໖. ຖປຕິສຸຕ຺ຕໍ

໑໐໐໒. ສາວຕ຺ຖິນິທານໍ. ເຕນ ໂຂ ປນ ສມເຍນ ສມ຺ພຫຸລາ ຠິກ຺ຂູ ຠຄວໂຕ ຈີວຣກມ຺ມໍ ກໂຣນ຺ຕິ – ‘‘ນິຏ຺ຐິຕຈີວໂຣ ຠຄວາ ເຕມາສຈ຺ຈເຍນ ຈາຣິກໍ ປກ຺ກມິສ຺ສຕີ’’ຕິ. ເຕນ ໂຂ ປນ ສມເຍນ ອິສິທຕ຺ຕປຸຣາຓາ ຖປຕໂຍ ສາຘຸເກ ປຏິວສນ຺ຕິ ເກນຈິເທວ ກຣຓີເຍນ. ອສ຺ໂສສຸໍ ໂຂ ອິສິທຕ຺ຕປຸຣາຓາ ຖປຕໂຍ – ‘‘ສມ຺ພຫຸລາ ກິຣ ຠິກ຺ຂູ ຠຄວໂຕ ຈີວຣກມ຺ມໍ ກໂຣນ຺ຕິ – ‘ນິຏ຺ຐິຕຈີວໂຣ ຠຄວາ ເຕມາສຈ຺ຈເຍນ ຈາຣິກໍ ປກ຺ກມິສ຺ສຕີ’’’ຕິ.

ອຖ ໂຂ ອິສິທຕ຺ຕປຸຣາຓາ ຖປຕໂຍ ມຄ຺ເຄ ປຸຣິສໍ ຐເປສຸໍ – ‘‘ຍທາ ຕ຺ວໍ, ອມ຺ໂຠ ປຸຣິສ, ປສ຺ເສຍ຺ຍາສິ ຠຄວນ຺ຕໍ ອາຄຈ຺ຉນ຺ຕໍ ອຣຫນ຺ຕໍ ສມ຺ມາສມ຺ພຸທ຺ຘໍ, ອຖ ອມ຺ຫາກໍ ອາໂຣເຈຍ຺ຍາສີ’’ຕິ. ທ຺ວີຫຕີຫໍ ຐິໂຕ ໂຂ ໂສ ປຸຣິໂສ ອທ຺ທສ ຠຄວນ຺ຕໍ ທູຣໂຕວ ອາຄຈ຺ຉນ຺ຕໍ. ທິສ຺ວານ ເຍນ ອິສິທຕ຺ຕປຸຣາຓາ ຖປຕໂຍ ເຕນຸປສງ຺ກມິ; ອຸປສງ຺ກມິຕ຺ວາ ອິສິທຕ຺ຕປຸຣາເຓ ຖປຕໂຍ ເອຕທໂວຈ – ‘‘ອຍໍ ໂສ, ຠນ຺ເຕ, ຠຄວາ ອາຄຈ຺ຉຕິ ອຣຫໍ ສມ຺ມາສມ຺ພຸທ຺ໂຘ. ຍສ຺ສ ທານິ ກາລໍ ມຎ຺ຎຖາ’’ຕິ.

ອຖ ໂຂ ອິສິທຕ຺ຕປຸຣາຓາ ຖປຕໂຍ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ຠຄວນ຺ຕໍ ປິຏ຺ຐິໂຕ ປິຏ຺ຐິໂຕ ອນຸພນ຺ຘິໍສຸ. ອຖ ໂຂ ຠຄວາ ມຄ຺ຄາ ໂອກ຺ກມ຺ມ ເຍນ ອຎ຺ຎຕຣໍ ຣຸກ຺ຂມູລໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອິສິທຕ຺ຕປຸຣາຓາ ຖປຕໂຍ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ເຕ ອິສິທຕ຺ຕປຸຣາຓາ ຖປຕໂຍ ຠຄວນ຺ຕໍ ເອຕທໂວຈຸໍ –

‘‘ຍທາ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ສາວຕ຺ຖິຍາ ໂກສເລສຸ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ສາວຕ຺ຖິຍາ ໂກສເລສຸ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ໂກສເລຫິ ມລ຺ເລສຸ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ໂກສເລຫິ ມລ຺ເລສຸ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ມລ຺ເລຫິ ວຊ຺ຊີສຸ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ມລ຺ເລຫິ ວຊ຺ຊີສຸ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ວຊ຺ຊີຫິ ກາສີສຸ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ ຠຄວນ຺ຕໍ ສຸຓາມ – ‘ວຊ຺ຊີຫິ ກາສີສຸ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ກາສີຫິ ມາຄເຘ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ໂທມນສ຺ສໍ – ‘ທູເຣ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ກາສີຫິ ມາຄເຘ ຈາຣິກໍ ປກ຺ກນ຺ໂຕ’ຕິ, ໂຫຕິ ອນປ຺ປກາ ໂນ ຕສ຺ມິໍ ສມເຍ ອນຕ຺ຕມນຕາ ໂຫຕິ ອນປ຺ປກໍ ໂທມນສ຺ສໍ – ‘ທູເຣ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ມາຄເຘຫິ ກາສີສຸ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ມາຄເຘຫິ ກາສີສຸ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ກາສີຫິ ວຊ຺ຊີສຸ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ກາສີຫິ ວຊ຺ຊີສຸ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ວຊ຺ຊີຫິ ມລ຺ເລສຸ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ວຊ຺ຊີຫິ ມລ຺ເລສຸ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ມລ຺ເລຫິ ໂກສເລ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ມລ຺ເລຫິ ໂກສເລ ຈາຣິກໍ ປກ຺ກນ຺ໂຕ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ’’’ຕິ.

‘‘ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ໂກສເລຫິ ສາວຕ຺ຖິໍ ຈາຣິກໍ ປກ຺ກມິສ຺ສຕີ’ຕິ, ໂຫຕິ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ໂສມນສ຺ສໍ – ‘ອາສນ຺ເນ ໂນ ຠຄວາ ຠວິສ຺ສຕີ’ຕິ. ຍທາ ປນ ມຍໍ, ຠນ຺ເຕ, ຠຄວນ຺ຕໍ ສຸຓາມ – ‘ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ’ຕິ, ໂຫຕິ ອນປ຺ປກາ ໂນ ຕສ຺ມິໍ ສມເຍ ອຕ຺ຕມນຕາ ໂຫຕິ ອນປ຺ປກໍ ໂສມນສ຺ສໍ – ‘ອາສນ຺ເນ ໂນ ຠຄວາ’’’ຕິ.

‘‘ຕສ຺ມາຕິຫ, ຖປຕໂຍ, ສມ຺ພາໂຘ ຆຣາວາໂສ ຣຊາປໂຖ, ອພ຺ໂຠກາໂສ ປພ຺ພຊ຺ຊາ. ອລຎ຺ຈ ປນ ໂວ, ຖປຕໂຍ, ອປ຺ປມາທາຍາ’’ຕິ. ‘‘ອຕ຺ຖິ ໂຂ ໂນ, ຠນ຺ເຕ, ເອຕມ຺ຫາ ສມ຺ພາຘາ ອຎ຺ໂຎ ສມ຺ພາໂຘ ສມ຺ພາຘຕໂຣ ເຈວ ສມ຺ພາຘສງ຺ຂາຕຕໂຣ ຈາ’’ຕິ. ‘‘ກຕໂມ ປນ ໂວ, ຖປຕໂຍ, ເອຕມ຺ຫາ ສມ຺ພາຘາ ອຎ຺ໂຎ ສມ຺ພາໂຘ ສມ຺ພາຘຕໂຣ ເຈວ ສມ຺ພາຘສງ຺ຂາຕຕໂຣ ຈາ’’ຕິ?

‘‘ອິຘ ມຍໍ, ຠນ຺ເຕ, ຍທາ ຣາຊາ ປເສນທິ ໂກສໂລ ອຸຍ຺ຍານຠູມິໍ ນິຍ຺ຍາຕຸກາໂມ ໂຫຕິ, ເຍ ເຕ ຣຎ຺ໂຎ ປເສນທິສ຺ສ ໂກສລສ຺ສ ນາຄາ ໂອປວຍ຺ຫາ ເຕ ກປ຺ເປຕ຺ວາ, ຍາ ຕາ ຣຎ຺ໂຎ ປເສນທິສ຺ສ ໂກສລສ຺ສ ປຊາປຕິໂຍ ປິຍາ ມນາປາ ຕາ ເອກໍ ປຸຣໂຕ ເອກໍ ປຈ຺ຉໂຕ ນິສີທາເປມ. ຕາສໍ ໂຂ ປນ, ຠນ຺ເຕ, ຠຄິນີນໍ ເອວຣູໂປ ຄນ຺ໂຘ ໂຫຕິ, ເສຍ຺ຍຖາປິ ນາມ ຄນ຺ຘກຣຓ຺ຑກສ຺ສ ຕາວເທວ ວິວຣິຍມານສ຺ສ, ຍຖາ ຕໍ ຣາຊກຎ຺ຎານໍ ຄນ຺ເຘນ ວິຠູສິຕານໍ. ຕາສໍ ໂຂ ປນ, ຠນ຺ເຕ, ຠຄິນີນໍ ເອວຣູໂປ ກາຍສມ຺ຜສ຺ໂສ ໂຫຕິ, ເສຍ຺ຍຖາປິ ນາມ ຕູລປິຈຸໂນ ວາ ກປ຺ປາສປິຈຸໂນ ວາ, ຍຖາ ຕໍ ຣາຊກຎ຺ຎານໍ ສຸເຂຘິຕານໍ. ຕສ຺ມິໍ ໂຂ ປນ, ຠນ຺ເຕ, ສມເຍ ນາໂຄປິ ຣກ຺ຂິຕພ຺ໂພ ໂຫຕິ, ຕາປິ ຠຄິນິໂຍ ຣກ຺ຂິຕພ຺ພາ ໂຫນ຺ຕິ, ອຕ຺ຕາປິ ຣກ຺ຂິຕພ຺ໂພ ໂຫຕິ. ນ ໂຂ ປນ ມຍໍ, ຠນ຺ເຕ, ອຠິຊານາມ ຕາສຸ ຠຄິນີສຸ ປາປກໍ ຈິຕ຺ຕໍ ອຸປ຺ປາເທຕາ. ອຍໍ ໂຂ ໂນ, ຠນ຺ເຕ, ເອຕມ຺ຫາ ສມ຺ພາຘາ ອຎ຺ໂຎ ສມ຺ພາໂຘ ສມ຺ພາຘຕໂຣ ເຈວ ສມ຺ພາຘສງ຺ຂາຕຕໂຣ ຈາ’’ຕິ.

‘‘ຕສ຺ມາຕິຫ, ຖປຕໂຍ, ສມ຺ພາໂຘ ຆຣາວາໂສ ຣຊາປໂຖ, ອພ຺ໂຠກາໂສ ປພ຺ພຊ຺ຊາ. ອລຎ຺ຈ ປນ ໂວ, ຖປຕໂຍ, ອປ຺ປມາທາຍ. ຈຕູຫິ ໂຂ, ຖປຕໂຍ, ຘມ຺ເມຫິ ສມນ຺ນາຄໂຕ ອຣິຍສາວໂກ ໂສຕາປນ຺ໂນ ໂຫຕິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ.

‘‘ກຕເມຫິ ຈຕູຫິ? ອິຘ, ຖປຕໂຍ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ…ເປ… ວິຄຕມລມຈ຺ເຉເຣນ ເຈຕສາ ອຊ຺ຌາຄາຣໍ ວສຕິ ມຸຕ຺ຕຈາໂຄ ປຍຕປາຓິ ໂວສ຺ສຄ຺ຄຣໂຕ ຍາຈໂຍໂຄ ທານສໍວິຠາຄຣໂຕ. ອິເມຫິ ໂຂ, ຖປຕໂຍ, ຈຕູຫິ ຘມ຺ເມຫິ ສມນ຺ນາຄໂຕ ອຣິຍສາວໂກ ໂສຕາປນ຺ໂນ ໂຫຕິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ.

‘‘ຕຸມ຺ເຫ ໂຂ, ຖປຕໂຍ, ພຸທ຺ເຘ ອເວຈ຺ຈປ຺ປສາເທນ ສມນ຺ນາຄຕາ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ…ເປ… ຍໍ ໂຂ ປນ ກິຎ຺ຈິ ກຸເລ ເທຍ຺ຍຘມ຺ມໍ ສພ຺ພໍ ຕໍ ອປ຺ປຏິວິຠຕ຺ຕໍ ສີລວນ຺ເຕຫິ ກລ຺ຍາຓຘມ຺ເມຫິ. ຕໍ ກິໍ ມຎ຺ຎຖ, ຖປຕໂຍ, ກຕິວິຘາ ເຕ ໂກສເລສຸ ມນຸສ຺ສາ ເຍ ຕຸມ຺ຫາກໍ ສມສມາ, ຍທິທໍ – ທານສໍວິຠາເຄ’’ຕິ? ‘‘ລາຠາ ໂນ, ຠນ຺ເຕ, ສຸລທ຺ຘໍ ໂນ, ຠນ຺ເຕ! ເຍສໍ ໂນ ຠຄວາ ເອວໍ ປຊານາຕີ’’ຕິ. ຉຏ຺ຐໍ.