໗. ສຸນິກ຺ຂິຕ຺ຕວຄ຺ໂຄ

໑. ຈິຕ຺ຕລຕາວິມານວຕ຺ຖຸ

໑໑໑໔. ‘‘ຍຖາ ວນໍ ຈິຕ຺ຕລຕໍ ປຠາສຕິ, ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໑໑໕. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໑໖. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໑໗. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທລິທ຺ໂທ ອຕາໂຓ ກປໂຓ ກມ຺ມກໂຣ ອໂຫສິໍ;

ຊິຓ຺ເຓ ຈ ມາຕາປິຕໂຣ ອຠາຣິໍ [ອຠຣິໍ (ສີ. ສ຺ຍາ.)], ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິ.

໑໑໑໘. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ຈິຕ຺ຕລຕາວິມານໍ ປຐມໍ.

໒. ນນ຺ທນວິມານວຕ຺ຖຸ

໑໑໒໐. ‘‘ຍຖາ ວນໍ ນນ຺ທນໍ [ນນ຺ທນໍ ຈິຕ຺ຕລຕໍ (ສີ. ສ຺ຍາ. ກ.), ນນ຺ທວນໍ (ກ.)] ປຠາສຕິ, ອຸຍ຺ຍານເສຏ຺ຐໍ ຕິທສານມຸຕ຺ຕມໍ;

ຕຖູປມໍ ຕຸຍ຺ຫມິທໍ ວິມານໍ, ໂອຠາສຍໍ ຕິຏ຺ຐຕິ ອນ຺ຕລິກ຺ເຂ.

໑໑໒໑. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໒໒. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໒໓. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ທລິທ຺ໂທ ອຕາໂຓ ກປໂຓ ກມ຺ມກໂຣ ອໂຫສິໍ;

ຊິຓ຺ເຓ ຈ ມາຕາປິຕໂຣ ອຠາຣິໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໒໔. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ນນ຺ທນວິມານໍ ທຸຕິຍໍ.

໓. ມຓິຖູຓວິມານວຕ຺ຖຸ

໑໑໒໖. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໑໒໗. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໑໑໒໘. ‘‘ເກນ ເຕຕາທິໂສ ວຓ຺ໂຓ…ເປ…ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໓໐. ໂສ ເທວປຸຕ຺ໂຕ ອຕ຺ຕມໂນ…ເປ…ຍສ຺ສ ກມ຺ມສ຺ສິທໍ ຜລໍ.

໑໑໓໑. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ວິວເນ ປເຖ ສງ຺ກມນໍ [ຈງ຺ກມນໍ (ສີ.), ຈງ຺ກມໍ (ສ຺ຍາ.), ສມກໍ (ກ. ສີ.)] ອກາສິໍ;

ອາຣາມຣຸກ຺ຂານິ ຈ ໂຣປຍິສ຺ສໍ, ປິຍາ ຈ ເມ ສີລວນ຺ໂຕ ອເຫສຸໍ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ໂຕ, ສກ຺ກຈ຺ຈ ທານໍ ວິປຸລໍ ອທາສິໍ.

໑໑໓໒. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ມຓິຖູຓວິມານໍ ຕຕິຍໍ.

໔. ສຸວຓ຺ຓວິມານວຕ຺ຖຸ

໑໑໓໔. ‘‘ໂສວຓ຺ຓມເຍ ປພ຺ພຕສ຺ມິໍ, ວິມານໍ ສພ຺ພໂຕປຠໍ;

ເຫມຊາລປຏິຈ຺ຉນ຺ນໍ [ເຫມຊາລກປຈ຺ຉນ຺ນໍ (ສີ.)], ກິງ຺ກິຓິ [ກິງ຺ກຓິກ (ສ຺ຍາ. ກ.), ກິງ຺ກິຓິກ (ປີ.)] ຊາລກປ຺ປິຕໍ.

໑໑໓໕. ‘‘ອຏ຺ຐໍສາ ສຸກຕາ ຖມ຺ຠາ, ສພ຺ເພ ເວຬຸຣິຍາມຍາ;

ເອກເມກາຍ ອໍສິຍາ, ຣຕນາ ສຕ຺ຕ ນິມ຺ມິຕາ.

໑໑໓໖. ‘‘ເວຬຸຣິຍສຸວຓ຺ຓສ຺ສ, ຜລິກາ ຣູປິຍສ຺ສ ຈ;

ມສາຣຄລ຺ລມຸຕ຺ຕາຫິ, ໂລຫິຕງ຺ຄມຓີຫິ ຈ.

໑໑໓໗. ‘‘ຈິຕ຺ຣາ ມໂນຣມາ ຠູມິ, ນ ຕຕ຺ຖຸທ຺ຘໍສຕີ ຣໂຊ;

ໂຄປາຓສີຄຓາ ປີຕາ, ກູຏໍ ຘາເຣນ຺ຕິ ນິມ຺ມິຕາ.

໑໑໓໘. ‘‘ໂສປາຓານິ ຈ ຈຕ຺ຕາຣິ, ນິມ຺ມິຕາ ຈຕຸໂຣ ທິສາ;

ນານາຣຕນຄພ຺ເຠຫິ, ອາທິຈ຺ໂຈວ ວິໂຣຈຕິ.

໑໑໓໙. ‘‘ເວທິຍາ ຈຕສ຺ໂສ ຕຕ຺ຖ, ວິຠຕ຺ຕາ ຠາຄໂສ ມິຕາ;

ທທ຺ທລ຺ລມານາ ອາຠນ຺ຕິ, ສມນ຺ຕາ ຈຕຸໂຣ ທິສາ.

໑໑໔໐. ‘‘ຕສ຺ມິໍ ວິມາເນ ປວເຣ, ເທວປຸຕ຺ໂຕ ມຫປ຺ປໂຠ;

ອຕິໂຣຈສິ ວຓ຺ເຓນ, ອຸທຍນ຺ໂຕວ ຠາຓຸມາ.

໑໑໔໑. ‘‘ທານສ຺ສ ເຕ ອິທໍ ຜລໍ, ອໂຖ ສີລສ຺ສ ວາ ປນ;

ອໂຖ ອຎ຺ຊລິກມ຺ມສ຺ສ, ຕໍ ເມ ອກ຺ຂາຫິ ປຸຈ຺ຉິໂຕ’’.

໑໑໔໒. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໔໓. ‘‘ອຫໍ ອນ຺ຘກວິນ຺ທສ຺ມິໍ, ພຸທ຺ຘສ຺ສາທິຈ຺ຈພນ຺ຘຸໂນ;

ວິຫາຣໍ ສຕ຺ຖຸ ກາເຣສິໍ, ປສນ຺ໂນ ເສຫິ ປາຓິຠິ.

໑໑໔໔. ‘‘ຕຕ຺ຖ ຄນ຺ຘຎ຺ຈ ມາລຎ຺ຈ, ປຈ຺ຈຍຎ຺ຈ [ປຈ຺ຈຄ຺ຄຎ຺ຈ (ສີ.), ປຈ຺ຈຄ຺ຆຎ຺ຈ (?)] ວິເລປນໍ;

ວິຫາຣໍ ສຕ຺ຖຸ ອທາສິໍ, ວິປ຺ປສນ຺ເນນ ເຈຕສາ;

ເຕນ ມຍ຺ຫໍ ອິທໍ ລທ຺ຘໍ, ວສໍ ວຕ຺ເຕມິ ນນ຺ທເນ.

໑໑໔໕. ‘‘ນນ຺ທເນ ຈ ວເນ [ນນ຺ທເນ ປວເນ (ສີ. ສ຺ຍາ.)] ຣມ຺ເມ, ນານາທິຊຄຓາຍຸເຕ;

ຣມາມິ ນຈ຺ຈຄີເຕຫິ, ອຈ຺ຉຣາຫິ ປຸຣກ຺ຂໂຕ’’ຕິ.

ສຸວຓ຺ຓວິມານໍ ຈຕຸຕ຺ຖໍ.

໕. ອມ຺ພວິມານວຕ຺ຖຸ

໑໑໔໖. ‘‘ອຸຈ຺ຈມິທໍ ມຓິຖູຓໍ ວິມານໍ, ສມນ຺ຕໂຕ ທ຺ວາທສ ໂຍຊນານິ;

ກູຏາຄາຣາ ສຕ຺ຕສຕາ ອຸຬາຣາ, ເວຬຸຣິຍຖມ຺ຠາ ຣຸຈກຕ຺ຖຕາ ສຸຠາ.

໑໑໔໗. ‘‘ຕຕ຺ຖຈ຺ຉສິ ປິວສິ ຂາທສິ ຈ, ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ;

ທິພ຺ພາ ຣສາ ກາມຄຸເຓຕ຺ຖ ປຎ຺ຈ, ນາຣິໂຍ ຈ ນຈ຺ຈນ຺ຕິ ສຸວຓ຺ຓຉນ຺ນາ.

໑໑໔໘. ‘‘ເກນ ເຕຕາທິໂສ ວຓ຺ໂຓ…ເປ… ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໕໐. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໕໑. ‘‘ຄິມ຺ຫານໍ ປຈ຺ຉິເມ ມາເສ, ປຕປນ຺ເຕ [ປຕາປນ຺ເຕ (ສ຺ຍາ.), ປຕາເປນ຺ເຕ (ກ.)] ທິວງ຺ກເຣ;

ປເຣສໍ ຠຕໂກ ໂປໂສ, ອມ຺ພາຣາມມສິຎ຺ຈຕິ.

໑໑໕໒. ‘‘ອຖ ເຕນາຄມາ ຠິກ຺ຂຸ, ສາຣິປຸຕ຺ໂຕຕິ ວິສ຺ສຸໂຕ;

ກິລນ຺ຕຣູໂປ ກາເຍນ, ອກິລນ຺ໂຕວ ເຈຕສາ.

໑໑໕໓. ‘‘ຕຎ຺ຈ ທິສ຺ວານ ອາຍນ຺ຕໍ, ອໂວຈໍ ອມ຺ພສິຎ຺ຈໂກ;

ສາຘຸ ຕໍ [ສາຘຸກໍ (ກ.)] ຠນ຺ເຕ ນ຺ຫາເປຍ຺ຍໍ, ຍໍ ມມສ຺ສ ສຸຂາວຫໍ.

໑໑໕໔. ‘‘ຕສ຺ສ ເມ ອນຸກມ຺ປາຍ, ນິກ຺ຂິປິ ປຕ຺ຕຈີວຣໍ;

ນິສີທິ ຣຸກ຺ຂມູລສ຺ມິໍ, ຉາຍາຍ ເອກຈີວໂຣ.

໑໑໕໕. ‘‘ຕຎ຺ຈ ອຈ຺ເຉນ ວາຣິນາ, ປສນ຺ນມານໂສ ນໂຣ;

ນ຺ຫາປຍີ ຣຸກ຺ຂມູລສ຺ມິໍ, ຉາຍາຍ ເອກຈີວຣໍ.

໑໑໕໖. ‘‘ອມ຺ໂພ ຈ ສິຕ຺ໂຕ ສມໂຓ ຈ ນ຺ຫາປິໂຕ, ມຍາ ຈ ປຸຎ຺ຎໍ ປສຸຕໍ ອນປ຺ປກໍ;

ອິຕິ ໂສ ປີຕິຍາ ກາຍໍ, ສພ຺ພໍ ຜຣຕິ ອຕ຺ຕໂນ.

໑໑໕໗. ‘‘ຕເທວ ເອຕ຺ຕກໍ ກມ຺ມໍ, ອກາສິໍ ຕາຍ ຊາຕິຍາ;

ປຫາຍ ມານຸສໍ ເທຫໍ, ອຸປປນ຺ໂນມ຺ຫິ ນນ຺ທນໍ.

໑໑໕໘. ‘‘ນນ຺ທເນ ຈ ວເນ ຣມ຺ເມ, ນານາທິຊຄຓາຍຸເຕ;

ຣມາມິ ນຈ຺ຈຄີເຕຫິ, ອຈ຺ຉຣາຫິ ປຸຣກ຺ຂໂຕ’’ຕິ.

ອມ຺ພວິມານໍ ປຎ຺ຈມໍ.

໖. ໂຄປາລວິມານວຕ຺ຖຸ

໑໑໕໙. ‘‘ທິສ຺ວານ ເທວໍ ປຏິປຸຈ຺ຉິ ຠິກ຺ຂຸ, ອຸຈ຺ເຈ ວິມານມ຺ຫິ ຈິຣຏ຺ຐິຕິເກ;

ອາມຸຕ຺ຕຫຕ຺ຖາຠຣຓໍ ຍສສ຺ສິໍ [ອາມຸຕ຺ຕຫຕ຺ຖາຠຣໂຓ ຍສສ຺ສີ (ສ຺ຍາ. ປີ. ກ.)], ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໑໖໐. ‘‘ອລງ຺ກໂຕ ມລ຺ຍຘໂຣ [ມາລຠາຣີ (ສີ.), ມາລຘຣີ (ກ.)] ສຸວຕ຺ໂຖ, ສຸກຸຓ຺ຑລີ ກປ຺ປິຕເກສມສ຺ສຸ;

ອາມຸຕ຺ຕຫຕ຺ຖາຠຣໂຓ ຍສສ຺ສີ, ທິພ຺ເພ ວິມານມ຺ຫິ ຍຖາປິ ຈນ຺ທິມາ.

໑໑໖໑. ‘‘ທິພ຺ພາ ຈ ວີຓາ ປວທນ຺ຕິ ວຄ຺ຄຸໍ, ອຏ຺ຐຏ຺ຐກາ ສິກ຺ຂິຕາ ສາຘຸຣູປາ;

ທິພ຺ພາ ຈ ກຎ຺ຎາ ຕິທສຈຣາ ອຸຬາຣາ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ.

໑໑໖໒. ‘‘ເທວິທ຺ຘິປຕ຺ໂຕສິ ມຫານຸຠາໂວ, ມນຸສ຺ສຠູໂຕ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາໂວ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໑໖໓. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໖໔. ‘‘ອຫໍ ມນຸສ຺ເສສຸ ມນຸສ຺ສຠູໂຕ, ສງ຺ຄມ຺ມ ຣກ຺ຂິສ຺ສໍ ປເຣສໍ ເຘນຸໂຍ;

ຕໂຕ ຈ ອາຄາ ສມໂຓ ມມນ຺ຕິເກ ຄາໂວ ຈ ມາເສ ອຄມໍສຸ ຂາທິຕຸໍ.

໑໑໖໕. ‘‘ທ຺ວຍຊ຺ຊ ກິຈ຺ຈໍ ອຸຠຍຎ຺ຈ ກາຣິຍໍ, ອິຈ຺ເຈວຫໍ [ອິຈ຺ເຈວໍ (ກ.)] ຠນ຺ເຕ ຕທາ ວິຈິນ຺ຕຍິໍ;

ຕໂຕ ຈ ສຎ຺ຎໍ ປຏິລທ຺ຘໂຍນິໂສ, ທທາມິ ຠນ຺ເຕຕິ ຂິປິໍ ອນນ຺ຕກໍ.

໑໑໖໖. ‘‘ໂສ ມາສເຂຕ຺ຕໍ ຕຸຣິໂຕ ອວາສຣິໍ, ປຸຣາ ອຍໍ ຠຎ຺ຊຕິ ຍສ຺ສິທໍ ຘນໍ;

ຕໂຕ ຈ ກຓ຺ໂຫ ອຸຣໂຄ ມຫາວິໂສ, ອຑໍສິ ປາເທ ຕຸຣິຕສ຺ສ ເມ ສໂຕ.

໑໑໖໗. ‘‘ສ຺ວາຫໍ ອຏ຺ໂຏມ຺ຫິ ທຸກ຺ເຂນ ປີຬິໂຕ, ຠິກ຺ຂຸ ຈ ຕໍ ສາມໍ ມຸຎ຺ຈິຕ຺ວານນ຺ຕກໍ [ມຸຎ຺ຈິຕ຺ວ ນນ຺ຕກໍ (ສີ.), ມຸຎ຺ຈິຕ຺ວາ ອນນ຺ຕກໍ (ສ຺ຍາ.)];

ອຫາສິ ກຸມ຺ມາສໍ ມມານຸກມ຺ປຍາ [ມມານຸກມ຺ປິຍາ (ປີ. ກ.), ມມານຸກມ຺ປາຍ (ສ຺ຍາ.)], ຕໂຕ ຈຸໂຕ ກາລກໂຕມ຺ຫິ ເທວຕາ.

໑໑໖໘. ‘‘ຕເທວ ກມ຺ມໍ ກຸສລໍ ກຕໍ ມຍາ, ສຸຂຎ຺ຈ ກມ຺ມໍ ອນຸໂຠມິ ອຕ຺ຕນາ;

ຕຍາ ຫິ ຠນ຺ເຕ ອນຸກມ຺ປິໂຕ ຠຸສໍ, ກຕຎ຺ຎຸຕາຍ ອຠິປາທຍາມິ ຕໍ.

໑໑໖໙. ‘‘ສເທວເກ ໂລເກ ສມາຣເກ ຈ, ອຎ຺ໂຎ ມຸນິ ນຕ຺ຖິ ຕຍານຸກມ຺ປໂກ;

ຕຍາ ຫິ ຠນ຺ເຕ ອນຸກມ຺ປິໂຕ ຠຸສໍ, ກຕຎ຺ຎຸຕາຍ ອຠິວາທຍາມິ ຕໍ.

໑໑໗໐. ‘‘ອິມສ຺ມິໍ ໂລເກ ປຣສ຺ມິໍ ວາ ປນ, ອຎ຺ໂຎ ມຸນີ ນຕ຺ຖິ ຕຍານຸກມ຺ປໂກ;

ຕຍາ ຫິ ຠນ຺ເຕ ອນຸກມ຺ປິໂຕ ຠຸສໍ, ກຕຎ຺ຎຸຕາຍ ອຠິວາທຍາມິ ຕ’’ນ຺ຕິ.

ໂຄປາລວິມານໍ ຉຏ຺ຐໍ.

໗. ກຓ຺ຑກວິມານວຕ຺ຖຸ

໑໑໗໑. ‘‘ປຸຓ຺ຓມາເສ ຍຖາ ຈນ຺ໂທ, ນກ຺ຂຕ຺ຕປຣິວາຣິໂຕ;

ສມນ຺ຕາ ອນຸປຣິຍາຕິ, ຕາຣກາຘິປຕີ ສສີ.

໑໑໗໒. ‘‘ຕຖູປມໍ ອິທໍ ພ຺ຍມ຺ຫໍ, ທິພ຺ພໍ ເທວປຸຣມ຺ຫິ ຈ;

ອຕິໂຣຈຕິ ວຓ຺ເຓນ, ອຸທຍນ຺ໂຕວ ຣໍສິມາ.

໑໑໗໓. ‘‘ເວຬຸຣິຍສຸວຓ຺ຓສ຺ສ, ຜລິກາ ຣູປິຍສ຺ສ ຈ;

ມສາຣຄລ຺ລມຸຕ຺ຕາຫິ, ໂລຫິຕງ຺ຄມຓີຫິ ຈ.

໑໑໗໔. ‘‘ຈິຕ຺ຣາ ມໂນຣມາ ຠູມິ, ເວຬູຣິຍສ຺ສ ສນ຺ຖຕາ;

ກູຏາຄາຣາ ສຸຠາ ຣມ຺ມາ, ປາສາໂທ ເຕ ສຸມາປິໂຕ.

໑໑໗໕. ‘‘ຣມ຺ມາ ຈ ເຕ ໂປກ຺ຂຣຓີ, ປຸຖຸໂລມນິເສວິຕາ;

ອຈ຺ໂຉທກາ ວິປ຺ປສນ຺ນາ, ໂສວຓ຺ຓວາລຸກສນ຺ຖຕາ.

໑໑໗໖. ‘‘ນານາປທຸມສຎ຺ຉນ຺ນາ, ປຸຓ຺ຑຣີກສໂມຕຕາ [ສໂມຕ຺ຖຕາ (ກ.), ສໂມຄຕາ (ສ຺ຍາ.)];

ສຸຣຠິໍ ສມ຺ປວາຍນ຺ຕິ, ມນຸຎ຺ຎາ ມາລຸເຕຣິຕາ.

໑໑໗໗. ‘‘ຕສ຺ສາ ເຕ ອຸຠໂຕ ປສ຺ເສ, ວນຄຸມ຺ພາ ສຸມາປິຕາ;

ອຸເປຕາ ປຸປ຺ຜຣຸກ຺ເຂຫິ, ຜລຣຸກ຺ເຂຫິ ຈູຠຍໍ.

໑໑໗໘. ‘‘ໂສວຓ຺ຓປາເທ ປລ຺ລງ຺ເກ, ມຸທຸເກ ໂຄຓກຕ຺ຖເຕ [ໂຈລສນ຺ຖເຕ (ສີ.)];

ນິສິນ຺ນໍ ເທວຣາຊໍວ, ອຸປຕິຏ຺ຐນ຺ຕິ ອຈ຺ຉຣາ.

໑໑໗໙. ‘‘ສພ຺ພາຠຣຓສຎ຺ຉນ຺ນາ, ນານາມາລາວິຠູສິຕາ;

ຣເມນ຺ຕິ ຕໍ ມຫິທ຺ຘິກໍ, ວສວຕ຺ຕີວ ໂມທສິ.

໑໑໘໐. ‘‘ເຠຣິສງ຺ຂມຸທິງ຺ຄາຫິ, ວີຓາຫິ ປຓເວຫິ ຈ;

ຣມສິ ຣຕິສມ຺ປນ຺ໂນ, ນຈ຺ຈຄີເຕ ສຸວາທິເຕ.

໑໑໘໑. ‘‘ທິພ຺ພາ ເຕ ວິວິຘາ ຣູປາ, ທິພ຺ພາ ສທ຺ທາ ອໂຖ ຣສາ;

ຄນ຺ຘາ ຈ ເຕ ອຘິປ຺ເປຕາ, ໂຜຏ຺ຐພ຺ພາ ຈ ມໂນຣມາ.

໑໑໘໒. ‘‘ຕສ຺ມິໍ ວິມາເນ ປວເຣ, ເທວປຸຕ຺ຕ ມຫປ຺ປໂຠ;

ອຕິໂຣຈສິ ວຓ຺ເຓນ, ອຸທຍນ຺ໂຕວ ຠາຓຸມາ.

໑໑໘໓. ‘‘ທານສ຺ສ ເຕ ອິທໍ ຜລໍ, ອໂຖ ສີລສ຺ສ ວາ ປນ;

ອໂຖ ອຎ຺ຊລິກມ຺ມສ຺ສ, ຕໍ ເມ ອກ຺ຂາຫິ ປຸຈ຺ຉິໂຕ’’.

໑໑໘໔. ໂສ ເທວປຸຕ຺ໂຕ ອຕ຺ຕມໂນ…ເປ… ຍສ຺ສ ກມ຺ມສ຺ສິທໍ ຜລໍ.

໑໑໘໕. ‘‘ອຫໍ ກປິລວຕ຺ຖຸສ຺ມິໍ, ສາກິຍານໍ ປຸຣຸຕ຺ຕເມ;

ສຸທ຺ໂຘທນສ຺ສ ປຸຕ຺ຕສ຺ສ, ກຓ຺ຑໂກ ສຫໂຊ ອຫໍ.

໑໑໘໖. ‘‘ຍທາ ໂສ ອຑ຺ຒຣຕ຺ຕາຍໍ, ໂພຘາຍ ມຠິນິກ຺ຂມິ;

ໂສ ມໍ ມຸທູຫິ ປາຓີຫິ, ຊາລິ [ຊາລ (ສີ.)] ຕມ຺ພນເຂຫິ ຈ.

໑໑໘໗. ‘‘ສຕ຺ຖິໍ ອາໂກຏຍິຕ຺ວານ, ວຫ ສມ຺ມາຕິ ຈພ຺ຣວິ;

ອຫໍ ໂລກໍ ຕາຣຍິສ຺ສໍ, ປຕ຺ໂຕ ສມ຺ໂພຘິມຸຕ຺ຕມໍ.

໑໑໘໘. ‘‘ຕໍ ເມ ຄິຣໍ ສຸຓນ຺ຕສ຺ສ, ຫາໂສ ເມ ວິປຸໂລ ອຫຸ;

ອຸທຄ຺ຄຈິຕ຺ໂຕ ສຸມໂນ, ອຠິສີສິໍ [ອຠິສິໍສິໍ (ສີ.), ອຠິສີສິ (ປີ.)] ຕທາ ອຫໍ.

໑໑໘໙. ‘‘ອຠິຣູຬ຺ຫຎ຺ຈ ມໍ ຎຕ຺ວາ, ສກ຺ຍປຸຕ຺ຕໍ ມຫາຍສໍ;

ອຸທຄ຺ຄຈິຕ຺ໂຕ ມຸທິໂຕ, ວຫິສ຺ສໍ ປຸຣິສຸຕ຺ຕມໍ.

໑໑໙໐. ‘‘ປເຣສໍ ວິຊິຕໍ ຄນ຺ຕ຺ວາ, ອຸຄ຺ຄຕສ຺ມິໍ ທິວາກເຣ [ທິວງ຺ກເຣ (ສ຺ຍາ. ກ.)];

ມມໍ ຉນ຺ນຎ຺ຈ ໂອຫາຍ, ອນເປກ຺ໂຂ ໂສ ອປກ຺ກມິ.