໒. ປຸຣິສວິມານໍ

໕. ມຫາຣຖວຄ຺ໂຄ

໑. ມຓ຺ຑູກເທວປຸຕ຺ຕວິມານວຕ຺ຖຸ

໘໕໗. ‘‘ໂກ ເມ ວນ຺ທຕິ ປາທານິ, ອິທ຺ຘິຍາ ຍສສາ ຊລໍ;

ອຠິກ຺ກນ຺ເຕນ ວຓ຺ເຓນ, ສພ຺ພາ ໂອຠາສຍໍ ທິສາ’’ຕິ.

໘໕໘. ‘‘ມຓ຺ຑູໂກຫໍ ປຸເຣ ອາສິໍ, ອຸທເກ ວາຣິໂຄຈໂຣ;

ຕວ ຘມ຺ມໍ ສຸຓນ຺ຕສ຺ສ, ອວຘີ ວຈ຺ຉປາລໂກ.

໘໕໙. ‘‘ມຸຫຸຕ຺ຕໍ ຈິຕ຺ຕປສາທສ຺ສ, ອິທ຺ຘິໍ ປສ຺ສ ຍສຎ຺ຈ ເມ;

ອານຸຠາວຎ຺ຈ ເມ ປສ຺ສ, ວຓ຺ຓໍ ປສ຺ສ ຊຸຕິຎ຺ຈ ເມ.

໘໖໐. ‘‘ເຍ ຈ ເຕ ທີຆມທ຺ຘານໍ, ຘມ຺ມໍ ອສ຺ໂສສຸໍ ໂຄຕມ;

ປຕ຺ຕາ ເຕ ອຈລຏ຺ຐານໍ, ຍຕ຺ຖ ຄນ຺ຕ຺ວາ ນ ໂສຈເຣ’’ຕິ.

ມຓ຺ຑູກເທວປຸຕ຺ຕວິມານໍ ປຐມໍ.

໒. ເຣວຕີວິມານວຕ຺ຖຸ

໘໖໑. [ຘ. ປ. ໒໑໙ ຘມ຺ມປເທ] ‘‘ຈິຣປ຺ປວາສິໍ ປຸຣິສໍ, ທູຣໂຕ ໂສຕ຺ຖິມາຄຕໍ;

ຎາຕິມິຕ຺ຕາ ສຸຫຊ຺ຊາ ຈ, ອຠິນນ຺ທນ຺ຕິ ອາຄຕໍ;

໘໖໒. [ຘ. ປ. ໒໒໐ ຘມ຺ມປເທ] ‘‘ຕເຖວ ກຕປຸຎ຺ຎມ຺ປິ, ອສ຺ມາ ໂລກາ ປຣໍ ຄຕໍ;

ປຸຎ຺ຎານິ ປຏິຄຓ຺ຫນ຺ຕິ, ປິຍໍ ຎາຕີວ ອາຄຕໍ.

໘໖໓. [ເປ. ວ. ໗໑໔]‘‘ອຸຏ຺ເຐຫິ ເຣວເຕ ສຸປາປຘມ຺ເມ, ອປາຣຸຕທ຺ວາເຣ [ອປາຣຸຠໍ ທ຺ວາຣໍ (ສີ. ສ຺ຍາ.), ອປາຣຸຕທ຺ວາຣໍ (ປີ. ກ.)] ອທານສີເລ;

ເນສ຺ສາມ ຕໍ ຍຕ຺ຖ ຖຸນນ຺ຕິ ທຸຄ຺ຄຕາ, ສມປ຺ປິຕາ ເນຣຍິກາ ທຸກ຺ເຂນາ’’ຕິ.

໘໖໔. ອິຈ຺ເຈວ [ອິຈ຺ເຈວໍ (ສ຺ຍາ. ກ.)] ວຕ຺ວານ ຍມສ຺ສ ທູຕາ, ເຕ ທ຺ເວ ຍກ຺ຂາ ໂລຫິຕກ຺ຂາ ພ຺ຣຫນ຺ຕາ;

ປຈ຺ເຈກພາຫາສຸ ຄເຫຕ຺ວາ ເຣວຕໍ, ປກ຺ກາມຍຸໍ ເທວຄຓສ຺ສ ສນ຺ຕິເກ.

໘໖໕. ‘‘ອາທິຈ຺ຈວຓ຺ຓໍ ຣຸຈິຣໍ ປຠສ຺ສຣໍ, ພ຺ຍມ຺ຫໍ ສຸຠໍ ກຎ຺ຈນຊາລຉນ຺ນໍ;

ກສ຺ເສຕມາກິຓ຺ຓຊນໍ ວິມານໍ, ສູຣິຍສ຺ສ ຣໍສີຣິວ ໂຊຕມານໍ.

໘໖໖. ‘‘ນາຣີຄຓາ ຈນ຺ທນສາຣລິຕ຺ຕາ [ຈນ຺ທນສາຣານຸລິຕ຺ຕາ (ສ຺ຍາ.)], ອຸຠໂຕ ວິມານໍ ອຸປໂສຠຍນ຺ຕິ;

ຕໍ ທິສ຺ສຕິ ສູຣິຍສມານວຓ຺ຓໍ, ໂກ ໂມທຕິ ສຄ຺ຄປຕ຺ໂຕ ວິມາເນ’’ຕິ.

໘໖໗. ‘‘ພາຣາຓສິຍໍ ນນ຺ທິໂຍ ນາມາສິ, ອຸປາສໂກ ອມຈ຺ຉຣີ ທານປຕິ ວທຎ຺ຎູ;

ຕສ຺ເສຕມາກິຓ຺ຓຊນໍ ວິມານໍ, ສູຣິຍສ຺ສ ຣໍສີຣິວ ໂຊຕມານໍ.

໘໖໘. ‘‘ນາຣີຄຓາ ຈນ຺ທນສາຣລິຕ຺ຕາ, ອຸຠໂຕ ວິມານໍ ອຸປໂສຠຍນ຺ຕິ;

ຕໍ ທິສ຺ສຕິ ສູຣິຍສມານວຓ຺ຓໍ, ໂສ ໂມທຕິ ສຄ຺ຄປຕ຺ໂຕ ວິມາເນ’’ຕິ.

໘໖໙. ‘‘ນນ຺ທິຍສ຺ສາຫໍ ຠຣິຍາ, ອຄາຣິນີ ສພ຺ພກຸລສ຺ສ ອິສ຺ສຣາ;

ຠຕ຺ຕຸ ວິມາເນ ຣມິສ຺ສາມິ ທານຫໍ, ນ ປຕ຺ຖເຍ ນິຣຍໍ ທສ຺ສນາຍາ’’ຕິ.

໘໗໐. ‘‘ເອໂສ ເຕ ນິຣໂຍ ສຸປາປຘມ຺ເມ, ປຸຎ຺ຎໍ ຕຍາ ອກຕໍ ຊີວໂລເກ;

ນ ຫິ ມຈ຺ຉຣີ ໂຣສໂກ ປາປຘມ຺ໂມ, ສຄ຺ຄູປຄານໍ ລຠຕິ ສຫພ຺ຍຕ’’ນ຺ຕິ.

໘໗໑. ‘‘ກິໍ ນຸ ຄູຖຎ຺ຈ ມຸຕ຺ຕຎ຺ຈ, ອສຸຈີ ປຏິທິສ຺ສຕິ;

ທຸຄ຺ຄນ຺ຘໍ ກິມິທໍ ມີຬ຺ຫໍ, ກິເມຕໍ ອຸປວາຍຕີ’’ຕິ.

໘໗໒. ‘‘ເອສ ສໍສວໂກ ນາມ, ຄມ຺ຠີໂຣ ສຕໂປຣິໂສ;

ຍຕ຺ຖ ວສ຺ສສຫສ຺ສານິ, ຕຸວໍ ປຈ຺ຈສິ ເຣວເຕ’’ຕິ.

໘໗໓. ‘‘ກິໍ ນຸ ກາເຍນ ວາຈາຍ, ມນສາ ທຸກ຺ກຏໍ ກຕໍ;

ເກນ ສໍສວໂກ ລທ຺ໂຘ, ຄມ຺ຠີໂຣ ສຕໂປຣິໂສ’’ຕິ.

໘໗໔. ‘‘ສມເຓ ພ຺ຣາຫ຺ມເຓ ຈາປິ, ອຎ຺ເຎ ວາປິ ວນິພ຺ພເກ [ວຓິພ຺ພເກ (ສ຺ຍາ. ກ.)];

ມຸສາວາເທນ ວຎ຺ເຈສິ, ຕໍ ປາປໍ ປກຕໍ ຕຍາ.

໘໗໕. ‘‘ເຕນ ສໍສວໂກ ລທ຺ໂຘ, ຄມ຺ຠີໂຣ ສຕໂປຣິໂສ;

ຕຕ຺ຖ ວສ຺ສສຫສ຺ສານິ, ຕຸວໍ ປຈ຺ຈສິ ເຣວເຕ.

໘໗໖. ‘‘ຫຕ຺ເຖປິ ຉິນ຺ທນ຺ຕິ ອໂຖປິ ປາເທ, ກຓ຺ເຓປິ ຉິນ຺ທນ຺ຕິ ອໂຖປິ ນາສໍ;

ອໂຖປິ ກາໂກຬຄຓາ ສເມຈ຺ຈ, ສງ຺ຄມ຺ມ ຂາທນ຺ຕິ ວິຜນ຺ທມານ’’ນ຺ຕິ.

໘໗໗. ‘‘ສາຘຸ ໂຂ ມໍ ປຏິເນຖ, ກາຫາມິ ກຸສລໍ ພຫຸໍ;

ທາເນນ ສມຈຣິຍາຍ, ສໍຍເມນ ທເມນ ຈ;

ຍໍ ກຕ຺ວາ ສຸຂິຕາ ໂຫນ຺ຕິ, ນ ຈ ປຈ຺ຉານຸຕປ຺ປເຣ’’ຕິ.

໘໗໘. ‘‘ປຸເຣ ຕຸວໍ ປມຊ຺ຊິຕ຺ວາ, ອິທານິ ປຣິເທວສິ;

ສຍໍ ກຕານໍ ກມ຺ມານໍ, ວິປາກໍ ອນຸໂຠສ຺ສສີ’’ຕິ.

໘໗໙. ‘‘ໂກ ເທວໂລກໂຕ ມນຸສ຺ສໂລກໍ, ຄນ຺ຕ຺ວານ ປຸຏ຺ໂຐ ເມ ເອວໍ ວເທຍ຺ຍ;

‘ນິກ຺ຂິຕ຺ຕທຓ຺ເຑສຸ ທທາຖ ທານໍ, ອຈ຺ຉາທນໍ ເສຍ຺ຍ [ສຍນ (ສີ.)] ມຖນ຺ນປານໍ;

ນຫິ ມຈ຺ຉຣີ ໂຣສໂກ ປາປຘມ຺ໂມ, ສຄ຺ຄູປຄານໍ ລຠຕິ ສຫພ຺ຍຕໍ’.

໘໘໐. ‘‘ສາຫໍ ນູນ ອິໂຕ ຄນ຺ຕ຺ວາ, ໂຍນິໍ ລທ຺ຘານ ມານຸສິໍ;

ວທຎ຺ຎູ ສີລສມ຺ປນ຺ນາ, ກາຫາມິ ກຸສລໍ ພຫຸໍ;

ທາເນນ ສມຈຣິຍາຍ, ສໍຍເມນ ທເມນ ຈ.

໘໘໑. ‘‘ອາຣາມານິ ຈ ໂຣປິສ຺ສໍ, ທຸຄ຺ເຄ ສງ຺ກມນານິ ຈ;

ປປຎ຺ຈ ອຸທປານຎ຺ຈ, ວິປ຺ປສນ຺ເນນ ເຈຕສາ.

໘໘໒. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໘໘໓. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;

ນ ຈ ທາເນ ປມຊ຺ຊິສ຺ສໍ, ສາມໍ ທິຏ຺ຐມິທໍ ມຍາ’’ຕິ;

໘໘໔. ອິຈ຺ເຈວໍ ວິປ຺ປລປນ຺ຕິໍ, ຜນ຺ທມານໍ ຕໂຕ ຕໂຕ;

ຂິປິໍສຸ ນິຣເຍ ໂຆເຣ, ອຸທ຺ຘປາທໍ ອວໍສິຣໍ.

໘໘໕. ‘‘ອຫໍ ປຸເຣ ມຈ຺ຉຣິນີ ອໂຫສິໍ, ປຣິຠາສິກາ ສມຓພ຺ຣາຫ຺ມຓານໍ;

ວິຕເຖນ ຈ ສາມິກໍ ວຎ຺ຈຍິຕ຺ວາ, ປຈ຺ຈາມຫໍ ນິຣເຍ ໂຆຣຣູເປ’’ຕິ.

ເຣວຕີວິມານໍ ທຸຕິຍໍ.

໓. ຉຕ຺ຕມາຓວກວິມານວຕ຺ຖຸ

໘໘໖. ‘‘ເຍ ວທຕໍ ປວໂຣ ມນຸເຊສຸ, ສກ຺ຍມຸນີ ຠຄວາ ກຕກິຈ຺ໂຈ;

ປາຣຄໂຕ ພລວີຣິຍສມງ຺ຄີ [ພລວີຣສມງ຺ຄີ (ກ.)], ຕໍ ສຸຄຕໍ ສຣຓຕ຺ຖມຸເປຫິ.

໘໘໗. ‘‘ຣາຄວິຣາຄມເນຊມໂສກໍ, ຘມ຺ມມສງ຺ຂຕມປ຺ປຏິກູລໍ;

ມຘຸຣມິມໍ ປຄຸຓໍ ສຸວິຠຕ຺ຕໍ, ຘມ຺ມມິມໍ ສຣຓຕ຺ຖມຸເປຫິ.

໘໘໘. ‘‘ຍຕ຺ຖ ຈ ທິນ຺ນ ມຫປ຺ຜລມາຫຸ, ຈຕູສຸ ສຸຈີສຸ ປຸຣິສຍຸເຄສຸ;

ອຏ຺ຐ ຈ ປຸຄ຺ຄລຘມ຺ມທສາ ເຕ, ສງ຺ຆມິມໍ ສຣຓຕ຺ຖມຸເປຫິ.

໘໘໙. ‘‘ນ ຕຖາ ຕປຕິ ນເຠ ສູຣິໂຍ, ຈນ຺ໂທ ຈ ນ ຠາສຕິ ນ ຜຸສ຺ໂສ;

ຍຖາ ອຕຸລມິທໍ ມຫປ຺ປຠາສໍ, ໂກ ນຸ ຕ຺ວໍ ຕິທິວາ ມຫິໍ ອຸປາຄາ.

໘໙໐. ‘‘ຉິນ຺ທຕິ ຣໍສີ ປຠງ຺ກຣສ຺ສ, ສາຘິກວີສຕິໂຍຊນານິ ອາຠາ;

ຣຕ຺ຕິມປິ ຍຖາ ທິວໍ ກໂຣຕິ, ປຣິສຸທ຺ຘໍ ວິມລໍ ສຸຠໍ ວິມານໍ.

໘໙໑. ‘‘ພຫຸປທຸມວິຈິຕ຺ຣປຸຓ຺ຑຣີກໍ, ໂວກິຓ຺ຓໍ ກຸສຸເມຫິ ເນກຈິຕ຺ຕໍ;

ອຣຊວິຣຊເຫມຊາລຉນ຺ນໍ, ອາກາເສ ຕປຕິ ຍຖາປິ ສູຣິໂຍ.

໘໙໒. ‘‘ຣຕ຺ຕມ຺ພຣປີຕວສສາຫິ, ອຄຣຸປິຍງ຺ຄຸຈນ຺ທນຸສ຺ສທາຫິ;

ກຎ຺ຈນຕນຸສນ຺ນິຠຕ຺ຕຈາຫິ, ປຣິປູຣໍ ຄຄນໍວ ຕາຣກາຫິ.

໘໙໓. ‘‘ນຣນາຣິໂຍ [ນຣນາຣີ (ກ.), ນາຣິໂຍ (?)] ພຫຸເກຕ຺ຖເນກວຓ຺ຓາ, ກຸສຸມວິຠູສິຕາຠຣເຓຕ຺ຖ ສຸມນາ;

ອນິລປມຸຎ຺ຈິຕາ ປວນ຺ຕິ [ປວາຍນ຺ຕິ (ກ.)] ສຸຣຠິໍ, ຕປນິຍວິຕຕາ ສຸວຓ຺ຓຉນ຺ນາ [ສຸວຓ຺ຓຈ຺ຉາທນາ (ສີ.)].

໘໙໔. ‘‘ກິສ຺ສ ສໍຍມສ຺ສ [ສມທມສ຺ສ (ສີ.)] ອຍໍ ວິປາໂກ, ເກນາສິ ກມ຺ມຜເລນິຘູປປນ຺ໂນ;

ຍຖາ ຈ ເຕ ອຘິຄຕມິທໍ ວິມານໍ, ຕທນຸປທໍ ອວຈາສິ ອິງ຺ຆ ປຸຏ຺ໂຐ’’ຕິ.

໘໙໕. ‘‘ສຍມິຘ [ຍມິຘ (ສີ. ສ຺ຍາ. ປີ.)] ປເຖ ສເມຈ຺ຈ ມາຓເວນ, ສຕ຺ຖານຸສາສິ ອນຸກມ຺ປມາໂນ;

ຕວ ຣຕນວຣສ຺ສ ຘມ຺ມໍ ສຸຕ຺ວາ, ກຣິສ຺ສາມີຕິ ຈ ພ຺ຣວິຕ຺ຖ ຉຕ຺ໂຕ.

໘໙໖. ‘‘ຊິນວຣປວຣໍ [ຊິນປວຣໍ (ສ຺ຍາ. ກ.)] ອຸເປຫິ [ອຸເປມິ (ພຫູສຸ)] ສຣຓໍ, ຘມ຺ມຎ຺ຈາປິ ຕເຖວ ຠິກ຺ຂຸສງ຺ຆໍ;

ໂນຕິ ປຐມໍ ອໂວຈຫໍ [ອໂວຈາຫໍ (ສີ. ສ຺ຍາ. ກ.)] ຠນ຺ເຕ, ປຈ຺ຉາ ເຕ ວຈນໍ ຕເຖວກາສິໍ.

໘໙໗. ‘‘ມາ ຈ ປາຓວຘໍ ວິວິຘໍ ຈຣສ຺ສຸ ອສຸຈິໍ,

ນ ຫິ ປາເຓສຸ ອສຎ຺ຎຕໍ ອວຓ຺ຓຍິໍສຸ ສປ຺ປຎ຺ຎາ;

ໂນຕິ ປຐມໍ ອໂວຈຫໍ ຠນ຺ເຕ,

ປຈ຺ຉາ ເຕ ວຈນໍ ຕເຖວກາສິໍ.

໘໙໘. ‘‘ມາ ຈ ປຣຊນສ຺ສ ຣກ຺ຂິຕມ຺ປິ, ອາທາຕພ຺ພມມຎ຺ຎິໂຖ [ມມຎ຺ຎິຕ຺ຖ (ສີ. ປີ.)] ອທິນ຺ນໍ;

ໂນຕິ ປຐມໍ ອໂວຈຫໍ ຠນ຺ເຕ, ປຈ຺ຉາ ວຈນໍ ຕເຖວກາສິໍ.

໘໙໙. ‘‘ມາ ຈ ປຣຊນສ຺ສ ຣກ຺ຂິຕາໂຍ, ປຣຠຣິຍາ ອຄມາ ອນຣິຍເມຕໍ;

ໂນຕິ ປຐມໍ ອໂວຈຫໍ ຠນ຺ເຕ, ປຈ຺ຉາ ເຕ ວຈນໍ ຕເຖວກາສິໍ;

໙໐໐. ‘‘ມາ ຈ ວິຕຖໍ ອຎ຺ຎຖາ ອຠາຓິ,

ນ ຫິ ມຸສາວາທໍ ອວຓ຺ຓຍິໍສຸ ສປ຺ປຎ຺ຎາ;

ໂນຕິ ປຐມໍ ອໂວຈຫໍ ຠນ຺ເຕ, ປຈ຺ຉາ ເຕ ວຈນໍ ຕເຖວກາສິໍ.

໙໐໑. ‘‘ເຍນ ຈ ປຸຣິສສ຺ສ ອເປຕິ ສຎ຺ຎາ, ຕໍ ມຊ຺ຊໍ ປຣິວຊ຺ຊຍສ຺ສຸ ສພ຺ພໍ;

ໂນຕິ ປຐມໍ ອໂວຈຫໍ ຠນ຺ເຕ, ປຈ຺ຉາ ເຕ ວຈນໍ ຕເຖວກາສິໍ.

໙໐໒. ‘‘ສ຺ວາຫໍ ອິຘ ປຎ຺ຈ ສິກ຺ຂາ ກຣິຕ຺ວາ, ປຏິປຊ຺ຊິຕ຺ວາ ຕຖາຄຕສ຺ສ ຘມ຺ເມ;

ທ຺ເວປຖມຄມາສິໍ ໂຈຣມຊ຺ເຌ, ເຕ ມໍ ຕຕ຺ຖ ວຘິໍສຸ ໂຠຄເຫຕຸ.

໙໐໓. ‘‘ເອຕ຺ຕກມິທໍ ອນຸສ຺ສຣາມິ ກຸສລໍ, ຕໂຕ ປຣໍ ນ ເມ ວິຊ຺ຊຕິ ອຎ຺ຎໍ;

ເຕນ ສຸຈຣິເຕນ ກມ຺ມຸນາຫໍ [ກມ຺ມນາຫໍ (ສີ.)], ອຸປ຺ປນ຺ໂນ [ອຸປປນ຺ໂນ (ພຫູສຸ)] ຕິທິເວສຸ ກາມກາມີ.

໙໐໔. ‘‘ປສ຺ສ ຂຓມຸຫຸຕ຺ຕສຎ຺ຎມສ຺ສ, ອນຸຘມ຺ມປ຺ປຏິປຕ຺ຕິຍາ ວິປາກໍ;

ຊລມິວ ຍສສາ ສເມກ຺ຂມານາ, ພຫຸກາ ມໍ ປິຫຍນ຺ຕິ ຫີນກມ຺ມາ.

໙໐໕. ‘‘ປສ຺ສ ກຕິປຍາຍ ເທສນາຍ, ສຸຄຕິຎ຺ຈມ຺ຫິ ຄໂຕ ສຸຂຎ຺ຈ ປຕ຺ໂຕ;

ເຍ ຈ ເຕ ສຕຕໍ ສຸຓນ຺ຕິ ຘມ຺ມໍ, ມຎ຺ເຎ ເຕ ອມຕໍ ຜຸສນ຺ຕິ ເຂມໍ.

໙໐໖. ‘‘ອປ຺ປມ຺ປິ ກຕໍ ມຫາວິປາກໍ, ວິປຸລໍ ໂຫຕິ [ວິປຸລຜລໍ (ກ.)] ຕຖາຄຕສ຺ສ ຘມ຺ເມ;

ປສ຺ສ ກຕປຸຎ຺ຎຕາຍ ຉຕ຺ໂຕ, ໂອຠາເສຕິ ປຖວິໍ ຍຖາປິ ສູຣິໂຍ.

໙໐໗. ‘‘ກິມິທໍ ກຸສລໍ ກິມາຈເຣມ, ອິຈ຺ເຈເກ ຫິ ສເມຈ຺ຈ ມນ຺ຕຍນ຺ຕິ;

ເຕ ມຍໍ ປຸນເຣວ [ປຸນປິ (?)] ລທ຺ຘ ມານຸສຕ຺ຕໍ, ປຏິປນ຺ນາ ວິຫເຣມຸ ສີລວນ຺ໂຕ.

໙໐໘. ‘‘ພຫຸກາໂຣ ອນຸກມ຺ປໂກ ຈ ສຕ຺ຖາ, ອິຕິ ເມ ສຕິ ອຄມາ ທິວາ ທິວສ຺ສ;

ສ຺ວາຫໍ ອຸປຄໂຕມ຺ຫິ ສຈ຺ຈນາມໍ, ອນຸກມ຺ປສ຺ສຸ ປຸນປິ ສຸເຓມຸ [ສຸໂຓມ (ສີ.), ສຸໂຓມິ (ສ຺ຍາ.)] ຘມ຺ມໍ.

໙໐໙. ‘‘ເຍ ຈິຘ [ເຍຘ (ສີ. ສ຺ຍາ. ປີ.), ເຍ ອິຘ (ກ.)] ປຊຫນ຺ຕິ ກາມຣາຄໍ, ຠວຣາຄານຸສຍຎ຺ຈ ປຫາຍ ໂມຫໍ;

ນ ຈ ເຕ ປຸນມຸເປນ຺ຕິ ຄພ຺ຠເສຍ຺ຍໍ, ປຣິນິພ຺ພານຄຕາ ຫິ ສີຕິຠູຕາ’’ຕິ.

ຉຕ຺ຕມາຓວກວິມານໍ ຕຕິຍໍ.

໔. ກກ຺ກຏກຣສທາຍກວິມານວຕ຺ຖຸ

໙໑໐. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ [ຣຸຈິຣຕ຺ຖຕາ (ສ຺ຍາ. ກ.) ໖໔໖ ຄາຖາຍໍ ‘‘ຣຸຈກຸປກິຓ຺ຓໍ’’ຕິ ປທສ຺ສ ສໍວຓ຺ຓນາ ປສ຺ສິຕພ຺ພາ] ສຸຠາ.

໙໑໑. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ [ວຄ຺ຄຸ (ສີ. ກ.), ວຄ຺ຄູ (ສ຺ຍາ.)];

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໙໑໒. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໙໑໓. ‘‘ປຸຈ຺ຉາມິ ຕໍ ເທວ ມຫານຸຠາວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໙໑໔. ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໙໑໕. ‘‘ສຕິສມຸປ຺ປາທກໂຣ, ທ຺ວາເຣ ກກ຺ກຏໂກ ຐິໂຕ;

ນິຏ຺ຐິໂຕ ຊາຕຣູປສ຺ສ, ໂສຠຕິ ທສປາທໂກ.

໙໑໖. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໙໑໗. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູໂຕ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາໂວ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ກກ຺ກຏກຣສທາຍກວິມານໍ ຈຕຸຕ຺ຖໍ.

(ອນນ຺ຕຣໍ ປຎ຺ຈວິມານໍ ຍຖາ ກກ຺ກຏກຣສທາຍກວິມານໍ ຕຖາ ວິຕ຺ຖາເຣຕພ຺ພໍ)

໕. ທ຺ວາຣປາລວິມານວຕ຺ຖຸ

໙໑໘. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໙໑໙. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໙໒໐. ‘‘ເກນ ເຕຕາທິໂສ ວຓ຺ໂຓ…ເປ… ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໙໒໒. ໂສ ເທວປຸຕ຺ໂຕ ອຕ຺ຕມໂນ, ໂມຄ຺ຄລ຺ລາເນນ ປຸຈ຺ຉິໂຕ;

ປຎ຺ຫໍ ປຸຏ຺ໂຐ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໙໒໓. ‘‘ທິພ຺ພໍ ມມໍ ວສ຺ສສຫສ຺ສມາຍຸ, ວາຈາຠິຄີຕໍ ມນສາ ປວຕ຺ຕິຕໍ;

ເອຕ຺ຕາວຕາ ຐສ຺ສຕິ ປຸຎ຺ຎກມ຺ໂມ, ທິພ຺ເພຫິ ກາເມຫິ ສມງ຺ຄິຠູໂຕ.

໙໒໔. ‘‘ເຕນ ເມຕາທິໂສ ວຓ຺ໂຓ…ເປ…ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.