໘. ພ຺ຣາຫ຺ມຓຣາຊວາທປຎ຺ໂຫ

໘. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຕຖາຄເຕນ ‘ອຫມສ຺ມິ, ຠິກ຺ຂເວ, ພ຺ຣາຫ຺ມໂຓ ຍາຈໂຍໂຄ’ຕິ. ປຸນ ຈ ຠຓິຕໍ ‘ຣາຊາຫມສ຺ມິ ເສລາ’ຕິ. ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ອຫມສ຺ມິ, ຠິກ຺ຂເວ, ພ຺ຣາຫ຺ມໂຓ ຍາຈໂຍໂຄ’ຕິ, ເຕນ ຫິ ‘ຣາຊາຫມສ຺ມິ ເສລາ’ຕິ ຍໍ ວຈນໍ, ຕໍ ມິຈ຺ຉາ. ຍທິ ຕຖາຄເຕນ ຠຓິຕໍ ‘ຣາຊາຫມສ຺ມິ ເສລາ’ຕິ, ເຕນ ຫິ ‘ອຫມສ຺ມິ, ຠິກ຺ຂເວ, ພ຺ຣາຫ຺ມໂຓ ຍາຈໂຍໂຄ’ຕິ ຕມ຺ປິ ວຈນໍ ມິຈ຺ຉາ. ຂຕ຺ຕິໂຍ ວາ ຫິ ຠເວຍ຺ຍ ພ຺ຣາຫ຺ມໂຓ ວາ, ນຕ຺ຖິ ເອກາຍ ຊາຕິຍາ ທ຺ເວ ວຓ຺ຓາ ນາມ, ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ອຫມສ຺ມິ, ຠິກ຺ຂເວ, ພ຺ຣາຫ຺ມໂຓ ຍາຈໂຍໂຄ’ຕິ, ປຸນ ຈ ຠຓິຕໍ ‘ຣາຊາຫມສ຺ມິ ເສລາ’ຕິ, ຕຕ຺ຖ ກາຣຓໍ ອຕ຺ຖິ, ເຍນ ກາຣເຓນ ຕຖາຄໂຕ ພ຺ຣາຫ຺ມໂຓ ຈ ຣາຊາ ຈ ໂຫຕີ’’ຕິ.

‘‘ກິໍ ປນ ຕໍ, ຠນ຺ເຕ ນາຄເສນ, ກາຣຓໍ, ເຍນ ກາຣເຓນ ຕຖາຄໂຕ ພ຺ຣາຫ຺ມໂຓ ຈ ຣາຊາ ຈ ໂຫຕິ’’? ‘‘ສພ຺ເພ, ມຫາຣາຊ, ປາປກາ ອກຸສລາ ຘມ຺ມາ ຕຖາຄຕສ຺ສ ພາຫິຕາ ປຫີນາ ອປຄຕາ ພ຺ຍປຄຕາ ອຸຈ຺ຉິນ຺ນາ ຂີຓາ ຂຍໍ ປຕ຺ຕາ ນິພ຺ພຸຕາ ອຸປສນ຺ຕາ, ຕສ຺ມາ ຕຖາຄໂຕ ‘ພ຺ຣາຫ຺ມໂຓ’ຕິ ວຸຈ຺ຈຕິ.

‘‘ພ຺ຣາຫ຺ມໂຓ ນາມ ສໍສຍມເນກໍສໍ ວິມຕິປຖໍ ວີຕິວຕ຺ໂຕ, ຠຄວາປິ, ມຫາຣາຊ, ສໍສຍມເນກໍສໍ ວິມຕິປຖໍ ວີຕິວຕ຺ໂຕ, ເຕນ ກາຣເຓນ ຕຖາຄໂຕ ‘ພ຺ຣາຫ຺ມໂຓ’ຕິ ວຸຈ຺ຈຕິ.

‘‘ພ຺ຣາຫ຺ມໂຓ ນາມ ສພ຺ພຠວຄຕິໂຍນິນິສ຺ສໂຏ ມລຣຊຄຕວິປ຺ປມຸຕ຺ໂຕ ອສຫາໂຍ, ຠຄວາປິ, ມຫາຣາຊ, ສພ຺ພຠວຄຕິໂຍນິນິສ຺ສໂຏ ມລຣຊຄຕວິປ຺ປມຸຕ຺ໂຕ ອສຫາໂຍ, ເຕນ ກາຣເຓນ ຕຖາຄໂຕ ‘ພ຺ຣາຫ຺ມໂຓ’ຕິ ວຸຈ຺ຈຕິ.

‘‘ພ຺ຣາຫ຺ມຓາ ນາມ ອຄ຺ຄເສຏ຺ຐວຣປວຣທິພ຺ພວິຫາຣພຫຸໂລ, ຠຄວາປິ, ມຫາຣາຊ, ອຄ຺ຄເສຏ຺ຐວຣປວຣທິພ຺ພວິຫາຣພຫຸໂລ, ເຕນາປິ ກປຣເຓນ ຕຖາຄໂຕ ‘‘ພ຺ຣາຫ຺ມໂຓ’’ຕິ ວຸຈ຺ຈຕິ.

‘‘ພ຺ຣາຫ຺ມໂຓ ນາມ ອຊ຺ຌຍນ ອຊ຺ຌາປນ ທານປ຺ປຏິຄ຺ຄຫຓ ທມ ສໍຍມນິຍມປຸພ຺ພມນຸສິຏ຺ຐິ ປເວຓິ ວໍສ ຘຣໂຓ, ຠຄວາປິ, ມຫາຣາຊ, ອຊ຺ຌຍນ ອຊ຺ຌາປນ ທານປ຺ປຏິຄ຺ຄຫຓ ທມ ສໍຍມ ນິຍມ ປຸພ຺ພຊິນາຈິຓ຺ຓ ອນຸສິຏ຺ຐິ ປເວຓິ ວໍສ ຘຣໂຓ ເຕນາປິ ກາຣເຓນ ຕຖາຄໂຕ ‘ພ຺ຣາຫ຺ມໂຓ’ຕິ ວຸຈ຺ຈຕິ.

‘‘ພ຺ຣາຫ຺ມໂຓ ນາມ ພ຺ຣຫາສຸຂວິຫາຣຊ຺ຌານຌາຍີ; ຠຄວາປິ, ມຫາຣາຊ, ພ຺ຣຫາສຸຂວິຫາຣຊ຺ຌານຌາຍີ, ເຕນາປິ ກາຣເຓນ ຕຖາຄໂຕ ‘ພ຺ຣາຫ຺ມໂຓ’ຕິ ວຸຈ຺ຈຕິ.

‘‘ພ຺ຣາຫ຺ມໂຓ ນາມ ສພ຺ພຠວາຠວຄຕີສຸ ອຠິຊາຕິວຕ຺ຕິຕມນຸຈຣິຕໍ ຊານາຕິ, ຠຄວາປິ, ມຫາຣາຊ, ສພ຺ພຠວາຠວຄຕີສຸ ອຠິຊາຕິວຕ຺ຕິຕມນຸຈຣິຕໍ ຊານາຕິ, ເຕນາປິ ກາຣເຓນ ຕຖາຄໂຕ ‘ພ຺ຣາຫ຺ມໂຓ’ຕິ ວຸຈ຺ຈຕິ.

‘‘ພ຺ຣາຫ຺ມໂຓຕິ, ມຫາຣາຊ, ຠຄວໂຕ ເນຕໍ ນາມໍ ມາຕຣາ ກຕໍ, ນ ປິຕຣາ ກຕໍ, ນ ຠາຕຣາ ກຕໍ, ນ ຠຄິນິຍາ ກຕໍ, ນ ມິຕ຺ຕາມຈ຺ເຈຫິ ກຕໍ, ນ ຎາຕິສາໂລຫິເຕຫິ ກຕໍ, ນ ສມຓພ຺ຣາຫ຺ມເຓຫິ ກຕໍ, ນ ເທວຕາຫິ ກຕໍ, ວິໂມກ຺ຂນ຺ຕິກເມຕໍ ພຸທ຺ຘານໍ ຠຄວນ຺ຕານໍ ນາມໍ ໂພຘິຍາ ເຍວ ມູເລ ມາຣເສນໍ ວິຘມິຕ຺ວາ ອຕີຕານາຄຕປຈ຺ຈຸປ຺ປນ຺ເນ ປາປເກ ອກຸສເລ ຘມ຺ເມ ພາເຫຕ຺ວາ ສຫ ສພ຺ພຎ຺ຎຸຕຎາຓສ຺ສ ປຏິລາຠາ ປຏິລທ຺ຘປາຕຸຠູຕສມຸປ຺ປນ຺ນມຕ຺ເຕ ສຈ຺ຉິກາ ປຎ຺ຎຕ຺ຕິ ຍທິທໍ ພ຺ຣາຫ຺ມໂຓຕິ, ເຕນ ກາຣເຓນ ຕຖາຄໂຕ ວຸຈ຺ຈຕິ ‘ພ຺ຣາຫ຺ມໂຓ’’’ຕິ.

‘‘ເກນ ປນ, ຠນ຺ເຕ ນາຄເສນ, ກາຣເຓນ ຕຖາຄໂຕ ວຸຈ຺ຈຕິ ‘ຣາຊາ’’’ຕິ? ‘‘ຣາຊາ ນາມ, ມຫາຣາຊ, ໂຍ ໂກຈິ ຣຊ຺ຊໍ ກາເຣຕິ ໂລກມນຸສາສຕິ, ຠຄວາປິ, ມຫາຣາຊ, ທສສຫສ຺ສິຍາ ໂລກຘາຕຸຍາ ຘມ຺ເມນ ຣຊ຺ຊໍ ກາເຣຕິ, ສເທວກໍ ໂລກໍ ສມາຣກໍ ສພ຺ຣຫ຺ມກໍ ສສ຺ສມຓພ຺ຣາຫ຺ມຓິໍ ປຊໍ ສເທວມນຸສ຺ສໍ ອນຸສາສຕິ, ເຕນາປິ ກາຣເຓນ ຕຖາຄໂຕ ວຸຈ຺ຈຕິ ‘ຣາຊາ’ຕິ.

‘‘ຣາຊາ ນາມ, ມຫາຣາຊ, ສພ຺ພຊນມນຸສ຺ເສ ອຠິຠວິຕ຺ວາ ນນ຺ທຍນ຺ໂຕ ຎາຕິສງ຺ຆໍ, ໂສຈຍນ຺ໂຕ ອມິຕ຺ຕສງ຺ຆໍ, ມຫຕິມຫາຍສສິຣິຫຣໍ ຖິຣສາຣທຓ຺ຑໍ ອນູນສຕສລາກາລງ຺ກຕໍ ອຸສ຺ສາເປຕິ ປຓ຺ຑຣວິມລເສຕຈ຺ຉຕ຺ຕໍ, ຠຄວາປິ, ມຫາຣາຊ, ໂສຈຍນ຺ໂຕ ມາຣເສນໍ ມິຈ຺ຉາປຏິປນ຺ນໍ, ນນ຺ທຍນ຺ໂຕ ເທວມນຸສ຺ເສ ສມ຺ມາປຏິປນ຺ເນ ທສສຫສ຺ສິຍາ ໂລກຘາຕຸຍາ ມຫຕິມຫາຍສສິຣິຫຣໍ ຂນ຺ຕິຖິຣສາຣທຓ຺ຑໍ ຎາຓວຣສຕສລາກາລງ຺ກຕໍ ອຸສ຺ສາເປຕິ ອຄ຺ຄວຣວິມຸຕ຺ຕິປຓ຺ຑຣວິມລເສຕຈ຺ຉຕ຺ຕໍ, ເຕນາປິ ກາຣເຓນ ຕຖາຄໂຕ ວຸຈ຺ຈຕິ ‘ຣາຊາ’ຕິ.

‘‘ຣາຊາ ນາມ ອຸປຄຕສມ຺ປຕ຺ຕຊນານໍ ພຫູນມຠິວນ຺ທນີໂຍ ຠວຕິ, ຠຄວາປິ, ມຫາຣາຊ, ອຸປຄຕສມ຺ປຕ຺ຕເທວມນຸສ຺ສານໍ ພຫູນມຠິວນ຺ທນີໂຍ, ເຕນາປິ ກາຣເຓນ ຕຖາຄໂຕ ວຸຈ຺ຈຕິ ‘ຣາຊາ’ຕິ.

‘‘ຣາຊາ ນາມ ຍສ຺ສ ກສ຺ສຈິ ອາຣາຘກສ຺ສ ປສີທິຕ຺ວາ ວຣິຕໍ ວຣໍ ທຕ຺ວາ ກາເມນ ຕປ຺ປຍຕິ, ຠຄວາປິ, ມຫາຣາຊ, ຍສ຺ສ ກສ຺ສຈິ ກາເຍນ ວາຈາຍ ມນສາ ອາຣາຘກສ຺ສ ປສີທິຕ຺ວາ ວຣິຕໍ ວຣມນຸຕ຺ຕຣໍ ສພ຺ພທຸກ຺ຂປຣິມຸຕ຺ຕິໍ ທຕ຺ວາ ອເສສກາມວເຣນ ຈ ຕປ຺ປຍຕິ, ເຕນາປິ ກາຣເຓນ ຕຖາຄໂຕ ວຸຈ຺ຈຕິ ‘ຣາຊາ’ຕິ.

‘‘ຣາຊາ ນາມ ອາຓໍ ວີຕິກ຺ກມນ຺ຕໍ ວິຄຣຫຕິ ຌາເປຕິ [ຊາເປຕິ (ສີ. ປີ.)] ຘໍເສຕິ, ຠຄວໂຕປິ, ມຫາຣາຊ, ສາສນວເຣ ອາຓໍ ອຕິກ຺ກມນ຺ໂຕ ອລຊ຺ຊີ ມງ຺ກຸຠາເວນ ໂອຎ຺ຎາໂຕ ຫີຬິໂຕ ຄຣຫິໂຕ ຠວິຕ຺ວາ ວຊ຺ຊຕິ ຊິນສາສນວຣມ຺ຫາ, ເຕນາປິ ກາຣເຓນ ຕຖາຄໂຕ ວຸຈ຺ຈຕິ ‘ຣາຊາ’ຕິ.

‘‘ຣາຊາ ນາມ ປຸພ຺ພການໍ ຘມ຺ມິການໍ ຣາຊູນໍ ປເວຓິມນຸສິຏ຺ຐິຍາ ຘມ຺ມາຘມ຺ມມນຸທີປຍິຕ຺ວາ ຘມ຺ເມນ ຣຊ຺ຊໍ ກາຣຍມາໂນ ປິຫຍິໂຕ ປິໂຍ ປຕ຺ຖິໂຕ ຠວຕິ ຊນມນຸສ຺ສານໍ, ຈິຣໍ ຣາຊກຸລວໍສໍ ຐປຍຕິ ຘມ຺ມຄຸຓພເລນ, ຠຄວາປິ, ມຫາຣາຊ, ປຸພ຺ພການໍ ສຍມ຺ຠູນໍ ປເວຓິມນຸສິຏ຺ຐິຍາ ຘມ຺ມາຘມ຺ມມນຸທີປຍິຕ຺ວາ ຘມ຺ເມນ ໂລກມນຸສາສມາໂນ ປິຫຍິໂຕ ປິໂຍ ປຕ຺ຖິໂຕ ເທວມນຸສ຺ສານໍ ຈິຣໍ ສາສນໍ ປວຕ຺ເຕຕິ ຘມ຺ມຄຸຓພເລນ, ເຕນາປິ ກາຣເຓນ ຕຖາຄໂຕ ວຸຈ຺ຈຕິ ‘ຣາຊາ’ຕິ. ເອວມເນກວິຘໍ, ມຫາຣາຊ, ກາຣຓໍ, ເຍນ ກາຣເຓນ ຕຖາຄໂຕ ພ຺ຣາຫ຺ມໂຓປິ ຠເວຍ຺ຍ ຣາຊາປິ ຠເວຍ຺ຍ, ສຸນິປຸໂຓ ຠິກ຺ຂຸ ກປ຺ປມ຺ປິ ໂນ ນໍ ສມ຺ປາເທຍ຺ຍ, ກິໍ ອຕິພຫຸໍ ຠຓິເຕນ, ສໍຂິຕ຺ຕໍ ສມ຺ປຏິຈ຺ຉິຕພ຺ພ’’ນ຺ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ພ຺ຣາຫ຺ມຓຣາຊວາທປຎ຺ໂຫ ອຏ຺ຐໂມ.