໑. ອສ຺ສາທທິຏ຺ຐິນິທ຺ເທໂສ

໑໒໘. ອສ຺ສາທທິຏ຺ຐິຍາ ກຕເມຫິ ປຎ຺ຈຕິໍສາຍ ອາກາເຣຫິ ອຠິນິເວໂສ ໂຫຕິ? ຍໍ ຣູປໍ ປຏິຈ຺ຈ ອຸປ຺ປຊ຺ຊຕິ ສຸຂໍ ໂສມນສ຺ສໍ, ອຍໍ ຣູປສ຺ສ ອສ຺ສາໂທຕິ – ອຠິນິເວສປຣາມາໂສ ທິຏ຺ຐິ. ທິຏ຺ຐິ ນ ອສ຺ສາໂທ, ອສ຺ສາໂທ ນ ທິຏ຺ຐິ. ອຎ຺ຎາ ທິຏ຺ຐິ, ອຎ຺ໂຎ ອສ຺ສາໂທ. ຍາ ຈ ທິຏ຺ຐິ ໂຍ ຈ ອສ຺ສາໂທ – ອຍໍ ວຸຈ຺ຈຕິ ອສ຺ສາທທິຏ຺ຐິ.

ອສ຺ສາທທິຏ຺ຐິ ມິຈ຺ຉາທິຏ຺ຐິ ທິຏ຺ຐິວິປຕ຺ຕິ. ຕາຍ ທິຏ຺ຐິວິປຕ຺ຕິຍາ ສມນ຺ນາຄໂຕ ປຸຄ຺ຄໂລ ທິຏ຺ຐິວິປນ຺ໂນ. ທິຏ຺ຐິວິປນ຺ໂນ ປຸຄ຺ຄໂລ ນ ເສວິຕພ຺ໂພ ນ ຠຊິຕພ຺ໂພ ນ ປຍິຣຸປາສິຕພ຺ໂພ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ. ໂຍ ທິຏ຺ຐິຍາ ຣາໂຄ [ຍາ ທິຏ຺ຐິ ໂຍ ຣາໂຄ (ສ຺ຍາ.)], ໂສ ນ ທິຏ຺ຐິ. ທິຏ຺ຐິ ນ ຣາໂຄ. ອຎ຺ຎາ ທິຏ຺ຐິ, ອຎ຺ໂຎ ຣາໂຄ. ຍາ ຈ ທິຏ຺ຐິ ໂຍ ຈ ຣາໂຄ – ອຍໍ ວຸຈ຺ຈຕິ ທິຏ຺ຐິຣາໂຄ. ຕາຍ ຈ ທິຏ຺ຐິຍາ ເຕນ ຈ ຣາເຄນ ສມນ຺ນາຄໂຕ ປຸຄ຺ຄໂລ ທິຏ຺ຐິຣາຄຣຕ຺ໂຕ. ທິຏ຺ຐິຣາຄຣຕ຺ເຕ ປຸຄ຺ຄເລ ທິນ຺ນໍ ທານໍ ນ ມຫປ຺ຜລໍ ໂຫຕິ ນ ມຫານິສໍສໍ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ ອສ຺ສາທທິຏ຺ຐິ ມິຈ຺ຉາທິຏ຺ຐິ.

ມິຈ຺ຉາທິຏ຺ຐິກສ຺ສ ປຸຣິສປຸຄ຺ຄລສ຺ສ ທ຺ເວວ ຄຕິໂຍ – ນິຣໂຍ ວາ ຕິຣຈ຺ຉານໂຍນິ ວາ. ມິຈ຺ຉາທິຏ຺ຐິກສ຺ສ ປຸຣິສປຸຄ຺ຄລສ຺ສ ຍຎ຺ເຈວ ກາຍກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ, ຍຎ຺ຈ ວຈີກມ຺ມໍ…ເປ… ຍຎ຺ຈ ມໂນກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ, ຍາ ຈ ເຈຕນາ ຍາ ຈ ປຕ຺ຖນາ ໂຍ ຈ ປຓິຘິ ເຍ ຈ ສງ຺ຂາຣາ, ສພ຺ເພ ເຕ ຘມ຺ມາ ອນິຏ຺ຐາຍ ອກນ຺ຕາຍ ອມນາປາຍ ອຫິຕາຍ ທຸກ຺ຂາຍ ສໍວຕ຺ຕນ຺ຕິ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ. ເສຍ຺ຍຖາປິ ນິມ຺ພພີຊໍ ວາ ໂກສາຕກີພີຊໍ ວາ ຕິຕ຺ຕກາລາພຸພີຊໍ ວາ ອລ຺ລາຍ ປຖວິຍາ ນິກ຺ຂິຕ຺ຕໍ ຍໍ ເຈວ ປຖວິຣສໍ ອຸປາທິຍຕິ, ຍຎ຺ຈ ອາໂປຣສໍ ອຸປາທິຍຕິ, ສພ຺ພໍ ຕໍ ຕິຕ຺ຕກຕ຺ຕາຍ ກຏຸກຕ຺ຕາຍ ອສາຕຕ຺ຕາຍ [ອສາຣຕາຍ (ສ຺ຍາ.)] ສໍວຕ຺ຕຕິ. ຕໍ ກິສ຺ສ ເຫຕຸ? ພີຊໍ ຫິສ຺ສ ປາປິກໍ. ເອວເມວໍ ມິຈ຺ຉາທິຏ຺ຐິກສ຺ສ ປຸຣິສປຸຄ຺ຄລສ຺ສ ຍຎ຺ເຈວ ກາຍກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ, ຍຎ຺ຈ ວຈີກມ຺ມໍ…ເປ… ຍຎ຺ຈ ມໂນກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ, ຍາ ຈ ເຈຕນາ ຍາ ຈ ປຕ຺ຖນາ ໂຍ ຈ ປຓິຘິ ເຍ ຈ ສງ຺ຂາຣາ, ສພ຺ເພ ເຕ ຘມ຺ມາ ອນິຏ຺ຐາຍ ອກນ຺ຕາຍ ອມນາປາຍ ອຫິຕາຍ ທຸກ຺ຂາຍ ສໍວຕ຺ຕນ຺ຕິ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ ອສ຺ສາທທິຏ຺ຐິ ມິຈ຺ຉາທິຏ຺ຐິ.

ມິຈ຺ຉາທິຏ຺ຐິ ທິຏ຺ຐິຄຕໍ, ທິຏ຺ຐິຄຫນໍ, ທິຏ຺ຐິກນ຺ຕາຣໍ, ທິຏ຺ຐິວິສູກໍ, ທິຏ຺ຐິວິປ຺ຜນ຺ທິຕໍ, ທິຏ຺ຐິສຎ຺ໂຎຊນໍ, ທິຏ຺ຐິສລ຺ລໍ, ທິຏ຺ຐິສມ຺ພາໂຘ, ທິຏ຺ຐິປລິໂພໂຘ, ທິຏ຺ຐິພນ຺ຘນໍ, ທິຏ຺ຐິປປາໂຕ, ທິຏ຺ຐານຸສໂຍ, ທິຏ຺ຐິສນ຺ຕາໂປ, ທິຏ຺ຐິປຣິຬາໂຫ, ທິຏ຺ຐິຄນ຺ໂຖ, ທິຏ຺ຐຸປາທານໍ, ທິຏ຺ຐາຠິນິເວໂສ, ທິຏ຺ຐິປຣາມາໂສ – ອິເມຫິ ອຏ຺ຐາຣສຫິ ອາກາເຣຫິ ປຣິຍຸຏ຺ຐິຕຈິຕ຺ຕສ຺ສ ສຎ຺ໂຎໂຄ.

໑໒໙. ອຕ຺ຖິ ສຎ຺ໂຎຊນານິ ເຈວ ທິຏ຺ຐິໂຍ ຈ, ອຕ຺ຖິ ສຎ຺ໂຎຊນານິ ນ ຈ ທິຏ຺ຐິໂຍ. ກຕມານິ ສຎ຺ໂຎຊນານິ ເຈວ ທິຏ຺ຐິໂຍ ຈ? ສກ຺ກາຍທິຏ຺ຐິ, ສີລພ຺ພຕປຣາມາໂສ – ອິມານິ ສຎ຺ໂຎຊນານິ ເຈວ ທິຏ຺ຐິໂຍ ຈ. ກຕມານິ ສຎ຺ໂຎຊນານິ, ນ ຈ ທິຏ຺ຐິໂຍ? ກາມຣາຄສຎ຺ໂຎຊນໍ, ປຏິຆສຎ຺ໂຎຊນໍ, ມານສຎ຺ໂຎຊນໍ, ວິຈິກິຈ຺ຉາສຎ຺ໂຎຊນໍ, ຠວຣາຄສຎ຺ໂຎຊນໍ, ອິສ຺ສາສຎ຺ໂຎຊນໍ, ມຈ຺ຉຣິຍສຎ຺ໂຎຊນໍ, ອນຸນຍສຎ຺ໂຎຊນໍ, ອວິຊ຺ຊາສຎ຺ໂຎຊນໍ – ອິມານິ ສຎ຺ໂຎຊນານິ, ນ ຈ ທິຏ຺ຐິໂຍ.

ຍໍ ເວທນໍ ປຏິຈ຺ຈ…ເປ… ຍໍ ສຎ຺ຎໍ ປຏິຈ຺ຈ…ເປ… ຍໍ ສງ຺ຂາເຣ [ເຍ ສງ຺ຂາເຣ (ກ.) ສໍ. ນິ. ໓.໒໘ ປສ຺ສິຕພ຺ພາ] ປຏິຈ຺ຈ…ເປ… ຍໍ ວິຎ຺ຎາຓໍ ປຏິຈ຺ຈ… ຍໍ ຈກ຺ຂຸໍ ປຏິຈ຺ຈ… ຍໍ ໂສຕໍ ປຏິຈ຺ຈ… ຍໍ ຆານໍ ປຏິຈ຺ຈ… ຍໍ ຊິວ຺ຫໍ ປຏິຈ຺ຈ… ຍໍ ກາຍໍ ປຏິຈ຺ຈ… ຍໍ ມນໍ ປຏິຈ຺ຈ… ຍໍ ຣູເປ ປຏິຈ຺ຈ… ຍໍ ສທ຺ເທ ປຏິຈ຺ຈ… ຍໍ ຄນ຺ເຘ ປຏິຈ຺ຈ … ຍໍ ຣເສ ປຏິຈ຺ຈ… ຍໍ ໂຜຏ຺ຐພ຺ເພ ປຏິຈ຺ຈ… ຍໍ ຘມ຺ເມ ປຏິຈ຺ຈ… ຍໍ ຈກ຺ຂຸວິຎ຺ຎາຓໍ ປຏິຈ຺ຈ… ຍໍ ໂສຕວິຎ຺ຎາຓໍ ປຏິຈ຺ຈ… ຍໍ ຆານວິຎ຺ຎາຓໍ ປຏິຈ຺ຈ… ຍໍ ຊິວ຺ຫາວິຎ຺ຎາຓໍ ປຏິຈ຺ຈ… ຍໍ ກາຍວິຎ຺ຎາຓໍ ປຏິຈ຺ຈ… ຍໍ ມໂນວິຎ຺ຎາຓໍ ປຏິຈ຺ຈ … ຍໍ ຈກ຺ຂຸສມ຺ຜສ຺ສໍ ປຏິຈ຺ຈ… ຍໍ ໂສຕສມ຺ຜສ຺ສໍ ປຏິຈ຺ຈ… ຍໍ ຆານສມ຺ຜສ຺ສໍ ປຏິຈ຺ຈ… ຍໍ ຊິວ຺ຫາສມ຺ຜສ຺ສໍ ປຏິຈ຺ຈ… ຍໍ ກາຍສມ຺ຜສ຺ສໍ ປຏິຈ຺ຈ… ຍໍ ມໂນສມ຺ຜສ຺ສໍ ປຏິຈ຺ຈ… ຍໍ ຈກ຺ຂຸສມ຺ຜສ຺ສຊໍ ເວທນໍ ປຏິຈ຺ຈ… ຍໍ ໂສຕສມ຺ຜສ຺ສຊໍ ເວທນໍ ປຏິຈ຺ຈ… ຍໍ ຆານສມ຺ຜສ຺ສຊໍ ເວທນໍ ປຏິຈ຺ຈ… ຍໍ ຊິວ຺ຫາສມ຺ຜສ຺ສຊໍ ເວທນໍ ປຏິຈ຺ຈ… ຍໍ ກາຍສມ຺ຜສ຺ສຊໍ ເວທນໍ ປຏິຈ຺ຈ… ຍໍ ມໂນສມ຺ຜສ຺ສຊໍ ເວທນໍ ປຏິຈ຺ຈ ອຸປ຺ປຊ຺ຊຕິ ສຸຂໍ ໂສມນສ຺ສໍ, ອຍໍ ມໂນສມ຺ຜສ຺ສຊາຍ ເວທນາຍ ອສ຺ສາໂທຕິ – ອຠິນິເວສປຣາມາໂສ ທິຏ຺ຐິ. ທິຏ຺ຐິ ນ ອສ຺ສາໂທ, ອສ຺ສາໂທ ນ ທິຏ຺ຐິ. ອຎ຺ຎາ ທິຏ຺ຐິ, ອຎ຺ໂຎ ອສ຺ສາໂທ. ຍາ ຈ ທິຏ຺ຐິ ໂຍ ຈ ອສ຺ສາໂທ – ອຍໍ ວຸຈ຺ຈຕິ ອສ຺ສາທທິຏ຺ຐິ.

ອສ຺ສາທທິຏ຺ຐິ ມິຈ຺ຉາທິຏ຺ຐິ ທິຏ຺ຐິວິປຕ຺ຕິ. ຕາຍ ທິຏ຺ຐິວິປຕ຺ຕິຍາ ສມນ຺ນາຄໂຕ ປຸຄ຺ຄໂລ ທິຏ຺ຐິວິປນ຺ໂນ. ທິຏ຺ຐິວິປນ຺ໂນ ປຸຄ຺ຄໂລ ນ ເສວິຕພ຺ໂພ ນ ຠຊິຕພ຺ໂພ ນ ປຍິຣຸປາສິຕພ຺ໂພ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ. ໂຍ ທິຏ຺ຐິຍາ ຣາໂຄ, ໂສ ນ ທິຏ຺ຐິ. ທິຏ຺ຐິ ນ ຣາໂຄ. ອຎ຺ຎາ ທິຏ຺ຐິ, ອຎ຺ໂຎ ຣາໂຄ. ຍາ ຈ ທິຏ຺ຐິ ໂຍ ຈ ຣາໂຄ, ອຍໍ ວຸຈ຺ຈຕິ ທິຏ຺ຐິຣາໂຄ. ຕາຍ ຈ ທິຏ຺ຐິຍາ ເຕນ ຈ ຣາເຄນ ສມນ຺ນາຄໂຕ ປຸຄ຺ຄໂລ ທິຏ຺ຐິຣາຄຣຕ຺ໂຕ. ທິຏ຺ຐິຣາຄຣຕ຺ເຕ ປຸຄ຺ຄເລ ທິນ຺ນໍ ທານໍ ນ ມຫປ຺ຜລໍ ໂຫຕິ ນ ມຫານິສໍສໍ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ ອສ຺ສາທທິຏ຺ຐິ ມິຈ຺ຉາທິຏ຺ຐິ.

ມິຈ຺ຉາທິຏ຺ຐິກສ຺ສ ປຸຣິສປຸຄ຺ຄລສ຺ສ ທ຺ເວວ ຄຕິໂຍ – ນິຣໂຍ ວາ ຕິຣຈ຺ຉານໂຍນິ ວາ. ມິຈ຺ຉາທິຏ຺ຐິກສ຺ສ ປຸຣິສປຸຄ຺ຄລສ຺ສ ຍຎ຺ເຈວ ກາຍກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ, ຍຎ຺ຈ ວຈີກມ຺ມໍ…ເປ… ຍຎ຺ຈ ມໂນກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ, ຍາ ຈ ເຈຕນາ ຍາ ຈ ປຕ຺ຖນາ ໂຍ ຈ ປຓິຘິ ເຍ ຈ ສງ຺ຂາຣາ, ສພ຺ເພ ເຕ ຘມ຺ມາ ອນິຏ຺ຐາຍ ອກນ຺ຕາຍ ອມນາປາຍ ອຫິຕາຍ ທຸກ຺ຂາຍ ສໍວຕ຺ຕນ຺ຕິ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ. ເສຍ຺ຍຖາປິ ນິມ຺ພພີຊໍ ວາ ໂກສາຕກີພີຊໍ ວາ ຕິຕ຺ຕກາລາພຸພີຊໍ ວາ ອລ຺ລາຍ ປຖວິຍາ ນິກ຺ຂິຕ຺ຕໍ ຍຎ຺ເຈວ ປຖວິຣສໍ ອຸປາທິຍຕິ ຍຎ຺ຈ ອາໂປຣສໍ ອຸປາທິຍຕິ, ສພ຺ພໍ ຕໍ ຕິຕ຺ຕກຕ຺ຕາຍ ກຏຸກຕ຺ຕາຍ ອສາຕຕ຺ຕາຍ ສໍວຕ຺ຕຕິ. ຕໍ ກິສ຺ສ ເຫຕຸ? ພີຊໍ ຫິສ຺ສ ປາປິກໍ. ເອວເມວໍ ມິຈ຺ຉາທິຏ຺ຐິກສ຺ສ ປຸຣິສປຸຄ຺ຄລສ຺ສ ຍຎ຺ເຈວ ກາຍກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ ຍຎ຺ຈ ວຈີກມ຺ມໍ…ເປ… ຍຎ຺ຈ ມໂນກມ຺ມໍ ຍຖາທິຏ຺ຐິ ສມຕ຺ຕໍ ສມາທິນ຺ນໍ, ຍາ ຈ ເຈຕນາ ຍາ ຈ ປຕ຺ຖນາ ໂຍ ຈ ປຓິຘິ ເຍ ຈ ສງ຺ຂາຣາ, ສພ຺ເພ ເຕ ຘມ຺ມາ ອນິຏ຺ຐາຍ ອກນ຺ຕາຍ ອມນາປາຍ ອຫິຕາຍ ທຸກ຺ຂາຍ ສໍວຕ຺ຕນ຺ຕິ. ຕໍ ກິສ຺ສ ເຫຕຸ? ທິຏ຺ຐິ ຫິສ຺ສ ປາປິກາ ອສ຺ສາທທິຏ຺ຐິ ມິຈ຺ຉາທິຏ຺ຐິ.

ມິຈ຺ຉາທິຏ຺ຐິ ທິຏ຺ຐິຄຕໍ ທິຏ຺ຐິຄຫນໍ…ເປ… ທິຏ຺ຐາຠິນິເວໂສ ທິຏ຺ຐິປຣາມາໂສ – ອິເມຫິ ອຏ຺ຐາຣສຫິ ອາກາເຣຫິ ປຣິຍຸຏ຺ຐິຕຈິຕ຺ຕສ຺ສ ສຎ຺ໂຎໂຄ.

ອຕ຺ຖິ ສຎ຺ໂຎຊນານິ ເຈວ ທິຏ຺ຐິໂຍ ຈ, ອຕ຺ຖິ ສຎ຺ໂຎຊນານິ ນ ຈ ທິຏ຺ຐິໂຍ. ກຕມານິ ສຎ຺ໂຎຊນານິ ເຈວ ທິຏ຺ຐິໂຍ ຈ? ສກ຺ກາຍທິຏ຺ຐິ, ສີລພ຺ພຕປຣາມາໂສ – ອິມານິ ສຎ຺ໂຎຊນານິ ເຈວ ທິຏ຺ຐິໂຍ ຈ. ກຕມານິ ສຎ຺ໂຎຊນານິ, ນ ຈ ທິຏ຺ຐິໂຍ? ກາມຣາຄສຎ຺ໂຎຊນໍ, ປຏິຆສຎ຺ໂຎຊນໍ, ມານສຎ຺ໂຎຊນໍ, ວິຈິກິຈ຺ຉາສຎ຺ໂຎຊນໍ, ຠວຣາຄສຎ຺ໂຎຊນໍ, ອິສ຺ສາສຎ຺ໂຎຊນໍ, ມຈ຺ຉຣິຍສຎ຺ໂຎຊນໍ, ອນຸນຍສຎ຺ໂຎຊນໍ, ອວິຊ຺ຊາສຎ຺ໂຎຊນໍ – ອິມານິ ສຎ຺ໂຎຊນານິ, ນ ຈ ທິຏ຺ຐິໂຍ. ອສ຺ສາທທິຏ຺ຐິຍາ ອິເມຫິ ປຎ຺ຈຕິໍສາຍ ອາກາເຣຫິ ອຠິນິເວໂສ ໂຫຕິ.

ອສ຺ສາທທິຏ຺ຐິນິທ຺ເທໂສ ປຐໂມ.