໑໐. ຕຕິຍຄິຎ຺ຊກາວສຖສຸຕ຺ຕໍ

໑໐໐໖. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອານນ຺ໂທ ຠຄວນ຺ຕໍ ເອຕທໂວຈ – ‘‘ກກ຺ກໂຏ ນາມ, ຠນ຺ເຕ, ຎາຕິເກ ອຸປາສໂກ ກາລງ຺ກໂຕ; ຕສ຺ສ ກາ ຄຕິ, ໂກ ອຠິສມ຺ປຣາໂຍ? ກຬິໂຠ ນາມ, ຠນ຺ເຕ, ຎາຕິເກ ອຸປາສໂກ…ເປ… ນິກໂຕ ນາມ, ຠນ຺ເຕ, ຎາຕິເກ ອຸປາສໂກ…ເປ… ກຏິສ຺ສໂຫ ນາມ, ຠນ຺ເຕ, ຎາຕິເກ ອຸປາສໂກ…ເປ… ຕຸຏ຺ໂຐ ນາມ, ຠນ຺ເຕ, ຎາຕິເກ ອຸປາສໂກ…ເປ… ສນ຺ຕຸຏ຺ໂຐ ນາມ, ຠນ຺ເຕ, ຎາຕິເກ ອຸປາສໂກ…ເປ… ຠທ຺ໂທ ນາມ, ຠນ຺ເຕ, ຎາຕິເກ ອຸປາສໂກ…ເປ… ສຸຠທ຺ໂທ ນາມ, ຠນ຺ເຕ, ຎາຕິເກ ອຸປາສໂກ ກາລງ຺ກໂຕ; ຕສ຺ສ ກາ ຄຕິ ໂກ ອຠິສມ຺ປຣາໂຍ’’ຕິ?

‘‘ກກ຺ກໂຏ, ອານນ຺ທ, ອຸປາສໂກ ກາລງ຺ກໂຕ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ. ກຬິໂຠ, ອານນ຺ທ …ເປ… ນິກໂຕ, ອານນ຺ທ…ເປ… ກຏິສ຺ສໂຫ, ອານນ຺ທ …ເປ… ຕຸຏ຺ໂຐ, ອານນ຺ທ…ເປ… ສນ຺ຕຸຏ຺ໂຐ, ອານນ຺ທ…ເປ… ຠທ຺ໂທ, ອານນ຺ທ…ເປ… ສຸຠທ຺ໂທ, ອານນ຺ທ, ອຸປາສໂກ ກາລງ຺ກໂຕ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິໂກ ຕຕ຺ຖ ປຣິນິພ຺ພາຍີ ອນາວຕ຺ຕິຘມ຺ໂມ ຕສ຺ມາ ໂລກາ. (ສພ຺ເພ ເອກຄຕິກາ ກາຕພ຺ພາ).

‘‘ປໂຣປຎ຺ຎາສ, ອານນ຺ທ, ຎາຕິເກ ອຸປາສກາ ກາລງ຺ກຕາ ປຎ຺ຈນ຺ນໍ ໂອຣມ຺ຠາຄິຍານໍ ສໍໂຍຊນານໍ ປຣິກ຺ຂຍາ ໂອປປາຕິກາ ຕຕ຺ຖ ປຣິນິພ຺ພາຍິໂນ ອນາວຕ຺ຕິຘມ຺ມາ ຕສ຺ມາ ໂລກາ. ສາຘິກນວຸຕິ, ອານນ຺ທ, ຎາຕິເກ ອຸປາສກາ ກາລງ຺ກຕາ ຕິຓ຺ຓໍ ສໍໂຍຊນານໍ ປຣິກ຺ຂຍາ ຣາຄໂທສໂມຫານໍ ຕນຸຕ຺ຕາ ສກທາຄາມິໂນ; ສກິເທວ ອິມໍ ໂລກໍ ອາຄນ຺ຕ຺ວາ ທຸກ຺ຂສ຺ສນ຺ຕໍ ກຣິສ຺ສນ຺ຕິ. ຉາຕິເຣການິ ໂຂ, ອານນ຺ທ, ປຎ຺ຈສຕານິ ຎາຕິເກ ອຸປາສກາ ກາລງ຺ກຕາ ຕິຓ຺ຓໍ ສໍໂຍຊນານໍ ປຣິກ຺ຂຍາ ໂສຕາປນ຺ນາ ອວິນິປາຕຘມ຺ມາ ນິຍຕາ ສມ຺ໂພຘິປຣາຍຓາ.

‘‘ອນຈ຺ຉຣິຍໍ ໂຂ ປເນຕໍ, ອານນ຺ທ, ຍໍ ມນຸສ຺ສຠູໂຕ ກາລໍ ກເຣຍ຺ຍ; ຕສ຺ມິໍ ຕສ຺ມິໍ ເຈ ມໍ ກາລງ຺ກເຕ ອຸປສງ຺ກມິຕ຺ວາ ເອຕມຕ຺ຖໍ ປຏິປຸຈ຺ຉິສ຺ສຖ. ວິເຫສາ ເປສາ, ອານນ຺ທ, ອສ຺ສ ຕຖາຄຕສ຺ສ. ຕສ຺ມາຕິຫານນ຺ທ, ຘມ຺ມາທາສໍ ນາມ ຘມ຺ມປຣິຍາຍໍ ເທເສສ຺ສາມິ; ເຍນ ສມນ຺ນາຄໂຕ ອຣິຍສາວໂກ ອາກງ຺ຂມາໂນ ອຕ຺ຕນາວ ອຕ຺ຕານໍ ພ຺ຍາກເຣຍ຺ຍ – ‘ຂີຓນິຣໂຍມ຺ຫິ ຂີຓຕິຣຈ຺ຉານໂຍນິ ຂີຓເປຕ຺ຕິວິສໂຍ ຂີຓາປາຍທຸຄ຺ຄຕິວິນິປາໂຕ, ໂສຕາປນ຺ໂນຫມສ຺ມິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ’’’.

‘‘ກຕໂມ ຈ ໂສ, ອານນ຺ທ, ຘມ຺ມາທາໂສ ຘມ຺ມປຣິຍາໂຍ; ເຍນ ສມນ຺ນາຄໂຕ ອຣິຍສາວໂກ ອາກງ຺ຂມາໂນ ອຕ຺ຕນາວ ອຕ຺ຕານໍ ພ຺ຍາກເຣຍ຺ຍ – ‘ຂີຓນິຣໂຍມ຺ຫິ ຂີຓຕິຣຈ຺ຉານໂຍນິ ຂີຓເປຕ຺ຕິວິສໂຍ ຂີຓາປາຍທຸຄ຺ຄຕິວິນິປາໂຕ, ໂສຕາປນ຺ໂນຫມສ຺ມິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ’’’.

‘‘ອິຘານນ຺ທ, ອຣິຍສາວໂກ ພຸທ຺ເຘ ອເວຈ຺ຈປ຺ປສາເທນ ສມນ຺ນາຄໂຕ ໂຫຕິ – ອິຕິປິ ໂສ ຠຄວາ…ເປ… ສຕ຺ຖາ ເທວມນຸສ຺ສານໍ ພຸທ຺ໂຘ ຠຄວາຕິ. ຘມ຺ເມ…ເປ… ສງ຺ເຆ…ເປ… ອຣິຍກນ຺ເຕຫິ ສີເລຫິ ສມນ຺ນາຄໂຕ ໂຫຕິ ອຂຓ຺ເຑຫິ…ເປ… ສມາຘິສໍວຕ຺ຕນິເກຫິ. ອຍໍ ໂຂ ໂສ, ອານນ຺ທ, ຘມ຺ມາທາໂສ ຘມ຺ມປຣິຍາໂຍ; ເຍນ ສມນ຺ນາຄໂຕ ອຣິຍສາວໂກ ອາກງ຺ຂມາໂນ ອຕ຺ຕນາວ ອຕ຺ຕານໍ ພ຺ຍາກເຣຍ຺ຍ – ‘ຂີຓນິຣໂຍມ຺ຫິ ຂີຓຕິຣຈ຺ຉານໂຍນິ ຂີຓເປຕ຺ຕິວິສໂຍ ຂີຓາປາຍທຸຄ຺ຄຕິວິນິປາໂຕ, ໂສຕາປນ຺ໂນຫມສ຺ມິ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂຓ’’’ຕິ. ທສມໍ.

ເວຬຸທ຺ວາຣວຄ຺ໂຄ ປຐໂມ.

ຕສ຺ສຸທ຺ທານໍ –

ຣາຊາ ໂອຄຘທີຆາວຸ, ສາຣິປຸຕ຺ຕາປເຣ ທຸເວ;

ຖປຕີ ເວຬຸທ຺ວາເຣຍ຺ຍາ, ຄິຎ຺ຊກາວສເຖ ຕໂຍຕິ.