໙. ເສທກສຸຕ຺ຕໍ

໓໘໕. ເອກໍ ສມຍໍ ຠຄວາ ສຸມ຺ເຠສຸ ວິຫຣຕິ ເສທກໍ ນາມ ສຸມ຺ຠານໍ ນິຄໂມ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຠູຕປຸພ຺ພໍ, ຠິກ຺ຂເວ, ຈຓ຺ຑາລວໍສິໂກ ຈຓ຺ຑາລວໍສໍ ອຸສ຺ສາເປຕ຺ວາ ເມທກຖາລິກໍ ອນ຺ເຕວາສິໍ ອາມນ຺ເຕສິ – ‘ເອຫິ ຕ຺ວໍ, ສມ຺ມ ເມທກຖາລິເກ, ຈຓ຺ຑາລວໍສໍ ອຠິຣຸຫິຕ຺ວາ ມມ ອຸປຣິຂນ຺ເຘ ຕິຏ຺ຐາຫີ’ຕິ. ‘ເອວໍ, ອາຈຣິຍາ’ຕິ ໂຂ, ຠິກ຺ຂເວ, ເມທກຖາລິກາ ອນ຺ເຕວາສີ ຈຓ຺ຑາລວໍສິກສ຺ສ ປຏິສ຺ສຸຕ຺ວາ ຈຓ຺ຑາລວໍສໍ ອຠິຣຸຫິຕ຺ວາ ອາຈຣິຍສ຺ສ ອຸປຣິຂນ຺ເຘ ອຏ຺ຐາສິ. ອຖ ໂຂ, ຠິກ຺ຂເວ, ຈຓ຺ຑາລວໍສິໂກ ເມທກຖາລິກໍ ອນ຺ເຕວາສິໍ ເອຕທໂວຈ – ‘ຕ຺ວໍ, ສມ຺ມ ເມທກຖາລິເກ, ມມໍ ຣກ຺ຂ, ອຫໍ ຕໍ ຣກ຺ຂິສ຺ສາມິ. ເອວໍ ມຍໍ ອຎ຺ຎມຎ຺ຎໍ ຄຸຕ຺ຕາ ອຎ຺ຎມຎ຺ຎໍ ຣກ຺ຂິຕາ ສິປ຺ປານິ ເຈວ ທສ຺ເສສ຺ສາມ, ລາຠຎ຺ຈ [ລາເຠ ຈ (ສີ.)] ລຈ຺ຉາມ, ໂສຕ຺ຖິນາ ຈ ຈຓ຺ຑາລວໍສາ ໂອໂຣຫິສ຺ສາມາ’ຕິ. ເອວໍ ວຸຕ຺ເຕ, ຠິກ຺ຂເວ, ເມທກຖາລິກາ ອນ຺ເຕວາສີ ຈຓ຺ຑາລວໍສິກໍ ເອຕທໂວຈ – ‘ນ ໂຂ ປເນຕໍ, ອາຈຣິຍ, ເອວໍ ຠວິສ຺ສຕິ. ຕ຺ວໍ, ອາຈຣິຍ, ອຕ຺ຕານໍ ຣກ຺ຂ, ອຫໍ ອຕ຺ຕານໍ ຣກ຺ຂິສ຺ສາມິ. ເອວໍ ມຍໍ ອຕ຺ຕຄຸຕ຺ຕາ ອຕ຺ຕຣກ຺ຂິຕາ ສິປ຺ປານິ ເຈວ ທສ຺ເສສ຺ສາມ, ລາຠຎ຺ຈ ລຈ຺ຉາມ, ໂສຕ຺ຖິນາ ຈ ຈຓ຺ຑາລວໍສາ ໂອໂຣຫິສ຺ສາມາ’’’ຕິ. ‘‘ໂສ ຕຕ຺ຖ ຎາໂຍ’’ຕິ ຠຄວາ ເອຕທໂວຈ, ‘‘ຍຖາ ເມທກຖາລິກາ ອນ຺ເຕວາສີ ອາຈຣິຍໍ ອໂວຈ. ອຕ຺ຕານໍ, ຠິກ຺ຂເວ, ຣກ຺ຂິສ຺ສາມີຕິ ສຕິປຏ຺ຐານໍ ເສວິຕພ຺ພໍ; ປຣໍ ຣກ຺ຂິສ຺ສາມີຕິ ສຕິປຏ຺ຐານໍ ເສວິຕພ຺ພໍ. ອຕ຺ຕານໍ, ຠິກ຺ຂເວ, ຣກ຺ຂນ຺ໂຕ ປຣໍ ຣກ຺ຂຕິ, ປຣໍ ຣກ຺ຂນ຺ໂຕ ອຕ຺ຕານໍ ຣກ຺ຂຕິ’’.

‘‘ກຖຎ຺ຈ, ຠິກ຺ຂເວ, ອຕ຺ຕານໍ ຣກ຺ຂນ຺ໂຕ ປຣໍ ຣກ຺ຂຕິ? ອາເສວນາຍ, ຠາວນາຍ, ພຫຸລີກມ຺ເມນ – ເອວໍ ໂຂ, ຠິກ຺ຂເວ, ອຕ຺ຕານໍ ຣກ຺ຂນ຺ໂຕ ປຣໍ ຣກ຺ຂຕິ. ກຖຎ຺ຈ, ຠິກ຺ຂເວ, ປຣໍ ຣກ຺ຂນ຺ໂຕ ອຕ຺ຕານໍ ຣກ຺ຂຕິ? ຂນ຺ຕິຍາ, ອວິຫິໍສາຍ, ເມຕ຺ຕຈິຕ຺ຕຕາຍ, ອນຸທຍຕາຍ – ເອວໍ ໂຂ, ຠິກ຺ຂເວ, ປຣໍ ຣກ຺ຂນ຺ໂຕ ອຕ຺ຕານໍ ຣກ຺ຂຕິ. ອຕ຺ຕານໍ, ຠິກ຺ຂເວ, ຣກ຺ຂິສ຺ສາມີຕິ ສຕິປຏ຺ຐານໍ ເສວິຕພ຺ພໍ; ປຣໍ ຣກ຺ຂິສ຺ສາມີຕິ ສຕິປຏ຺ຐານໍ ເສວິຕພ຺ພໍ. ອຕ຺ຕານໍ, ຠິກ຺ຂເວ, ຣກ຺ຂນ຺ໂຕ ປຣໍ ຣກ຺ຂຕິ, ປຣໍ ຣກ຺ຂນ຺ໂຕ ອຕ຺ຕານໍ ຣກ຺ຂຕີ’’ຕິ. ນວມໍ.