໖. ປຐມອນາຖປິຓ຺ຑິກສຸຕ຺ຕໍ

໑໐໒໒. ສາວຕ຺ຖິນິທານໍ. ເຕນ ໂຂ ປນ ສມເຍນ ອນາຖປິຓ຺ຑິໂກ ຄຫປຕິ ອາພາຘິໂກ ໂຫຕິ ທຸກ຺ຂິໂຕ ພາຬ຺ຫຄິລາໂນ. ອຖ ໂຂ ອນາຖປິຓ຺ຑິໂກ ຄຫປຕິ ອຎ຺ຎຕຣໍ ປຸຣິສໍ ອາມນ຺ເຕສິ – ‘‘ເອຫິ ຕ຺ວໍ, ອມ຺ໂຠ ປຸຣິສ, ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມ; ອຸປສງ຺ກມິຕ຺ວາ ມມ ວຈເນນ ອາຍສ຺ມໂຕ ສາຣິປຸຕ຺ຕສ຺ສ ປາເທ ສິຣສາ ວນ຺ທ – ‘ອນາຖປິຓ຺ຑິໂກ, ຠນ຺ເຕ, ຄຫປຕິ ອາພາຘິໂກ ທຸກ຺ຂິໂຕ ພາຬ຺ຫຄິລາໂນ. ໂສ ອາຍສ຺ມໂຕ ສາຣິປຸຕ຺ຕສ຺ສ ປາເທ ສິຣສາ ວນ຺ທຕີ’ຕິ. ເອວຎ຺ຈ ວເທຫິ – ‘ສາຘຸ ກິຣ, ຠນ຺ເຕ, ອາຍສ຺ມາ ສາຣິປຸຕ຺ໂຕ ເຍນ ອນາຖປິຓ຺ຑິກສ຺ສ ຄຫປຕິສ຺ສ ນິເວສນໍ ເຕນຸປສງ຺ກມຕຸ ອນຸກມ຺ປໍ ອຸປາທາຍາ’’’ຕິ.

‘‘ເອວໍ, ຠນ຺ເຕ’’ຕິ ໂຂ ໂສ ປຸຣິໂສ ອນາຖປິຓ຺ຑິກສ຺ສ ຄຫປຕິສ຺ສ ປຏິສ຺ສຸຕ຺ວາ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂສ ປຸຣິໂສ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ –

‘‘ອນາຖປິຓ຺ຑິໂກ, ຠນ຺ເຕ, ຄຫປຕິ ອາພາຘິໂກ ທຸກ຺ຂິໂຕ ພາຬ຺ຫຄິລາໂນ. ໂສ ອາຍສ຺ມໂຕ ສາຣິປຸຕ຺ຕສ຺ສ ປາເທ ສິຣສາ ວນ຺ທຕິ. ເອວຎ຺ຈ ວທຕິ – ‘ສາຘຸ ກິຣ, ຠນ຺ເຕ, ອາຍສ຺ມາ ສາຣິປຸຕ຺ໂຕ ເຍນ ອນາຖປິຓ຺ຑິກສ຺ສ ຄຫປຕິສ຺ສ ນິເວສນໍ ເຕນຸປສງ຺ກມຕຸ ອນຸກມ຺ປໍ ອຸປາທາຍາ’’’ຕິ. ອຘິວາເສສິ ໂຂ ອາຍສ຺ມາ ສາຣິປຸຕ຺ໂຕ ຕຸຓ຺ຫີຠາເວນ.

ອຖ ໂຂ ອາຍສ຺ມາ ສາຣິປຸຕ຺ໂຕ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ອາຍສ຺ມຕາ ອານນ຺ເທນ ປຈ຺ຉາສມເຓນ ເຍນ ອນາຖປິຓ຺ຑິກສ຺ສ ຄຫປຕິສ຺ສ ນິເວສນໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ນິສຊ຺ຊ ໂຂ ອາຍສ຺ມາ ສາຣິປຸຕ຺ໂຕ ອນາຖປິຓ຺ຑິກໍ ຄຫປຕິໍ ເອຕທໂວຈ – ‘‘ກຈ຺ຈິ ເຕ, ຄຫປຕິ, ຂມນີຍໍ ກຈ຺ຈິ ຍາປນີຍໍ? ກຈ຺ຈິ ທຸກ຺ຂາ ເວທນາ ປຏິກ຺ກມນ຺ຕິ, ໂນ ອຠິກ຺ກມນ຺ຕິ; ປຏິກ຺ກໂມສານໍ ປຎ຺ຎາຍຕິ, ໂນ ອຠິກ຺ກໂມ’’ຕິ? ‘‘ນ ເມ, ຠນ຺ເຕ, ຂມນີຍໍ, ນ ຍາປນີຍໍ. ພາຬ຺ຫາ ເມ ທຸກ຺ຂາ ເວທນາ ອຠິກ຺ກມນ຺ຕິ, ໂນ ປຏິກ຺ກມນ຺ຕິ; ອຠິກ຺ກໂມສານໍ ປຎ຺ຎາຍຕິ, ໂນ ປຏິກ຺ກໂມ’’ຕິ.

‘‘ຍຖາຣູເປນ ໂຂ, ຄຫປຕິ, ພຸທ຺ເຘ ອປ຺ປສາເທນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ ຕຖາຣູໂປ ເຕ ພຸທ຺ເຘ ອປ຺ປສາໂທ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ພຸທ຺ເຘ ອເວຈ຺ຈປ຺ປສາໂທ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຕຎ຺ຈ ປນ ເຕ ພຸທ຺ເຘ ອເວຈ຺ຈປ຺ປສາທໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ຘມ຺ເມ ອປ຺ປສາເທນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູໂປ ເຕ ຘມ຺ເມ ອປ຺ປສາໂທ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ຘມ຺ເມ ອເວຈ຺ຈປ຺ປສາໂທ – ສ຺ວາກ຺ຂາໂຕ ຠຄວຕາ ຘມ຺ໂມ…ເປ… ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີຕິ. ຕຎ຺ຈ ປນ ເຕ ຘມ຺ເມ ອເວຈ຺ຈປ຺ປສາທໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ສງ຺ເຆ ອປ຺ປສາເທນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູໂປ ເຕ ສງ຺ເຆ ອປ຺ປສາໂທ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສງ຺ເຆ ອເວຈ຺ຈປ຺ປສາໂທ – ສຸປ຺ປຏິປນ຺ໂນ ຠຄວໂຕ ສາວກສງ຺ໂຆ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາຕິ. ຕຎ຺ຈ ປນ ເຕ ສງ຺ເຆ ອເວຈ຺ຈປ຺ປສາທໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ທຸສ຺ສີລ຺ເຍນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູປໍ ເຕ ທຸສ຺ສີລ຺ຍໍ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ອຣິຍກນ຺ຕານິ ສີລານິ…ເປ… ສມາຘິສໍວຕ຺ຕນິການິ. ຕານິ ຈ ປນ ເຕ ອຣິຍກນ຺ຕານິ ສີລານິ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູປາຍ ໂຂ, ຄຫປຕິ, ມິຈ຺ຉາທິຏ຺ຐິຍາ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູປາ ເຕ ມິຈ຺ຉາທິຏ຺ຐິ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາທິຏ຺ຐິ. ຕຎ຺ຈ ປນ ເຕ ສມ຺ມາທິຏ຺ຐິໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ມິຈ຺ຉາສງ຺ກປ຺ເປນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູໂປ ເຕ ມິຈ຺ຉາສງ຺ກປ຺ໂປ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາສງ຺ກປ຺ໂປ. ຕຎ຺ຈ ປນ ເຕ ສມ຺ມາສງ຺ກປ຺ປໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູປາຍ ໂຂ, ຄຫປຕິ, ມິຈ຺ຉາວາຈາຍ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູປາ ເຕ ມິຈ຺ຉາວາຈາ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາວາຈາ. ຕຎ຺ຈ ປນ ເຕ ສມ຺ມາວາຈໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ມິຈ຺ຉາກມ຺ມນ຺ເຕນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູໂປ ເຕ ມິຈ຺ຉາກມ຺ມນ຺ໂຕ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາກມ຺ມນ຺ໂຕ. ຕຎ຺ຈ ປນ ເຕ ສມ຺ມາກມ຺ມນ຺ຕໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ມິຈ຺ຉາອາຊີເວນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູໂປ ເຕ ມິຈ຺ຉາອາຊີໂວ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາອາຊີໂວ. ຕຎ຺ຈ ປນ ເຕ ສມ຺ມາອາຊີວໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ມິຈ຺ຉາວາຍາເມນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູໂປ ເຕ ມິຈ຺ຉາວາຍາໂມ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາວາຍາໂມ. ຕຎ຺ຈ ປນ ເຕ ສມ຺ມາວາຍາມໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູປາຍ ໂຂ, ຄຫປຕິ, ມິຈ຺ຉາສຕິຍາ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູປາ ເຕ ມິຈ຺ຉາສຕິ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາສຕິ. ຕຎ຺ຈ ປນ ເຕ ສມ຺ມາສຕິໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ມິຈ຺ຉາສມາຘິນາ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູໂປ ເຕ ມິຈ຺ຉາສມາຘິ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາສມາຘິ. ຕຎ຺ຈ ປນ ເຕ ສມ຺ມາສມາຘິໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູເປນ ໂຂ, ຄຫປຕິ, ມິຈ຺ຉາຎາເຓນ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູປໍ ເຕ ມິຈ຺ຉາຎາຓໍ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາຎາຓໍ. ຕຎ຺ຈ ປນ ເຕ ສມ຺ມາຎາຓໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍ.

‘‘ຍຖາຣູປາຍ ໂຂ, ຄຫປຕິ, ມິຈ຺ຉາວິມຸຕ຺ຕິຍາ ສມນ຺ນາຄໂຕ ອສ຺ສຸຕວາ ປຸຖຸຊ຺ຊໂນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ, ຕຖາຣູປາ ເຕ ມິຈ຺ຉາວິມຸຕ຺ຕິ ນຕ຺ຖິ. ອຕ຺ຖິ ຈ ໂຂ ເຕ, ຄຫປຕິ, ສມ຺ມາວິມຸຕ຺ຕິ. ຕຎ຺ຈ ປນ ເຕ ສມ຺ມາວິມຸຕ຺ຕິໍ ອຕ຺ຕນິ ສມນຸປສ຺ສໂຕ ຐານໂສ ເວທນາ ປຏິປ຺ປສ຺ສມ຺ເຠຍ຺ຍາ’’ຕິ.

ອຖ ໂຂ ອນາຖປິຓ຺ຑິກສ຺ສ ຄຫປຕິສ຺ສ ຐານໂສ ເວທນາ ປຏິປ຺ປສ຺ສມ຺ຠິໍສຸ. ອຖ ໂຂ ອນາຖປິຓ຺ຑິໂກ ຄຫປຕິ ອາຍສ຺ມນ຺ຕຎ຺ຈ ສາຣິປຸຕ຺ຕໍ ອາຍສ຺ມນ຺ຕຎ຺ຈ ອານນ຺ທໍ ສເກເນວ ຖາລິປາເກນ ປຣິວິສິ. ອຖ ໂຂ ອນາຖປິຓ຺ຑິໂກ ຄຫປຕິ ອາຍສ຺ມນ຺ຕໍ ສາຣິປຸຕ຺ຕໍ ຠຸຕ຺ຕາວິໍ ໂອນີຕປຕ຺ຕປາຓິໍ ອຎ຺ຎຕຣໍ ນີຈາສນໍ ຄເຫຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອນາຖປິຓ຺ຑິກໍ ຄຫປຕິໍ ອາຍສ຺ມາ ສາຣິປຸຕ຺ໂຕ ອິມາຫິ ຄາຖາຫິ ອນຸໂມທິ –

‘‘ຍສ຺ສ ສທ຺ຘາ ຕຖາຄເຕ, ອຈລາ ສຸປ຺ປຕິຏ຺ຐິຕາ;

ສີລຎ຺ຈ ຍສ຺ສ ກລ຺ຍາຓໍ, ອຣິຍກນ຺ຕໍ ປສໍສິຕໍ.

‘‘ສງ຺ເຆ ປສາໂທ ຍສ຺ສຕ຺ຖິ, ອຸຊຸຠູຕຎ຺ຈ ທສ຺ສນໍ;

ອທລິທ຺ໂທຕິ [ອທຬິທ຺ໂທຕິ (ສີ. ສ຺ຍາ. ກໍ.)] ຕໍ ອາຫຸ, ອໂມຆໍ ຕສ຺ສ ຊີວິຕໍ.

‘‘ຕສ຺ມາ ສທ຺ຘຎ຺ຈ ສີລຎ຺ຈ, ປສາທໍ ຘມ຺ມທສ຺ສນໍ;

ອນຸຍຸຎ຺ເຊຖ ເມຘາວີ, ສຣໍ ພຸທ຺ຘານສາສນ’’ນ຺ຕິ.

ອຖ ໂຂ ອາຍສ຺ມາ ສາຣິປຸຕ຺ໂຕ ອນາຖປິຓ຺ຑິກໍ ຄຫປຕິໍ ອິມາຫິ ຄາຖາຫິ ອນຸໂມທິຕ຺ວາ ອຸຏ຺ຐາຍາສນາ ປກ຺ກາມິ.

ອຖ ໂຂ ອາຍສ຺ມາ ອານນ຺ໂທ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ອານນ຺ທໍ ຠຄວາ ເອຕທໂວຈ – ‘‘ຫນ຺ທ! ກຸໂຕ ນຸ ຕ຺ວໍ, ອານນ຺ທ, ອາຄຈ຺ຉສິ ທິວາທິວສ຺ສາ’’ຕິ? ‘‘ອາຍສ຺ມຕາ, ຠນ຺ເຕ, ສາຣິປຸຕ຺ເຕນ ອນາຖປິຓ຺ຑິໂກ ຄຫປຕິ ອິມິນາ ຈ ອິມິນາ ຈ ໂອວາເທນ ໂອວທິໂຕ’’ຕິ. ‘‘ປຓ຺ຑິໂຕ, ອານນ຺ທ, ສາຣິປຸຕ຺ໂຕ; ມຫາປຎ຺ໂຎ, ອານນ຺ທ, ສາຣິປຸຕ຺ໂຕ, ຍຕ຺ຣ ຫິ ນາມ ຈຕ຺ຕາຣິ ໂສຕາປຕ຺ຕິຍງ຺ຄານິ ທສຫາກາເຣຫິ ວິຠຊິສ຺ສຕີ’’ຕິ. ຉຏ຺ຐໍ.