໑໙. ປຎ຺ຎາສນິປາໂຕ

໑. ຕາລປຸຏຕ຺ເຖຣຄາຖາ

໑໐໙໔. ‘‘ກທາ ນຸຫໍ ປພ຺ພຕກນ຺ທຣາສຸ, ເອກາກິໂຍ ອທ຺ທຸຕິໂຍ ວິຫສ຺ສໍ;

ອນິຈ຺ຈໂຕ ສພ຺ພຠວໍ ວິປສ຺ສໍ, ຕໍ ເມ ອິທໍ ຕໍ ນຸ ກທາ ຠວິສ຺ສຕິ.

໑໐໙໕. ‘‘ກທາ ນຸຫໍ ຠິນ຺ນປຏນ຺ຘໂຣ ມຸນິ, ກາສາວວຕ຺ໂຖ ອມໂມ ນິຣາໂສ;

ຣາຄຎ຺ຈ ໂທສຎ຺ຈ ຕເຖວ ໂມຫໍ, ຫນ຺ຕ຺ວາ ສຸຂີ ປວນຄໂຕ ວິຫສ຺ສໍ.

໑໐໙໖. ‘‘ກທາ ອນິຈ຺ຈໍ ວຘໂຣຄນີຬໍ, ກາຍໍ ອິມໍ ມຈ຺ຈຸຊຣາຍຸປທ຺ທຸຕໍ;

ວິປສ຺ສມາໂນ ວີຕຠໂຍ ວິຫສ຺ສໍ, ເອໂກ ວເນ ຕໍ ນຸ ກທາ ຠວິສ຺ສຕິ.

໑໐໙໗. ‘‘ກທາ ນຸຫໍ ຠຍຊນນິໍ ທຸຂາວຫໍ, ຕຓ຺ຫາລຕໍ ພຫຸວິຘານຸວຕ຺ຕນິໍ;

ປຎ຺ຎາມຍໍ ຕິຂິຓມສິໍ ຄເຫຕ຺ວາ, ເຉຕ຺ວາ ວເສ ຕມ຺ປິ ກທາ ຠວິສ຺ສຕິ.

໑໐໙໘. ‘‘ກທາ ນຸ ປຎ຺ຎາມຍມຸຄ຺ຄເຕຊໍ, ສຕ຺ຖໍ ອິສີນໍ ສຫສາທິຍິຕ຺ວາ;

ມາຣໍ ສເສນໍ ສຫສາ ຠຎ຺ຊິສ຺ສໍ, ສີຫາສເນ ຕໍ ນຸ ກທາ ຠວິສ຺ສຕິ.

໑໐໙໙. ‘‘ກທາ ນຸຫໍ ສພ຺ຠິ ສມາຄເມສຸ, ທິຏ຺ໂຐ ຠເວ ຘມ຺ມຄຣູຫິ ຕາທິຠິ;

ຍາຖາວທສ຺ສີຫິ ຊິຕິນ຺ທ຺ຣິເຍຫິ, ປຘານິໂຍ ຕໍ ນຸ ກທາ ຠວິສ຺ສຕິ.

໑໑໐໐. ‘‘ກທາ ນຸ ມໍ ຕນ຺ທິ ຂຸທາ ປິປາສາ, ວາຕາຕປາ ກີຏສຣີສປາ ວາ;

ນ ພາຘຍິສ຺ສນ຺ຕິ ນ ຕໍ ຄິຣິພ຺ພເຊ, ອຕ຺ຖຕ຺ຖິຍໍ ຕໍ ນຸ ກທາ ຠວິສ຺ສຕິ.

໑໑໐໑. ‘‘ກທາ ນຸ ໂຂ ຍໍ ວິທິຕໍ ມເຫສິນາ, ຈຕ຺ຕາຣິ ສຈ຺ຈານິ ສຸທຸທ຺ທສານິ;

ສມາຫິຕຕ຺ໂຕ ສຕິມາ ອຄຈ຺ຉໍ, ປຎ຺ຎາຍ ຕໍ ຕໍ ນຸ ກທາ ຠວິສ຺ສຕິ.

໑໑໐໒. ‘‘ກທາ ນຸ ຣູເປ ອມິເຕ ຈ ສທ຺ເທ, ຄນ຺ເຘ ຣເສ ຜຸສິຕພ຺ເພ ຈ ຘມ຺ເມ;

ອາທິຕ຺ຕໂຕຫໍ ສມເຖຫິ ຍຸຕ຺ໂຕ, ປຎ຺ຎາຍ ທຈ຺ຉໍ ຕທິທໍ ກທາ ເມ.

໑໑໐໓. ‘‘ກທາ ນຸຫໍ ທຸພ຺ພຈເນນ ວຸຕ຺ໂຕ, ຕໂຕນິມິຕ຺ຕໍ ວິມໂນ ນ ເຫສ຺ສໍ;

ອໂຖ ປສຕ຺ໂຖປິ ຕໂຕນິມິຕ຺ຕໍ, ຕຸຏ຺ໂຐ ນ ເຫສ຺ສໍ ຕທິທໍ ກທາ ເມ.

໑໑໐໔. ‘‘ກທາ ນຸ ກຏ຺ເຐ ຈ ຕິເຓ ລຕາ ຈ, ຂນ຺ເຘ ອິເມຫໍ ອມິເຕ ຈ ຘມ຺ເມ;

ອຊ຺ຌຕ຺ຕິກາເນວ ຈ ພາຫິຣານິ ຈ, ສມໍ ຕຸເລຍ຺ຍໍ ຕທິທໍ ກທາ ເມ.

໑໑໐໕. ‘‘ກທາ ນຸ ມໍ ປາວຸສກາລເມໂຆ, ນເວນ ໂຕເຍນ ສຈີວຣໍ ວເນ;

ອິສິປ຺ປຍາຕມ຺ຫິ ປເຖ ວຊນ຺ຕໍ, ໂອວສ຺ສເຕ ຕໍ ນຸ ກທາ ຠວິສ຺ສຕິ.

໑໑໐໖. ‘‘ກທາ ມຍູຣສ຺ສ ສິຂຓ຺ຑິໂນ ວເນ, ທິຊສ຺ສ ສຸຕ຺ວາ ຄິຣິຄພ຺ຠເຣ ຣຸຕໍ;

ປຈ຺ຈຸຏ຺ຐຫິຕ຺ວາ ອມຕສ຺ສ ປຕ຺ຕິຍາ, ສໍຈິນ຺ຕເຍ ຕໍ ນຸ ກທາ ຠວິສ຺ສຕິ.

໑໑໐໗. ‘‘ກທາ ນຸ ຄງ຺ຄໍ ຍມຸນໍ ສຣສ຺ສຕິໍ, ປາຕາລຂິຕ຺ຕໍ ວຬວາມຸຂຎ຺ຈ [ພລວາມຸຂຎ຺ຈ (ກ.)];

ອສຊ຺ຊມາໂນ ປຕເຣຍ຺ຍມິທ຺ຘິຍາ, ວິຠິໍສນໍ ຕໍ ນຸ ກທາ ຠວິສ຺ສຕິ.

໑໑໐໘. ‘‘ກທາ ນຸ ນາໂຄວ ອສງ຺ຄຈາຣີ, ປທາລເຍ ກາມຄຸເຓສຸ ຉນ຺ທໍ;

ນິພ຺ພຊ຺ຊຍໍ ສພ຺ພສຸຠໍ ນິມິຕ຺ຕໍ, ຌາເນ ຍຸໂຕ ຕໍ ນຸ ກທາ ຠວິສ຺ສຕິ.

໑໑໐໙. ‘‘ກທາ ອິຓຏ຺ໂຏວ ທລິທ຺ທໂກ [ທຬິທ຺ທໂກ (ສີ.)] ນິຘິໍ, ອາຣາຘຍິຕ຺ວາ ຘນິເກຫິ ປີຬິໂຕ;

ຕຸຏ຺ໂຐ ຠວິສ຺ສໍ ອຘິຄມ຺ມ ສາສນໍ, ມເຫສິໂນ ຕໍ ນຸ ກທາ ຠວິສ຺ສຕິ.

໑໑໑໐. ‘‘ພຫູນິ ວສ຺ສານິ ຕຍາມ຺ຫິ ຍາຈິໂຕ, ‘ອຄາຣວາເສນ ອລໍ ນຸ ເຕ ອິທໍ’;

ຕໍ ທານິ ມໍ ປພ຺ພຊິຕໍ ສມານໍ, ກິໍກາຣຓາ ຈິຕ຺ຕ ຕຸວໍ ນ ຍຸຎ຺ຊສິ.

໑໑໑໑. ‘‘ນນຸ ອຫໍ ຈິຕ຺ຕ ຕຍາມ຺ຫິ ຍາຈິໂຕ, ‘ຄິຣິພ຺ພເຊ ຈິຕ຺ຣຉທາ ວິຫງ຺ຄມາ’;

ມຫິນ຺ທໂຆສຕ຺ຖນິຕາຠິຄຊ຺ຊິໂນ, ເຕ ຕໍ ຣເມສ຺ສນ຺ຕິ ວນມ຺ຫິ ຌາຍິນໍ.

໑໑໑໒. ‘‘ກຸລມ຺ຫິ ມິຕ຺ເຕ ຈ ປິເຍ ຈ ຎາຕເກ, ຂິຑ຺ຑາຣຕິໍ ກາມຄຸຓຎ຺ຈ ໂລເກ;

ສພ຺ພໍ ປຫາຍ ອິມມຊ຺ຌຸປາຄໂຕ, ອໂຖປິ ຕ຺ວໍ ຈິຕ຺ຕ ນ ມຍ຺ຫ ຕຸສ຺ສສິ.

໑໑໑໓. ‘‘ມເມວ ເອຕໍ ນ ຫິ ຕ຺ວໍ ປເຣສໍ, ສນ຺ນາຫກາເລ ປຣິເທວິເຕນ ກິໍ;

ສພ຺ພໍ ອິທໍ ຈລມິຕິ ເປກ຺ຂມາໂນ, ອຠິນິກ຺ຂມິໍ ອມຕປທໍ ຊິຄີສໍ.

໑໑໑໔. ‘‘ສຸຍຸຕ຺ຕວາທີ ທ຺ວິປທານມຸຕ຺ຕໂມ, ມຫາຠິສກ຺ໂກ ນຣທມ຺ມສາຣຖິ [ສາຣຖີ (ສີ.)];

‘ຈິຕ຺ຕໍ ຈລໍ ມກ຺ກຏສນ຺ນິຠໍ ອິຕິ, ອວີຕຣາເຄນ ສຸທຸນ຺ນິວາຣຍໍ’.

໑໑໑໕. ‘‘ກາມາ ຫິ ຈິຕ຺ຣາ ມຘຸຣາ ມໂນຣມາ, ອວິທ຺ທສູ ຍຕ຺ຖ ສິຕາ ປຸຖຸຊ຺ຊນາ;

ເຕ ທຸກ຺ຂມິຈ຺ຉນ຺ຕິ ປຸນພ຺ຠເວສິໂນ, ຈິຕ຺ເຕນ ນີຕາ ນິຣເຍ ນິຣາກຕາ.

໑໑໑໖. ‘‘‘ມຍູຣໂກຎ຺ຈາຠິຣຸຕມ຺ຫິ ການເນ, ທີປີຫິ ພ຺ຍຄ຺ເຆຫິ ປຸຣກ຺ຂໂຕ ວສໍ;

ກາເຍ ອເປກ຺ຂໍ ຊຫ ມາ ວິຣາຘຍ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໑໗. ‘‘‘ຠາເວຫິ ຌານານິ ຈ ອິນ຺ທ຺ຣິຍານິ ຈ, ພລານິ ໂພຊ຺ຌງ຺ຄສມາຘິຠາວນາ;

ຕິສ຺ໂສ ຈ ວິຊ຺ຊາ ຜຸສ ພຸທ຺ຘສາສເນ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໑໘. ‘‘‘ຠາເວຫິ ມຄ຺ຄໍ ອມຕສ຺ສ ປຕ຺ຕິຍາ, ນິຍ຺ຍານິກໍ ສພ຺ພທຸຂກ຺ຂໂຍຄຘໍ;

ອຏ຺ຐງ຺ຄິກໍ ສພ຺ພກິເລສໂສຘນໍ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໑໙. ‘‘‘ທຸກ຺ຂນ຺ຕິ ຂນ຺ເຘ ປຏິປສ຺ສ ໂຍນິໂສ, ຍໂຕ ຈ ທຸກ຺ຂໍ ສມຸເທຕິ ຕໍ ຊຫ;

ອິເຘວ ທຸກ຺ຂສ຺ສ ກໂຣຫິ ອນ຺ຕໍ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໒໐. ‘‘‘ອນິຈ຺ຈໍ ທຸກ຺ຂນ຺ຕິ ວິປສ຺ສ ໂຍນິໂສ, ສຸຎ຺ຎໍ ອນຕ຺ຕາຕິ ອຆໍ ວຘນ຺ຕິ ຈ;

ມໂນວິຈາເຣ ອຸປຣຸນ຺ຘ ເຈຕໂສ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໒໑. ‘‘‘ມຸຓ຺ໂຑ ວິຣູໂປ ອຠິສາປມາຄໂຕ, ກປາລຫຕ຺ໂຖວ ກຸເລສຸ ຠິກ຺ຂສຸ;

ຍຸຎ຺ຊສ຺ສຸ ສຕ຺ຖຸວຈເນ ມເຫສິໂນ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໒໒. ‘‘‘ສຸສໍວຸຕຕ຺ໂຕ ວິສິຂນ຺ຕເຣ ຈຣໍ, ກຸເລສຸ ກາເມສຸ ອສງ຺ຄມານໂສ;

ຈນ຺ໂທ ຍຖາ ໂທສິນປຸຓ຺ຓມາສິຍາ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໒໓. ‘‘‘ອາຣຎ຺ຎິໂກ ໂຫຫິ ຈ ປິຓ຺ຑປາຕິໂກ, ໂສສານິໂກ ໂຫຫິ ຈ ປໍສຸກູລິໂກ;

ເນສຊ຺ຊິໂກ ໂຫຫິ ສທາ ຘຸເຕ ຣໂຕ’, ອິຕິສ຺ສຸ ມໍ ຈິຕ຺ຕ ປຸເຣ ນິຍຸຎ຺ຊສິ.

໑໑໒໔. ‘‘ໂຣເປຕ຺ວ ຣຸກ຺ຂານິ ຍຖາ ຜເລສີ, ມູເລ ຕຣຸໍ ເຉຕ຺ຕຸ ຕເມວ ອິຈ຺ຉສິ;

ຕຖູປມໍ ຈິຕ຺ຕມິທໍ ກໂຣສິ, ຍໍ ມໍ ອນິຈ຺ຈມ຺ຫິ ຈເລ ນິຍຸຎ຺ຊສິ.

໑໑໒໕. ‘‘ອຣູປ ທູຣງ຺ຄມ ເອກຈາຣິ, ນ ເຕ ກຣິສ຺ສໍ ວຈນໍ ອິທານິຫໍ;

ທຸກ຺ຂາ ຫິ ກາມາ ກຏຸກາ ມຫພ຺ຠຍາ, ນິພ຺ພານເມວາຠິມໂນ ຈຣິສ຺ສໍ.

໑໑໒໖. ‘‘ນາຫໍ ອລກ຺ຂ຺ຍາ ອຫິຣິກ຺ກຕາຍ ວາ, ນ ຈິຕ຺ຕເຫຕູ ນ ຈ ທູຣກນ຺ຕນາ;

ອາຊີວເຫຕູ ຈ ອຫໍ ນ ນິກ຺ຂມິໍ, ກໂຕ ຈ ເຕ ຈິຕ຺ຕ ປຏິສ຺ສໂວ ມຍາ.

໑໑໒໗. ‘‘‘ອປ຺ປິຈ຺ຉຕາ ສປ຺ປຸຣິເສຫິ ວຓ຺ຓິຕາ, ມກ຺ຂປ຺ປຫານໍ ວູປສໂມ ທຸຂສ຺ສ’;

ອິຕິສ຺ສຸ ມໍ ຈິຕ຺ຕ ຕທາ ນິຍຸຎ຺ຊສິ, ອິທານິ ຕ຺ວໍ ຄຈ຺ຉສິ ປຸພ຺ພຈິຓ຺ຓໍ.

໑໑໒໘. ‘‘ຕຓ຺ຫາ ອວິຊ຺ຊາ ຈ ປິຍາປິຍຎ຺ຈ, ສຸຠານິ ຣູປານິ ສຸຂາ ຈ ເວທນາ;

ມນາປິຍາ ກາມຄຸຓາ ຈ ວນ຺ຕາ, ວນ຺ເຕ ອຫໍ ອາວມິຕຸໍ ນ ອຸສ຺ສເຫ.

໑໑໒໙. ‘‘ສພ຺ພຕ຺ຖ ເຕ ຈິຕ຺ຕ ວໂຈ ກຕໍ ມຍາ, ພຫູສຸ ຊາຕີສຸ ນ ເມສິ ໂກປິໂຕ;

ອຊ຺ຌຕ຺ຕສມ຺ຠໂວ ກຕຎ຺ຎຸຕາຍ ເຕ, ທຸກ຺ເຂ ຈິຣໍ ສໍສຣິຕໍ ຕຍາ ກເຕ.

໑໑໓໐. ‘‘ຕ຺ວຎ຺ເຎວ ໂນ ຈິຕ຺ຕ ກໂຣສິ ພ຺ຣາຫ຺ມໂຓ [ພ຺ຣາຫ຺ມເຓ (ສີ.), ພ຺ຣາຫ຺ມຓໍ (?) ຠາວໂລປ-ຕປ຺ປຘານຕາ ຄເຫຕພ຺ພາ], ຕ຺ວໍ ຂຕ຺ຕິໂຍ ຣາຊທສີ [ຣາຊທິສີ (ສ຺ຍາ. ກ.)] ກໂຣສິ;

ເວສ຺ສາ ຈ ສຸທ຺ທາ ຈ ຠວາມ ເອກທາ, ເທວຕ຺ຕນໍ ວາປິ ຕເວວ ວາຫສາ.

໑໑໓໑. ‘‘ຕເວວ ເຫຕູ ອສຸຣາ ຠວາມເສ, ຕ຺ວໍມູລກໍ ເນຣຍິກາ ຠວາມເສ;

ອໂຖ ຕິຣຈ຺ຉານຄຕາປິ ເອກທາ, ເປຕຕ຺ຕນໍ ວາປິ ຕເວວ ວາຫສາ.

໑໑໓໒. ‘‘ນນຸ ທຸພ຺ຠິສ຺ສສິ ມໍ ປຸນປ຺ປຸນໍ, ມຸຫຸໍ ມຸຫຸໍ ຈາຣຓິກໍວ ທສ຺ສຍໍ;

ອຸມ຺ມຕ຺ຕເກເນວ ມຍາ ປໂລຠສິ, ກິຎ຺ຈາປິ ເຕ ຈິຕ຺ຕ ວິຣາຘິຕໍ ມຍາ.

໑໑໓໓. ‘‘ອິທໍ ປຸເຣ ຈິຕ຺ຕມຈາຣິ ຈາຣິກໍ, ເຍນິຈ຺ຉກໍ ຍຕ຺ຖກາມໍ ຍຖາສຸຂໍ;

ຕທຊ຺ຊຫໍ ນິຄ຺ຄເຫສ຺ສາມິ ໂຍນິໂສ, ຫຕ຺ຖິປ຺ປຠິນ຺ນໍ ວິຍ ອງ຺ກຸສຄ຺ຄໂຫ.

໑໑໓໔. ‘‘ສຕ຺ຖາ ຈ ເມ ໂລກມິມໍ ອຘິຏ຺ຐຫິ, ອນິຈ຺ຈໂຕ ອທ຺ຘຸວໂຕ ອສາຣໂຕ;

ປກ຺ຂນ຺ທ ມໍ ຈິຕ຺ຕ ຊິນສ຺ສ ສາສເນ, ຕາເຣຫິ ໂອຆາ ມຫຕາ ສຸທຸຕ຺ຕຣາ.

໑໑໓໕. ‘‘ນ ເຕ ອິທໍ ຈິຕ຺ຕ ຍຖາ ປຸຣາຓກໍ, ນາຫໍ ອລໍ ຕຸຍ຺ຫ ວເສ ນິວຕ຺ຕິຕຸໍ [ວເສນ ວຕ຺ຕິຕຸໍ (?)];

ມເຫສິໂນ ປພ຺ພຊິໂຕມ຺ຫິ ສາສເນ, ນ ມາທິສາ ໂຫນ຺ຕິ ວິນາສຘາຣິໂນ.

໑໑໓໖. ‘‘ນຄາ ສມຸທ຺ທາ ສຣິຕາ ວສຸນ຺ຘຣາ, ທິສາ ຈຕສ຺ໂສ ວິທິສາ ອໂຘ ທິວາ;

ສພ຺ເພ ອນິຈ຺ຈາ ຕິຠວາ ອຸປທ຺ທຸຕາ, ກຸຫິໍ ຄໂຕ ຈິຕ຺ຕ ສຸຂໍ ຣມິສ຺ສສິ.

໑໑໓໗. ‘‘ຘິຕິປ຺ປຣໍ ກິໍ ມມ ຈິຕ຺ຕ ກາຫິສິ, ນ ເຕ ອລໍ ຈິຕ຺ຕ ວສານຸວຕ຺ຕໂກ;

ນ ຊາຕຸ ຠສ຺ຕໍ ອຸຠໂຕມຸຂໍ ຉຸເປ, ຘິຣຕ຺ຖຸ ປູຣໍ ນວ ໂສຕສນ຺ທນິໍ.

໑໑໓໘. ‘‘ວຣາຫເອເຓຍ຺ຍວິຄາຬ຺ຫເສວິເຕ, ປພ຺ຠາຣກຸຏ຺ເຏ ປກເຕວ ສຸນ຺ທເຣ;

ນວມ຺ພຸນາ ປາວຸສສິຕ຺ຖການເນ, ຕຫິໍ ຄຸຫາເຄຫຄໂຕ ຣມິສ຺ສສິ.

໑໑໓໙. ‘‘ສຸນີລຄີວາ ສຸສິຂາ ສຸເປຂຸນາ, ສຸຈິຕ຺ຕປຕ຺ຕຈ຺ຉທນາ ວິຫງ຺ຄມາ;

ສຸມຎ຺ຊຸໂຆສຕ຺ຖນິຕາຠິຄຊ຺ຊິໂນ, ເຕ ຕໍ ຣເມສ຺ສນ຺ຕິ ວນມ຺ຫິ ຌາຍິນໍ.

໑໑໔໐. ‘‘ວຸຏ຺ຐມ຺ຫິ ເທເວ ຈຕຸຣງ຺ຄຸເລ ຕິເຓ, ສໍປຸປ຺ຜິເຕ ເມຆນິຠມ຺ຫິ ການເນ;

ນຄນ຺ຕເຣ ວິຏປິສໂມ ສຍິສ຺ສໍ, ຕໍ ເມ ມຸທູ ເຫຫິຕິ ຕູລສນ຺ນິຠໍ.

໑໑໔໑. ‘‘ຕຖາ ຕຸ ກສ຺ສາມິ ຍຖາປິ ອິສ຺ສໂຣ, ຍໍ ລພ຺ຠຕິ ເຕນປິ ໂຫຕຸ ເມ ອລໍ;

ນ ຕາຫໍ ກສ຺ສາມິ ຍຖາ ອຕນ຺ທິໂຕ, ພິຬາຣຠສ຺ຕໍວ ຍຖາ ສຸມທ຺ທິຕໍ.

໑໑໔໒. ‘‘ຕຖາ ຕຸ ກສ຺ສາມິ ຍຖາປິ ອິສ຺ສໂຣ, ຍໍ ລພ຺ຠຕິ ເຕນປິ ໂຫຕຸ ເມ ອລໍ;

ວີຣິເຍນ ຕໍ ມຍ຺ຫ ວສານຍິສ຺ສໍ, ຄຊໍວ ມຕ຺ຕໍ ກຸສລງ຺ກຸສຄ຺ຄໂຫ.

໑໑໔໓. ‘‘ຕຍາ ສຸທນ຺ເຕນ ອວຏ຺ຐິເຕນ ຫິ, ຫເຍນ ໂຍຄ຺ຄາຈຣິໂຍວ ອຸຊ຺ຊຸນາ;

ປໂຫມິ ມຄ຺ຄໍ ປຏິປຊ຺ຊິຕຸໍ ສິວໍ, ຈິຕ຺ຕານຸຣກ຺ຂີຫິ ສທາ ນິເສວິຕໍ.

໑໑໔໔. ‘‘ອາຣມ຺ມເຓ ຕໍ ພລສາ ນິພນ຺ຘິສໍ, ນາຄໍວ ຖມ຺ຠມ຺ຫິ ທຬ຺ຫາຍ ຣຊ຺ຊຸຍາ;

ຕໍ ເມ ສຸຄຸຕ຺ຕໍ ສຕິຍາ ສຸຠາວິຕໍ, ອນິສ຺ສິຕໍ ສພ຺ພຠເວສຸ ເຫຫິສິ.

໑໑໔໕. ‘‘ປຎ຺ຎາຍ ເຉຕ຺ວາ ວິປຖານຸສາຣິນໍ, ໂຍເຄນ ນິຄ຺ຄຍ຺ຫ ປເຖ ນິເວສິຍ;

ທິສ຺ວາ ສມຸທຍໍ ວິຠວຎ຺ຈ ສມ຺ຠວໍ, ທາຍາທໂກ ເຫຫິສິ ອຄ຺ຄວາທິໂນ.

໑໑໔໖. ‘‘ຈຕຸພ຺ພິປລ຺ລາສວສໍ ອຘິຏ຺ຐິຕໍ, ຄາມຓ຺ຑລໍວ ປຣິເນສິ ຈິຕ຺ຕ ມໍ;

ນນຸ [ນູນ (ສີ.)] ສໍໂຍຊນພນ຺ຘນຈ຺ຉິທໍ, ສໍເສວເສ ກາຣຸຓິກໍ ມຫາມຸນິໍ.

໑໑໔໗. ‘‘ມິໂຄ ຍຖາ ເສຣິ ສຸຈິຕ຺ຕການເນ, ຣມ຺ມໍ ຄິຣິໍ ປາວຸສອພ຺ຠມາລິນິໍ [ມາລິໍ (?)];

ອນາກຸເລ ຕຕ຺ຖ ນເຄ ຣມິສ຺ສໍ [ຣມິສ຺ສສິ (ສ຺ຍາ. ກ.)], ອສໍສຍໍ ຈິຕ຺ຕ ປຣາ ຠວິສ຺ສສິ.

໑໑໔໘. ‘‘ເຍ ຕຸຍ຺ຫ ຉນ຺ເທນ ວເສນ ວຕ຺ຕິໂນ, ນຣາ ຈ ນາຣີ ຈ ອນຸໂຠນ຺ຕິ ຍໍ ສຸຂໍ;

ອວິທ຺ທສູ ມາຣວສານຸວຕ຺ຕິໂນ, ຠວາຠິນນ຺ທີ ຕວ ຈິຕ຺ຕ ສາວກາ’’ຕິ.

… ຕາລປຸໂຏ ເຖໂຣ….

ປຎ຺ຎາສນິປາໂຕ ນິຏ຺ຐິໂຕ.