໙. ມຏ຺ຐກຸຓ຺ຑລີວິມານວຕ຺ຖຸ

໑໒໐໗. [ເປ. ວ. ໑໘໖] ‘‘ອລງ຺ກໂຕ ມຏ຺ຐກຸຓ຺ຑລີ [ມຏ຺ຏກຸຓ຺ຑລີ (ສີ.)], ມາລຘາຣີ ຫຣິຈນ຺ທນຸສ຺ສໂທ;

ພາຫາ ປຄ຺ຄຍ຺ຫ ກນ຺ທສິ, ວນມຊ຺ເຌ ກິໍ ທຸກ຺ຂິໂຕ ຕຸວ’’ນ຺ຕິ.

໑໒໐໘. ‘‘ໂສວຓ຺ຓມໂຍ ປຠສ຺ສໂຣ, ອຸປ຺ປນ຺ໂນ ຣຖປຎ຺ຊໂຣ ມມ;

ຕສ຺ສ ຈກ຺ກຍຸຄໍ ນ ວິນ຺ທາມິ, ເຕນ ທຸກ຺ເຂນ ຊຫາມິ [ຊຫິສ຺ສໍ (ສີ.), ຊຫິສ຺ສາມິ (ສ຺ຍາ. ປີ.)] ຊີວິຕ’’ນ຺ຕິ.

໑໒໐໙. ‘‘ໂສວຓ຺ຓມຍໍ ມຓິມຍໍ, ໂລຫິຕກມຍໍ [ໂລຫິຕງ຺ຄມຍໍ (ສ຺ຍາ.), ໂລຫິຕງ຺ກມຍໍ (ສີ.), ໂລຫມຍໍ (ກຕ຺ຖຈິ)] ອຖ ຣູປິຍມຍໍ;

ອາຈິກ຺ຂ [ອາຈິກ຺ຂຖ (ກ.)] ເມ ຠທ຺ທມາຓວ, ຈກ຺ກຍຸຄໍ ປຏິປາທຍາມິ ເຕ’’ຕິ.

໑໒໑໐. ໂສ ມາຓໂວ ຕສ຺ສ ປາວທິ, ‘‘ຈນ຺ທິມສູຣິຍາ ອຸຠເຍຕ຺ຖ ທິສ຺ສເຣ;

ໂສວຓ຺ຓມໂຍ ຣໂຖ ມມ, ເຕນ ຈກ຺ກຍຸເຄນ ໂສຠຕີ’’ຕິ.

໑໒໑໑. ‘‘ພາໂລ ໂຂ ຕ຺ວໍ ອສິ ມາຓວ, ໂຍ ຕ຺ວໍ ປຕ຺ຖຍເສ ອປຕ຺ຖິຍໍ;

ມຎ຺ຎາມິ ຕຸວໍ ມຣິສ຺ສສິ, ນ ຫິ ຕ຺ວໍ ລຈ຺ຉສິ ຈນ຺ທິມສູຣິເຍ’’ຕິ.

໑໒໑໒. ‘‘ຄມນາຄມນມ຺ປິ ທິສ຺ສຕິ, ວຓ຺ຓຘາຕຸ ອຸຠຍຕ຺ຖ ວີຖິຍາ;

ເປໂຕ [ເປໂຕ ປນ (ສີ. ສ຺ຍາ.)] ກາລກໂຕ ນ ທິສ຺ສຕິ, ໂກ ນິຘ ກນ຺ທຕໍ ພາລ຺ຍຕໂຣ’’ຕິ.

໑໒໑໓. ‘‘ສຈ຺ຈໍ ໂຂ ວເທສິ ມາຓວ, ອຫເມວ ກນ຺ທຕໍ ພາລ຺ຍຕໂຣ;

ຈນ຺ທໍ ວິຍ ທາຣໂກ ຣຸທໍ, ເປຕໍ ກາລກຕາຠິປຕ຺ຖຍິ’’ນ຺ຕິ.

໑໒໑໔. ‘‘ອາທິຕ຺ຕໍ ວຕ ມໍ ສນ຺ຕໍ, ຆຕສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈໍ, ສພ຺ພໍ ນິພ຺ພາປເຍ ທຣໍ.

໑໒໑໕. ‘‘ອພ຺ພຫີ [ອພ຺ພູຬ຺ຫ (ປີ.), ອພ຺ພູຬ຺ຫໍ (ສ຺ຍາ. ກ.)] ວຕ ເມ ສລ຺ລໍ, ໂສກໍ ຫທຍນິສ຺ສິຕໍ;

ໂຍ ເມ ໂສກປເຣຕສ຺ສ, ປຸຕ຺ຕໂສກໍ ອປານຸທິ.

໑໒໑໖. ‘‘ສ຺ວາຫໍ ອພ຺ພູຬ຺ຫສລ຺ໂລສ຺ມິ, ສີຕິຠູໂຕສ຺ມິ ນິພ຺ພຸໂຕ;

ນ ໂສຈາມິ ນ ໂຣທາມິ, ວຕ ສຸຕ຺ວານ ມາຓວາຕິ.

໑໒໑໗. ‘‘ເທວຕາ ນຸສິ ຄນ຺ຘພ຺ໂພ, ອທຸ [ອາທຸ (ສີ. ສ຺ຍາ.)] ສກ຺ໂກ ປຸຣິນ຺ທໂທ;

ໂກ ວາ ຕ຺ວໍ ກສ຺ສ ວາ ປຸຕ຺ໂຕ, ກຖໍ ຊາເນມຸ ຕໍ ມຍ’’ນ຺ຕິ.

໑໒໑໘. ‘‘ຍຎ຺ຈ [ຍໍ (ກ.)] ກນ຺ທສິ ຍຎ຺ຈ ໂຣທສິ, ປຸຕ຺ຕໍ ອາຬາຫເນ ສຍໍ ທຫິຕ຺ວາ;

ສ຺ວາຫໍ ກຸສລໍ ກຣິຕ຺ວາ ກມ຺ມໍ, ຕິທສານໍ ສຫພ຺ຍຕໍ ຄໂຕ’’ຕິ [ປຕ຺ໂຕຕິ (ສີ. ສ຺ຍາ. ປີ.)].

໑໒໑໙. ‘‘ອປ຺ປໍ ວາ ພຫຸໍ ວາ ນາທ຺ທສາມ, ທານໍ ທທນ຺ຕສ຺ສ ສເກ ອຄາເຣ;

ອຸໂປສຖກມ຺ມໍ ວາ [ອຸໂປສຖກມ຺ມຎ຺ຈ (ກ.)] ຕາທິສໍ, ເກນ ກມ຺ເມນ ຄໂຕສິ ເທວໂລກ’’ນ຺ຕິ.

໑໒໒໐. ‘‘ອາພາຘິໂກຫໍ ທຸກ຺ຂິໂຕ ຄິລາໂນ, ອາຕຸຣຣູໂປມ຺ຫິ ສເກ ນິເວສເນ;

ພຸທ຺ຘໍ ວິຄຕຣຊໍ ວິຕິຓ຺ຓກງ຺ຂໍ, ອທ຺ທກ຺ຂິໍ ສຸຄຕໍ ອໂນມປຎ຺ຎໍ.

໑໒໒໑. ‘‘ສ຺ວາຫໍ ມຸທິຕມໂນ ປສນ຺ນຈິຕ຺ໂຕ, ອຎ຺ຊລິໍ ອກຣິໍ ຕຖາຄຕສ຺ສ;

ຕາຫໍ ກຸສລໍ ກຣິຕ຺ວານ ກມ຺ມໍ, ຕິທສານໍ ສຫພ຺ຍຕໍ ຄໂຕ’’ຕິ.

໑໒໒໒. ‘‘ອຈ຺ຉຣິຍໍ ວຕ ອພ຺ຠຸຕໍ ວຕ, ອຎ຺ຊລິກມ຺ມສ຺ສ ອຍມີທິໂສ ວິປາໂກ;

ອຫມ຺ປິ ມຸທິຕມໂນ ປສນ຺ນຈິຕ຺ໂຕ, ອຊ຺ເຊວ ພຸທ຺ຘໍ ສຣຓໍ ວຊາມີ’’ຕິ.

໑໒໒໓. ‘‘ອຊ຺ເຊວ ພຸທ຺ຘໍ ສຣຓໍ ວຊາຫິ, ຘມ຺ມຎ຺ຈ ສງ຺ຆຎ຺ຈ ປສນ຺ນຈິຕ຺ໂຕ;

ຕເຖວ ສິກ຺ຂາຍ ປທານິ ປຎ຺ຈ, ອຂຓ຺ຑຜຸລ຺ລານິ ສມາທິຍສ຺ສຸ.

໑໒໒໔. ‘‘ປາຓາຕິປາຕາ ວິຣມສ຺ສຸ ຂິປ຺ປໍ, ໂລເກ ອທິນ຺ນໍ ປຣິວຊ຺ຊຍສ຺ສຸ;

ອມຊ຺ຊໂປ ມາ ຈ ມຸສາ ຠຓາຫິ, ສເກນ ທາເຣນ ຈ ໂຫຫິ ຕຸຏ຺ໂຐ’’ຕິ.

໑໒໒໕. ‘‘ອຕ຺ຖກາໂມສິ ເມ ຍກ຺ຂ, ຫິຕກາໂມສິ ເທວເຕ;

ກໂຣມິ ຕຸຍ຺ຫໍ ວຈນໍ, ຕ຺ວໍສິ ອາຈຣິໂຍ ມມາຕິ.

໑໒໒໖. ‘‘ອຸເປມິ ສຣຓໍ ພຸທ຺ຘໍ, ຘມ຺ມຎ຺ຈາປິ ອນຸຕ຺ຕຣໍ;

ສງ຺ຆຎ຺ຈ ນຣເທວສ຺ສ, ຄຈ຺ຉາມິ ສຣຓໍ ອຫໍ.

໑໒໒໗. ‘‘ປາຓາຕິປາຕາ ວິຣມາມິ ຂິປ຺ປໍ, ໂລເກ ອທິນ຺ນໍ ປຣິວຊ຺ຊຍາມິ;

ອມຊ຺ຊໂປ ໂນ ຈ ມຸສາ ຠຓາມິ, ສເກນ ທາເຣນ ຈ ໂຫມິ ຕຸຏ຺ໂຐ’’ຕິ.

ມຏ຺ຐກຸຓ຺ຑລີວິມານໍ ນວມໍ.