໕. ປຐມຠິກ຺ຂຸສຸຕ຺ຕໍ

໙໙໑. ອຖ ໂຂ ສມ຺ພຫຸລາ ຠິກ຺ຂູ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ເຕ ຠິກ຺ຂູ ຠຄວນ຺ຕໍ ເອຕທໂວຈຸໍ – ‘‘ອຕ຺ຖິ ນຸ ໂຂ, ຠນ຺ເຕ, ເອກຘມ຺ໂມ ຠາວິໂຕ ພຫຸລີກໂຕ ຈຕ຺ຕາໂຣ ຘມ຺ເມ ປຣິປູເຣຕິ, ຈຕ຺ຕາໂຣ ຘມ຺ມາ ຠາວິຕາ ພຫຸລີກຕາ ສຕ຺ຕ ຘມ຺ເມ ປຣິປູເຣນ຺ຕິ, ສຕ຺ຕ ຘມ຺ມາ ຠາວິຕາ ພຫຸລີກຕາ ທ຺ເວ ຘມ຺ເມ ປຣິປູເຣນ຺ຕີ’’ຕິ? ‘‘ອຕ຺ຖິ ໂຂ, ຠິກ຺ຂເວ, ເອກຘມ຺ໂມ ຠາວິໂຕ ພຫຸລີກໂຕ ຈຕ຺ຕາໂຣ ຘມ຺ເມ ປຣິປູເຣຕິ, ຈຕ຺ຕາໂຣ ຘມ຺ມາ ຠາວິຕາ ພຫຸລີກຕາ ສຕ຺ຕ ຘມ຺ເມ ປຣິປູເຣນ຺ຕິ, ສຕ຺ຕ ຘມ຺ມາ ຠາວິຕາ ພຫຸລີກຕາ ທ຺ເວ ຘມ຺ເມ ປຣິປູເຣນ຺ຕີ’’ຕິ.

‘‘ກຕໂມ ປນ, ຠນ຺ເຕ, ເອກຘມ຺ໂມ ຠາວິໂຕ ພຫຸລີກໂຕ ຈຕ຺ຕາໂຣ ຘມ຺ເມ ປຣິປູເຣຕິ, ຈຕ຺ຕາໂຣ ຘມ຺ມາ ຠາວິຕາ ພຫຸລີກຕາ ສຕ຺ຕ ຘມ຺ເມ ປຣິປູເຣນ຺ຕິ, ສຕ຺ຕ ຘມ຺ມາ ຠາວິຕາ ພຫຸລີກຕາ ທ຺ເວ ຘມ຺ເມ ປຣິປູເຣນ຺ຕີ’’ຕິ? ‘‘ອານາປານສ຺ສຕິສມາຘິ ໂຂ, ຠິກ຺ຂເວ, ເອກຘມ຺ໂມ ຠາວິໂຕ ພຫຸລີກໂຕ ຈຕ຺ຕາໂຣ ສຕິປຏ຺ຐາເນ ປຣິປູເຣຕິ, ຈຕ຺ຕາໂຣ ສຕິປຏ຺ຐານາ ຠາວິຕາ ພຫຸລີກຕາ ສຕ຺ຕ ໂພຊ຺ຌງ຺ເຄ ປຣິປູເຣນ຺ຕິ, ສຕ຺ຕ ໂພຊ຺ຌງ຺ຄາ ຠາວິຕາ ພຫຸລີກຕາ ວິຊ຺ຊາວິມຸຕ຺ຕິໍ ປຣິປູເຣນ຺ຕີ’’ຕິ.

‘‘ກຖໍ ຠາວິໂຕ ຈ, ຠິກ຺ຂເວ, ອານາປານສ຺ສຕິສມາຘິ ກຖໍ ພຫຸລີກໂຕ ຈຕ຺ຕາໂຣ ສຕິປຏ຺ຐາເນ ປຣິປູເຣຕິ? ອິຘ, ຠິກ຺ຂເວ, ຠິກ຺ຂຸ ອຣຎ຺ຎຄໂຕ ວາ…ເປ… ເອວໍ ຠາວິຕາ ໂຂ, ຠິກ຺ຂເວ, ສຕ຺ຕ ໂພຊ຺ຌງ຺ຄາ ເອວໍ ພຫຸລີກຕາ ວິຊ຺ຊາວິມຸຕ຺ຕິໍ ປຣິປູເຣນ຺ຕີ’’ຕິ. ປຎ຺ຈມໍ.