໒. ປຏິປທາສຸຕ຺ຕໍ

໔໔. ສາວຕ຺ຖິນິທານໍ. ‘‘ສກ຺ກາຍສມຸທຍຄາມິນິຎ຺ຈ ໂວ, ຠິກ຺ຂເວ, ປຏິປທໍ ເທເສສ຺ສາມິ, ສກ຺ກາຍນິໂຣຘຄາມິນິຎ຺ຈ ປຏິປທໍ. ຕໍ ສຸຓາຖ. ກຕມາ ຈ, ຠິກ຺ຂເວ, ສກ຺ກາຍສມຸທຍຄາມິນີ ປຏິປທາ? ອິຘ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ, ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ, ຣູປໍ ອຕ຺ຕໂຕ ສມນຸປສ຺ສຕິ, ຣູປວນ຺ຕໍ ວາ ອຕ຺ຕານໍ; ອຕ຺ຕນິ ວາ ຣູປໍ, ຣູປສ຺ມິໍ ວາ ອຕ຺ຕານໍ. ເວທນໍ ອຕ຺ຕໂຕ… ສຎ຺ຎໍ… ສງ຺ຂາເຣ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ວິຎ຺ຎາຓວນ຺ຕໍ ວາ ອຕ຺ຕານໍ; ອຕ຺ຕນິ ວາ ວິຎ຺ຎາຓໍ, ວິຎ຺ຎາຓສ຺ມິໍ ວາ ອຕ຺ຕານໍ. ອຍໍ ວຸຈ຺ຈຕິ, ຠິກ຺ຂເວ, ‘ສກ຺ກາຍສມຸທຍຄາມິນີ ປຏິປທາ, ສກ຺ກາຍສມຸທຍຄາມິນີ ປຏິປທາ’ຕິ. ອິຕິ ຫິທໍ, ຠິກ຺ຂເວ, ວຸຈ຺ຈຕິ ‘ທຸກ຺ຂສມຸທຍຄາມິນີ ສມນຸປສ຺ສນາ’ຕິ. ອຍເມເວຕ຺ຖ ອຕ຺ໂຖ’’.

‘‘ກຕມາ ຈ, ຠິກ຺ຂເວ, ສກ຺ກາຍນິໂຣຘຄາມິນີ ປຏິປທາ? ອິຘ, ຠິກ຺ຂເວ, ສຸຕວາ ອຣິຍສາວໂກ ອຣິຍານໍ ທສ຺ສາວີ ອຣິຍຘມ຺ມສ຺ສ ໂກວິໂທ ອຣິຍຘມ຺ເມ ສຸວິນີໂຕ, ສປ຺ປຸຣິສານໍ ທສ຺ສາວີ ສປ຺ປຸຣິສຘມ຺ມສ຺ສ ໂກວິໂທ ສປ຺ປຸຣິສຘມ຺ເມ ສຸວິນີໂຕ, ນ ຣູປໍ ອຕ຺ຕໂຕ ສມນຸປສ຺ສຕິ, ນ ຣູປວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ຣູປໍ, ນ ຣູປສ຺ມິໍ ວາ ອຕ຺ຕານໍ. ນ ເວທນໍ ອຕ຺ຕໂຕ… ນ ສຎ຺ຎໍ… ນ ສງ຺ຂາເຣ… ນ ວິຎ຺ຎາຓໍ ອຕ຺ຕໂຕ ສມນຸປສ຺ສຕິ, ນ ວິຎ຺ຎາຓວນ຺ຕໍ ວາ ອຕ຺ຕານໍ; ນ ອຕ຺ຕນິ ວາ ວິຎ຺ຎາຓໍ, ນ ວິຎ຺ຎາຓສ຺ມິໍ ວາ ອຕ຺ຕານໍ. ອຍໍ ວຸຈ຺ຈຕິ, ຠິກ຺ຂເວ, ‘ສກ຺ກາຍນິໂຣຘຄາມິນີ ປຏິປທາ, ສກ຺ກາຍນິໂຣຘຄາມິນີ ປຏິປທາ’ຕິ. ອິຕິ ຫິທໍ, ຠິກ຺ຂເວ, ວຸຈ຺ຈຕິ ‘ທຸກ຺ຂນິໂຣຘຄາມິນີ ສມນຸປສ຺ສນາ’ຕິ. ອຍເມເວຕ຺ຖ ອຕ຺ໂຖ’’ຕິ. ທຸຕິຍໍ.