໓. ອານນ຺ທຕ຺ເຖຣຄາຖາ

໑໐໑໗. ‘‘ປິສຸເຓນ ຈ ໂກຘເນນ ຈ, ມຈ຺ຉຣິນາ ຈ ວິຠູຕນນ຺ທິນາ;

ສຂິຕໍ ນ ກເຣຍ຺ຍ ປຓ຺ຑິໂຕ, ປາໂປ ກາປຸຣິເສນ ສງ຺ຄໂມ.

໑໐໑໘. ‘‘ສທ຺ເຘນ ຈ ເປສເລນ ຈ, ປຎ຺ຎວຕາ ພຫຸສ຺ສຸເຕນ ຈ;

ສຂິຕໍ ກເຣຍ຺ຍ ປຓ຺ຑິໂຕ, ຠທ຺ໂທ ສປ຺ປຸຣິເສນ ສງ຺ຄໂມ.

໑໐໑໙. ‘‘ປສ຺ສ ຈິຕ຺ຕກຕໍ ພິມ຺ພໍ…ເປ… ຍສ຺ສ ນຕ຺ຖິ ຘຸວໍ ຐິຕິ.

໑໐໒໐. ‘‘ປສ຺ສ ຈິຕ຺ຕກຕໍ ພິມ຺ພໍ…ເປ… ວຕ຺ເຖຫິ ໂສຠຕິ.

໑໐໒໑. ‘‘ອລຕ຺ຕກກຕາ …ເປ… ໂນ ຈ ປາຣຄເວສິໂນ.

໑໐໒໒. ‘‘ອຏ຺ຐປທກຕາ…ເປ… ໂນ ຈ ປາຣຄເວສິໂນ.

໑໐໒໓. ‘‘ອຎ຺ຊນີວ ນວາ…ເປ… ໂນ ຈ ປາຣຄເວສິໂນ.

໑໐໒໔. ‘‘ພຫຸສ຺ສຸໂຕ ຈິຕ຺ຕກຖີ, ພຸທ຺ຘສ຺ສ ປຣິຈາຣໂກ;

ປນ຺ນຠາໂຣ ວິສຎ຺ຎຸຕ຺ໂຕ, ເສຍ຺ຍໍ ກປ຺ເປຕິ ໂຄຕໂມ.

໑໐໒໕. ‘‘ຂີຓາສໂວ ວິສຎ຺ຎຸຕ຺ໂຕ, ສງ຺ຄາຕີໂຕ ສຸນິພ຺ພຸໂຕ;

ຘາເຣຕິ ອນ຺ຕິມໍ ເທຫໍ, ຊາຕິມຣຓປາຣຄູ.

໑໐໒໖. ‘‘ຍສ຺ມິໍ ປຕິຏ຺ຐິຕາ ຘມ຺ມາ, ພຸທ຺ຘສ຺ສາທິຈ຺ຈພນ຺ຘຸໂນ;

ນິພ຺ພານຄມເນ ມຄ຺ເຄ, ໂສຍໍ ຕິຏ຺ຐຕິ ໂຄຕໂມ.

໑໐໒໗. ‘‘ທ຺ວາສີຕິ ພຸທ຺ຘໂຕ ຄຓ຺ຫິໍ, ທ຺ເວ ສຫສ຺ສານິ ຠິກ຺ຂຸໂຕ;

ຈຕຸຣາສີຕິສຫສ຺ສານິ, ເຍ ເມ ຘມ຺ມາ ປວຕ຺ຕິໂນ.

໑໐໒໘. ‘‘ອປ຺ປສ຺ສຸຕາຍໍ ປຸຣິໂສ, ພລິພທ຺ໂທວ ຊີຣຕິ;

ມໍສານິ ຕສ຺ສ ວຑ຺ຒນ຺ຕິ, ປຎ຺ຎາ ຕສ຺ສ ນ ວຑ຺ຒຕິ.

໑໐໒໙. ‘‘ພຫຸສ຺ສຸໂຕ ອປ຺ປສ຺ສຸຕໍ, ໂຍ ສຸເຕນາຕິມຎ຺ຎຕິ;

ອນ຺ໂຘ ປທີປຘາໂຣວ, ຕເຖວ ປຏິຠາຕິ ມໍ.

໑໐໓໐. ‘‘ພຫຸສ຺ສຸຕໍ ອຸປາເສຍ຺ຍ, ສຸຕຎ຺ຈ ນ ວິນາສເຍ;

ຕໍ ມູລໍ ພ຺ຣຫ຺ມຈຣິຍສ຺ສ, ຕສ຺ມາ ຘມ຺ມຘໂຣ ສິຍາ.

໑໐໓໑. ‘‘ປຸພ຺ພາປຣຎ຺ຎູ ອຕ຺ຖຎ຺ຎູ, ນິຣຸຕ຺ຕິປທໂກວິໂທ;

ສຸຄ຺ຄຫີຕຎ຺ຈ ຄຓ຺ຫາຕິ, ອຕ຺ຖຎ຺ໂຈປປຣິກ຺ຂຕິ.

໑໐໓໒. ‘‘ຂນ຺ຕ຺ຍາ ຉນ຺ທິກໂຕ [ຂນ຺ຕິຍາ ຉນ຺ທິໂຕ (?)] ໂຫຕິ, ອຸສ຺ສຫິຕ຺ວາ ຕຸເລຕິ ຕໍ;

ສມເຍ ໂສ ປທຫຕິ, ອຊ຺ຌຕ຺ຕໍ ສຸສມາຫິໂຕ.

໑໐໓໓. ‘‘ພຫຸສ຺ສຸຕໍ ຘມ຺ມຘຣໍ, ສປ຺ປຎ຺ຎໍ ພຸທ຺ຘສາວກໍ;

ຘມ຺ມວິຎ຺ຎາຓມາກງ຺ຂໍ, ຕໍ ຠເຊຖ ຕຖາວິຘໍ.

໑໐໓໔. ‘‘ພຫຸສ຺ສຸໂຕ ຘມ຺ມຘໂຣ, ໂກສາຣກ຺ໂຂ ມເຫສິໂນ;

ຈກ຺ຂຸ ສພ຺ພສ຺ສ ໂລກສ຺ສ, ປູຊນີໂຍ ພຫຸສ຺ສຸໂຕ.

໑໐໓໕. ‘‘ຘມ຺ມາຣາໂມ ຘມ຺ມຣໂຕ, ຘມ຺ມໍ ອນຸວິຈິນ຺ຕຍໍ;

ຘມ຺ມໍ ອນຸສ຺ສຣໍ ຠິກ຺ຂຸ, ສທ຺ຘມ຺ມາ ນ ປຣິຫາຍຕິ.

໑໐໓໖. ‘‘ກາຍມຈ຺ເຉຣຄຣຸໂນ [ຄຣຸໂກ (ສີ.)], ຫິຍ຺ຍມາເນ [ຫິຍ຺ຍມາໂນ (ສີ.)] ອນຸຏ຺ຐເຫ;

ສຣີຣສຸຂຄິທ຺ຘສ຺ສ, ກຸໂຕ ສມຓຜາສຸຕາ.

໑໐໓໗. ‘‘ນ ປກ຺ຂນ຺ຕິ ທິສາ ສພ຺ພາ, ຘມ຺ມາ ນ ປຏິຠນ຺ຕິ ມໍ;

ຄເຕ ກລ຺ຍາຓມິຕ຺ຕມ຺ຫິ, ອນ຺ຘກາຣໍວ ຂາຍຕິ.

໑໐໓໘. ‘‘ອພ຺ຠຕີຕສຫາຍສ຺ສ, ອຕີຕຄຕສຕ຺ຖຸໂນ;

ນຕ຺ຖິ ເອຕາທິສໍ ມິຕ຺ຕໍ, ຍຖາ ກາຍຄຕາ ສຕິ.

໑໐໓໙. ‘‘ເຍ ປຸຣາຓາ ອຕີຕາ ເຕ, ນເວຫິ ນ ສເມຕິ ເມ;

ສ຺ວຊ຺ຊ ເອໂກວ ຌາຍາມິ, ວສ຺ສຸເປໂຕວ ປກ຺ຂິມາ.

໑໐໔໐. ‘‘ທສ຺ສນາຍ ອຠິກ຺ກນ຺ເຕ, ນານາເວຣຊ຺ຊເກ ພຫູ;

ມາ ວາຣຍິຕ຺ຖ ໂສຕາໂຣ, ປສ຺ສນ຺ຕຸ ສມໂຍ ມມໍ.

໑໐໔໑. ‘‘ທສ຺ສນາຍ ອຠິກ຺ກນ຺ເຕ, ນານາເວຣຊ຺ຊເກ ປຸຖຸ;

ກໂຣຕິ ສຕ຺ຖາ ໂອກາສໍ, ນ ນິວາເຣຕິ ຈກ຺ຂຸມາ.

໑໐໔໒. ‘‘ປຓ຺ຓວີສຕິວສ຺ສານິ, ເສຂຠູຕສ຺ສ ເມ ສໂຕ;

ນ ກາມສຎ຺ຎາ ອຸປ຺ປຊ຺ຊິ, ປສ຺ສ ຘມ຺ມສຸຘມ຺ມຕໍ.

໑໐໔໓. ‘‘ປຓ຺ຓວີສຕິວສ຺ສານິ, ເສຂຠູຕສ຺ສ ເມ ສໂຕ;

ນ ໂທສສຎ຺ຎາ ອຸປ຺ປຊ຺ຊິ, ປສ຺ສ ຘມ຺ມສຸຘມ຺ມຕໍ.

໑໐໔໔. ‘‘ປຓ຺ຓວີສຕິວສ຺ສານິ, ຠຄວນ຺ຕໍ ອຸປຏ຺ຐຫິໍ;

ເມຕ຺ເຕນ ກາຍກມ຺ເມນ, ຉາຍາວ ອນປາຍິນີ [ອນຸປາຍິນີ (ສ຺ຍາ. ກ.)].

໑໐໔໕. ‘‘ປຓ຺ຓວີສຕິວສ຺ສານິ, ຠຄວນ຺ຕໍ ອຸປຏ຺ຐຫິໍ;

ເມຕ຺ເຕນ ວຈີກມ຺ເມນ, ຉາຍາວ ອນປາຍິນີ.

໑໐໔໖. ‘‘ປຓ຺ຓວີສຕິວສ຺ສານິ, ຠຄວນ຺ຕໍ ອຸປຏ຺ຐຫິໍ;

ເມຕ຺ເຕນ ມໂນກມ຺ເມນ, ຉາຍາວ ອນປາຍິນີ.

໑໐໔໗. ‘‘ພຸທ຺ຘສ຺ສ ຈງ຺ກມນ຺ຕສ຺ສ, ປິຏ຺ຐິໂຕ ອນຸຈງ຺ກມິໍ;

ຘມ຺ເມ ເທສິຍມານມ຺ຫິ, ຎາຓໍ ເມ ອຸທປຊ຺ຊຖ.

໑໐໔໘. ‘‘ອຫໍ ສກຣຓີໂຍມ຺ຫິ, ເສໂຂ ອປ຺ປຕ຺ຕມານໂສ;

ສຕ຺ຖຸ ຈ ປຣິນິພ຺ພານໍ, ໂຍ ອມ຺ຫໍ ອນຸກມ຺ປໂກ.

໑໐໔໙. ‘‘ຕທາສິ ຍໍ ຠິໍສນກໍ, ຕທາສິ ໂລມຫໍສນໍ;

ສພ຺ພາກາຣວຣູເປເຕ, ສມ຺ພຸທ຺ເຘ ປຣິນິພ຺ພຸເຕ.

໑໐໕໐. ‘‘ພຫຸສ຺ສຸໂຕ ຘມ຺ມຘໂຣ, ໂກສາຣກ຺ໂຂ ມເຫສິໂນ;

ຈກ຺ຂຸ ສພ຺ພສ຺ສ ໂລກສ຺ສ, ອານນ຺ໂທ ປຣິນິພ຺ພຸໂຕ.

໑໐໕໑. ‘‘ພຫຸສ຺ສຸໂຕ ຘມ຺ມຘໂຣ, ໂກສາຣກ຺ໂຂ ມເຫສິໂນ;

ຈກ຺ຂຸ ສພ຺ພສ຺ສ ໂລກສ຺ສ, ອນ຺ຘກາເຣ ຕໂມນຸໂທ.

໑໐໕໒. ‘‘ຄຕິມນ຺ໂຕ ສຕິມນ຺ໂຕ, ຘິຕິມນ຺ໂຕ ຈ ໂຍ ອິສິ;

ສທ຺ຘມ຺ມຘາຣໂກ ເຖໂຣ, ອານນ຺ໂທ ຣຕນາກໂຣ.

໑໐໕໓. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ນຕ຺ຖິ ທານິ ປຸນພ຺ຠໂວ’’ຕິ.

… ອານນ຺ໂທ ເຖໂຣ….

ຕິໍສນິປາໂຕ ນິຏ຺ຐິໂຕ.