຍສຸ ເຈຕ຺ຖ ສຸຕ຺ຕນ຺ຕຠາຊນີຍໍ ນຕ຺ຖິ, ອຠິຘມ຺ມຠາຊນີເຍ ປເນຕານິ ປຎ຺ຈ ສິກ຺ຂາປທານິ ກາມາວຈຣກຸສລຈິຕ຺ຕສມ຺ປຍຸຕ຺ຕານໍ ວິຣຕີນໍ ວເສນ ນານປ຺ປກາຣໂຕ ປຐມວາເຣ ວິຠຕ຺ຕານິ, ຕຖາ ທຸຕິຍວາເຣ ເຈຕນາວເສນ, ວິຣຕິເຈຕນາສມ຺ປຍຸຕ຺ຕາ ປເນຕ຺ຖ ຘມ຺ມາ ນ ສິກ຺ຂາປທານິ, ສິກ຺ຂາປທສມ຺ປຍຸຕ຺ຕາ ປນ ໂຫນ຺ຕິ, ຕຖາ ຕຕິຍນເຍ ຜສ຺ສາທີນໍ ສພ຺ເພສໍ ຘມ຺ມານໍ ວເສນ ນານປ຺ປກາຣໂຕ ວິຠຕ຺ຕາຕິ.

ປຎ຺ຫາປຸຈ຺ຉເກ ປນ ເຈຕນາຍ, ຜສ຺ສາທີນຎ຺ຈ ປຣິຍາຍສິກ຺ຂາປທຕ຺ຕາ ນິປ຺ປຣິຍາຍສິກ຺ຂາປທຠູຕານໍ ວິຣຕີນໍ ວເສເນວ ວິຠຕ຺ຕານິ. ຕຕ຺ຖ ຫິ ປຎ຺ຈ ສິກ຺ຂາປທານິ ກຸສລາ ເອວ, ສິຍາ ສຸຂາຍ, ສິຍາ ອທຸກ຺ຂມສຸຂາຍ ສມ຺ປຍຸຕ຺ຕາ…ເປ… ປຣິຕ຺ຕາຣມ຺ມຓາວ, ປຈ຺ຈຸປ຺ປນ຺ນາຣມ຺ມຓາວ, ພຫິທ຺ຘາຣມ຺ມຓາວ, ອນິທສ຺ສນອປ຺ປຏິຆາວ, ນ ເຫຕູ, ສເຫຕຸກາ, ໂນ ຈິຕ຺ຕາ, ເຈຕສິກາ, ກາມາວຈຣາ, ສອຸຕ຺ຕຣາວ, ອຣຓາວາຕິ. ເອຕ຺ຖ ຈ ຍານິ ສິກ຺ຂາປທານິ ສຕ຺ຕາຣມ຺ມຓານິ ວຸຕ຺ຕານິ, ຕານິ ຈ ວິຣຕິສຠາວຕ຺ຕາ ຍສ຺ມາ ‘‘ສຕ຺ໂຕ’’ຕິ ສງ຺ຂໍ ຄເຕ ປຣິຕ຺ຕຘມ຺ເມ ເອວ ປຈ຺ຈຸປ຺ປນ຺ເນ ເອວ ຘມ຺ເມ ອາຣມ຺ມຓໍ ກໂຣນ຺ຕິ, ຕສ຺ມາ ປຣິຕ຺ຕາຣມ຺ມຓາຕິ ຈ ວຸຕ຺ຕາຕິ ເວທິຕພ຺ພາ. ອິທານິ ວິຣມິຕພ຺ພປາຓາຕິປາຕາທີນໍ –

ຘມ຺ມກມ຺ມປຖາລມ຺ພ-ເວທນາມູລກມ຺ມໂຕ;

ສາວຊ຺ຊງ຺ຄາທິໂຕ ເຎຍ຺ໂຍ, ປາຬິມຸຕ຺ຕວິນິຈ຺ຉໂຍ.

ຕຕ຺ຖ ຘມ຺ມໂຕ ຕາວ – ປຎ຺ຈເປເຕ ປາຓາຕິປາຕາທໂຍ ເຈຕນາສຠາວາວ ໂຫນ຺ຕິ. ກມ຺ມປຖໂຕ ປຎ຺ຈ ກມ຺ມປຖາວ. ອາຣມ຺ມຓໂຕ ປນ ປາຓາຕິປາໂຕ ຊີວິຕິນ຺ທ຺ຣິຍາຣມ຺ມໂຓ, ອທິນ຺ນາທານໍ ສຕ຺ຕາຣມ຺ມຓໍ, ສງ຺ຂາຣາຣມ຺ມຓໍ ວາ, ຕຖາ ມຸສາວາໂທ, ມິຈ຺ຉາຈາໂຣ ອິຕ຺ຖິປຸຣິສາຣມ຺ມໂຓ, ສຸຣາປານໍ ສງ຺ຂາຣາຣມ຺ມຓໍ. ເວທນາໂຕ ປນ ປາຓາຕິປາໂຕ ທຸກ຺ຂເວທໂນ, ອທິນ຺ນາທານໍ ຕິເວທນໍ, ຕຖາ ມຸສາວາໂທ, ມິຈ຺ຉາຈາໂຣ ປນ ສຸຂມຊ຺ຌຕ຺ຕວເສນ ທ຺ວິເວທໂນ, ຕຖາ ສຸຣາປານໍ. ມູລໂຕ ປນ ປຐໂມ ໂທສໂມຫມູໂລ, ທຸຕິຍໍ ສິຍາ ໂລຠໂມຫມູລໍ, ສິຍາ ໂທສໂມຫມູລໍ, ຕຖາ ມຸສາວາໂທ, ມິຈ຺ຉາຈາໂຣ ປນ ໂລຠໂມຫມູໂລວ, ຕຖາ ສຸຣາປານໍ. ກມ຺ມໂຕ ປເນຕ຺ຖ ມຸສາວາໂທ ວຈີກມ຺ມໍ, ເສສາ ກາຍກມ຺ມເມວ.

ສາວຊ຺ຊໂຕ ປນ ປາຓາຕິປາໂຕ ຕາວ ອມນຸສ຺ສເກ ປາເຓ ອປ຺ປສາວຊ຺ໂຊ, ມນຸສ຺ສເກ ມຫາສາວຊ຺ໂຊ. ເຕສຸ ຈ ຂຸທ຺ທກສຣີເຣ ອປ຺ປສາວຊ຺ໂຊ, ມຫາສຣີເຣ ມຫາສາວຊ຺ໂຊ. ກສ຺ມາ? ປໂຍຄມຫນ຺ຕຕາຍ. ປໂຍຄສມຕ຺ເຕປິ ອປ຺ປຄຸເຓ ອປ຺ປສາວຊ຺ໂຊ, ມຫາຄຸເຓ ມຫາສາວຊ຺ໂຊ. ສຣີຣຄຸຓານໍ ສມຠາເວ ສຕິ ກິເລສານໍ, ອຸປກ຺ກມານຎ຺ຈ ມຸທຸຕິພ຺ພຕາຍ ອປ຺ປມຫາສາວຊ຺ໂຊ ໂຫຕິ, ຂີຓາສເວ ປນ ມຫາສາວຊ຺ຊຕໂຣຕິ. ອທິນ຺ນາທານໍ ວຕ຺ຖຸໂນ ຫີນປ຺ປຓີຕຕາຍ ເຈວ ຄຸຓວິຣຫິຕຕພ຺ພນ຺ຕສນ຺ຕກຕາຍ ຈ. ຕຕ຺ຖາປິ ຕໍ ຕໍ ອຸປາທາຍຸປາທາຍ ຈ ອປ຺ປມຫາສາວຊ຺ຊໍ, ຂີຓາສວສນ຺ຕເກ ມຫາສາວຊ຺ຊຕຣນ຺ຕິ ເວທິຕພ຺ພໍ. ມິຈ຺ຉາຈາໂຣ ທຸສ຺ສີລສີລວນ຺ຕວຕ຺ຖຸວີຕິກ຺ກມເນນ. ຕຕ຺ຖາປິ ຕໍ ຕໍ ອຸປາທາຍຸປາທາຍ ຈ ອປ຺ປມຫາສາວຊ຺ໂຊ, ຂີຓາສວວຕ຺ຖຸວີຕິກ຺ກມເນ ມຫາສາວຊ຺ຊຕໂຣຕິ ຈ ເວທິຕພ຺ໂພ. ມຸສາວາໂທ ຍມຕ຺ຖໍ ຠຎ຺ຊຕິ, ຕສ຺ສ ອປ຺ປມຫນ຺ຕຕໍ, ວຕ຺ຖຸສາມິໂນ ຄຸຓວິຣຫິຕຕໍ, ຕພ຺ພນ຺ຕຕຎ຺ຈ ອຸປາທາຍຸປາທາຍ ອປ຺ປມຫາສາວຊ຺ໂຊ ໂຫຕິ. ອປິຈ ອຕ຺ຕໂນ ສນ຺ຕກໍ ອທາຕຸກາມຕາຍ, ຫສາຘິປ຺ປາເຍນ ວາ ‘‘ນຕ຺ເຖຕ’’ນ຺ຕິອາທິນຍປ຺ປວຕ຺ໂຕ ອປ຺ປສາວຊ຺ໂຊ, ອທິຏ຺ຐໍ ‘‘ທິຏ຺ຐ’’ນ຺ຕິອາທິນາ ກູຏສກ຺ຂິອາທິຠາເວນ ວາ ປວຕ຺ໂຕ ມຫາສາວຊ຺ໂຊ, ມຸສາ ວຕ຺ວາ ປນ ສງ຺ຆເຠທເນ ມຫາສາວຊ຺ຊຕໂຣ. ສຸຣາປານໍ ພິນ຺ທຸມຕ຺ຕໂຕ ປຏ຺ຐາຍ ຕໍ ຕໍ ອຸປາທາຍຸປາທາຍ ອປ຺ປສາວຊ຺ຊໍ, ພຫຸເກ ມຫາສາວຊ຺ຊໍ, ກາຍວິກາຣຊນນປໂຫນກປາເນ ປນ ມຫາສາວຊ຺ຊຕຣເມວ.

ອງ຺ຄາທິໂຕ ປນ ປາຓາຕິປາຕສ຺ສ ປາໂຓ ປາຓສຎ຺ຎິຕາ ວຘກຈິຕ຺ຕໍ ອຸປກ຺ກໂມ ເຕນ ມຣຓນ຺ຕິ ປຎ຺ຈ ອງ຺ຄານິ. ສາຫຕ຺ຖິໂກ ອາຓຕ຺ຕິໂກ ນິສ຺ສຄ຺ຄິໂກ ຖາວໂຣ ວິຊ຺ຊາມໂຍ ອິທ຺ຘິມໂຍຕິ ຉ ປໂຍຄາ. ອທິນ຺ນາທານສ຺ສ ປຣປຣິຄ຺ຄຫິຕຕາ ຕຖາສຎ຺ຎິຕາ ເຖຍ຺ຍຈິຕ຺ຕໍ ອຸປກ຺ກໂມ ເຕນ ຫຣຓນ຺ຕິ ປຎ຺ຈ ອງ຺ຄານິ. ສາຫຕ຺ຖິກາທໂຍ ຉ ເອວ ປໂຍຄາ. ເຕ ຈ ໂຂ ຍຖານຸຣູປໍ ເຖຍ຺ຍາວຫາຣາທີນໍ ວເສນ ປວຕ຺ຕາ. ມິຈ຺ຉາຈາຣສ຺ສ ອຄມນີຍວຕ຺ຖຸຕາ ເສວນຈິຕ຺ຕໍ ມຄ຺ເຄນ ມຄ຺ຄປ຺ປຏິປຕ຺ຕີຕິ ຕີຓິ ອງ຺ຄານິ. ສາຫຕ຺ຖິໂກ ເອໂກວ ປໂຍໂຄ. ເອວໍ ເສສານມ຺ປິ ປໂຍໂຄ ເວທິຕພ຺ໂພ. ມຸສາວາທສ຺ສ ອຕຖໍ ວຕ຺ຖຸ, ວິສໍວາທນຈິຕ຺ຕໍ, ຕຊ຺ໂຊ ວາຍາໂມ, ປຣສ຺ສ ຕທຕ຺ຖວິຊານນນ຺ຕິ ຈຕ຺ຕາຣິ ອງ຺ຄານິ. ສຸຣາປານສ຺ສ ສຸຣາທີນໍ ອຎ຺ຎຕຣຕາ ອຊ຺ໂຌຫຣຓນ຺ຕິ ທ຺ເວ ອງ຺ຄານີຕິ.

ເອວໍ ປາຓາຕິປາຕາທີນໍ ຘມ຺ມາທິໂຕ ວິນິຈ຺ຉຍໍ ຎຕ຺ວາ ອິທານິ ປາຓາຕິປາຕາເວຣມຓິອາທີນໍ ປຎ຺ຈນ຺ນມ຺ປິ –

ຘມ຺ມກມ຺ມປຖາລມ຺ພ-ສມາທານປໂຍຄໂຕ;

ຂຓ຺ຑໂຕ ຈ ວິຊານີໂຍ, ປາຬິມຸຕ຺ຕວິນິຈ຺ຉໂຍ.

ຕຕ຺ຖ ຘມ຺ມກມ຺ມປຖໂຕ ວິນິຈ຺ຉໂຍ ວຸຕ຺ຕນໂຍວ. ອາຣມ຺ມຓໂຕ ປເນຕານິ ຊີວິຕິນ຺ທ຺ຣິຍາທິຕໍຕໍວີຕິກ຺ກມິຕພ຺ພວຕ຺ຖາຣມ຺ມຓານິ. ສມາທານໂຕ ເອກສ຺ສ ສນ຺ຕິເກ ວາ ສຍເມວ ວາ ‘‘ປຎ຺ຈ ສີລານິ ອຘິຏ຺ຐຫາມີ’’ຕິ ເອກໂຕ ວາ ປາຏິເອກ຺ກໍ ວາ ສມາທິຍນ຺ເຕນ ເອຕານິ ສມາທິນ຺ນາເນວ ໂຫນ຺ຕິ. ປໂຍຄໂຕ ປນ ສພ຺ພານິປິ ສາຫຕ຺ຖິກປໂຍຄາເນວ. ຂຓ຺ຑໂຕ ຄຫຏ຺ຐາ ຍໍ ຍໍ ວີຕິກ຺ກມນ຺ຕິ, ຕໍ ຕເທວ ຂຓ຺ຑໍ ໂຫຕິ, ເນຕເຣ. ຄຫຏ຺ຐາ ອນິພທ຺ຘສີລາ ໂຫນ຺ຕິ, ຍໍ ຍໍ ສກ຺ໂກນ຺ຕິ, ຕໍ ຕເທວ ໂຄເປນ຺ຕິ. ສາມເຓຣານໍ ປນ ເອກສ຺ມິໍ ວີຕິກ຺ກມິເຕ ສພ຺ພານິປິ ຠິຊ຺ຊນ຺ຕີຕິ ເອວໍ ວິຊານີໂຍ ປາຬິມຸຕ຺ຕວິນິຈ຺ຉໂຍ.

ສິກ຺ຂາປທວິຠງ຺ຄມາຕິກຕ຺ຖວຓ຺ຓນາ ນິຏ຺ຐິຕາ.