໘. ທຸຕິຍສູຣິຍສຸຕ຺ຕໍ

໑໑໐໘. ‘‘ຍາວກີວຎ຺ຈ, ຠິກ຺ຂເວ, ຈນ຺ທິມສູຣິຍາ ໂລເກ ນຸປ຺ປຊ຺ຊນ຺ຕິ, ເນວ ຕາວ ມຫໂຕ ອາໂລກສ຺ສ ປາຕຸຠາໂວ ໂຫຕິ ມຫໂຕ ໂອຠາສສ຺ສ. ອນ຺ຘຕມໍ ຕທາ ໂຫຕິ ອນ຺ຘກາຣຕິມິສາ. ເນວ ຕາວ ຣຕ຺ຕິນ຺ທິວາ [ຣຕ຺ຕິທິວາ (ກ.)] ປຎ຺ຎາຍນ຺ຕິ, ນ ມາສທ຺ຘມາສາ ປຎ຺ຎາຍນ຺ຕິ, ນ ອຸຕຸສໍວຈ຺ຉຣາ ປຎ຺ຎາຍນ຺ຕິ.

‘‘ຍໂຕ ຈ ໂຂ, ຠິກ຺ຂເວ, ຈນ຺ທິມສູຣິຍາ ໂລເກ ອຸປ຺ປຊ຺ຊນ຺ຕິ, ອຖ ມຫໂຕ ອາໂລກສ຺ສ ປາຕຸຠາໂວ ໂຫຕິ ມຫໂຕ ໂອຠາສສ຺ສ. ເນວ ອນ຺ຘກາຣຕມໍ ຕທາ ໂຫຕິ ນ ອນ຺ຘກາຣຕິມິສາ. ອຖ ຣຕ຺ຕິນ຺ທິວາ ປຎ຺ຎາຍນ຺ຕິ, ມາສທ຺ຘມາສາ ປຎ຺ຎາຍນ຺ຕິ, ອຸຕຸສໍວຈ຺ຉຣາ ປຎ຺ຎາຍນ຺ຕິ. ເອວເມວ ໂຂ, ຠິກ຺ຂເວ, ຍາວກີວຎ຺ຈ ຕຖາຄໂຕ ໂລເກ ນຸປ຺ປຊ຺ຊຕິ ອຣຫໍ ສມ຺ມາສມ຺ພຸທ຺ໂຘ, ເນວ ຕາວ ມຫໂຕ ອາໂລກສ຺ສ ປາຕຸຠາໂວ ໂຫຕິ ມຫໂຕ ໂອຠາສສ຺ສ. ອນ຺ຘຕມໍ ຕທາ ໂຫຕິ ອນ຺ຘກາຣຕິມິສາ. ເນວ ຕາວ ຈຕຸນ຺ນໍ ອຣິຍສຈ຺ຈານໍ ອາຈິກ຺ຂຓາ ໂຫຕິ ເທສນາ ປຎ຺ຎາປນາ ປຏ຺ຐປນາ ວິວຣຓາ ວິຠຊນາ ອຸຕ຺ຕານີກມ຺ມໍ.

‘‘ຍໂຕ ຈ ໂຂ, ຠິກ຺ຂເວ, ຕຖາຄໂຕ ໂລເກ ອຸປ຺ປຊ຺ຊຕິ ອຣຫໍ ສມ຺ມາສມ຺ພຸທ຺ໂຘ, ອຖ ມຫໂຕ ອາໂລກສ຺ສ ປາຕຸຠາໂວ ໂຫຕິ ມຫໂຕ ໂອຠາສສ຺ສ. ເນວ ອນ຺ຘຕມໍ ຕທາ ໂຫຕິ ນ ອນ຺ຘກາຣຕິມິສາ. ອຖ ໂຂ ຈຕຸນ຺ນໍ ອຣິຍສຈ຺ຈານໍ ອາຈິກ຺ຂຓາ ໂຫຕິ ເທສນາ ປຎ຺ຎາປນາ ປຏ຺ຐປນາ ວິວຣຓາ ວິຠຊນາ ອຸຕ຺ຕານີກມ຺ມໍ. ກຕເມສໍ ຈຕຸນ຺ນໍ? ທຸກ຺ຂສ຺ສ ອຣິຍສຈ຺ຈສ຺ສ…ເປ… ທຸກ຺ຂນິໂຣຘຄາມິນິຍາ ປຏິປທາຍ ອຣິຍສຈ຺ຈສ຺ສ.

‘‘ຕສ຺ມາຕິຫ, ຠິກ຺ຂເວ, ‘ອິທໍ ທຸກ຺ຂ’ນ຺ຕິ ໂຍໂຄ ກຣຓີໂຍ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ໂຍໂຄ ກຣຓີໂຍ’’ຕິ. ອຏ຺ຐມໍ.