໑໐. ນນ຺ທກລິຈ຺ຉວິສຸຕ຺ຕໍ

໑໐໒໖. ເອກໍ ສມຍໍ ຠຄວາ ເວສາລິຍໍ ວິຫຣຕິ ມຫາວເນ ກູຏາຄາຣສາລາຍໍ. ອຖ ໂຂ ນນ຺ທໂກ ລິຈ຺ຉວິມຫາມຕ຺ໂຕ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ນນ຺ທກໍ ລິຈ຺ຉວິມຫາມຕ຺ຕໍ ຠຄວາ ເອຕທໂວຈ –

‘‘ຈຕູຫິ ໂຂ, ນນ຺ທກ, ຘມ຺ເມຫິ ສມນ຺ນາຄໂຕ ອຣິຍສາວໂກ ໂສຕາປນ຺ໂນ ໂຫຕິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ. ກຕເມຫິ ຈຕູຫິ? ອິຘ, ນນ຺ທກ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ອິເມຫິ ໂຂ, ນນ຺ທກ, ຈຕູຫິ ຘມ຺ເມຫິ ສມນ຺ນາຄໂຕ ອຣິຍສາວໂກ ໂສຕາປນ຺ໂນ ໂຫຕິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ.

‘‘ອິເມຫິ ຈ ປນ, ນນ຺ທກ, ຈຕູຫິ ຘມ຺ເມຫິ ສມນ຺ນາຄໂຕ ອຣິຍສາວໂກ ອາຍຸນາ ສໍຍຸຕ຺ໂຕ ໂຫຕິ ທິພ຺ເພນປິ ມານຸເສນປິ; ວຓ຺ເຓນ ສໍຍຸຕ຺ໂຕ ໂຫຕິ ທິພ຺ເພນປິ ມານຸເສນປິ; ສຸເຂນ ສໍຍຸຕ຺ໂຕ ໂຫຕິ ທິພ຺ເພນປິ ມານຸເສນປິ; ຍເສນ ສໍຍຸຕ຺ໂຕ ໂຫຕິ ທິພ຺ເພນປິ ມານຸເສນປິ; ອາຘິປເຕຍ຺ເຍນ ສໍຍຸຕ຺ໂຕ ໂຫຕິ ທິພ຺ເພນປິ ມານຸເສນປິ. ຕໍ ໂຂ ປນາຫໍ, ນນ຺ທກ, ນາຎ຺ຎສ຺ສ ສມຓສ຺ສ ວາ ພ຺ຣາຫ຺ມຓສ຺ສ ວາ ສຸຕ຺ວາ ວທາມິ. ອປິ ຈ ຍເທວ ມຍາ ສາມໍ ຎາຕໍ ສາມໍ ທິຏ຺ຐໍ ສາມໍ ວິທິຕໍ, ຕເທວາຫໍ ວທາມີ’’ຕິ.

ເອວໍ ວຸຕ຺ເຕ ອຎ຺ຎຕໂຣ ປຸຣິໂສ ນນ຺ທກໍ ລິຈ຺ຉວິມຫາມຕ຺ຕໍ ເອຕທໂວຈ – ‘‘ນຫານກາໂລ, ຠນ຺ເຕ’’ຕິ. ‘‘ອລໍ ທານິ, ຠເຓ, ເອເຕນ ພາຫິເຣນ ນຫາເນນ. ອລມິທໍ ອຊ຺ຌຕ຺ຕໍ ນຫານໍ ຠວິສ຺ສຕິ, ຍທິທໍ – ຠຄວຕິ ປສາໂທ’’ຕິ. ທສມໍ.

ສຣຓານິວຄ຺ໂຄ ຕຕິໂຍ.

ຕສ຺ສຸທ຺ທານໍ –

ມຫານາເມນ ທ຺ເວ ວຸຕ຺ຕາ, ໂຄຘາ ຈ ສຣຓາ ທຸເວ;

ທຸເວ ອນາຖປິຓ຺ຑິກາ, ທຸເວ ເວຣຠເຍນ ຈ;

ລິຈ຺ຉວີ ທສໂມ ວຸຕ຺ໂຕ, ວຄ຺ໂຄ ເຕນ ປວຸຈ຺ຈຕີຕິ.