໖. ອຸຈ຺ເຉທທິຏ຺ຐິນິທ຺ເທໂສ

໑໓໙. ສກ຺ກາຍວຕ຺ຖຸກາຍ ອຸຈ຺ເຉທທິຏ຺ຐິຍາ ກຕເມຫິ ປຎ຺ຈຫິ ອາກາເຣຫິ ອຠິນິເວໂສ ໂຫຕິ? ອິຘ ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ ຣູປໍ ອຕ຺ຕໂຕ ສມນຸປສ຺ສຕິ, ເວທນໍ ອຕ຺ຕໂຕ ສມນຸປສ຺ສຕິ, ສຎ຺ຎໍ ອຕ຺ຕໂຕ ສມນຸປສ຺ສຕິ, ສງ຺ຂາເຣ ອຕ຺ຕໂຕ ສມນຸປສ຺ສຕິ, ວິຎ຺ຎາຓໍ ອຕ຺ຕໂຕ ສມນຸປສ຺ສຕິ.

ກຖໍ ຣູປໍ ອຕ຺ຕໂຕ ສມນຸປສ຺ສຕິ? ອິເຘກຈ຺ໂຈ ປຖວີກສິຓໍ…ເປ… ໂອທາຕກສິຓໍ ອຕ຺ຕໂຕ ສມນຸປສ຺ສຕິ. ‘‘ຍໍ ໂອທາຕກສິຓໍ, ໂສ ອຫໍ; ໂຍ ອຫໍ, ຕໍ ໂອທາຕກສິຓ’’ນ຺ຕິ – ໂອທາຕກສິຓຎ຺ຈ ອຕ຺ຕຎ຺ຈ ອທ຺ວຍໍ ສມນຸປສ຺ສຕິ. ເສຍ຺ຍຖາປິ ເຕລປ຺ປທີປສ຺ສ ຌາຍໂຕ…ເປ… ອຍໍ ປຐມາ ສກ຺ກາຍວຕ຺ຖຸກາ ອຸຈ຺ເຉທທິຏ຺ຐິ. ອຸຈ຺ເຉທທິຏ຺ຐິ ມິຈ຺ຉາທິຏ຺ຐິ…ເປ… ອິມານິ ສຎ຺ໂຎຊນານິ, ນ ຈ ທິຏ຺ຐິໂຍ. ເອວໍ ຣູປໍ ອຕ຺ຕໂຕ ສມນຸປສ຺ສຕິ…ເປ… ສກ຺ກາຍວຕ຺ຖຸກາຍ ອຸຈ຺ເຉທທິຏ຺ຐິຍາ ອິເມຫິ ປຎ຺ຈຫິ ອາກາເຣຫິ ອຠິນິເວໂສ ໂຫຕິ.

ອຸຈ຺ເຉທທິຏ຺ຐິນິທ຺ເທໂສ ຉຏ຺ໂຐ.