໑໘. ຈຕ຺ຕາລີສນິປາໂຕ

໑. ມຫາກສ຺ສປຕ຺ເຖຣຄາຖາ

໑໐໕໔. ‘‘ນ ຄເຓນ ປຸຣກ຺ຂໂຕ ຈເຣ, ວິມໂນ ໂຫຕິ ສມາຘິ ທຸລ຺ລໂຠ;

ນານາຊນສງ຺ຄໂຫ ທຸໂຂ, ອິຕິ ທິສ຺ວານ ຄຓໍ ນ ໂຣຈເຍ.

໑໐໕໕. ‘‘ນ ກຸລານິ ອຸປພ຺ພເຊ ມຸນິ, ວິມໂນ ໂຫຕິ ສມາຘິ ທຸລ຺ລໂຠ;

ໂສ ອຸສ຺ສຸກ຺ໂກ ຣສານຸຄິທ຺ໂຘ, ອຕ຺ຖໍ ຣິຎ຺ຈຕິ ໂຍ ສຸຂາວໂຫ.

໑໐໕໖. ‘‘ປງ຺ໂກຕິ ຫິ ນໍ ອເວທຍຸໍ, ຍາຍໍ ວນ຺ທນປູຊນາ ກຸເລສຸ;

ສຸຂຸມໍ ສລ຺ລ ທຸຣຸພ຺ພຫໍ, ສກ຺ກາໂຣ ກາປຸຣິເສນ ທຸຊ຺ຊໂຫ.

໑໐໕໗. ‘‘ເສນາສນມ຺ຫາ ໂອຣຸຍ຺ຫ, ນຄຣໍ ປິຓ຺ຑາຍ ປາວິສິໍ;

ຠຸຎ຺ຊນ຺ຕໍ ປຸຣິສໍ ກຸຏ຺ຐິໍ, ສກ຺ກຈ຺ຈໍ ຕໍ ອຸປຏ຺ຐຫິໍ.

໑໐໕໘. ‘‘ໂສ ເມ [ຕໍ (ສີ. ກ.)] ປກ຺ເກນ ຫຕ຺ເຖນ, ອາໂລປໍ ອຸປນາມຍິ;

ອາໂລປໍ ປກ຺ຂິປນ຺ຕສ຺ສ, ອງ຺ຄຸລິ ເຈຕ຺ຖ [ເປຕ຺ຖ (ສີ. ກ.)] ຉິຊ຺ຊຖ.

໑໐໕໙. ‘‘ກຸຏ຺ຏມູລຎ຺ຈ [ກຸຑ຺ຑມູລຎ຺ຈ (ສີ. ສ຺ຍາ.)] ນິສ຺ສາຍ, ອາໂລປໍ ຕໍ ອຠຸຎ຺ຊິສໍ;

ຠຸຎ຺ຊມາເນ ວາ ຠຸຕ຺ເຕ ວາ, ເຊຄຸຈ຺ຉໍ ເມ ນ ວິຊ຺ຊຕິ.

໑໐໖໐. ‘‘ອຸຕ຺ຕິຏ຺ຐປິຓ຺ໂຑ ອາຫາໂຣ, ປູຕິມຸຕ຺ຕຎ຺ຈ ໂອສຘໍ;

ເສນາສນໍ ຣຸກ຺ຂມູລໍ, ປໍສຸກູລຎ຺ຈ ຈີວຣໍ;

ຍສ຺ເສເຕ ອຠິສມ຺ຠຸຕ຺ວາ [ອຠິຠຸຎ຺ຊຕິ (?)], ສ ເວ ຈາຕຸທ຺ທິໂສ ນໂຣ.

໑໐໖໑. ‘‘ຍຕ຺ຖ ເອເກ ວິຫຎ຺ຎນ຺ຕິ, ອາຣຸຫນ຺ຕາ ສິລຸຈ຺ຈຍໍ;

ຕສ຺ສ ພຸທ຺ຘສ຺ສ ທາຍາໂທ, ສມ຺ປຊາໂນ ປຕິສ຺ສໂຕ;

ອິທ຺ຘິພເລນຸປຕ຺ຖທ຺ໂຘ, ກສ຺ສໂປ ອຠິຣູຫຕິ.

໑໐໖໒. ‘‘ປິຓ຺ຑປາຕປຏິກ຺ກນ຺ໂຕ, ເສລມາຣຸຍ຺ຫ ກສ຺ສໂປ;

ຌາຍຕິ ອນຸປາທາໂນ, ປຫີນຠຍເຠຣໂວ.

໑໐໖໓. ‘‘ປິຓ຺ຑປາຕປຏິກ຺ກນ຺ໂຕ, ເສລມາຣຸຍ຺ຫ ກສ຺ສໂປ;

ຌາຍຕິ ອນຸປາທາໂນ, ຑຍ຺ຫມາເນສຸ ນິພ຺ພຸໂຕ.

໑໐໖໔. ‘‘ປິຓ຺ຑປາຕປຏິກ຺ກນ຺ໂຕ, ເສລມາຣຸຍ຺ຫ ກສ຺ສໂປ;

ຌາຍຕິ ອນຸປາທາໂນ, ກຕກິຈ຺ໂຈ ອນາສໂວ.

໑໐໖໕. ‘‘ກເຣຣິມາລາວິຕຕາ, ຠູມິຠາຄາ ມໂນຣມາ;

ກຸຎ຺ຊຣາຠິຣຸທາ ຣມ຺ມາ, ເຕ ເສລາ ຣມຍນ຺ຕິ ມໍ.

໑໐໖໖. ‘‘ນີລພ຺ຠວຓ຺ຓາ ຣຸຈິຣາ, ວາຣິສີຕາ ສຸຈິນ຺ຘຣາ;

ອິນ຺ທໂຄປກສຎ຺ຉນ຺ນາ, ເຕ ເສລາ ຣມຍນ຺ຕິ ມໍ.

໑໐໖໗. ‘‘ນີລພ຺ຠກູຏສທິສາ, ກູຏາຄາຣວຣູປມາ;

ວາຣຓາຠິຣຸທາ ຣມ຺ມາ, ເຕ ເສລາ ຣມຍນ຺ຕິ ມໍ.

໑໐໖໘. ‘‘ອຠິວຸຏ຺ຐາ ຣມ຺ມຕລາ, ນຄາ ອິສິຠິ ເສວິຕາ;

ອພ຺ຠຸນ຺ນທິຕາ ສິຂີຫິ, ເຕ ເສລາ ຣມຍນ຺ຕິ ມໍ.

໑໐໖໙. ‘‘ອລໍ ຌາຍິຕຸກາມສ຺ສ, ປຫິຕຕ຺ຕສ຺ສ ເມ ສໂຕ;

ອລໍ ເມ ອຕ຺ຖກາມສ຺ສ [ອຕ຺ຕກາມສ຺ສ (?)], ປຫິຕຕ຺ຕສ຺ສ ຠິກ຺ຂຸໂນ.

໑໐໗໐. ‘‘ອລໍ ເມ ຜາສຸກາມສ຺ສ, ປຫິຕຕ຺ຕສ຺ສ ຠິກ຺ຂຸໂນ;

ອລໍ ເມ ໂຍຄກາມສ຺ສ, ປຫິຕຕ຺ຕສ຺ສ ຕາທິໂນ.

໑໐໗໑. ‘‘ອຸມາປຸປ຺ເຜນ ສມານາ, ຄຄນາວພ຺ຠຉາທິຕາ;

ນານາທິຊຄຓາກິຓ຺ຓາ, ເຕ ເສລາ ຣມຍນ຺ຕິ ມໍ.

໑໐໗໒. ‘‘ອນາກິຓ຺ຓາ ຄຫຏ຺ເຐຫິ, ມິຄສງ຺ຆນິເສວິຕາ;

ນານາທິຊຄຓາກິຓ຺ຓາ, ເຕ ເສລາ ຣມຍນ຺ຕິ ມໍ.

໑໐໗໓. ‘‘ອຈ຺ໂຉທິກາ ປຸຖຸສິລາ, ໂຄນງ຺ຄຸລມິຄາຍຸຕາ;

ອມ຺ພຸເສວາລສຎ຺ຉນ຺ນາ, ເຕ ເສລາ ຣມຍນ຺ຕິ ມໍ.

໑໐໗໔. ‘‘ນ ປຎ຺ຈງ຺ຄິເກນ ຕຸຣິເຍນ, ຣຕິ ເມ ໂຫຕິ ຕາທິສີ;

ຍຖາ ເອກຄ຺ຄຈິຕ຺ຕສ຺ສ, ສມ຺ມາ ຘມ຺ມໍ ວິປສ຺ສໂຕ.

໑໐໗໕. ‘‘ກມ຺ມໍ ພຫຸກໍ ນ ກາຣເຍ, ປຣິວຊ຺ເຊຍ຺ຍ ຊນໍ ນ ອຸຍ຺ຍເມ;

ອຸສ຺ສຸກ຺ໂກ ໂສ ຣສານຸຄິທ຺ໂຘ, ອຕ຺ຖໍ ຣິຎ຺ຈຕິ ໂຍ ສຸຂາວໂຫ.

໑໐໗໖. ‘‘ກມ຺ມໍ ພຫຸກໍ ນ ກາຣເຍ, ປຣິວຊ຺ເຊຍ຺ຍ ອນຕ຺ຕເນຍ຺ຍເມຕໍ;

ກິຈ຺ຉຕິ ກາໂຍ ກິລມຕິ, ທຸກ຺ຂິໂຕ ໂສ ສມຖໍ ນ ວິນ຺ທຕິ.

໑໐໗໗. ‘‘ໂອຏ຺ຐປ຺ປຫຕມຕ຺ເຕນ, ອຕ຺ຕານມ຺ປິ ນ ປສ຺ສຕິ;

ປຕ຺ຖທ຺ຘຄີໂວ ຈຣຕິ, ອຫໍ ເສຍ຺ໂຍຕິ ມຎ຺ຎຕິ.

໑໐໗໘. ‘‘ອເສຍ຺ໂຍ ເສຍ຺ຍສມານໍ, ພາໂລ ມຎ຺ຎຕິ ອຕ຺ຕານໍ;

ນ ຕໍ ວິຎ຺ຎູ ປສໍສນ຺ຕິ, ປຕ຺ຖທ຺ຘມານສໍ ນຣໍ.

໑໐໗໙. ‘‘ໂຍ ຈ ເສຍ຺ໂຍຫມສ຺ມີຕິ, ນາຫໍ ເສຍ຺ໂຍຕິ ວາ ປນ;

ຫີໂນ ຕໍສທິໂສ [ຕີໂນຫໍ ສທິໂສ (ສ຺ຍາ.)] ວາຕິ, ວິຘາສຸ ນ ວິກມ຺ປຕິ.

໑໐໘໐. ‘‘ປຎ຺ຎວນ຺ຕໍ ຕຖາ ຕາທິໍ, ສີເລສຸ ສຸສມາຫິຕໍ;

ເຈໂຕສມຖມນຸຕ຺ຕໍ, ຕຎ຺ເຈ ວິຎ຺ຎູ ປສໍສເຣ.

໑໐໘໑. ‘‘ຍສ຺ສ ສພ຺ຣຫ຺ມຈາຣີສຸ, ຄາຣໂວ ນູປລພ຺ຠຕິ;

ອາຣກາ ໂຫຕິ ສທ຺ຘມ຺ມາ, ນຠໂຕ ປຸຖວີ ຍຖາ.

໑໐໘໒. ‘‘ເຍສຎ຺ຈ ຫິຣິ ໂອຕ຺ຕປ຺ປໍ, ສທາ ສມ຺ມາ ອຸປຏ຺ຐິຕໍ;

ວິຣູຬ຺ຫພ຺ຣຫ຺ມຈຣິຍາ ເຕ, ເຕສໍ ຂີຓາ ປຸນພ຺ຠວາ.

໑໐໘໓. ‘‘ອຸທ຺ຘໂຕ ຈປໂລ ຠິກ຺ຂຸ, ປໍສຸກູເລນ ປາຣຸໂຕ;

ກປີວ ສີຫຈມ຺ເມນ, ນ ໂສ ເຕນຸປໂສຠຕິ.

໑໐໘໔. ‘‘ອນຸທ຺ຘໂຕ ອຈປໂລ, ນິປໂກ ສໍວຸຕິນ຺ທ຺ຣິໂຍ;

ໂສຠຕິ ປໍສຸກູເລນ, ສີໂຫວ ຄິຣິຄພ຺ຠເຣ.

໑໐໘໕. ‘‘ເອເຕ ສມ຺ພຫຸລາ ເທວາ, ອິທ຺ຘິມນ຺ໂຕ ຍສສ຺ສິໂນ;

ທສເທວສຫສ຺ສານິ, ສພ຺ເພ ເຕ ພ຺ຣຫ຺ມກາຍິກາ.

໑໐໘໖. ‘‘ຘມ຺ມເສນາປຕິໍ ວີຣໍ, ມຫາຌາຍິໍ ສມາຫິຕໍ;

ສາຣິປຸຕ຺ຕໍ ນມສ຺ສນ຺ຕາ, ຕິຏ຺ຐນ຺ຕິ ປຎ຺ຊລີກຕາ.

໑໐໘໗. ‘‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ຍສ຺ສ ເຕ ນາຠິຊານາມ, ຍມ຺ປິ ນິສ຺ສາຍ ຌາຍຕິ [ຌາຍສິ (ກ. ອຏ຺ຐ.)].

໑໐໘໘. ‘‘‘ອຈ຺ເຉຣໍ ວຕ ພຸທ຺ຘານໍ, ຄມ຺ຠີໂຣ ໂຄຈໂຣ ສໂກ;

ເຍ ມຍໍ ນາຠິຊານາມ, ວາລເວຘິສມາຄຕາ’.

໑໐໘໙. ‘‘ຕໍ ຕຖາ ເທວກາເຍຫິ, ປູຊິຕໍ ປູຊນາຣຫໍ;

ສາຣິປຸຕ຺ຕໍ ຕທາ ທິສ຺ວາ, ກປ຺ປິນສ຺ສ ສິຕໍ ອຫຸ.

໑໐໙໐. ‘‘ຍາວຕາ ພຸທ຺ຘເຂຕ຺ຕມ຺ຫິ, ຐປຍິຕ຺ວາ ມຫາມຸນິໍ;

ຘຸຕຄຸເຓ ວິສິຏ຺ໂຐຫໍ, ສທິໂສ ເມ ນ ວິຊ຺ຊຕິ.

໑໐໙໑. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ນຕ຺ຖິ ທານິ ປຸນພ຺ຠໂວ.

໑໐໙໒. ‘‘ນ ຈີວເຣ ນ ສຍເນ, ໂຠຊເນ ນຸປລິມ຺ປຕິ;

ໂຄຕໂມ ອນປ຺ປເມຍ຺ໂຍ, ມຸຬາລປຸປ຺ຜໍ ວິມລໍວ;

ອມ຺ພຸນາ ເນກ຺ຂມ຺ມນິນ຺ໂນ, ຕິຠວາຠິນິສ຺ສໂຏ.

໑໐໙໓. ‘‘ສຕິປຏ຺ຐານຄີໂວ ໂສ, ສທ຺ຘາຫຕ຺ໂຖ ມຫາມຸນິ;

ປຎ຺ຎາສີໂສ ມຫາຎາຓີ, ສທາ ຈຣຕິ ນິພ຺ພຸໂຕ’’ຕິ.

… ມຫາກສ຺ສໂປ ເຖໂຣ….

ຈຕ຺ຕາລີສນິປາໂຕ ນິຏ຺ຐິໂຕ.