໗. ທຸຕິຍອນາຖປິຓ຺ຑິກສຸຕ຺ຕໍ

໑໐໒໓. ສາວຕ຺ຖິນິທານໍ. ເຕນ ໂຂ ປນ ສມເຍນ ອນາຖປິຓ຺ຑິໂກ ຄຫປຕິ ອາພາຘິໂກ ໂຫຕິ ທຸກ຺ຂິໂຕ ພາຬ຺ຫຄິລາໂນ. ອຖ ໂຂ ອນາຖປິຓ຺ຑິໂກ ຄຫປຕິ ອຎ຺ຎຕຣໍ ປຸຣິສໍ ອາມນ຺ເຕສິ – ‘‘ເອຫິ ຕ຺ວໍ, ອມ຺ໂຠ ປຸຣິສ, ເຍນາຍສ຺ມາ ອານນ຺ໂທ ເຕນຸປສງ຺ກມ; ອຸປສງ຺ກມິຕ຺ວາ ມມ ວຈເນນ ອາຍສ຺ມໂຕ ອານນ຺ທສ຺ສ ປາເທ ສິຣສາ ວນ຺ທ – ‘ອນາຖປິຓ຺ຑິໂກ, ຠນ຺ເຕ, ຄຫປຕິ ອາພາຘິໂກ ທຸກ຺ຂິໂຕ ພາຬ຺ຫຄິລາໂນ. ໂສ ອາຍສ຺ມໂຕ ອານນ຺ທສ຺ສ ປາເທ ສິຣສາ ວນ຺ທຕີ’ຕິ. ເອວຎ຺ຈ ວເທຫິ – ‘ສາຘຸ ກິຣ, ຠນ຺ເຕ, ອາຍສ຺ມາ ອານນ຺ໂທ ເຍນ ອນາຖປິຓ຺ຑິກສ຺ສ ຄຫປຕິສ຺ສ ນິເວສນໍ ເຕນຸປສງ຺ກມຕຸ ອນຸກມ຺ປໍ ອຸປາທາຍາ’’’ຕິ.

‘‘ເອວໍ, ຠນ຺ເຕ’’ຕິ ໂຂ ໂສ ປຸຣິໂສ ອນາຖປິຓ຺ຑິກສ຺ສ ຄຫປຕິສ຺ສ ປຏິສ຺ສຸຕ຺ວາ ເຍນາຍສ຺ມາ ອານນ຺ໂທ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອານນ຺ທໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ໂສ ປຸຣິໂສ ອາຍສ຺ມນ຺ຕໍ ອານນ຺ທໍ ເອຕທໂວຈ – ‘‘ອນາຖປິຓ຺ຑິໂກ, ຠນ຺ເຕ, ຄຫປຕິ ອາພາຘິໂກ ທຸກ຺ຂິໂຕ ພາຬ຺ຫຄິລາໂນ. ໂສ ອາຍສ຺ມໂຕ ອານນ຺ທສ຺ສ ປາເທ ສິຣສາ ວນ຺ທຕິ. ເອວຎ຺ຈ ວທຕິ – ‘ສາຘຸ ກິຣ, ຠນ຺ເຕ, ອາຍສ຺ມາ ອານນ຺ໂທ ເຍນ ອນາຖປິຓ຺ຑິກສ຺ສ ຄຫປຕິສ຺ສ ນິເວສນໍ ເຕນຸປສງ຺ກມຕຸ ອນຸກມ຺ປໍ ອຸປາທາຍາ’’’ຕິ. ອຘິວາເສສິ ໂຂ ອາຍສ຺ມາ ອານນ຺ໂທ ຕຸຓ຺ຫີຠາເວນ.

ອຖ ໂຂ ອາຍສ຺ມາ ອານນ຺ໂທ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ອນາຖປິຓ຺ຑິກສ຺ສ ຄຫປຕິສ຺ສ ນິເວສນໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ນິສຊ຺ຊ ໂຂ ອາຍສ຺ມາ ອານນ຺ໂທ ອນາຖປິຓ຺ຑິກໍ ຄຫປຕິໍ ເອຕທໂວຈ – ‘‘ກຈ຺ຈິ ເຕ, ຄຫປຕິ, ຂມນີຍໍ, ກຈ຺ຈິ ຍາປນີຍໍ? ກຈ຺ຈິ ທຸກ຺ຂາ ເວທນາ ປຏິກ຺ກມນ຺ຕິ, ໂນ ອຠິກ຺ກມນ຺ຕິ; ປຏິກ຺ກໂມສານໍ ປຎ຺ຎາຍຕິ, ໂນ ອຠິກ຺ກໂມ’’ຕິ? ‘‘ນ ເມ, ຠນ຺ເຕ, ຂມນີຍໍ ນ ຍາປນີຍໍ. ພາຬ຺ຫາ ເມ ທຸກ຺ຂາ ເວທນາ ອຠິກ຺ກມນ຺ຕິ, ໂນ ປຏິກ຺ກມນ຺ຕິ; ອຠິກ຺ກໂມສານໍ ປຎ຺ຎາຍຕິ, ໂນ ປຏິກ຺ກໂມ’’ຕິ.

‘‘ຈຕູຫິ ໂຂ, ຄຫປຕິ, ຘມ຺ເມຫິ ສມນ຺ນາຄຕສ຺ສ ອສ຺ສຸຕວໂຕ ປຸຖຸຊ຺ຊນສ຺ສ ໂຫຕິ ອຸຕ຺ຕາໂສ, ໂຫຕິ ຉມ຺ຠິຕຕ຺ຕໍ, ໂຫຕິ ສມ຺ປຣາຍິກໍ ມຣຓຠຍໍ. ກຕເມຫິ ຈຕູຫິ? ອິຘ, ຄຫປຕິ, ອສ຺ສຸຕວາ ປຸຖຸຊ຺ຊໂນ ພຸທ຺ເຘ ອປ຺ປສາເທນ ສມນ຺ນາຄໂຕ ໂຫຕິ. ຕຎ຺ຈ ປນສ຺ສ ພຸທ຺ເຘ ອປ຺ປສາທໍ ອຕ຺ຕນິ ສມນຸປສ຺ສໂຕ ໂຫຕິ ອຸຕ຺ຕາໂສ, ໂຫຕິ ຉມ຺ຠິຕຕ຺ຕໍ, ໂຫຕິ ສມ຺ປຣາຍິກໍ ມຣຓຠຍໍ.

‘‘ປຸນ ຈປຣໍ, ຄຫປຕິ, ອສ຺ສຸຕວາ ປຸຖຸຊ຺ຊໂນ ຘມ຺ເມ ອປ຺ປສາເທນ ສມນ຺ນາຄໂຕ ໂຫຕິ. ຕຎ຺ຈ ປນສ຺ສ ຘມ຺ເມ ອປ຺ປສາທໍ ອຕ຺ຕນິ ສມນຸປສ຺ສໂຕ ໂຫຕິ ອຸຕ຺ຕາໂສ, ໂຫຕິ ຉມ຺ຠິຕຕ຺ຕໍ, ໂຫຕິ ສມ຺ປຣາຍິກໍ ມຣຓຠຍໍ.

‘‘ປຸນ ຈປຣໍ, ຄຫປຕິ, ອສ຺ສຸຕວາ ປຸຖຸຊ຺ຊໂນ ສງ຺ເຆ ອປ຺ປສາເທນ ສມນ຺ນາຄໂຕ ໂຫຕິ. ຕຎ຺ຈ ປນສ຺ສ ສງ຺ເຆ ອປ຺ປສາທໍ ອຕ຺ຕນິ ສມນຸປສ຺ສໂຕ ໂຫຕິ ອຸຕ຺ຕາໂສ, ໂຫຕິ ຉມ຺ຠິຕຕ຺ຕໍ, ໂຫຕິ ສມ຺ປຣາຍິກໍ ມຣຓຠຍໍ.

‘‘ປຸນ ຈປຣໍ, ຄຫປຕິ, ອສ຺ສຸຕວາ ປຸຖຸຊ຺ຊໂນ ທຸສ຺ສີລ຺ເຍນ ສມນ຺ນາຄໂຕ ໂຫຕິ. ຕຎ຺ຈ ປນສ຺ສ ທຸສ຺ສີລ຺ຍໍ ອຕ຺ຕນິ ສມນຸປສ຺ສໂຕ ໂຫຕິ ອຸຕ຺ຕາໂສ, ໂຫຕິ ຉມ຺ຠິຕຕ຺ຕໍ, ໂຫຕິ ສມ຺ປຣາຍິກໍ ມຣຓຠຍໍ. ອິເມຫິ ໂຂ, ຄຫປຕິ, ຈຕູຫິ ຘມ຺ເມຫິ ສມນ຺ນາຄຕສ຺ສ ອສ຺ສຸຕວໂຕ ປຸຖຸຊ຺ຊນສ຺ສ ໂຫຕິ ອຸຕ຺ຕາໂສ, ໂຫຕິ ຉມ຺ຠິຕຕ຺ຕໍ, ໂຫຕິ ສມ຺ປຣາຍິກໍ ມຣຓຠຍໍ.

‘‘ຈຕູຫິ ໂຂ, ຄຫປຕິ, ຘມ຺ເມຫິ ສມນ຺ນາຄຕສ຺ສ ສຸຕວໂຕ ອຣິຍສາວກສ຺ສ ນ ໂຫຕິ ອຸຕ຺ຕາໂສ, ນ ໂຫຕິ ຉມ຺ຠິຕຕ຺ຕໍ, ນ ໂຫຕິ ສມ຺ປຣາຍິກໍ ມຣຓຠຍໍ. ກຕເມຫິ ຈຕູຫິ? ອິຘ, ຄຫປຕິ, ສຸຕວາ ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຕຎ຺ຈ ປນສ຺ສ ພຸທ຺ເຘ ອເວຈ຺ຈປ຺ປສາທໍ ອຕ຺ຕນິ ສມນຸປສ຺ສໂຕ ນ ໂຫຕິ ອຸຕ຺ຕາໂສ, ນ ໂຫຕິ ຉມ຺ຠິຕຕ຺ຕໍ, ນ ໂຫຕິ ສມ຺ປຣາຍິກໍ ມຣຓຠຍໍ.

‘‘ປຸນ ຈປຣໍ, ຄຫປຕິ, ສຸຕວາ ອຣິຍສາວໂກ ຘມ຺ເມ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ສ຺ວາກ຺ຂາໂຕ ຠຄວຕາ ຘມ຺ໂມ…ເປ… ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີຕິ. ຕຎ຺ຈ ປນສ຺ສ ຘມ຺ເມ ອເວຈ຺ຈປ຺ປສາທໍ ອຕ຺ຕນິ ສມນຸປສ຺ສໂຕ ນ ໂຫຕິ ອຸຕ຺ຕາໂສ, ນ ໂຫຕິ ຉມ຺ຠິຕຕ຺ຕໍ, ນ ໂຫຕິ ສມ຺ປຣາຍິກໍ ມຣຓຠຍໍ.

‘‘ປຸນ ຈປຣໍ, ຄຫປຕິ, ສຸຕວາ ອຣິຍສາວໂກ ສງ຺ເຆ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ສຸປ຺ປຏິປນ຺ໂນ ຠຄວໂຕ ສາວກສງ຺ໂຆ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາຕິ. ຕຎ຺ຈ ປນສ຺ສ ສງ຺ເຆ ອເວຈ຺ຈປ຺ປສາທໍ ອຕ຺ຕນິ ສມນຸປສ຺ສໂຕ ນ ໂຫຕິ ອຸຕ຺ຕາໂສ, ນ ໂຫຕິ ຉມ຺ຠິຕຕ຺ຕໍ, ນ ໂຫຕິ ສມ຺ປຣາຍິກໍ ມຣຓຠຍໍ.

‘‘ປຸນ ຈປຣໍ, ຄຫປຕິ, ສຸຕວາ ອຣິຍສາວໂກ ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ຕານິ ຈ ປນສ຺ສ ອຣິຍກນ຺ຕານິ ສີລານິ ອຕ຺ຕນິ ສມນຸປສ຺ສໂຕ ນ ໂຫຕິ ອຸຕ຺ຕາໂສ, ນ ໂຫຕິ ຉມ຺ຠິຕຕ຺ຕໍ, ນ ໂຫຕິ ສມ຺ປຣາຍິກໍ ມຣຓຠຍໍ. ອິເມຫິ ໂຂ, ຄຫປຕິ, ຈຕູຫິ ຘມ຺ເມຫິ ສມນ຺ນາຄຕສ຺ສ ສຸຕວໂຕ ອຣິຍສາວກສ຺ສ ນ ໂຫຕິ ອຸຕ຺ຕາໂສ, ນ ໂຫຕິ ຉມ຺ຠິຕຕ຺ຕໍ, ນ ໂຫຕິ ສມ຺ປຣາຍິກໍ ມຣຓຠຍ’’ນ຺ຕິ.

‘‘ນາຫໍ, ຠນ຺ເຕ ອານນ຺ທ, ຠາຍາມິ. ກ຺ຍາຫໍ ຠາຍິສ຺ສາມິ! ອຫຎ຺ຫິ, ຠນ຺ເຕ, ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫມິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ ອເວຈ຺ຈປ຺ປສາເທນ ສມນ຺ນາຄໂຕ ໂຫມິ – ສຸປ຺ປຏິປນ຺ໂນ ຠຄວໂຕ ສາວກສງ຺ໂຆ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາຕິ. ຍານິ ຈິມານິ, ຠນ຺ເຕ, ຠຄວຕາ ຄິຫິສາມີຈິການິ ສິກ຺ຂາປທານິ ເທສິຕານິ, ນາຫໍ ເຕສໍ ກິຎ຺ຈິ ອຕ຺ຕນິ ຂຓ຺ຑໍ ສມນຸປສ຺ສາມີ’’ຕິ. ‘‘ລາຠາ ເຕ, ຄຫປຕິ, ສຸລທ຺ຘໍ ເຕ, ຄຫປຕິ! ໂສຕາປຕ຺ຕິຜລໍ ຕຍາ, ຄຫປຕິ, ພ຺ຍາກຕ’’ນ຺ຕິ. ສຕ຺ຕມໍ.