໑໐. ທຸຕິຍນນ຺ທິກ຺ຂຍສຸຕ຺ຕໍ

໕໒. ສາວຕ຺ຖິນິທານໍ. ‘‘ຣູປໍ, ຠິກ຺ຂເວ, ໂຍນິໂສ ມນສິ ກໂຣຖ, ຣູປານິຈ຺ຈຕຎ຺ຈ ຍຖາຠູຕໍ ສມນຸປສ຺ສຖ. ຣູປໍ, ຠິກ຺ຂເວ, ຠິກ຺ຂຸ ໂຍນິໂສ ມນສິ ກໂຣນ຺ໂຕ, ຣູປານິຈ຺ຈຕຎ຺ຈ ຍຖາຠູຕໍ ສມນຸປສ຺ສນ຺ໂຕ ຣູປສ຺ມິໍ ນິພ຺ພິນ຺ທຕິ. ນນ຺ທິກ຺ຂຍາ ຣາຄກ຺ຂໂຍ, ຣາຄກ຺ຂຍາ ນນ຺ທິກ຺ຂໂຍ. ນນ຺ທິຣາຄກ຺ຂຍາ ຈິຕ຺ຕໍ ວິມຸຕ຺ຕໍ ສຸວິມຸຕ຺ຕນ຺ຕິ ວຸຈ຺ຈຕິ. ເວທນໍ, ຠິກ຺ຂເວ, ໂຍນິໂສ ມນສິ ກໂຣຖ, ເວທນານິຈ຺ຈຕຎ຺ຈ ຍຖາຠູຕໍ ສມນຸປສ຺ສຖ. ເວທນໍ, ຠິກ຺ຂເວ, ຠິກ຺ຂຸ ໂຍນິໂສ ມນສິ ກໂຣນ຺ໂຕ, ເວທນານິຈ຺ຈຕຎ຺ຈ ຍຖາຠູຕໍ ສມນຸປສ຺ສນ຺ໂຕ ເວທນາຍ ນິພ຺ພິນ຺ທຕິ. ນນ຺ທິກ຺ຂຍາ ຣາຄກ຺ຂໂຍ, ຣາຄກ຺ຂຍາ ນນ຺ທິກ຺ຂໂຍ. ນນ຺ທິຣາຄກ຺ຂຍາ ຈິຕ຺ຕໍ ວິມຸຕ຺ຕໍ ສຸວິມຸຕ຺ຕນ຺ຕິ ວຸຈ຺ຈຕິ. ສຎ຺ຎໍ ຠິກ຺ຂເວ… ສງ຺ຂາເຣ, ຠິກ຺ຂເວ, ໂຍນິໂສ ມນສິ ກໂຣຖ, ສງ຺ຂາຣານິຈ຺ຈຕຎ຺ຈ ຍຖາຠູຕໍ ສມນຸປສ຺ສຖ. ສງ຺ຂາເຣ, ຠິກ຺ຂເວ, ຠິກ຺ຂຸ ໂຍນິໂສ ມນສິ ກໂຣນ຺ໂຕ, ສງ຺ຂາຣານິຈ຺ຈຕໍ ຍຖາຠູຕໍ ສມນຸປສ຺ສນ຺ໂຕ ສງ຺ຂາເຣສຸ ນິພ຺ພິນ຺ທຕິ. ນນ຺ທິກ຺ຂຍາ ຣາຄກ຺ຂໂຍ, ຣາຄກ຺ຂຍາ ນນ຺ທິກ຺ຂໂຍ. ນນ຺ທິຣາຄກ຺ຂຍາ ຈິຕ຺ຕໍ ວິມຸຕ຺ຕໍ ສຸວິມຸຕ຺ຕນ຺ຕິ ວຸຈ຺ຈຕິ. ວິຎ຺ຎາຓໍ, ຠິກ຺ຂເວ, ໂຍນິໂສ ມນສິ ກໂຣຖ, ວິຎ຺ຎາຓານິຈ຺ຈຕຎ຺ຈ ຍຖາຠູຕໍ ສມນຸປສ຺ສຖ. ວິຎ຺ຎາຓໍ, ຠິກ຺ຂເວ, ຠິກ຺ຂຸ ໂຍນິໂສ ມນສິ ກໂຣນ຺ໂຕ, ວິຎ຺ຎາຓານິຈ຺ຈຕຎ຺ຈ ຍຖາຠູຕໍ ສມນຸປສ຺ສນ຺ໂຕ ວິຎ຺ຎາຓສ຺ມິໍ ນິພ຺ພິນ຺ທຕິ. ນນ຺ທິກ຺ຂຍາ ຣາຄກ຺ຂໂຍ, ຣາຄກ຺ຂຍາ ນນ຺ທິກ຺ຂໂຍ. ນນ຺ທິຣາຄກ຺ຂຍາ ຈິຕ຺ຕໍ ວິມຸຕ຺ຕໍ ສຸວິມຸຕ຺ຕນ຺ຕິ ວຸຈ຺ຈຕີ’’ຕິ. ທສມໍ.

ອຕ຺ຕທີປວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ອຕ຺ຕທີປາ ປຏິປທາ, ທ຺ເວ ຈ ໂຫນ຺ຕິ ອນິຈ຺ຈຕາ;

ສມນຸປສ຺ສນາ ຂນ຺ຘາ, ທ຺ເວ ໂສຓາ ທ຺ເວ ນນ຺ທິກ຺ຂເຍນ ຈາຕິ.

ມູລປຓ຺ຓາສໂກ ສມຕ຺ໂຕ.

ຕສ຺ສ ມູລປຓ຺ຓາສກສ຺ສ ວຄ຺ຄຸທ຺ທານໍ –

ນກຸລປິຕາ ອນິຈ຺ໂຈ ຈ, ຠາໂຣ ນຕຸມ຺ຫາເກນ ຈ;

ອຕ຺ຕທີເປນ ປຎ຺ຎາໂສ, ປຐໂມ ເຕນ ປວຸຈ຺ຈຕີຕິ.