໓. ອນິຈ຺ຈສຸຕ຺ຕໍ

໔໕. ສາວຕ຺ຖິນິທານໍ. ‘‘ຣູປໍ, ຠິກ຺ຂເວ, ອນິຈ຺ຈໍ. ຍທນິຈ຺ຈໍ ຕໍ ທຸກ຺ຂໍ; ຍໍ ທຸກ຺ຂໍ ຕທນຕ຺ຕາ; ຍທນຕ຺ຕາ ຕໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ທຏ຺ຐພ຺ພໍ. ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ປສ຺ສໂຕ ຈິຕ຺ຕໍ ວິຣຊ຺ຊຕິ ວິມຸຈ຺ຈຕິ ອນຸປາທາຍ ອາສເວຫິ. ເວທນາ ອນິຈ຺ຈາ… ສຎ຺ຎາ… ສງ຺ຂາຣາ… ວິຎ຺ຎາຓໍ ອນິຈ຺ຈໍ. ຍທນິຈ຺ຈໍ ຕໍ ທຸກ຺ຂໍ; ຍໍ ທຸກ຺ຂໍ ຕທນຕ຺ຕາ; ຍທນຕ຺ຕາ ຕໍ ‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’ຕິ ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ທຏ຺ຐພ຺ພໍ. ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ປສ຺ສໂຕ ຈິຕ຺ຕໍ ວິຣຊ຺ຊຕິ ວິມຸຈ຺ຈຕິ ອນຸປາທາຍ ອາສເວຫິ. ຣູປຘາຕຸຍາ ເຈ, ຠິກ຺ຂເວ, ຠິກ຺ຂຸໂນ ຈິຕ຺ຕໍ ວິຣຕ຺ຕໍ ວິມຸຕ຺ຕໍ ໂຫຕິ ອນຸປາທາຍ ອາສເວຫິ, ເວທນາຘາຕຸຍາ…ເປ… ສຎ຺ຎາຘາຕຸຍາ… ສງ຺ຂາຣຘາຕຸຍາ… ວິຎ຺ຎາຓຘາຕຸຍາ ເຈ, ຠິກ຺ຂເວ, ຠິກ຺ຂຸໂນ ຈິຕ຺ຕໍ ວິຣຕ຺ຕໍ ວິມຸຕ຺ຕໍ ໂຫຕິ ອນຸປາທາຍ ອາສເວຫິ. ວິມຸຕ຺ຕຕ຺ຕາ ຐິຕໍ. ຐິຕຕ຺ຕາ ສນ຺ຕຸສິຕໍ [ສນ຺ຕຸສ຺ສິຕໍ (ກ. ສີ. ປີ. ກ.)]. ສນ຺ຕຸສິຕຕ຺ຕາ ນ ປຣິຕສ຺ສຕິ. ອປຣິຕສ຺ສໍ ປຈ຺ຈຕ຺ຕຎ຺ເຎວ ປຣິນິພ຺ພາຍຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕີ’’ຕິ. ຕຕິຍໍ.