໖. ອຣິຏ຺ຐສຸຕ຺ຕໍ

໙໘໒. ສາວຕ຺ຖິນິທານໍ. ຕຕ຺ຣ ໂຂ ຠຄວາ…ເປ… ເອຕທໂວຈ – ‘‘ຠາເວຖ ໂນ ຕຸມ຺ເຫ ຠິກ຺ຂເວ, ອານາປານສ຺ສຕິ’’ນ຺ຕິ? ເອວໍ ວຸຕ຺ເຕ ອາຍສ຺ມາ ອຣິຏ຺ໂຐ ຠຄວນ຺ຕໍ ເອຕທໂວຈ – ‘‘ອຫໍ ໂຂ, ຠນ຺ເຕ, ຠາເວມິ ອານາປານສ຺ສຕິ’’ນ຺ຕິ. ‘‘ຍຖາ ກຖໍ ປນ ຕ຺ວໍ, ອຣິຏ຺ຐ, ຠາເວສິ ອານາປານສ຺ສຕິ’’ນ຺ຕິ? ‘‘ອຕີເຕສຸ ເມ, ຠນ຺ເຕ, ກາເມສຸ ກາມຈ຺ຉນ຺ໂທ ປຫີໂນ, ອນາຄເຕສຸ ເມ ກາເມສຸ ກາມຈ຺ຉນ຺ໂທ ວິຄໂຕ, ອຊ຺ຌຕ຺ຕພຫິທ຺ຘາ [ອຊ຺ຌຕ຺ຕໍ ພຫິທ຺ຘາ (ສ຺ຍາ. ກໍ. ປີ. ກ.)] ຈ ເມ ຘມ຺ເມສຸ ປຏິຆສຎ຺ຎາ ສຸປ຺ປຏິວິນີຕາ. ໂສ [ໂສຫໍ (?)] ສໂຕວ ອສ຺ສສິສ຺ສາມິ, ສໂຕວ ປສ຺ສສິສ຺ສາມິ. ເອວໍ ຂ຺ວາຫໍ, ຠນ຺ເຕ, ຠາເວມິ ອານາປານສ຺ສຕິ’’ນ຺ຕິ.

‘‘‘ອຕ຺ເຖສາ, ອຣິຏ຺ຐ, ອານາປານສ຺ສຕິ, ເນສາ ນຕ຺ຖີ’ຕິ ວທາມິ. ອປິ ຈ, ອຣິຏ຺ຐ, ຍຖາ ອານາປານສ຺ສຕິ ວິຕ຺ຖາເຣນ ປຣິປຸຓ຺ຓາ ໂຫຕິ ຕໍ ສຸຓາຫິ, ສາຘຸກໍ ມນສິ ກໂຣຫິ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ອາຍສ຺ມາ ອຣິຏ຺ໂຐ ຠຄວໂຕ ປຈ຺ຈສ຺ໂສສິ. ຠຄວາ ເອຕທໂວຈ –

‘‘ກຖຎ຺ຈ, ອຣິຏ຺ຐ, ອານາປານສ຺ສຕິ ວິຕ຺ຖາເຣນ ປຣິປຸຓ຺ຓາ ໂຫຕິ? ອິຘ, ອຣິຏ຺ຐ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ນິສີທຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ. ໂສ ສໂຕວ ອສ຺ສສຕິ, ສໂຕວ ປສ຺ສສຕິ. ທີຆໍ ວາ ອສ຺ສສນ຺ໂຕ ‘ທີຆໍ ອສ຺ສສາມີ’ຕິ ປຊານາຕິ…ເປ… ‘ປຏິນິສ຺ສຄ຺ຄານຸປສ຺ສີ ອສ຺ສສິສ຺ສາມີ’ຕິ ສິກ຺ຂຕິ, ‘ປຏິນິສ຺ສຄ຺ຄານຸປສ຺ສີ ປສ຺ສສິສ຺ສາມີ’ຕິ ສິກ຺ຂຕິ. ເອວໍ ໂຂ, ອຣິຏ຺ຐ, ອານາປານສ຺ສຕິ ວິຕ຺ຖາເຣນ ປຣິປຸຓ຺ຓາ ໂຫຕີ’’ຕິ. ຉຏ຺ຐໍ.