໑໗. ຕິໍສນິປາໂຕ

໑. ຜຸສ຺ສຕ຺ເຖຣຄາຖາ

໙໔໙. ປາສາທິເກ ພຫູ ທິສ຺ວາ, ຠາວິຕຕ຺ເຕ ສຸສໍວຸເຕ;

ອິສິ ປຓ຺ຑຣສໂຄຕ຺ໂຕ [ປຓ຺ຑຣສ຺ສ ໂຄຕ຺ໂຕ (ສີ.)], ອປຸຈ຺ຉິ ຜຸສ຺ສສວ຺ຫຍໍ.

໙໕໐. ‘‘ກິໍຉນ຺ທາ ກິມຘິປ຺ປາຍາ, ກິມາກປ຺ປາ ຠວິສ຺ສເຣ;

ອນາຄຕມ຺ຫິ ກາລມ຺ຫິ, ຕໍ ເມ ອກ຺ຂາຫິ ປຸຈ຺ຉິໂຕ’’.

໙໕໑. ‘‘ສຸໂຓຫິ ວຈນໍ ມຍ຺ຫໍ, ອິສິປຓ຺ຑຣສວ຺ຫຍ;

ສກ຺ກຈ຺ຈໍ ອຸປຘາເຣຫິ, ອາຈິກ຺ຂິສ຺ສາມ຺ຍນາຄຕໍ.

໙໕໒. ‘‘ໂກຘນາ ອຸປນາຫີ ຈ, ມກ຺ຂີ ຖມ຺ຠີ ສຐາ ພຫູ;

ອຸສ຺ສຸກີ ນານາວາທາ ຈ, ຠວິສ຺ສນ຺ຕິ ອນາຄເຕ.

໙໕໓. ‘‘ອຎ຺ຎາຕມານິໂນ ຘມ຺ເມ, ຄມ຺ຠີເຣ ຕີຣໂຄຈຣາ;

ລຫຸກາ ອຄຣຸ ຘມ຺ເມ, ອຎ຺ຎມຎ຺ຎມຄາຣວາ.

໙໕໔. ‘‘ພຫູ ອາທີນວາ ໂລເກ, ອຸປ຺ປຊ຺ຊິສ຺ສນ຺ຕ຺ຍນາຄເຕ;

ສຸເທສິຕໍ ອິມໍ ຘມ຺ມໍ, ກິເລເສສ຺ສນ຺ຕິ [ກິເລສິສ຺ສນ຺ຕິ (ສີ.), ກິລິສິສ຺ສນ຺ຕິ (ສ຺ຍາ. ກ.)] ທຸມ຺ມຕີ.

໙໕໕. ‘‘ຄຸຓຫີນາປິ ສງ຺ຆມ຺ຫິ, ໂວຫຣນ຺ຕາ ວິສາຣທາ;

ພລວນ຺ໂຕ ຠວິສ຺ສນ຺ຕິ, ມຸຂຣາ ອສ຺ສຸຕາວິໂນ.

໙໕໖. ‘‘ຄຸຓວນ຺ໂຕປິ ສງ຺ຆມ຺ຫິ, ໂວຫຣນ຺ຕາ ຍຖາຕ຺ຖໂຕ;

ທຸພ຺ພລາ ເຕ ຠວິສ຺ສນ຺ຕິ, ຫິຣີມນາ ອນຕ຺ຖິກາ.

໙໕໗. ‘‘ຣຊຕໍ ຊາຕຣູປຎ຺ຈ, ເຂຕ຺ຕໍ ວຕ຺ຖຸມເຊຬກໍ;

ທາສິທາສຎ຺ຈ ທຸມ຺ເມຘາ, ສາທິຍິສ຺ສນ຺ຕ຺ຍນາຄເຕ.

໙໕໘. ‘‘ອຸຊ຺ຌານສຎ຺ຎິໂນ ພາລາ, ສີເລສຸ ອສມາຫິຕາ;

ອຸນ຺ນຬາ ວິຈຣິສ຺ສນ຺ຕິ, ກລຫາຠິຣຕາ ມຄາ.

໙໕໙. ‘‘ອຸທ຺ຘຕາ ຈ ຠວິສ຺ສນ຺ຕິ, ນີລຈີວຣປາຣຸຕາ;

ກຸຫາ ຖທ຺ຘາ ລປາ ສິງ຺ຄີ, ຈຣິສ຺ສນ຺ຕ຺ຍຣິຍາ ວິຍ.

໙໖໐. ‘‘ເຕລສຓ຺ເຐຫິ ເກເສຫິ, ຈປລາ ອຎ຺ຊນກ຺ຂິກາ;

ຣຖິຍາຍ ຄມິສ຺ສນ຺ຕິ, ທນ຺ຕວຓ຺ຓິກປາຣຸຕາ.

໙໖໑. ‘‘ອເຊຄຸຈ຺ຉໍ ວິມຸຕ຺ເຕຫິ, ສຸຣຕ຺ຕໍ ອຣຫທ຺ຘຊໍ;

ຊິຄຸຈ຺ຉິສ຺ສນ຺ຕິ ກາສາວໍ, ໂອທາເຕສຸ ສມຸຈ຺ຉິຕາ [ໂອທາເຕ ສຸສມຸຈ຺ຉິຕາ (ສີ.)].

໙໖໒. ‘‘ລາຠກາມາ ຠວິສ຺ສນ຺ຕິ, ກຸສີຕາ ຫີນວີຣິຍາ;

ກິຈ຺ຉນ຺ຕາ ວນປຕ຺ຖານິ, ຄາມນ຺ເຕສຸ ວສິສ຺ສເຣ.

໙໖໓. ‘‘ເຍ ເຍ ລາຠໍ ລຠິສ຺ສນ຺ຕິ, ມິຈ຺ຉາຊີວຣຕາ ສທາ;

ເຕ ເຕວ ອນຸສິກ຺ຂນ຺ຕາ, ຠຊິສ຺ສນ຺ຕິ ອສໍຍຕາ.

໙໖໔. ‘‘ເຍ ເຍ ອລາຠິໂນ ລາຠໍ, ນ ເຕ ປຸຊ຺ຊາ ຠວິສ຺ສເຣ;

ສຸເປສເລປິ ເຕ ຘີເຣ, ເສວິສ຺ສນ຺ຕິ ນ ເຕ ຕທາ.

໙໖໕. ‘‘ມິລກ຺ຂຸຣຊນໍ ຣຕ຺ຕໍ [ປິລກ຺ຂຣຊນໍ ຣຕ຺ຕໍ (?)], ຄຣຫນ຺ຕາ ສກໍ ຘຊໍ;

ຕິຕ຺ຖິຍານໍ ຘຊໍ ເກຈິ, ຘາຣິສ຺ສນ຺ຕ຺ຍວທາຕກໍ.

໙໖໖. ‘‘ອຄາຣໂວ ຈ ກາສາເວ, ຕທາ ເຕສໍ ຠວິສ຺ສຕິ;

ປຏິສງ຺ຂາ ຈ ກາສາເວ, ຠິກ຺ຂູນໍ ນ ຠວິສ຺ສຕິ.

໙໖໗. ‘‘ອຠິຠູຕສ຺ສ ທຸກ຺ເຂນ, ສລ຺ລວິທ຺ຘສ຺ສ ຣຸປ຺ປໂຕ;

ປຏິສງ຺ຂາ ມຫາໂຆຣາ, ນາຄສ຺ສາສິ ອຈິນ຺ຕິຍາ.

໙໖໘. ‘‘ຉທ຺ທນ຺ໂຕ ຫິ ຕທາ ທິສ຺ວາ, ສຸຣຕ຺ຕໍ ອຣຫທ຺ຘຊໍ;

ຕາວເທວ ຠຓີ ຄາຖາ, ຄໂຊ ອຕ຺ໂຖປສໍຫິຕາ’’.

໙໖໙. [ຘ. ປ. ໙; ຊາ. ໑.໒.໑໔໑; ໑.໑໖.໑໒໒] ‘‘ອນິກ຺ກສາໂວ ກາສາວໍ, ໂຍ ວຕ຺ຖໍ ປຣິຘສ຺ສຕິ [ປຣິທຫິສ຺ສຕິ (ສີ. ສ຺ຍາ.)];

ອເປໂຕ ທມສຈ຺ເຈນ, ນ ໂສ ກາສາວມຣຫຕິ.

໙໗໐. ‘‘ໂຍ ຈ ວນ຺ຕກາສາວສ຺ສ, ສີເລສຸ ສຸສມາຫິໂຕ;

ອຸເປໂຕ ທມສຈ຺ເຈນ, ສ ເວ ກາສາວມຣຫຕິ.

໙໗໑. ‘‘ວິປນ຺ນສີໂລ ທຸມ຺ເມໂຘ, ປາກໂຏ ກາມກາຣິໂຍ;

ວິພ຺ຠນ຺ຕຈິຕ຺ໂຕ ນິສ຺ສຸກ຺ໂກ, ນ ໂສ ກາສາວມຣຫຕິ.

໙໗໒. ‘‘ໂຍ ຈ ສີເລນ ສມ຺ປນ຺ໂນ, ວີຕຣາໂຄ ສມາຫິໂຕ;

ໂອທາຕມນສງ຺ກປ຺ໂປ, ສ ເວ ກາສາວມຣຫຕິ.

໙໗໓. ‘‘ອຸທ຺ຘໂຕ ອຸນ຺ນໂຬ ພາໂລ, ສີລໍ ຍສ຺ສ ນ ວິຊ຺ຊຕິ;

ໂອທາຕກໍ ອຣຫຕິ, ກາສາວໍ ກິໍ ກຣິສ຺ສຕິ.

໙໗໔. ‘‘ຠິກ຺ຂູ ຈ ຠິກ຺ຂຸນິໂຍ ຈ, ທຸຏ຺ຐຈິຕ຺ຕາ ອນາທຣາ;

ຕາທີນໍ ເມຕ຺ຕຈິຕ຺ຕານໍ, ນິຄ຺ຄຓ຺ຫິສ຺ສນ຺ຕ຺ຍນາຄເຕ.

໙໗໕. ‘‘ສິກ຺ຂາເປນ຺ຕາປິ ເຖເຣຫິ, ພາລາ ຈີວຣຘາຣຓໍ;

ນ ສຸຓິສ຺ສນ຺ຕິ ທຸມ຺ເມຘາ, ປາກຏາ ກາມກາຣິຍາ.

໙໗໖. ‘‘ເຕ ຕຖາ ສິກ຺ຂິຕາ ພາລາ, ອຎ຺ຎມຎ຺ຎໍ ອຄາຣວາ;

ນາທິຍິສ຺ສນ຺ຕຸປຊ຺ຌາເຍ, ຂຬຸງ຺ໂກ ວິຍ ສາຣຖິໍ.

໙໗໗. ‘‘ເອວໍ ອນາຄຕທ຺ຘານໍ, ປຏິປຕ຺ຕິ ຠວິສ຺ສຕິ;

ຠິກ຺ຂູນໍ ຠິກ຺ຂຸນີນຎ຺ຈ, ປຕ຺ເຕ ກາລມ຺ຫິ ປຈ຺ຉິເມ.

໙໗໘. ‘‘ປຸຣາ ອາຄຈ຺ຉເຕ ເອຕໍ, ອນາຄຕໍ ມຫພ຺ຠຍໍ;

ສຸພ຺ພຈາ ໂຫຖ ສຂິລາ, ອຎ຺ຎມຎ຺ຎໍ ສຄາຣວາ.

໙໗໙. ‘‘ເມຕ຺ຕຈິຕ຺ຕາ ກາຣຸຓິກາ, ໂຫຖ ສີເລສຸ ສໍວຸຕາ;

ອາຣທ຺ຘວີຣິຍາ ປຫິຕຕ຺ຕາ, ນິຈ຺ຈໍ ທຬ຺ຫປຣກ຺ກມາ.

໙໘໐. ‘‘ປມາທໍ ຠຍໂຕ ທິສ຺ວາ, ອປ຺ປມາທຎ຺ຈ ເຂມໂຕ;

ຠາເວຖຏ຺ຐງ຺ຄິກໍ ມຄ຺ຄໍ, ຜຸສນ຺ຕາ ອມຕໍ ປທ’’ນ຺ຕິ.

… ຜຸສ຺ໂສ ເຖໂຣ….

໒. ສາຣິປຸຕ຺ຕຕ຺ເຖຣຄາຖາ

໙໘໑. ‘‘ຍຖາຈາຣີ ຍຖາສໂຕ ສຕີມາ, ຍຕສງ຺ກປ຺ປຊ຺ຌາຍິ ອປ຺ປມຕ຺ໂຕ;

ອຊ຺ຌຕ຺ຕຣໂຕ ສມາຫິຕຕ຺ໂຕ, ເອໂກ ສນ຺ຕຸສິໂຕ ຕມາຫຸ ຠິກ຺ຂຸໍ.

໙໘໒. ‘‘ອລ຺ລໍ ສຸກ຺ຂໍ ວາ ຠຸຎ຺ຊນ຺ໂຕ, ນ ພາຬ຺ຫໍ ສຸຫິໂຕ ສິຍາ;

ອູນູທໂຣ ມິຕາຫາໂຣ, ສໂຕ ຠິກ຺ຂຸ ປຣິພ຺ພເຊ.

໙໘໓. ‘‘ຈຕ຺ຕາໂຣ ປຎ຺ຈ ອາໂລເປ, ອຠຸຕ຺ວາ ອຸທກໍ ປິເວ;

ອລໍ ຜາສຸວິຫາຣາຍ, ປຫິຕຕ຺ຕສ຺ສ ຠິກ຺ຂຸໂນ.

໙໘໔. ‘‘ກປ຺ປິຍໍ ຕໍ ເຈ ຉາເທຕິ, ຈີວຣໍ ອິທມຕ຺ຖິກໍ [ອິທມຕ຺ຖິຕໍ (ສີ.)];

ອລໍ ຜາສຸວິຫາຣາຍ, ປຫິຕຕ຺ຕສ຺ສ ຠິກ຺ຂຸໂນ.

໙໘໕. ‘‘ປລ຺ລງ຺ເກນ ນິສິນ຺ນສ຺ສ, ຊຓ຺ຓຸເກ ນາຠິວສ຺ສຕິ;

ອລໍ ຜາສຸວິຫາຣາຍ, ປຫິຕຕ຺ຕສ຺ສ ຠິກ຺ຂຸໂນ.

໙໘໖. [ສໍ. ນິ. ໔.໒໕໓; ອິຕິວຸ. ໕໓] ‘‘ໂຍ ສຸຂໍ ທຸກ຺ຂໂຕ ອທ຺ທ, ທຸກ຺ຂມທ຺ທກ຺ຂິ ສລ຺ລໂຕ;

ອຸຠຍນ຺ຕເຣນ [ອຸຠຍມນ຺ຕເຣ (ສີ.)] ນາໂຫສິ, ເກນ ໂລກສ຺ມິ ກິໍ ສິຍາ.

໙໘໗. ‘‘ມາ ເມ ກທາຈິ ປາປິຈ຺ໂຉ, ກຸສີໂຕ ຫີນວີຣິໂຍ;

ອປ຺ປສ຺ສຸໂຕ ອນາທໂຣ, ເກນ ໂລກສ຺ມິ ກິໍ ສິຍາ.

໙໘໘. ‘‘ພຫຸສ຺ສຸໂຕ ຈ ເມຘາວີ, ສີເລສຸ ສຸສມາຫິໂຕ;

ເຈໂຕສມຖມນຸຍຸຕ຺ໂຕ, ອປິ ມຸທ຺ຘນິ ຕິຏ຺ຐຕຸ.

໙໘໙. ‘‘ໂຍ ປປຎ຺ຈມນຸຍຸຕ຺ໂຕ, ປປຎ຺ຈາຠິຣໂຕ ມໂຄ;

ວິຣາຘຍີ ໂສ ນິພ຺ພານໍ, ໂຍຄກ຺ເຂມໍ ອນຸຕ຺ຕຣໍ.

໙໙໐. ‘‘ໂຍ ຈ ປປຎ຺ຈໍ ຫິຕ຺ວານ, ນິປ຺ປປຎ຺ຈປເຖ ຣໂຕ;

ອາຣາຘຍີ ໂສ ນິພ຺ພານໍ, ໂຍຄກ຺ເຂມໍ ອນຸຕ຺ຕຣໍ.

໙໙໑. [ຘ. ປ. ໙໘] ‘‘ຄາເມ ວາ ຍທິ ວາຣຎ຺ເຎ, ນິນ຺ເນ ວາ ຍທິ ວາ ຖເລ;

ຍຕ຺ຖ ອຣຫນ຺ໂຕ ວິຫຣນ຺ຕິ, ຕໍ ຠູມິຣາມເຓຍ຺ຍກໍ.

໙໙໒. ‘‘ຣມຓີຍານິ ອຣຎ຺ຎານິ, ຍຕ຺ຖ ນ ຣມຕີ ຊໂນ;

ວີຕຣາຄາ ຣມິສ຺ສນ຺ຕິ, ນ ເຕ ກາມຄເວສິໂນ.

໙໙໓. [ຘ. ປ. ໗໖] ‘‘ນິຘີນໍວ ປວຕ຺ຕາຣໍ, ຍໍ ປສ຺ເສ ວຊ຺ຊທສ຺ສິນໍ;

ນິຄ຺ຄຍ຺ຫວາທິໍ ເມຘາວິໍ, ຕາທິສໍ ປຓ຺ຑິຕໍ ຠເຊ;

ຕາທິສໍ ຠຊມານສ຺ສ, ເສຍ຺ໂຍ ໂຫຕິ ນ ປາປິໂຍ.

໙໙໔. [ຘ. ປ. ໗໗] ‘‘ໂອວເທຍ຺ຍານຸສາເສຍ຺ຍ, ອສພ຺ຠາ ຈ ນິວາຣເຍ;

ສຕຎ຺ຫິ ໂສ ປິໂຍ ໂຫຕິ, ອສຕໍ ໂຫຕິ ອປ຺ປິໂຍ.

໙໙໕. ‘‘ອຎ຺ຎສ຺ສ ຠຄວາ ພຸທ຺ໂຘ, ຘມ຺ມໍ ເທເສສິ ຈກ຺ຂຸມາ;

ຘມ຺ເມ ເທສິຍມານມ຺ຫິ, ໂສຕໂມເຘສິມຕ຺ຖິໂກ;

ຕໍ ເມ ອໂມຆໍ ສວນໍ, ວິມຸຕ຺ໂຕມ຺ຫິ ອນາສໂວ.

໙໙໖. ‘‘ເນວ ປຸພ຺ເພນິວາສາຍ, ນປິ ທິພ຺ພສ຺ສ ຈກ຺ຂຸໂນ;

ເຈໂຕປຣິຍາຍ ອິທ຺ຘິຍາ, ຈຸຕິຍາ ອຸປປຕ຺ຕິຍາ;

ໂສຕຘາຕຸວິສຸທ຺ຘິຍາ, ປຓິຘີ ເມ ນ ວິຊ຺ຊຕິ [ກຖາ. ໓໗໘].

໙໙໗. ‘‘ຣຸກ຺ຂມູລໍວ ນິສ຺ສາຍ, ມຸຓ຺ໂຑ ສງ຺ຆາຏິປາຣຸໂຕ;

ປຎ຺ຎາຍ ອຸຕ຺ຕໂມ ເຖໂຣ, ອຸປຕິສ຺ໂສວ [ອຸປຕິສ຺ໂສ ຈ (ສີ. ກ.)] ຌາຍຕິ.

໙໙໘. ‘‘ອວິຕກ຺ກໍ ສມາປນ຺ໂນ, ສມ຺ມາສມ຺ພຸທ຺ຘສາວໂກ;

ອຣິເຍນ ຕຸຓ຺ຫີຠາເວນ, ອຸເປໂຕ ໂຫຕິ ຕາວເທ.

໙໙໙. [ອຸທາ. ໒໔] ‘‘ຍຖາປິ ປພ຺ພໂຕ ເສໂລ, ອຈໂລ ສຸປ຺ປຕິຏ຺ຐິໂຕ;

ເອວໍ ໂມຫກ຺ຂຍາ ຠິກ຺ຂຸ, ປພ຺ພໂຕວ ນ ເວຘຕິ.

໑໐໐໐. ‘‘ອນງ຺ຄຓສ຺ສ ໂປສສ຺ສ, ນິຈ຺ຈໍ ສຸຈິຄເວສິໂນ;

ວາລຄ຺ຄມຕ຺ຕໍ ປາປສ຺ສ, ອພ຺ຠມຕ຺ຕໍວ ຂາຍຕິ.

໑໐໐໑. ‘‘ນາຠິນນ຺ທາມິ ມຣຓໍ, ນາຠິນນ຺ທາມິ ຊີວິຕໍ;

ນິກ຺ຂິປິສ຺ສໍ ອິມໍ ກາຍໍ, ສມ຺ປຊາໂນ ປຕິສ຺ສໂຕ.

໑໐໐໒. ‘‘ນາຠິນນ຺ທາມິ ມຣຓໍ, ນາຠິນນ຺ທາມິ ຊີວິຕໍ;

ກາລຎ຺ຈ ປຏິກງ຺ຂາມິ, ນິພ຺ພິສໍ ຠຕໂກ ຍຖາ.

໑໐໐໓. ‘‘ອຸຠເຍນ ມິທໍ ມຣຓເມວ, ນາມຣຓໍ ປຈ຺ຉາ ວາ ປຸເຣ ວາ;

ປຏິປຊ຺ຊຖ ມາ ວິນສ຺ສຖ, ຂໂຓ ໂວ ມາ ອຸປຈ຺ຈຄາ.

໑໐໐໔. ‘‘ນຄຣໍ ຍຖາ ປຈ຺ຈນ຺ຕໍ, ຄຸຕ຺ຕໍ ສນ຺ຕຣພາຫິຣໍ;

ເອວໍ ໂຄເປຖ ອຕ຺ຕານໍ, ຂໂຓ ໂວ ມາ ອຸປຈ຺ຈຄາ;

ຂຓາຕີຕາ ຫິ ໂສຈນ຺ຕິ, ນິຣຍມ຺ຫິ ສມປ຺ປິຕາ.

໑໐໐໕. ‘‘ອຸປສນ຺ໂຕ ອຸປຣໂຕ, ມນ຺ຕຠາຓີ [ມຕ຺ຕຠາຓີ (ສີ.)] ອນຸທ຺ຘໂຕ;

ຘຸນາຕິ ປາປເກ ຘມ຺ເມ, ທຸມປຕ຺ຕໍວ ມາລຸໂຕ.

໑໐໐໖. ‘‘ອຸປສນ຺ໂຕ ອຸປຣໂຕ, ມນ຺ຕຠາຓີ ອນຸທ຺ຘໂຕ;

ອປ຺ປາສິ [ອພ຺ພຫິ (ສ຺ຍາ.), ອຠາສິ (?)] ປາປເກ ຘມ຺ເມ, ທຸມປຕ຺ຕໍວ ມາລຸໂຕ.

໑໐໐໗. ‘‘ອຸປສນ຺ໂຕ ອນາຍາໂສ, ວິປ຺ປສນ຺ໂນ ອນາວິໂລ;

ກລ຺ຍາຓສີໂລ ເມຘາວີ, ທຸກ຺ຂສ຺ສນ຺ຕກໂຣ ສິຍາ.

໑໐໐໘. ‘‘ນ ວິສ຺ສເສ ເອກຕິເຍສຸ ເອວໍ, ອຄາຣິສຸ ປພ຺ພຊິເຕສຸ ຈາປິ;

ສາຘູປິ ຫຸຕ຺ວາ ນ ອສາຘຸ ໂຫນ຺ຕິ, ອສາຘຸ ຫຸຕ຺ວາ ປຸນ ສາຘຸ ໂຫນ຺ຕິ.

໑໐໐໙. ‘‘ກາມຈ຺ຉນ຺ໂທ ຈ ພ຺ຍາປາໂທ, ຖິນມິທ຺ຘຎ຺ຈ ຠິກ຺ຂຸໂນ;

ອຸທ຺ຘຈ຺ຈໍ ວິຈິກິຈ຺ຉາ ຈ, ປຎ຺ເຈເຕ ຈິຕ຺ຕເກລິສາ.

໑໐໑໐. ‘‘ຍສ຺ສ ສກ຺ກຣິຍມານສ຺ສ, ອສກ຺ກາເຣນ ຈູຠຍໍ;

ສມາຘິ ນ ວິກມ຺ປຕິ, ອປ຺ປມາທວິຫາຣິໂນ.

໑໐໑໑. ‘‘ຕໍ ຌາຍິນໍ ສາຕຕິກໍ, ສຸຂຸມທິຏ຺ຐິວິປສ຺ສກໍ;

ອຸປາທານກ຺ຂຍາຣາມໍ, ອາຫຸ ສປ຺ປຸຣິໂສ ອິຕິ.

໑໐໑໒. ‘‘ມຫາສມຸທ຺ໂທ ປຖວີ, ປພ຺ພໂຕ ອນິໂລປິ ຈ;

ອຸປມາຍ ນ ຍຸຊ຺ຊນ຺ຕິ, ສຕ຺ຖຸ ວຣວິມຸຕ຺ຕິຍາ.

໑໐໑໓. ‘‘ຈກ຺ການຸວຕ຺ຕໂກ ເຖໂຣ, ມຫາຎາຓີ ສມາຫິໂຕ;

ປຖວາປຄ຺ຄິສມາໂນ, ນ ຣຊ຺ຊຕິ ນ ທຸສ຺ສຕິ.

໑໐໑໔. ‘‘ປຎ຺ຎາປາຣມິຕໍ ປຕ຺ໂຕ, ມຫາພຸທ຺ຘິ ມຫາມຕິ;

ອຊໂຬ ຊຬສມາໂນ, ສທາ ຈຣຕິ ນິພ຺ພຸໂຕ.

໑໐໑໕. ‘‘ປຣິຈິຓ຺ໂຓ ມຍາ ສຕ຺ຖາ…ເປ… ຠວເນຕ຺ຕິ ສມູຫຕາ.

໑໐໑໖. ‘‘ສມ຺ປາເທຖປ຺ປມາເທນ, ເອສາ ເມ ອນຸສາສນີ;

ຫນ຺ທາຫໍ ປຣິນິພ຺ພິສ຺ສໍ, ວິປ຺ປມຸຕ຺ໂຕມ຺ຫິ ສພ຺ພຘີ’’ຕິ.

… ສາຣິປຸຕ຺ໂຕ ເຖໂຣ….

໓. ອານນ຺ທຕ຺ເຖຣຄາຖາ

໑໐໑໗. ‘‘ປິສຸເຓນ ຈ ໂກຘເນນ ຈ, ມຈ຺ຉຣິນາ ຈ ວິຠູຕນນ຺ທິນາ;

ສຂິຕໍ ນ ກເຣຍ຺ຍ ປຓ຺ຑິໂຕ, ປາໂປ ກາປຸຣິເສນ ສງ຺ຄໂມ.

໑໐໑໘. ‘‘ສທ຺ເຘນ ຈ ເປສເລນ ຈ, ປຎ຺ຎວຕາ ພຫຸສ຺ສຸເຕນ ຈ;

ສຂິຕໍ ກເຣຍ຺ຍ ປຓ຺ຑິໂຕ, ຠທ຺ໂທ ສປ຺ປຸຣິເສນ ສງ຺ຄໂມ.

໑໐໑໙. ‘‘ປສ຺ສ ຈິຕ຺ຕກຕໍ ພິມ຺ພໍ…ເປ… ຍສ຺ສ ນຕ຺ຖິ ຘຸວໍ ຐິຕິ.