໘. ສູກຣຂຕສຸຕ຺ຕໍ

໕໒໘. ເອກໍ ສມຍໍ ຠຄວາ ຣາຊຄເຫ ວິຫຣຕິ ຄິຊ຺ຌກູເຏ ປພ຺ພເຕ ສູກຣຂຕາຍໍ. ຕຕ຺ຣ ໂຂ ຠຄວາ ອາຍສ຺ມນ຺ຕໍ ສາຣິປຸຕ຺ຕໍ ອາມນ຺ເຕສິ – ‘‘ກິໍ ນຸ ໂຂ, ສາຣິປຸຕ຺ຕ, ອຕ຺ຖວສໍ ສມ຺ປສ຺ສມາໂນ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ [ປວຕ຺ເຕຕີຕິ (ສີ.)]? ‘‘ອນຸຕ຺ຕຣຎ຺ຫິ, ຠນ຺ເຕ, ໂຍຄກ຺ເຂມໍ ສມ຺ປສ຺ສມາໂນ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ. ‘‘ສາຘຸ ສາຘຸ, ສາຣິປຸຕ຺ຕ! ອນຸຕ຺ຕຣຎ຺ຫິ, ສາຣິປຸຕ຺ຕ, ໂຍຄກ຺ເຂມໍ ສມ຺ປສ຺ສມາໂນ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ.

‘‘ກຕໂມ ຈ, ສາຣິປຸຕ຺ຕ, ອນຸຕ຺ຕໂຣ ໂຍຄກ຺ເຂໂມ ຍໍ ສມ຺ປສ຺ສມາໂນ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ? ‘‘ອິຘ, ຠນ຺ເຕ, ຂີຓາສໂວ ຠິກ຺ຂຸ ສທ຺ຘິນ຺ທ຺ຣິຍໍ ຠາເວຕິ ອຸປສມຄາມິໍ ສມ຺ໂພຘຄາມິໍ, ວີຣິຍິນ຺ທ຺ຣິຍໍ ຠາເວຕິ…ເປ… ສຕິນ຺ທ຺ຣິຍໍ ຠາເວຕິ…ເປ… ສມາຘິນ຺ທ຺ຣິຍໍ ຠາເວຕິ…ເປ… ປຎ຺ຎິນ຺ທ຺ຣິຍໍ ຠາເວຕິ ອຸປສມຄາມິໍ ສມ຺ໂພຘຄາມິໍ. ອຍໍ ໂຂ, ຠນ຺ເຕ, ອນຸຕ຺ຕໂຣ ໂຍຄກ຺ເຂໂມ ຍໍ ສມ຺ປສ຺ສມາໂນ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ. ‘‘ສາຘຸ ສາຘຸ, ສາຣິປຸຕ຺ຕ! ເອໂສ ຫິ, ສາຣິປຸຕ຺ຕ, ອນຸຕ຺ຕໂຣ ໂຍຄກ຺ເຂໂມ ຍໍ ສມ຺ປສ຺ສມາໂນ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ.

‘‘ກຕໂມ ຈ, ສາຣິປຸຕ຺ຕ, ປຣມນິປຈ຺ຈກາໂຣ ຍໍ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ? ‘‘ອິຘ, ຠນ຺ເຕ, ຂີຓາສໂວ ຠິກ຺ຂຸ ສຕ຺ຖຣິ ສຄາຣໂວ ວິຫຣຕິ ສປ຺ປຕິສ຺ໂສ [ສປ຺ປຏິສ຺ໂສ (ສ຺ຍາ. ກໍ. ກ.)], ຘມ຺ເມ ສຄາຣໂວ ວິຫຣຕິ ສປ຺ປຕິສ຺ໂສ, ສງ຺ເຆ ສຄາຣໂວ ວິຫຣຕິ ສປ຺ປຕິສ຺ໂສ, ສິກ຺ຂາຍ ສຄາຣໂວ ວິຫຣຕິ ສປ຺ປຕິສ຺ໂສ, ສມາຘິສ຺ມິໍ ສຄາຣໂວ ວິຫຣຕິ ສປ຺ປຕິສ຺ໂສ. ອຍໍ ໂຂ, ຠນ຺ເຕ, ປຣມນິປຈ຺ຈກາໂຣ ຍໍ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ. ‘‘ສາຘຸ ສາຘຸ, ສາຣິປຸຕ຺ຕ! ເອໂສ ຫິ, ສາຣິປຸຕ຺ຕ, ປຣມນິປຈ຺ຈກາໂຣ ຍໍ ຂີຓາສໂວ ຠິກ຺ຂຸ ຕຖາຄເຕ ວາ ຕຖາຄຕສາສເນ ວາ ປຣມນິປຈ຺ຈກາຣໍ ປວຕ຺ຕມາໂນ ປວຕ຺ຕຕີ’’ຕິ. ອຏ຺ຐມໍ.