໗. ສຫມ຺ປຕິພ຺ຣຫ຺ມສຸຕ຺ຕໍ

໕໒໗. ເອກໍ ສມຍໍ ຠຄວາ ອຸຣຸເວລາຍໍ ວິຫຣຕິ ນຊ຺ຊາ ເນຣຎ຺ຊຣາຍ ຕີເຣ ອຊປາລນິຄ຺ໂຣເຘ ປຐມາຠິສມ຺ພຸທ຺ໂຘ. ອຖ ໂຂ ຠຄວໂຕ ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ – ‘‘ປຎ຺ຈິນ຺ທ຺ຣິຍານິ ຠາວິຕານິ ພຫຸລີກຕານິ ອມໂຕຄຘານິ ໂຫນ຺ຕິ ອມຕປຣາຍຓານິ ອມຕປຣິໂຍສານານິ. ກຕມານິ ປຎ຺ຈ? ສທ຺ຘິນ຺ທ຺ຣິຍໍ ຠາວິຕໍ ພຫຸລີກຕໍ ອມໂຕຄຘໍ ໂຫຕິ ອມຕປຣາຍຓໍ ອມຕປຣິໂຍສານໍ. ວີຣິຍິນ຺ທ຺ຣິຍໍ…ເປ… ສຕິນ຺ທ຺ຣິຍໍ…ເປ… ສມາຘິນ຺ທ຺ຣິຍໍ…ເປ… ປຎ຺ຎິນ຺ທ຺ຣິຍໍ ຠາວິຕໍ ພຫຸລີກຕໍ ອມໂຕຄຘໍ ໂຫຕິ ອມຕປຣາຍຓໍ ອມຕປຣິໂຍສານໍ. ອິມານິ ປຎ຺ຈິນ຺ທ຺ຣິຍານິ ຠາວິຕານິ ພຫຸລີກຕານິ ອມໂຕຄຘານິ ໂຫນ຺ຕິ ອມຕປຣາຍຓານິ ອມຕປຣິໂຍສານານີ’’ຕິ.

ອຖ ໂຂ ພ຺ຣຫ຺ມາ ສຫມ຺ປຕິ ຠຄວໂຕ ເຈຕສາ ເຈໂຕປຣິວິຕກ຺ກມຎ຺ຎາຍ – ເສຍ຺ຍຖາປິ ນາມ ພລວາ ປຸຣິໂສ ສມິຎ຺ຊິຕໍ ວາ ພາຫໍ ປສາເຣຍ຺ຍ, ປສາຣິຕໍ ວາ ພາຫໍ ສມິຎ຺ເຊຍ຺ຍ; ເອວເມວ ພ຺ຣຫ຺ມໂລເກ ອນ຺ຕຣຫິໂຕ ຠຄວໂຕ ປຸຣໂຕ ປາຕຸຣໂຫສິ. ອຖ ໂຂ ພ຺ຣຫ຺ມາ ສຫມ຺ປຕິ ເອກໍສໍ ອຸຕ຺ຕຣາສງ຺ຄໍ ກຣິຕ຺ວາ ເຍນ ຠຄວາ ເຕນຎ຺ຊລິໍ ປຓາເມຕ຺ວາ ຠຄວນ຺ຕໍ ເອຕທໂວຈ – ‘‘ເອວເມຕໍ, ຠຄວາ, ເອວເມຕໍ ສຸຄຕ! ປຎ຺ຈິນ຺ທ຺ຣິຍານິ ຠາວິຕານິ ພຫຸລີກຕານິ ອມໂຕຄຘານິ ໂຫນ຺ຕິ ອມຕປຣາຍຓານິ ອມຕປຣິໂຍສານານິ. ກຕມານິ ປຎ຺ຈ? ສທ຺ຘິນ຺ທ຺ຣິຍໍ ຠາວິຕໍ ພຫຸລີກຕໍ ອມໂຕຄຘໍ ໂຫຕິ ອມຕປຣາຍຓໍ ອມຕປຣິໂຍສານໍ…ເປ… ປຎ຺ຎິນ຺ທ຺ຣິຍໍ ຠາວິຕໍ ພຫຸລີກຕໍ ອມໂຕຄຘໍ ໂຫຕິ ອມຕປຣາຍຓໍ ອມຕປຣິໂຍສານໍ. ອິມານິ ປຎ຺ຈິນ຺ທ຺ຣິຍານິ ຠາວິຕານິ ພຫຸລີກຕານິ ອມໂຕຄຘານິ ໂຫນ຺ຕິ ອມຕປຣາຍຓານິ ອມຕປຣິໂຍສານານິ’’.

‘‘ຠູຕປຸພ຺ພາຫໍ, ຠນ຺ເຕ, ກສ຺ສເປ ສມ຺ມາສມ຺ພຸທ຺ເຘ ພ຺ຣຫ຺ມຈຣິຍໍ ອຈຣິໍ. ຕຕ຺ຣປິ ມໍ ເອວໍ ຊານນ຺ຕິ – ‘ສຫໂກ ຠິກ຺ຂຸ, ສຫໂກ ຠິກ຺ຂູ’ຕິ. ໂສ ຂ຺ວາຫໍ, ຠນ຺ເຕ, ອິເມສໍເຍວ ປຎ຺ຈນ຺ນໍ ອິນ຺ທ຺ຣິຍານໍ ຠາວິຕຕ຺ຕາ ພຫຸລີກຕຕ຺ຕາ ກາເມສຸ ກາມຈ຺ຉນ຺ທໍ ວິຣາເຊຕ຺ວາ ກາຍສ຺ສ ເຠທາ ປຣໍ ມຣຓາ ສຸຄຕິໍ ພ຺ຣຫ຺ມໂລກໍ ອຸປປນ຺ໂນ. ຕຕ຺ຣປິ ມໍ ເອວໍ ຊານນ຺ຕິ – ‘ພ຺ຣຫ຺ມາ ສຫມ຺ປຕິ, ພ຺ຣຫ຺ມາ ສຫມ຺ປຕີ’’’ຕິ. ‘‘ເອວເມຕໍ, ຠຄວາ, ເອວເມຕໍ ສຸຄຕ! ອຫເມຕໍ ຊານາມິ, ອຫເມຕໍ ປສ຺ສາມິ ຍຖາ ອິມານິ ປຎ຺ຈິນ຺ທ຺ຣິຍານິ ຠາວິຕານິ ພຫຸລີກຕານິ ອມໂຕຄຘານິ ໂຫນ຺ຕິ ອມຕປຣາຍຓານິ ອມຕປຣິໂຍສານານີ’’ຕິ. ສຕ຺ຕມໍ.