໒໐. ສຏ຺ຐິນິປາໂຕ

໑. ມຫາໂມຄ຺ຄລ຺ລານຕ຺ເຖຣຄາຖາ

໑໑໔໙. ‘‘ອາຣຎ຺ຎິກາ ປິຓ຺ຑປາຕິກາ, ອຸຎ຺ຉາປຕ຺ຕາຄເຕ ຣຕາ;

ທາເລມຸ ມຈ຺ຈຸໂນ ເສນໍ, ອຊ຺ຌຕ຺ຕໍ ສຸສມາຫິຕາ.

໑໑໕໐. ‘‘ອາຣຎ຺ຎິກາ ປິຓ຺ຑປາຕິກາ, ອຸຎ຺ຉາປຕ຺ຕາຄເຕ ຣຕາ;

ຘຸນາມ ມຈ຺ຈຸໂນ ເສນໍ, ນຬາຄາຣໍວ ກຸຎ຺ຊໂຣ.

໑໑໕໑. ‘‘ຣຸກ຺ຂມູລິກາ ສາຕຕິກາ, ອຸຎ຺ຉາປຕ຺ຕາຄເຕ ຣຕາ;

ທາເລມຸ ມຈ຺ຈຸໂນ ເສນໍ, ອຊ຺ຌຕ຺ຕໍ ສຸສມາຫິຕາ.

໑໑໕໒. ‘‘ຣຸກ຺ຂມູລິກາ ສາຕຕິກາ, ອຸຎ຺ຉາປຕ຺ຕາຄເຕ ຣຕາ;

ຘຸນາມ ມຈ຺ຈຸໂນ ເສນໍ, ນຬາຄາຣໍວ ກຸຎ຺ຊໂຣ.

໑໑໕໓. ‘‘ອຏ຺ຐິກງ຺ກລກຸຏິເກ, ມໍສນ຺ຫາຣຸປສິພ຺ພິເຕ;

ຘິຣຕ຺ຖຸ ປຸເຣ ທຸຄ຺ຄນ຺ເຘ, ປຣຄຕ຺ເຕ ມມາຍເສ.

໑໑໕໔. ‘‘ຄູຖຠສ຺ເຕ ຕໂຈນທ຺ເຘ, ອຸຣຄຓ຺ຑິປິສາຈິນິ;

ນວ ໂສຕານິ ເຕ ກາເຍ, ຍານິ ສນ຺ທນ຺ຕິ ສພ຺ພທາ.

໑໑໕໕. ‘‘ຕວ ສຣີຣໍ ນວໂສຕໍ, ທຸຄ຺ຄນ຺ຘກຣໍ ປຣິພນ຺ຘໍ;

ຠິກ຺ຂຸ ປຣິວຊ຺ຊຍເຕ ຕໍ, ມີຬ຺ຫໍ ຈ ຍຖາ ສຸຈິກາໂມ.

໑໑໕໖. ‘‘ເອວຎ຺ເຈ ຕໍ ຊໂນ ຊຎ຺ຎາ, ຍຖາ ຊານາມິ ຕໍ ອຫໍ;

ອາຣກາ ປຣິວຊ຺ເຊຍ຺ຍ, ຄູຖຏ຺ຐານໍວ ປາວຸເສ’’.

໑໑໕໗. ‘‘ເອວເມຕໍ ມຫາວີຣ, ຍຖາ ສມຓ ຠາສສິ;

ເອຕ຺ຖ ເຈເກ ວິສີທນ຺ຕິ, ປງ຺ກມ຺ຫິວ ຊຣຄ຺ຄໂວ.

໑໑໕໘. ‘‘ອາກາສມ຺ຫິ ຫລິທ຺ທິຍາ, ໂຍ ມຎ຺ເຎຖ ຣເຊຕເວ;

ອຎ຺ເຎນ ວາປິ ຣງ຺ເຄນ, ວິຆາຕຸທຍເມວ ຕໍ.

໑໑໕໙. ‘‘ຕທາກາສສມໍ ຈິຕ຺ຕໍ, ອຊ຺ຌຕ຺ຕໍ ສຸສມາຫິຕໍ;

ມາ ປາປຈິຕ຺ເຕ ອາສາທິ, ອຄ຺ຄິຂນ຺ຘໍວ ປກ຺ຂິມາ.

໑໑໖໐. ‘‘ປສ຺ສ ຈິຕ຺ຕກຕໍ ພິມ຺ພໍ, ອຣຸກາຍໍ ສມຸສ຺ສິຕໍ;

ອາຕຸຣໍ ພຫຸສງ຺ກປ຺ປໍ, ຍສ຺ສ ນຕ຺ຖິ ຘຸວໍ ຐິຕິ.

໑໑໖໑. ‘‘ປສ຺ສ ຈິຕ຺ຕກຕໍ ຣູປໍ, ມຓິນາ ກຸຓ຺ຑເລນ ຈ;

ອຏ຺ຐິໍ ຕເຈນ ໂອນທ຺ຘໍ, ສຫ ວຕ຺ເຖຫິ ໂສຠຕິ.

໑໑໖໒. ‘‘ອລຕ຺ຕກກຕາ ປາທາ, ມຸຂໍ ຈຸຓ຺ຓກມກ຺ຂິຕໍ;

ອລໍ ພາລສ຺ສ ໂມຫາຍ, ໂນ ຈ ປາຣຄເວສິໂນ.

໑໑໖໓. ‘‘ອຏ຺ຐປທກຕາ ເກສາ, ເນຕ຺ຕາ ອຎ຺ຊນມກ຺ຂິຕາ;

ອລໍ ພາລສ຺ສ ໂມຫາຍ, ໂນ ຈ ປາຣຄເວສິໂນ.

໑໑໖໔. ‘‘ອຎ຺ຊນີວ ນວາ ຈິຕ຺ຕາ, ປູຕິກາໂຍ ອລງ຺ກໂຕ;

ອລໍ ພາລສ຺ສ ໂມຫາຍ, ໂນ ຈ ປາຣຄເວສິໂນ.

໑໑໖໕. ‘‘ໂອທຫິ ມິຄໂວ ປາສໍ, ນາສທາ ວາຄຸຣໍ ມິໂຄ;

ຠຸຕ຺ວາ ນິວາປໍ ຄຈ຺ຉາມ, ກທ຺ທນ຺ເຕ ມິຄພນ຺ຘເກ.

໑໑໖໖. ‘‘ຉິນ຺ໂນ ປາໂສ ມິຄວສ຺ສ, ນາສທາ ວາຄຸຣໍ ມິໂຄ;

ຠຸຕ຺ວາ ນິວາປໍ ຄຈ຺ຉາມ, ໂສຈນ຺ເຕ ມິຄລຸທ຺ທເກ.

໑໑໖໗. ‘‘ຕທາສິ ຍໍ ຠິໍສນກໍ, ຕທາສິ ໂລມຫໍສນໍ;

ອເນກາກາຣສມ຺ປນ຺ເນ, ສາຣິປຸຕ຺ຕມ຺ຫິ ນິພ຺ພຸເຕ.

໑໑໖໘. [ທີ. ນິ. ໒.໒໒໑, ໒໗໒; ສໍ. ນິ. ໑.໑໘໖; ໒.໑໔໓; ອປ. ເຖຣ ໑.໒.໑໑໕; ຊາ. ໑.໑.໙໕] ‘‘ອນິຈ຺ຈາ ວຕ ສງ຺ຂາຣາ ອຸປ຺ປາທວຍ ຘມ຺ມິໂນ.

ອຸປຊ຺ຊິຕ຺ວາ ນິຣຸຊ຺ຌນ຺ຕິ, ເຕສໍ ວູປສໂມ ສຸໂຂ.

໑໑໖໙. ‘‘ສຸຂຸມໍ ເຕ ປຏິວິຊ຺ຌນ຺ຕິ, ວາລຄ຺ຄໍ ອຸສຸນາ ຍຖາ;

ເຍ ປຎ຺ຈກ຺ຂນ຺ເຘ ປສ຺ສນ຺ຕິ, ປຣໂຕ ໂນ ຈ ອຕ຺ຕໂຕ.

໑໑໗໐. ‘‘ເຍ ຈ ປສ຺ສນ຺ຕິ ສງ຺ຂາເຣ, ປຣໂຕ ໂນ ຈ ອຕ຺ຕໂຕ;

ປຈ຺ຈພ຺ຍາຘິໍສຸ ນິປຸຓໍ, ວາລຄ຺ຄໍ ອຸສຸນາ ຍຖາ.

໑໑໗໑. [ສໍ. ນິ. ໑.໒໑, ໙໗] ‘‘ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ;

ກາມຣາຄປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ.

໑໑໗໒. [ສໍ. ນິ. ໑.໒໑, ໙໗]‘‘ສຕ຺ຕິຍາ ວິຍ ໂອມຏ຺ໂຐ, ຑຍ຺ຫມາໂນວ ມຕ຺ຖເກ;

ຠວຣາຄປ຺ປຫານາຍ, ສໂຕ ຠິກ຺ຂຸ ປຣິພ຺ພເຊ’’.

໑໑໗໓. ‘‘ໂຈທິໂຕ ຠາວິຕຕ຺ເຕນ, ສຣີຣນ຺ຕິມຘາຣິນາ;

ມິຄາຣມາຕຸປາສາທໍ, ປາທງ຺ຄຸຏ຺ເຐນ ກມ຺ປຍິໍ.

໑໑໗໔. ‘‘ນຍິທໍ ສິຖິລມາຣພ຺ຠ, ນຍິທໍ ອປ຺ເປນ ຖາມສາ;

ນິພ຺ພານມຘິຄນ຺ຕພ຺ພໍ, ສພ຺ພຄນ຺ຖ-ປໂມຈນໍ.

໑໑໗໕. ‘‘ອຍຎ຺ຈ ທຫໂຣ ຠິກ຺ຂຸ, ອຍມຸຕ຺ຕມໂປຣິໂສ;

ຘາເຣຕິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫິນິໍ [ສວາຫນໍ (ກ.)].

໑໑໗໖. ‘‘ວິວຣມນຸປຠນ຺ຕິ ວິຊ຺ຊຸຕາ, ເວຠາຣສ຺ສ ຈ ປຓ຺ຑວສ຺ສ ຈ;

ນຄວິວຣຄໂຕ ຌາຍຕິ, ປຸຕ຺ໂຕ ອປ຺ປຏິມສ຺ສ ຕາທິໂນ.

໑໑໗໗. ‘‘ອຸປສນ຺ໂຕ ອຸປຣໂຕ, ປນ຺ຕເສນາສໂນ ມຸນິ;

ທາຍາໂທ ພຸທ຺ຘເສຏ຺ຐສ຺ສ, ພ຺ຣຫ຺ມຸນາ ອຠິວນ຺ທິໂຕ.

໑໑໗໘. ‘‘ອຸປສນ຺ຕໍ ອຸປຣຕໍ, ປນ຺ຕເສນາສນໍ ມຸນິໍ;

ທາຍາທໍ ພຸທ຺ຘເສຏ຺ຐສ຺ສ, ວນ຺ທ ພ຺ຣາຫ຺ມຓ ກສ຺ສປໍ.

໑໑໗໙. ‘‘ໂຍ ຈ ຊາຕິສຕໍ ຄຈ຺ເຉ, ສພ຺ພາ ພ຺ຣາຫ຺ມຓຊາຕິໂຍ;

ໂສຕ຺ຕິໂຍ ເວທສມ຺ປນ຺ໂນ, ມນຸສ຺ເສສຸ ປຸນປ຺ປຸນໍ.

໑໑໘໐. ‘‘ອຊ຺ຌາຍໂກປິ ເຈ ອສ຺ສ, ຕິຓ຺ຓໍ ເວທານ ປາຣຄູ;

ເອຕສ຺ສ ວນ຺ທນາເຍຕໍ, ກລໍ ນາຄ຺ຆຕິ ໂສຬສິໍ.

໑໑໘໑. ‘‘ໂຍ ໂສ ອຏ຺ຐ ວິໂມກ຺ຂານິ, ປຸເຣຠຕ຺ຕໍ ອຜສ຺ສຍິ [ອປສ຺ສຍິ (ສີ. ກ.), ອຜຸສ຺ສຍິ (ສ຺ຍາ.)];

ອນຸໂລມໍ ປຏິໂລມໍ, ຕໂຕ ປິຓ຺ຑາຍ ຄຈ຺ຉຕິ.

໑໑໘໒. ‘‘ຕາທິສໍ ຠິກ຺ຂຸໍ ມາສາທິ [ມາ ຫນິ (ສີ.)], ມາຕ຺ຕານໍ ຂຓິ ພ຺ຣາຫ຺ມຓ;

ອຠິປ຺ປສາເທຫິ ມນໍ, ອຣຫນ຺ຕມ຺ຫິ ຕາທິເນ;

ຂິປ຺ປໍ ປຎ຺ຊລິໂກ ວນ຺ທ, ມາ ເຕ ວິຊຏິ ມຕ຺ຖກໍ.

໑໑໘໓. ‘‘ເນໂສ ປສ຺ສຕິ ສທ຺ຘມ຺ມໍ, ສໍສາເຣນ ປຸຣກ຺ຂໂຕ;

ອໂຘຄມໍ ຊິມ຺ຫປຖໍ, ກຸມ຺ມຄ຺ຄມນຸຘາວຕິ.

໑໑໘໔. ‘‘ກິມີວ ມີຬ຺ຫສລ຺ລິຕ຺ໂຕ, ສງ຺ຂາເຣ ອຘິມຸຈ຺ຉິໂຕ;

ປຄາຬ຺ໂຫ ລາຠສກ຺ກາເຣ, ຕຸຈ຺ໂຉ ຄຈ຺ຉຕິ ໂປຏ຺ຐິໂລ.

໑໑໘໕. ‘‘ອິມຎ຺ຈ ປສ຺ສ ອາຍນ຺ຕໍ, ສາຣິປຸຕ຺ຕໍ ສຸທສ຺ສນໍ;

ວິມຸຕ຺ຕໍ ອຸຠໂຕຠາເຄ, ອຊ຺ຌຕ຺ຕໍ ສຸສມາຫິຕໍ.

໑໑໘໖. ‘‘ວິສລ຺ລໍ ຂີຓສໍໂຍຄໍ, ເຕວິຊ຺ຊໍ ມຈ຺ຈຸຫາຍິນໍ;

ທກ຺ຂິເຓຍ຺ຍໍ ມນຸສ຺ສານໍ, ປຸຎ຺ຎກ຺ເຂຕ຺ຕໍ ອນຸຕ຺ຕຣໍ.

໑໑໘໗. ‘‘ເອເຕ ສມ຺ພຫຸລາ ເທວາ, ອິທ຺ຘິມນ຺ໂຕ ຍສສ຺ສິໂນ;

ທສ ເທວສຫສ຺ສານິ, ສພ຺ເພ ພ຺ຣຫ຺ມປຸໂຣຫິຕາ;

ໂມຄ຺ຄລ຺ລານໍ ນມສ຺ສນ຺ຕາ, ຕິຏ຺ຐນ຺ຕິ ປຎ຺ຊລີກຕາ.

໑໑໘໘. ‘‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ຍສ຺ສ ເຕ ອາສວາ ຂີຓາ, ທກ຺ຂິເຓຍ຺ໂຍສິ ມາຣິສ’.

໑໑໘໙. ‘‘ປູຊິໂຕ ນຣເທເວນ, ອຸປ຺ປນ຺ໂນ ມຣຓາຠິຠູ;

ປຸຓ຺ຑຣີກໍວ ໂຕເຍນ, ສງ຺ຂາເຣນຸປລິປ຺ປຕິ.

໑໑໙໐. ‘‘ຍສ຺ສ ມຸຫຸຕ຺ເຕນ ສຫສ຺ສຘາ ໂລໂກ, ສໍວິທິໂຕ ສພ຺ຣຫ຺ມກປ຺ໂປ ວສິ;

ອິທ຺ຘິຄຸເຓ ຈຸຕຸປປາເຕ ກາເລ, ປສ຺ສຕິ ເທວຕາ ສ ຠິກ຺ຂຸ.

໑໑໙໑. ‘‘ສາຣິປຸຕ຺ໂຕວ ປຎ຺ຎາຍ, ສີເລນ ອຸປສເມນ ຈ;

ໂຍປິ ປາຣງ຺ຄໂຕ ຠິກ຺ຂຸ, ເອຕາວປຣໂມ ສິຍາ.

໑໑໙໒. ‘‘ໂກຏິສຕສຫສ຺ສສ຺ສ, ອຕ຺ຕຠາວໍ ຂເຓນ ນິມ຺ມິເນ;

ອຫໍ ວິກຸພ຺ພນາສຸ ກຸສໂລ, ວສີຠູໂຕມ຺ຫິ ອິທ຺ຘິຍາ.

໑໑໙໓. ‘‘ສມາຘິວິຊ຺ຊາວສິປາຣມີຄໂຕ, ໂມຄ຺ຄລ຺ລານໂຄຕ຺ໂຕ ອສິຕສ຺ສ ສາສເນ;

ຘີໂຣ ສມຸຈ຺ຉິນ຺ທິ ສມາຫິຕິນ຺ທ຺ຣິໂຍ, ນາໂຄ ຍຖາ ປູຕິລຕໍວ ພນ຺ຘນໍ.

໑໑໙໔. ‘‘ປຣິຈິຓ຺ໂຓ ມຍາ ສຕ຺ຖາ, ກຕໍ ພຸທ຺ຘສ຺ສ ສາສນໍ;

ໂອຫິໂຕ ຄຣຸໂກ ຠາໂຣ, ຠວເນຕ຺ຕິ ສມູຫຕາ.

໑໑໙໕. ‘‘ຍສ຺ສ ຈຕ຺ຖາຍ ປພ຺ພຊິໂຕ, ອຄາຣສ຺ມານຄາຣິຍໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໑໑໙໖. [ມ. ນິ. ໑.໕໑໓] ‘‘ກີທິໂສ ນິຣໂຍ ອາສິ, ຍຕ຺ຖ ທຸສ຺ສີ ອປຈ຺ຈຖ;

ວິຘຸຣໍ ສາວກມາສຊ຺ຊ, ກກຸສນ຺ຘຎ຺ຈ ພ຺ຣາຫ຺ມຓໍ.

໑໑໙໗. ‘‘ສຕໍ ອາສິ ອໂຍສງ຺ກູ, ສພ຺ເພ ປຈ຺ຈຕ຺ຕເວທນາ;

ອີທິໂສ ນິຣໂຍ ອາສິ, ຍຕ຺ຖ ທຸສ຺ສີ ອປຈ຺ຈຖ;

ວິຘຸຣໍ ສາວກມາສຊ຺ຊ, ກກຸສນ຺ຘຎ຺ຈ ພ຺ຣາຫ຺ມຓໍ.

໑໑໙໘. ‘‘ໂຍ ເອຕມຠິຊານາຕິ, ຠິກ຺ຂຸ ພຸທ຺ຘສ຺ສ ສາວໂກ;

ຕາທິສໍ ຠິກ຺ຂຸມາສຊ຺ຊ, ກຓ຺ຫ ທຸກ຺ຂໍ ນິຄຈ຺ຉສິ.

໑໑໙໙. ‘‘ມຊ຺ເຌສຣສ຺ມິໍ [ສຣສ຺ສ (ສີ.), ສາຄຣສ຺ມິໍ (ກ.)] ຕິຏ຺ຐນ຺ຕິ, ວິມານາ ກປ຺ປຐາຍິໂນ;

ເວຬຸຣິຍວຓ຺ຓາ ຣຸຈິຣາ, ອຈ຺ຈິມນ຺ໂຕ ປຠສ຺ສຣາ;

ອຈ຺ຉຣາ ຕຕ຺ຖ ນຈ຺ຈນ຺ຕິ, ປຸຖຸ ນານຕ຺ຕວຓ຺ຓິໂຍ.

໑໒໐໐. ‘‘ໂຍ ເອຕມຠິຊານາຕິ…ເປ… ກຓ຺ຫ ທຸກ຺ຂໍ ນິຄຈ຺ຉສິ.

໑໒໐໑. ‘‘ໂຍ ເວ ພຸທ຺ເຘນ ໂຈທິໂຕ, ຠິກ຺ຂຸສງ຺ຆສ຺ສ ເປກ຺ຂໂຕ;

ມິຄາຣມາຕຸປາສາທໍ, ປາທງ຺ຄຸຏ຺ເຐນ ກມ຺ປຍິ.

໑໒໐໒. ‘‘ໂຍ ເອຕມຠິຊານາຕິ…ເປ… ກຓ຺ຫ ທຸກ຺ຂໍ ນິຄຈ຺ຉສິ.

໑໒໐໓. ‘‘ໂຍ ເວຊຍນ຺ຕປາສາທໍ, ປາທງ຺ຄຸຏ຺ເຐນ ກມ຺ປຍິ;

ອິທ຺ຘິພເລນຸປຕ຺ຖທ຺ໂຘ, ສໍເວເຊສິ ຈ ເທວຕາ.

໑໒໐໔. ‘‘ໂຍ ເອຕມຠິຊານາຕິ…ເປ… ກຓ຺ຫ ທຸກ຺ຂໍ ນິຄຈ຺ຉສິ.

໑໒໐໕. ‘‘ໂຍ ເວຊຍນ຺ຕປາສາເທ, ສກ຺ກໍ ໂສ ປຣິປຸຈ຺ຉຕິ;

ອປິ ອາວຸໂສ ຊານາສິ, ຕຓ຺ຫກ຺ຂຍວິມຸຕ຺ຕິໂຍ;

ຕສ຺ສ ສກ຺ໂກ ວິຍາກາສິ, ປຎ຺ຫໍ ປຸຏ຺ໂຐ ຍຖາຕຖໍ.

໑໒໐໖. ‘‘ໂຍ ເອຕມຠິຊານາຕິ…ເປ… ກຓ຺ຫ ທຸກ຺ຂໍ ນິຄຈ຺ຉສິ.

໑໒໐໗. ‘‘ໂຍ ພ຺ຣຫ຺ມານໍ ປຣິປຸຈ຺ຉຕິ, ສຸຘມ຺ມາຍໍ ຐິໂຕ [ສຸຘມ຺ມາຍາ’ຠິໂຕ (ສ຺ຍາ.)] ສຠໍ;

ອຊ຺ຊາປິ ຕ຺ຍາວຸໂສ ສາ ທິຏ຺ຐິ, ຍາ ເຕ ທິຏ຺ຐິ ປຸເຣ ອຫຸ;

ປສ຺ສສິ ວີຕິວຕ຺ຕນ຺ຕໍ, ພ຺ຣຫ຺ມໂລເກ ປຠສ຺ສຣໍ.

໑໒໐໘. ‘‘ຕສ຺ສ ພ຺ຣຫ຺ມາ ວິຍາກາສິ, ປຎ຺ຫໍ ປຸຏ຺ໂຐ ຍຖາຕຖໍ;

ນ ເມ ມາຣິສ ສາ ທິຏ຺ຐິ, ຍາ ເມ ທິຏ຺ຐິ ປຸເຣ ອຫຸ.

໑໒໐໙. ‘‘ປສ຺ສາມິ ວີຕິວຕ຺ຕນ຺ຕໍ, ພ຺ຣຫ຺ມໂລເກ ປຠສ຺ສຣໍ;

ໂສຫໍ ອຊ຺ຊ ກຖໍ ວຊ຺ຊໍ, ອຫໍ ນິຈ຺ໂຈມ຺ຫິ ສສ຺ສໂຕ.

໑໒໑໐. ‘‘ໂຍ ເອຕມຠິຊານາຕິ…ເປ… ກຓ຺ຫ ທຸກ຺ຂໍ ນິຄຈ຺ຉສິ.

໑໒໑໑. ‘‘ໂຍ ມຫາເນຣຸໂນ ກູຏໍ, ວິໂມກ຺ເຂນ ອຜສ຺ສຍິ [ອປສ຺ສຍິ (ສີ. ກ.)];

ວນໍ ປຸພ຺ພວິເທຫານໍ, ເຍ ຈ ຠູມິສຍາ ນຣາ.

໑໒໑໒. ‘‘ໂຍ ເອຕມຠິຊານາຕິ, ຠິກ຺ຂຸ ພຸທ຺ຘສ຺ສ ສາວໂກ;

ຕາທິສໍ ຠິກ຺ຂຸມາສຊ຺ຊ, ກຓ຺ຫ ທຸກ຺ຂໍ ນິຄຈ຺ຉສິ.

໑໒໑໓. ‘‘ນ ເວ ອຄ຺ຄິ ເຈຕຍຕິ, ອຫໍ ພາລໍ ຑຫາມີຕິ;

ພາໂລວ ຊລິຕໍ ອຄ຺ຄິໍ, ອາສຊ຺ຊ ນໍ ປຑຍ຺ຫຕິ.

໑໒໑໔. ‘‘ເອວເມວ ຕຸວໍ ມາຣ, ອາສຊ຺ຊ ນໍ ຕຖາຄຕໍ;

ສຍໍ ຑຫິສ຺ສສິ ອຕ຺ຕານໍ, ພາໂລ ອຄ຺ຄິໍວ ສມ຺ຜຸສໍ.

໑໒໑໕. ‘‘ອປຸຎ຺ຎໍ ປສວີ ມາໂຣ, ອາສຊ຺ຊ ນໍ ຕຖາຄຕໍ;

ກິໍ ນຸ ມຎ຺ຎສິ ປາປິມ, ນ ເມ ປາປໍ ວິປຈ຺ຈຕິ.

໑໒໑໖. ‘‘ກຣໂຕ ເຕ ຈີຍເຕ [ມິຍ຺ຍເຕ (ສພ຺ພຕ຺ຖ) ມ. ນິ. ໑.໕໑໓ ປສ຺ສິຕພ຺ພໍ] ປາປໍ, ຈິຣຣຕ຺ຕາຍ ອນ຺ຕກ;

ມາຣ ນິພ຺ພິນ຺ທ ພຸທ຺ຘມ຺ຫາ, ອາສໍ ມາກາສິ ຠິກ຺ຂຸສຸ.

໑໒໑໗. ‘‘ອິຕິ ມາຣໍ ອຕຊ຺ເຊສິ, ຠິກ຺ຂຸ ເຠສກຬາວເນ;

ຕໂຕ ໂສ ທຸມ຺ມໂນ ຍກ຺ໂຂ, ຕຕ຺ເຖວນ຺ຕຣຘາຍຖາ’’ຕິ.

ອິຕ຺ຖໍ ສຸທໍ ອາຍສ຺ມາ ມຫາໂມຄ຺ຄລ຺ລາໂນ [ມຫາໂມຄ຺ຄລາໂນ (ກ.)] ເຖໂຣ ຄາຖາໂຍ ອຠາສິຕ຺ຖາຕິ.

ສຏ຺ຐິນິປາໂຕ ນິຏ຺ຐິໂຕ.