໔. ປຸຎ຺ຎາຠິສນ຺ທວຄ຺ໂຄ

໑. ປຐມປຸຎ຺ຎາຠິສນ຺ທສຸຕ຺ຕໍ

໑໐໒໗. ສາວຕ຺ຖິນິທານໍ. ‘‘ຈຕ຺ຕາໂຣເມ, ຠິກ຺ຂເວ, ປຸຎ຺ຎາຠິສນ຺ທາ ກຸສລາຠິສນ຺ທາ ສຸຂສ຺ສາຫາຣາ. ກຕເມ ຈຕ຺ຕາໂຣ? ອິຘ, ຠິກ຺ຂເວ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ອຍໍ ປຐໂມ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ຘມ຺ເມ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ສ຺ວາກ຺ຂາໂຕ ຠຄວຕາ ຘມ຺ໂມ…ເປ… ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫີຕິ. ອຍໍ ທຸຕິໂຍ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ສງ຺ເຆ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ສຸປ຺ປຏິປນ຺ໂນ ຠຄວໂຕ ສາວກສງ຺ໂຆ…ເປ… ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສາຕິ. ອຍໍ ຕຕິໂຍ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ອຍໍ ຈຕຸຕ຺ໂຖ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ. ອິເມ ໂຂ, ຠິກ຺ຂເວ, ຈຕ຺ຕາໂຣ ປຸຎ຺ຎາຠິສນ຺ທາ ກຸສລາຠິສນ຺ທາ ສຸຂສ຺ສາຫາຣາ’’ຕິ. ປຐມໍ.

໒. ທຸຕິຍປຸຎ຺ຎາຠິສນ຺ທສຸຕ຺ຕໍ

໑໐໒໘. ‘‘ຈຕ຺ຕາໂຣເມ, ຠິກ຺ຂເວ, ປຸຎ຺ຎາຠິສນ຺ທາ ກຸສລາຠິສນ຺ທາ ສຸຂສ຺ສາຫາຣາ. ກຕເມ ຈຕ຺ຕາໂຣ? ອິຘ, ຠິກ຺ຂເວ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ອຍໍ ປຐໂມ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ຘມ຺ເມ…ເປ… ສງ຺ເຆ…ເປ….

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ວິຄຕມລມຈ຺ເຉເຣນ ເຈຕສາ ອຄາຣໍ ອຊ຺ຌາວສຕິ ມຸຕ຺ຕຈາໂຄ ປຍຕປາຓິ ໂວສ຺ສຄ຺ຄຣໂຕ ຍາຈໂຍໂຄ ທານສໍວິຠາຄຣໂຕ. ອຍໍ ຈຕຸຕ຺ໂຖ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ. ອິເມ ໂຂ, ຠິກ຺ຂເວ, ຈຕ຺ຕາໂຣ ປຸຎ຺ຎາຠິສນ຺ທາ ກຸສລາຠິສນ຺ທາ ສຸຂສ຺ສາຫາຣາ’’ຕິ. ທຸຕິຍໍ.

໓. ຕຕິຍປຸຎ຺ຎາຠິສນ຺ທສຸຕ຺ຕໍ

໑໐໒໙. ‘‘ຈຕ຺ຕາໂຣເມ, ຠິກ຺ຂເວ, ປຸຎ຺ຎາຠິສນ຺ທາ ກຸສລາຠິສນ຺ທາ ສຸຂສ຺ສາຫາຣາ. ກຕເມ ຈຕ຺ຕາໂຣ? ອິຘ, ຠິກ຺ຂເວ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ອຍໍ ປຐໂມ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ຘມ຺ເມ…ເປ… ສງ຺ເຆ…ເປ….

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ປຎ຺ຎວາ ໂຫຕິ ອຸທຍຕ຺ຖຄາມິນິຍາ ປຎ຺ຎາຍ ສມນ຺ນາຄໂຕ ອຣິຍາຍ ນິພ຺ເພຘິກາຍ ສມ຺ມາ ທຸກ຺ຂກ຺ຂຍຄາມິນິຍາ. ອຍໍ ຈຕຸຕ຺ໂຖ ປຸຎ຺ຎາຠິສນ຺ໂທ ກຸສລາຠິສນ຺ໂທ ສຸຂສ຺ສາຫາໂຣ. ອິເມ ໂຂ, ຠິກ຺ຂເວ, ຈຕ຺ຕາໂຣ ປຸຎ຺ຎາຠິສນ຺ທາ ກຸສລາຠິສນ຺ທາ ສຸຂສ຺ສາຫາຣາ’’ຕິ. ຕຕິຍໍ.

໔. ປຐມເທວປທສຸຕ຺ຕໍ

໑໐໓໐. ສາວຕ຺ຖິນິທານໍ. ຈຕ຺ຕາຣິມານິ, ຠິກ຺ຂເວ, ເທວານໍ ເທວປທານິ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍ.

ກຕມານິ ຈຕ຺ຕາຣິ? ອິຘ, ຠິກ຺ຂເວ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ອິທໍ ປຐມໍ ເທວານໍ ເທວປທໍ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ຘມ຺ເມ…ເປ… ສງ຺ເຆ…ເປ….

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ອິທໍ ຈຕຸຕ຺ຖໍ ເທວານໍ ເທວປທໍ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍ. ອິມານິ ໂຂ, ຠິກ຺ຂເວ, ຈຕ຺ຕາຣິ ເທວານໍ ເທວປທານິ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍາ’’ຕິ. ຈຕຸຕ຺ຖໍ.

໕. ທຸຕິຍເທວປທສຸຕ຺ຕໍ

໑໐໓໑. ‘‘ຈຕ຺ຕາຣິມານິ, ຠິກ຺ຂເວ, ເທວານໍ ເທວປທານິ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍ.

‘‘ກຕມານິ ຈຕ຺ຕາຣິ? ອິຘ, ຠິກ຺ຂເວ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ໂສ ອິຕິ ປຏິສຎ຺ຈິກ຺ຂຕິ – ‘ກິໍ ນຸ ໂຂ ເທວານໍ ເທວປທ’ນ຺ຕິ? ໂສ ເອວໍ ປຊານາຕິ – ‘ອພ຺ຍາພຊ຺ຌປຣເມ ຂ຺ວາຫໍ ເອຕຣຫິ ເທເວ ສຸຓາມິ. ນ ຈ ໂຂ ປນາຫໍ ກິຎ຺ຈິ ພ຺ຍາພາເຘມິ ຕສໍ ວາ ຖາວຣໍ ວາ. ອທ຺ຘາຫໍ ເທວປທຘມ຺ມສມນ຺ນາຄໂຕ ວິຫຣາມີ’’’ຕິ. ອິທໍ ປຐມໍ ເທວານໍ ເທວປທໍ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ຘມ຺ເມ…ເປ… ສງ຺ເຆ…ເປ….

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ໂສ ອິຕິ ປຏິສຎ຺ຈິກ຺ຂຕິ – ‘ກິໍ ນຸ ໂຂ ເທວານໍ ເທວປທ’ນ຺ຕິ? ໂສ ເອວໍ ປຊານາຕິ – ‘ອພ຺ຍາພຊ຺ຌປຣເມ ຂ຺ວາຫໍ ເອຕຣຫິ ເທເວ ສຸຓາມິ. ນ ໂຂ ປນາຫໍ ກິຎ຺ຈິ ພ຺ຍາພາເຘມິ ຕສໍ ວາ ຖາວຣໍ ວາ. ອທ຺ຘາຫໍ ເທວປທຘມ຺ມສມນ຺ນາຄໂຕ ວິຫຣາມີ’ຕິ. ອິທໍ ຈຕຸຕ຺ຖໍ ເທວານໍ ເທວປທໍ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍ. ອິມານິ ໂຂ, ຠິກ຺ຂເວ, ຈຕ຺ຕາຣິ ເທວານໍ ເທວປທານິ ອວິສຸທ຺ຘານໍ ສຕ຺ຕານໍ ວິສຸທ຺ຘິຍາ ອປຣິໂຍທາຕານໍ ສຕ຺ຕານໍ ປຣິໂຍທປນາຍາ’’ຕິ. ປຎ຺ຈມໍ.

໖. ເທວສຠາຄສຸຕ຺ຕໍ

໑໐໓໒. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄຕໍ ອຕ຺ຕມນາ ເທວາ ສຠາຄຕໍ ກເຖນ຺ຕິ. ກຕເມຫິ ຈຕູຫິ? ອິຘ, ຠິກ຺ຂເວ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຍາ ຕາ ເທວຕາ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄຕາ ອິໂຕ ຈຸຕາ ຕຕ຺ຣູປປນ຺ນາ ຕາສໍ ເອວໍ ໂຫຕິ – ‘ຍຖາຣູເປນ ໂຂ ມຍໍ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄຕາ ຕໂຕ ຈຸຕາ ອິຘູປປນ຺ນາ, ອຣິຍສາວໂກປິ ຕຖາຣູເປນ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ເອຫີຕິ ເທວານໍ ສນ຺ຕິເກ’’’ຕິ.

‘‘ປຸນ ຈປຣໍ, ຠິກ຺ຂເວ, ອຣິຍສາວໂກ ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ຍາ ຕາ ເທວຕາ ອຣິຍກນ຺ເຕຫິ ສີເລຫິ ສມນ຺ນາຄຕາ ອິໂຕ ຈຸຕາ ຕຕ຺ຣູປປນ຺ນາ ຕາສໍ ເອວໍ ໂຫຕິ – ‘ຍຖາຣູເປຫິ ໂຂ ມຍໍ ອຣິຍກນ຺ເຕຫິ ສີເລຫິ ສມນ຺ນາຄຕາ ຕໂຕ ຈຸຕາ ອິຘູປປນ຺ນາ, ອຣິຍສາວໂກປິ ຕຖາຣູເປຫິ ອຣິຍກນ຺ເຕຫິ ສີເລຫິ ສມນ຺ນາຄໂຕ ເອຫີຕິ ເທວານໍ ສນ຺ຕິເກ’ຕິ. ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄຕໍ ອຕ຺ຕມນາ ເທວາ ສຠາຄຕໍ ກເຖນ຺ຕີ’’ຕິ. ຉຏ຺ຐໍ.

໗. ມຫານາມສຸຕ຺ຕໍ

໑໐໓໓. ເອກໍ ສມຍໍ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ອຖ ໂຂ ມຫານາໂມ ສກ຺ໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ມຫານາໂມ ສກ຺ໂກ ຠຄວນ຺ຕໍ ເອຕທໂວຈ –

‘‘ກິຕ຺ຕາວຕາ ນຸ ໂຂ, ຠນ຺ເຕ, ອຸປາສໂກ ໂຫຕີ’’ຕິ? ‘‘ຍໂຕ ໂຂ, ມຫານາມ, ພຸທ຺ຘໍ ສຣຓໍ ຄໂຕ ໂຫຕິ, ຘມ຺ມໍ ສຣຓໍ ຄໂຕ ໂຫຕິ, ສງ຺ຆໍ ສຣຓໍ ຄໂຕ ໂຫຕິ – ເອຕ຺ຕາວຕາ ໂຂ, ມຫານາມ, ອຸປາສໂກ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ສີລສມ຺ປນ຺ໂນ ໂຫຕີ’’ຕິ? ‘‘ຍໂຕ ໂຂ, ມຫານາມ, ອຸປາສໂກ ປາຓາຕິປາຕາ ປຏິວິຣໂຕ ໂຫຕິ, ອທິນ຺ນາທານາ ປຏິວິຣໂຕ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ມຸສາວາທາ ປຏິວິຣໂຕ ໂຫຕິ, ສຸຣາເມຣຍມຊ຺ຊປ຺ປມາທຏ຺ຐານາ ປຏິວິຣໂຕ ໂຫຕິ, – ເອຕ຺ຕາວຕາ ໂຂ, ມຫານາມ, ອຸປາສໂກ ສີລສມ຺ປນ຺ໂນ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ສທ຺ຘາສມ຺ປນ຺ໂນ ໂຫຕີ’’ຕິ? ‘‘ອິຘ, ມຫານາມ, ອຸປາສໂກ ສທ຺ໂຘ ໂຫຕິ, ສທ຺ທຫຕິ ຕຖາຄຕສ຺ສ ໂພຘິໍ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ເອຕ຺ຕາວຕາ ໂຂ, ມຫານາມ, ອຸປາສໂກ ສທ຺ຘາສມ຺ປນ຺ໂນ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ຈາຄສມ຺ປນ຺ໂນ ໂຫຕີ’’ຕິ? ‘‘ອິຘ, ມຫານາມ, ອຸປາສໂກ ວິຄຕມລມຈ຺ເຉເຣນ ເຈຕສາ ອຄາຣໍ ອຊ຺ຌາວສຕິ ມຸຕ຺ຕຈາໂຄ ປຍຕປາຓິ ໂວສ຺ສຄ຺ຄຣໂຕ ຍາຈໂຍໂຄ ທານສໍວິຠາຄຣໂຕ – ເອຕ຺ຕາວຕາ ໂຂ, ມຫານາມ, ອຸປາສໂກ ຈາຄສມ຺ປນ຺ໂນ ໂຫຕີ’’ຕິ.

‘‘ກິຕ຺ຕາວຕາ ປນ, ຠນ຺ເຕ, ອຸປາສໂກ ປຎ຺ຎາສມ຺ປນ຺ໂນ ໂຫຕີ’’ຕິ? ‘‘ອິຘ, ມຫານາມ, ອຸປາສໂກ ປຎ຺ຎວາ ໂຫຕິ ອຸທຍຕ຺ຖຄາມິນິຍາ ປຎ຺ຎາຍ ສມນ຺ນາຄໂຕ ອຣິຍາຍ ນິພ຺ເພຘິກາຍ ສມ຺ມາ ທຸກ຺ຂກ຺ຂຍຄາມິນິຍາ – ເອຕ຺ຕາວຕາ ໂຂ, ມຫານາມ, ອຸປາສໂກ ປຎ຺ຎາສມ຺ປນ຺ໂນ ໂຫຕີ’’ຕິ. ສຕ຺ຕມໍ.

໘. ວສ຺ສສຸຕ຺ຕໍ

໑໐໓໔. ‘‘ເສຍ຺ຍຖາປິ, ຠິກ຺ຂເວ, ອຸປຣິປພ຺ພເຕ ຖຸລ຺ລຜຸສິຕເກ ເທເວ ວສ຺ສນ຺ເຕ ຕໍ ອຸທກໍ ຍຖານິນ຺ນໍ ປວຕ຺ຕມານໍ ປພ຺ພຕກນ຺ທຣປທຣສາຂາ ປຣິປູເຣຕິ, ປພ຺ພຕກນ຺ທຣປທຣສາຂາ ປຣິປູຣາ ກຸໂສພ຺ເຠ ປຣິປູເຣນ຺ຕິ, ກຸໂສພ຺ຠາ ປຣິປູຣາ ມຫາໂສພ຺ເຠ ປຣິປູເຣນ຺ຕິ, ມຫາໂສພ຺ຠາ ປຣິປູຣາ ກຸນ຺ນທິໂຍ ປຣິປູເຣນ຺ຕິ, ກຸນ຺ນທິໂຍ ປຣິປູຣາ ມຫານທິໂຍ ປຣິປູເຣນ຺ຕິ, ມຫານທິໂຍ ປຣິປູຣາ ມຫາສມຸທ຺ທໍ [ມຫາສມຸທ຺ທສາຄຣໍ (ສພ຺ພຕ຺ຖ) ສໍ. ນິ. ໔.໗໐] ປຣິປູເຣນ຺ຕິ; ເອວເມວ ໂຂ, ຠິກ຺ຂເວ, ອຣິຍສາວກສ຺ສ ໂຍ ຈ ພຸທ຺ເຘ ອເວຈ຺ຈປ຺ປສາໂທ, ໂຍ ຈ ຘມ຺ເມ ອເວຈ຺ຈປ຺ປສາໂທ, ໂຍ ຈ ສງ຺ເຆ ອເວຈ຺ຈປ຺ປສາໂທ, ຍານິ ຈ ອຣິຍກນ຺ຕານິ ສີລານິ – ອິເມ ຘມ຺ມາ ສນ຺ທມານາ ປາຣໍ ຄນ຺ຕ຺ວາ ອາສວານໍ ຂຍາຍ ສໍວຕ຺ຕນ຺ຕີ’’ຕິ. ອຏ຺ຐມໍ.

໙. ກາຬິໂຄຘສຸຕ຺ຕໍ

໑໐໓໕. ເອກໍ ສມຍໍ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ອຖ ໂຂ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ກາຬິໂຄຘາຍ ສາກິຍານິຍາ ນິເວສນໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອຖ ໂຂ ກາຬິໂຄຘາ ສາກິຍານີ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ກາຬິໂຄຘໍ ສາກິຍານິໍ ຠຄວາ ເອຕທໂວຈ –

‘‘ຈຕູຫິ ໂຂ, ໂຄເຘ, ຘມ຺ເມຫິ ສມນ຺ນາຄຕາ ອຣິຍສາວິກາ ໂສຕາປນ຺ນາ ໂຫຕິ ອວິນິປາຕຘມ຺ມາ ນິຍຕາ ສມ຺ໂພຘິປຣາຍຓາ. ກຕເມຫິ ຈຕູຫິ? ອິຘ, ໂຄເຘ, ອຣິຍສາວິກາ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄຕາ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ…ເປ… ວິຄຕມລມຈ຺ເຉເຣນ ເຈຕສາ ອຄາຣໍ ອຊ຺ຌາວສຕິ ມຸຕ຺ຕຈາຄາ ປຍຕປາຓິນີ [ປຍຕປາຓີ (ສພ຺ພຕ຺ຖ) ໓.໓໐ ໂມຄ຺ຄລ຺ລານສຸຕ຺ຕໍ ໂອໂລເກຕພ຺ພໍ] ໂວສ຺ສຄ຺ຄຣຕາ ຍາຈໂຍຄາ ທານສໍວິຠາຄຣຕາ. ອິເມຫິ ໂຂ, ໂຄເຘ, ຈຕູຫິ ຘມ຺ເມຫິ ສມນ຺ນາຄຕາ ອຣິຍສາວິກາ ໂສຕາປນ຺ນາ ໂຫຕິ ອວິນິປາຕຘມ຺ມາ ນິຍຕາ ສມ຺ໂພຘິປຣາຍຓາ’’ຕິ.

‘‘ຍານິມານິ, ຠນ຺ເຕ, ຠຄວຕາ ຈຕ຺ຕາຣິ ໂສຕາປຕ຺ຕິຍງ຺ຄານິ ເທສິຕານິ, ສໍວິຊ຺ຊນ຺ເຕ ເຕ ຘມ຺ມາ ມຍິ, ອຫຎ຺ຈ ເຕສຸ ຘມ຺ເມສຸ ສນ຺ທິສ຺ສາມິ. ອຫຎ຺ຫິ, ຠນ຺ເຕ, ພຸທ຺ເຘ ອເວຈ຺ຈປ຺ປສາເທນ ສມນ຺ນາຄຕາ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ…ເປ… ຍໍ ໂຂ ປນ ກິຎ຺ຈິ ກຸເລ ເທຍ຺ຍຘມ຺ມໍ ສພ຺ພໍ ຕໍ ອປ຺ປຏິວິຠຕ຺ຕໍ ສີລວນ຺ເຕຫິ ກລ຺ຍາຓຘມ຺ເມຫີ’’ຕິ. ‘‘ລາຠາ ເຕ, ໂຄເຘ, ສຸລທ຺ຘໍ ເຕ, ໂຄເຘ! ໂສຕາປຕ຺ຕິຜລໍ ຕຍາ, ໂຄເຘ, ພ຺ຍາກຕ’’ນ຺ຕິ. ນວມໍ.

໑໐. ນນ຺ທິຍສກ຺ກສຸຕ຺ຕໍ

໑໐໓໖. ເອກໍ ສມຍໍ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ອຖ ໂຂ ນນ຺ທິໂຍ ສກ຺ໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ນນ຺ທິໂຍ ສກ຺ໂກ ຠຄວນ຺ຕໍ ເອຕທໂວຈ – ‘‘ຍສ຺ເສວ ນຸ ໂຂ, ຠນ຺ເຕ, ອຣິຍສາວກສ຺ສ ຈຕ຺ຕາຣິ ໂສຕາປຕ຺ຕິຍງ຺ຄານິ ສພ຺ເພນ ສພ຺ພໍ ສພ຺ພຖາ ສພ຺ພໍ ນຕ຺ຖິ ສ຺ເວວ ນຸ ໂຂ, ຠນ຺ເຕ, ອຣິຍສາວໂກ ປມາທວິຫາຣີ’’ຕິ.

‘‘‘ຍສ຺ສ ໂຂ, ນນ຺ທິຍ, ຈຕ຺ຕາຣິ ໂສຕາປຕ຺ຕິຍງ຺ຄານິ ສພ຺ເພນ ສພ຺ພໍ ສພ຺ພຖາ ສພ຺ພໍ ນຕ຺ຖິ ຕມຫໍ ພາຫິໂຣ ປຸຖຸຊ຺ຊນປກ຺ເຂ ຐິໂຕ’ຕິ ວທາມິ. ອປິ ຈ, ນນ຺ທິຍ, ຍຖາ ອຣິຍສາວໂກ ປມາທວິຫາຣີ ເຈວ ໂຫຕິ, ອປ຺ປມາທວິຫາຣີ ຈ ຕໍ ສຸຓາຫິ, ສາຘຸກໍ ມນສິ ກໂຣຫິ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ນນ຺ທິໂຍ ສກ຺ໂກ ຠຄວໂຕ ປຈ຺ຈສ຺ໂສສິ. ຠຄວາ ເອຕທໂວຈ –

‘‘ກຖຎ຺ຈ, ນນ຺ທິຍ, ອຣິຍສາວໂກ ປມາທວິຫາຣີ ໂຫຕິ? ອິຘ ນນ຺ທິຍ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ໂສ ເຕນ ພຸທ຺ເຘ ອເວຈ຺ຈປ຺ປສາເທນ ສນ຺ຕຸຏ຺ໂຐ ນ ອຸຕ຺ຕຣິ ວາຍມຕິ ທິວາ ປວິເວກາຍ, ຣຕ຺ຕິໍ ປຏິສລ຺ລານາຍ. ຕສ຺ສ ເອວໍ ປມຕ຺ຕສ຺ສ ວິຫຣໂຕ ປາໂມຊ຺ຊໍ ນ ໂຫຕິ. ປາໂມຊ຺ເຊ ອສຕິ, ປີຕິ ນ ໂຫຕິ. ປີຕິຍາ ອສຕິ, ປສ຺ສທ຺ຘິ ນ ໂຫຕິ. ປສ຺ສທ຺ຘິຍາ ອສຕິ, ທຸກ຺ຂໍ ວິຫຣຕິ. ທຸກ຺ຂິໂນ ຈິຕ຺ຕໍ ນ ສມາຘິຍຕິ. ອສມາຫິເຕ ຈິຕ຺ເຕ ຘມ຺ມາ ນ ປາຕຸຠວນ຺ຕິ. ຘມ຺ມານໍ ອປາຕຸຠາວາ ປມາທວິຫາຣີ ຕ຺ເວວ ສງ຺ຂ຺ຍໍ ຄຈ຺ຉຕິ.

‘‘ປຸນ ຈປຣໍ, ນນ຺ທິຍ, ອຣິຍສາວໂກ ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ໂສ ເຕຫິ ອຣິຍກນ຺ເຕຫິ ສີເລຫິ ສນ຺ຕຸຏ຺ໂຐ ນ ອຸຕ຺ຕຣິ ວາຍມຕິ ທິວາ ປວິເວກາຍ ຣຕ຺ຕິໍ ປຏິສລ຺ລານາຍ. ຕສ຺ສ ເອວໍ ປມຕ຺ຕສ຺ສ ວິຫຣໂຕ ປາໂມຊ຺ຊໍ ນ ໂຫຕິ. ປາໂມຊ຺ເຊ ອສຕິ, ປີຕິ ນ ໂຫຕິ. ປີຕິຍາ ອສຕິ, ປສ຺ສທ຺ຘິ ນ ໂຫຕິ. ປສ຺ສທ຺ຘິຍາ ອສຕິ, ທຸກ຺ຂໍ ວິຫຣຕິ. ທຸກ຺ຂິໂນ ຈິຕ຺ຕໍ ນ ສມາຘິຍຕິ. ອສມາຫິເຕ ຈິຕ຺ເຕ ຘມ຺ມາ ນ ປາຕຸຠວນ຺ຕິ. ຘມ຺ມານໍ ອປາຕຸຠາວາ ປມາທວິຫາຣີ ຕ຺ເວວ ສງ຺ຂ຺ຍໍ ຄຈ຺ຉຕິ. ເອວໍ ໂຂ, ນນ຺ທິຍ, ອຣິຍສາວໂກ ປມາທວິຫາຣີ ໂຫຕິ.

‘‘ກຖຎ຺ຈ, ນນ຺ທິຍ, ອຣິຍສາວໂກ ອປ຺ປມາທວິຫາຣີ ໂຫຕິ? ອິຘ, ນນ຺ທິຍ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ໂສ ເຕນ ພຸທ຺ເຘ ອເວຈ຺ຈປ຺ປສາເທນ ອສນ຺ຕຸຏ຺ໂຐ ອຸຕ຺ຕຣິ ວາຍມຕິ ທິວາ ປວິເວກາຍ ຣຕ຺ຕິໍ ປຏິສລ຺ລານາຍ. ຕສ຺ສ ເອວໍ ອປ຺ປມຕ຺ຕສ຺ສ ວິຫຣໂຕ ປາໂມຊ຺ຊໍ ຊາຍຕິ. ປມຸທິຕສ຺ສ ປີຕິ ຊາຍຕິ. ປີຕິມນສ຺ສ ກາໂຍ ປສ຺ສມ຺ຠຕິ. ປສ຺ສທ຺ຘກາໂຍ ສຸຂໍ ເວທິຍຕິ. ສຸຂິໂນ ຈິຕ຺ຕໍ ສມາຘິຍຕິ. ສມາຫິເຕ ຈິຕ຺ເຕ ຘມ຺ມາ ປາຕຸຠວນ຺ຕິ. ຘມ຺ມານໍ ປາຕຸຠາວາ ອປ຺ປມາທວິຫາຣີ ຕ຺ເວວ ສງ຺ຂ຺ຍໍ ຄຈ຺ຉຕິ.

‘‘ປຸນ ຈປຣໍ, ນນ຺ທິຍ, ອຣິຍສາວໂກ ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ໂສ ເຕຫິ ອຣິຍກນ຺ເຕຫິ ສີເລຫິ ອສນ຺ຕຸຏ຺ໂຐ ອຸຕ຺ຕຣິ ວາຍມຕິ ທິວາ ປວິເວກາຍ ຣຕ຺ຕິໍ ປຏິສລ຺ລານາຍ. ຕສ຺ສ ເອວໍ ອປ຺ປມຕ຺ຕສ຺ສ ວິຫຣໂຕ ປາໂມຊ຺ຊໍ ຊາຍຕິ. ປມຸທິຕສ຺ສ ປີຕິ ຊາຍຕິ. ປີຕິມນສ຺ສ ກາໂຍ ປສ຺ສມ຺ຠຕິ. ປສ຺ສທ຺ຘກາໂຍ ສຸຂໍ ເວທິຍຕິ. ສຸຂິໂນ ຈິຕ຺ຕໍ ສມາຘິຍຕິ. ສມາຫິເຕ ຈິຕ຺ເຕ ຘມ຺ມາ ປາຕຸຠວນ຺ຕິ. ຘມ຺ມານໍ ປາຕຸຠາວາ ອປ຺ປມາທວິຫາຣີ ຕ຺ເວວ ສງ຺ຂ຺ຍໍ ຄຈ຺ຉຕິ. ເອວໍ ໂຂ, ນນ຺ທິຍ, ອຣິຍສາວໂກ ອປ຺ປມາທວິຫາຣີ ໂຫຕີ’’ຕິ. ທສມໍ.

ປຸຎ຺ຎາຠິສນ຺ທວຄ຺ໂຄ ຈຕຸຕ຺ໂຖ.

ຕສ຺ສຸທ຺ທານໍ –

ອຠິສນ຺ທາ ຕໂຍ ວຸຕ຺ຕາ, ທຸເວ ເທວປທານິ ຈ;

ສຠາຄຕໍ ມຫານາໂມ, ວສ຺ສໍ ກາຬີ ຈ ນນ຺ທິຍາຕິ.