໗. ມຫາກປ຺ປິນສຸຕ຺ຕໍ

໙໘໓. ສາວຕ຺ຖິນິທານໍ. ເຕນ ໂຂ ປນ ສມເຍນ ອາຍສ຺ມາ ມຫາກປ຺ປິໂນ ຠຄວໂຕ ອວິທູເຣ ນິສິນ຺ໂນ ໂຫຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ. ອທ຺ທສາ ໂຂ ຠຄວາ ອາຍສ຺ມນ຺ຕໍ ມຫາກປ຺ປິນໍ ອວິທູເຣ ນິສິນ຺ນໍ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ. ທິສ຺ວານ ຠິກ຺ຂູ ອາມນ຺ເຕສິ –

‘‘ປສ຺ສຖ ໂນ ຕຸມ຺ເຫ, ຠິກ຺ຂເວ, ເອຕສ຺ສ ຠິກ຺ຂຸໂນ ກາຍສ຺ສ ອິຎ຺ຊິຕຕ຺ຕໍ ວາ ຜນ຺ທິຕຕ຺ຕໍ ວາ’’ຕິ? ‘‘ຍທາປິ ມຍໍ, ຠນ຺ເຕ, ຕໍ ອາຍສ຺ມນ຺ຕໍ ປສ຺ສາມ ສງ຺ຆມຊ຺ເຌ ວາ ນິສິນ຺ນໍ ເອກໍ ວາ ຣໂຫ ນິສິນ຺ນໍ, ຕທາປິ ມຍໍ ຕສ຺ສ ອາຍສ຺ມໂຕ ນ ປສ຺ສາມ ກາຍສ຺ສ ອິຎ຺ຊິຕຕ຺ຕໍ ວາ ຜນ຺ທິຕຕ຺ຕໍ ວາ’’ຕິ.

‘‘ຍສ຺ສ, ຠິກ຺ຂເວ, ສມາຘິສ຺ສ ຠາວິຕຕ຺ຕາ ພຫຸລີກຕຕ຺ຕາ ເນວ ກາຍສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ, ນ ຈິຕ຺ຕສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ, ຕສ຺ສ ໂສ, ຠິກ຺ຂເວ, ຠິກ຺ຂຸ ສມາຘິສ຺ສ ນິກາມລາຠີ ອກິຈ຺ຉລາຠີ ອກສິຣລາຠີ. ກຕມສ຺ສ ຈ, ຠິກ຺ຂເວ, ສມາຘິສ຺ສ ຠາວິຕຕ຺ຕາ ພຫຸລີກຕຕ຺ຕາ ເນວ ກາຍສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ, ນ ຈິຕ຺ຕສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ?

‘‘ອານາປານສ຺ສຕິສມາຘິສ຺ສ, ຠິກ຺ຂເວ, ຠາວິຕຕ຺ຕາ ພຫຸລີກຕຕ຺ຕາ ເນວ ກາຍສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ, ນ ຈິຕ຺ຕສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ. ກຖໍ ຠາວິເຕ ຈ, ຠິກ຺ຂເວ, ອານາປານສ຺ສຕິສມາຘິມ຺ຫິ ກຖໍ ພຫຸລີກເຕ ເນວ ກາຍສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ, ນ ຈິຕ຺ຕສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ?

‘‘ອິຘ, ຠິກ຺ຂເວ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ນິສີທຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ. ໂສ ສໂຕວ ອສ຺ສສຕິ, ສໂຕວ ປສ຺ສສຕິ…ເປ… ‘ປຏິນິສ຺ສຄ຺ຄານຸປສ຺ສີ ອສ຺ສສິສ຺ສາມີ’ຕິ ສິກ຺ຂຕິ, ‘ປຏິນິສ຺ສຄ຺ຄານຸປສ຺ສີ ປສ຺ສສິສ຺ສາມີ’ຕິ ສິກ຺ຂຕິ. ເອວໍ ຠາວິເຕ ຈ ໂຂ, ຠິກ຺ຂເວ, ອານາປານສ຺ສຕິສມາຘິມ຺ຫິ ເອວໍ ພຫຸລີກເຕ ເນວ ກາຍສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ, ນ ຈິຕ຺ຕສ຺ສ ອິຎ຺ຊິຕຕ຺ຕໍ ວາ ໂຫຕິ ຜນ຺ທິຕຕ຺ຕໍ ວາ’’ຕິ. ສຕ຺ຕມໍ.