໕. ສສ຺ສຕທິຏ຺ຐິນິທ຺ເທໂສ

໑໓໘. ສກ຺ກາຍວຕ຺ຖຸກາຍ ສສ຺ສຕທິຏ຺ຐິຍາ ກຕເມຫິ ປນ຺ນຣສຫິ ອາກາເຣຫິ ອຠິນິເວໂສ ໂຫຕິ? ອິຘ ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ ຣູປວນ຺ຕໍ ວາ ອຕ຺ຕານໍ ອຕ຺ຕນິ ວາ ຣູປໍ ຣູປສ຺ມິໍ ວາ ອຕ຺ຕານໍ. ເວທນາວນ຺ຕໍ ວາ ອຕ຺ຕານໍ…ເປ… ສຎ຺ຎາວນ຺ຕໍ ວາ ອຕ຺ຕານໍ… ສງ຺ຂາຣວນ຺ຕໍ ວາ ອຕ຺ຕານໍ… ວິຎ຺ຎາຓວນ຺ຕໍ ວາ ອຕ຺ຕານໍ ອຕ຺ຕນິ ວາ ວິຎ຺ຎາຓໍ ວິຎ຺ຎາຓສ຺ມິໍ ວາ ອຕ຺ຕານໍ.

ກຖໍ ຣູປວນ຺ຕໍ ອຕ຺ຕານໍ ສມນຸປສ຺ສຕິ? ອິເຘກຈ຺ໂຈ ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ. ຕສ຺ສ ເອວໍ ໂຫຕິ – ‘‘ອຍໍ ໂຂ ເມ ອຕ຺ຕາ. ໂສ ໂຂ ປນ ເມ ອຍໍ ອຕ຺ຕາ ອິມິນາ ຣູເປນ ຣູປວາ’’ຕິ. ຣູປວນ຺ຕໍ ອຕ຺ຕານໍ ສມນຸປສ຺ສຕິ. ເສຍ຺ຍຖາປິ ຣຸກ຺ໂຂ ຉາຍາສມ຺ປນ຺ໂນ ອສ຺ສ. ຕເມນໍ ປຸຣິໂສ ເອວໍ ວເທຍ຺ຍ – ‘‘ອຍໍ ຣຸກ຺ໂຂ, ອຍໍ ຉາຍາ; ອຎ຺ໂຎ ຣຸກ຺ໂຂ, ອຎ຺ຎາ ຉາຍາ. ໂສ ໂຂ ປນາຍໍ ຣຸກ຺ໂຂ ອິມາຍ ຉາຍາຍ ຉາຍາວາ’’ຕິ. ຉາຍາວນ຺ຕໍ ຣຸກ຺ຂໍ ສມນຸປສ຺ສຕິ. ເອວເມວໍ ອິເຘກຈ຺ໂຈ ເວທນໍ…ເປ… ອຍໍ ປຐມາ ສກ຺ກາຍວຕ຺ຖຸກາ ສສ຺ສຕທິຏ຺ຐິ. ສສ຺ສຕທິຏ຺ຐິ ມິຈ຺ຉາທິຏ຺ຐິ…ເປ… ອິມານິ ສຎ຺ໂຎຊນານິ, ນ ຈ ທິຏ຺ຐິໂຍ. ເອວໍ ຣູປວນ຺ຕໍ ອຕ຺ຕານໍ ສມນຸປສ຺ສຕິ…ເປ… ສກ຺ກາຍວຕ຺ຖຸກາຍ ສສ຺ສຕທິຏ຺ຐິຍາ ອິເມຫິ ປນ຺ນຣສຫິ ອາກາເຣຫິ ອຠິນິເວໂສ ໂຫຕິ.

ສສ຺ສຕທິຏ຺ຐິນິທ຺ເທໂສ ປຎ຺ຈໂມ.