໘. ອເນກວຓ຺ຓວິມານວຕ຺ຖຸ

໑໑໙໙. ‘‘ອເນກວຓ຺ຓໍ ທຣໂສກນາສນໍ, ວິມານມາຣຸຍ຺ຫ ອເນກຈິຕ຺ຕໍ;

ປຣິວາຣິໂຕ ອຈ຺ຉຣາສງ຺ຄເຓນ, ສຸນິມ຺ມິໂຕ ຠູຕປຕີວ ໂມທສິ.

໑໒໐໐. ‘‘ສມສ຺ສໂມ ນຕ຺ຖິ ກຸໂຕ ປນຸຕ຺ຕໂຣ [ອຸຕ຺ຕຣິ (ກ.)], ຍເສນ ປຸຎ຺ເຎນ ຈ ອິທ຺ຘິຍາ ຈ;

ສພ຺ເພ ຈ ເທວາ ຕິທສຄຓາ ສເມຈ຺ຈ, ຕໍ ຕໍ ນມສ຺ສນ຺ຕິ ສສິໍວ ເທວາ;

ອິມາ ຈ ເຕ ອຈ຺ຉຣາໂຍ ສມນ຺ຕໂຕ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໒໐໑. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໒໐໒. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໒໐໓. ‘‘ອຫໍ ຠທນ຺ເຕ ອຫຸວາສິ ປຸພ຺ເພ, ສຸເມຘນາມສ຺ສ ຊິນສ຺ສ ສາວໂກ;

ປຸຖຸຊ຺ຊໂນ ອນນຸໂພໂຘຫມສ຺ມິ [ອນວໂພໂຘຫມສ຺ມິໍ (ສີ.), ອນນຸໂພໂຘຫມາສິໍ (?)], ໂສ ສຕ຺ຕ ວສ຺ສານິ ປຣິພ຺ພຊິສ຺ສຫໍ [ປພ຺ພຊິສ຺ສຫໍ (ສ຺ຍາ. ກ.), ປພ຺ພຊິສາຫໍ (ປີ.)].

໑໒໐໔. ‘‘ໂສຫໍ ສຸເມຘສ຺ສ ຊິນສ຺ສ ສຕ຺ຖຸໂນ, ປຣິນິພ຺ພຸຕສ຺ໂສຆຕິຓ຺ຓສ຺ສ ຕາທິໂນ;

ຣຕນຸຈ຺ຈຍໍ ເຫມຊາເລນ ຉນ຺ນໍ, ວນ຺ທິຕ຺ວາ ຖູປສ຺ມິໍ ມນໍ ປສາທຍິໍ.

໑໒໐໕. ‘‘ນ ມາສິ ທານໍ ນ ຈ ມຕ຺ຖິ ທາຕຸໍ, ປເຣ ຈ ໂຂ ຕຕ຺ຖ ສມາທເປສິໍ;

ປູເຊຖ ນໍ ປູຊນີຍສ຺ສ [ປູຊເນຍ຺ຍສ຺ສ (ສ຺ຍາ. ກ.)] ຘາຕຸໍ, ເອວໍ ກິຣ ສຄ຺ຄມິໂຕ ຄມິສ຺ສຖ.

໑໒໐໖. ‘‘ຕເທວ ກມ຺ມໍ ກຸສລໍ ກຕໍ ມຍາ, ສຸຂຎ຺ຈ ທິພ຺ພໍ ອນຸໂຠມິ ອຕ຺ຕນາ;

ໂມທາມຫໍ ຕິທສຄຓສ຺ສ ມຊ຺ເຌ, ນ ຕສ຺ສ ປຸຎ຺ຎສ຺ສ ຂຍມ຺ປິ ອຊ຺ຌຄ’’ນ຺ຕິ.

ອເນກວຓ຺ຓວິມານໍ ອຏ຺ຐມໍ.