໑໓. ອຕ຺ຕວາທປຏິສໍຍຸຕ຺ຕທິຏ຺ຐິນິທ຺ເທໂສ

໑໔໖. ອຕ຺ຕວາທປຏິສໍຍຸຕ຺ຕາຍ ທິຏ຺ຐິຍາ ກຕເມຫິ ວີສຕິຍາ ອາກາເຣຫິ ອຠິນິເວໂສ ໂຫຕິ? ອິຘ ອສ຺ສຸຕວາ ປຸຖຸຊ຺ຊໂນ ອຣິຍານໍ ອທສ຺ສາວີ ອຣິຍຘມ຺ມສ຺ສ ອໂກວິໂທ ອຣິຍຘມ຺ເມ ອວິນີໂຕ ສປ຺ປຸຣິສານໍ ອທສ຺ສາວີ ສປ຺ປຸຣິສຘມ຺ມສ຺ສ ອໂກວິໂທ ສປ຺ປຸຣິສຘມ຺ເມ ອວິນີໂຕ ຣູປໍ ອຕ຺ຕໂຕ ສມນຸປສ຺ສຕິ ຣູປວນ຺ຕໍ ວາ ອຕ຺ຕານໍ ອຕ຺ຕນິ ວາ ຣູປໍ ຣູປສ຺ມິໍ ວາ ອຕ຺ຕານໍ…ເປ… ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ອຕ຺ຕໂຕ ສມນຸປສ຺ສຕິ ວິຎ຺ຎາຓວນ຺ຕໍ ວາ ອຕ຺ຕານໍ ອຕ຺ຕນິ ວາ ວິຎ຺ຎາຓໍ ວິຎ຺ຎາຓສ຺ມິໍ ວາ ອຕ຺ຕານໍ…ເປ….

ກຖໍ ຣູປໍ ອຕ຺ຕໂຕ ສມນຸປສ຺ສຕິ? ອິເຘກຈ຺ໂຈ ປຖວີກສິຓໍ…ເປ… ໂອທາຕກສິຓໍ ອຕ຺ຕໂຕ ສມນຸປສ຺ສຕິ. ‘‘ຍໍ ໂອທາຕກສິຓໍ, ໂສ ອຫໍ; ໂຍ ອຫໍ, ຕໍ ໂອທາຕກສິຓ’’ນ຺ຕິ – ໂອທາຕກສິຓຎ຺ຈ ອຕ຺ຕຎ຺ຈ ອທ຺ວຍໍ ສມນຸປສ຺ສຕິ. ເສຍ຺ຍຖາປິ ເຕລປ຺ປທີປສ຺ສ ຌາຍໂຕ ‘‘ຍາ ອຈ຺ຈິ, ໂສ ວຓ຺ໂຓ; ໂຍ ວຓ຺ໂຓ, ສາ ອຈ຺ຈີ’’ຕິ – ອຈ຺ຈິຎ຺ຈ ວຓ຺ຓຎ຺ຈ ອທ຺ວຍໍ ສມນຸປສ຺ສຕິ. ເອວເມວໍ ອິເຘກຈ຺ໂຈ ໂອທາຕກສິຓໍ ອຕ຺ຕໂຕ ສມນຸປສ຺ສຕິ…ເປ… ອຍໍ ປຐມາ ຣູປວຕ຺ຖຸກາ ອຕ຺ຕວາທປຏິສໍຍຸຕ຺ຕາ ທິຏ຺ຐິ. ອຕ຺ຕວາທປຏິສໍຍຸຕ຺ຕາ ທິຏ຺ຐິ ມິຈ຺ຉາທິຏ຺ຐິ…ເປ… ອິມານິ ສຎ຺ໂຎຊນານິ, ນ ຈ ທິຏ຺ຐິໂຍ. ເອວໍ ຣູປໍ ອຕ຺ຕໂຕ ສມນຸປສ຺ສຕິ…ເປ… ອຕ຺ຕວາທປຏິສໍຍຸຕ຺ຕາຍ ທິຏ຺ຐິຍາ ອິເມຫິ ວີສຕິຍາ ອາກາເຣຫິ ອຠິນິເວໂສ ໂຫຕິ.

ອຕ຺ຕວາທປຏິສໍຍຸຕ຺ຕທິຏ຺ຐິນິທ຺ເທໂສ ເຕຣສໂມ.