໙. ຄາຖາຠິຄີຕໂຠຊນກຖາປຎ຺ໂຫ

໙. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ –

‘‘‘ຄາຖາຠິຄີຕໍ ເມ ອໂຠຊເນຍ຺ຍໍ [ອໂຠຊນີຍໍ (ກ.) ສຸ. ນິ. ໘໑ ປສ຺ສິຕພ຺ພໍ], ສມ຺ປສ຺ສຕໍ ພ຺ຣາຫ຺ມຓ ເນສ ຘມ຺ມາ;

ຄາຖາຠິຄີຕໍ ປນຸທນ຺ຕິ ພຸທ຺ຘາ, ຘມ຺ເມ ສຕີ ພ຺ຣາຫ຺ມຓ ວຸຕ຺ຕິເຣສາ’ຕິ.

‘‘ປຸນ ຈ ຠຄວາ ປຣິສາຍ ຘມ຺ມໍ ເທເສນ຺ໂຕ ກເຖນ຺ໂຕ ອນຸປຸພ຺ພິກຖໍ ປຐມໍ ຕາວ ທານກຖໍ ກເຖຕິ, ປຈ຺ຉາ ສີລກຖໍ, ຕສ຺ສ ຠຄວໂຕ ສພ຺ພໂລກິສ຺ສຣສ຺ສ ຠາສິຕໍ ສຸຕ຺ວາ ເທວມນຸສ຺ສາ ອຠິສງ຺ຂຣິຕ຺ວາ ທານໍ ເທນ຺ຕິ, ຕສ຺ສ ຕໍ ອຸຍ຺ໂຍຊິຕໍ ທານໍ ສາວກາ ປຣິຠຸຎ຺ຊນ຺ຕິ. ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ຄາຖາຠິຄີຕໍ ເມ ອໂຠຊເນຍ຺ຍ’ນ຺ຕິ, ເຕນ ຫິ ‘ຠຄວາ ທານກຖໍ ປຐມໍ ກເຖຕີ’ຕິ ຍໍ ວຈນໍ, ຕໍ ມິຈ຺ຉາ. ຍທິ ທານກຖໍ ປຐມໍ ກເຖຕິ, ເຕນ ຫິ ‘ຄາຖາຠິຄີຕໍ ເມ ອໂຠຊເນຍ຺ຍ’ນ຺ຕິ ຕມ຺ປິ ວຈນໍ ມິຈ຺ຉາ. ກິໍ ກາຣຓໍ? ໂຍ ໂສ, ຠນ຺ເຕ, ທກ຺ຂິເຓຍ຺ໂຍ ຄິຫີນໍ ປິຓ຺ຑປາຕທານສ຺ສ ວິປາກໍ ກເຖຕິ, ຕສ຺ສ ເຕ ຘມ຺ມກຖໍ ສຸຕ຺ວາ ປສນ຺ນຈິຕ຺ຕາ ອປຣາປຣໍ ທານໍ ເທນ຺ຕິ, ເຍ ຕໍ ທານໍ ປຣິຠຸຎ຺ຊນ຺ຕິ, ສພ຺ເພ ເຕ ຄາຖາຠິຄີຕໍ ປຣິຠຸຎ຺ຊນ຺ຕິ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ນິປຸໂຓ ຄມ຺ຠີໂຣ ຕປານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ຄາຖາຠິຄີຕໍ ເມ ອໂຠຊເນຍ຺ຍໍ, ສມ຺ປສ຺ສຕໍ ພ຺ຣາຫ຺ມຓ ເນສ ຘມ຺ໂມ. ຄາຖາຠິຄີຕໍ ປນຸທນ຺ຕິ ພຸທ຺ຘາ, ຘມ຺ເມ ສຕີ ພ຺ຣາຫ຺ມຓ ວຸຕ຺ຕິເຣສາ’ຕິ, ກເຖຕິ ຈ ຠຄວາ ປຐມໍ ທານກຖໍ, ຕຎ຺ຈ ປນ ກິຣິຍໍ ສພ຺ເພສໍ ຕຖາຄຕານໍ ປຐມໍ ທານກຖາຍ, ຕຕ຺ຖ ຈິຕ຺ຕໍ ອຠິຣມາເປຕ຺ວາ ປຈ຺ຉາ ສີເລ ນິໂຍເຊນ຺ຕິ. ຍຖາ, ມຫາຣາຊ, ມນຸສ຺ສາ ຕຣຸຓທາຣການໍ ປຐມໍ ຕາວ ກີຬາຠຓ຺ຑການິ ເທນ຺ຕິ. ເສຍ຺ຍຖິທໍ, ວງ຺ກກໍ ຆຏິກໍ ຈິງ຺ຄຸລກໍ ປຕ຺ຕາຬ຺ຫກໍ ຣຖກໍ ຘນຸກໍ, ປຈ຺ຉາ ເຕ ສເກ ສເກ ກມ຺ເມ ນິໂຍເຊນ຺ຕິ. ເອວເມວ ໂຂ, ມຫາຣາຊ, ຕຖາຄໂຕ ປຐມໍ ທານກຖາຍ ຈິຕ຺ຕໍ ອຠິຣມາເປຕ຺ວາ ປຈ຺ຉາ ສີເລ ນິໂຍເຊຕິ.

‘‘ຍຖາ ວາ ປນ, ມຫາຣາຊ, ຠິສກ຺ໂກ ນາມ ອາຕຸຣານໍ ປຐມໍ ຕາວ ຈຕູຫປຎ຺ຈາຫໍ ເຕລໍ ປາເຍຕິ ພລກຣຓາຍ ສິເນຫນາຍ, ປຈ຺ຉາ ວິເຣເຈຕິ. ເອວເມວ ໂຂ, ມຫາຣາຊ, ຕຖາຄໂຕ ປຐມໍ ຕາວ ທານກຖາຍ ຈິຕ຺ຕໍ ອຠິຣມາເປຕ຺ວາ ປຈ຺ຉາ ສີເລ ນິໂຍເຊຕິ. ທາຍການໍ, ມຫາຣາຊ, ທານປຕີນໍ ຈິຕ຺ຕໍ ມຸທຸກໍ ໂຫຕິ ມທ຺ທວໍ ສິນິທ຺ຘໍ, ເຕນ ເຕ ທານເສຕຸສງ຺ກເມນ ທານນາວາຍ ສໍສາຣສາຄຣປາຣມນຸຄຈ຺ຉນ຺ຕິ, ຕສ຺ມາ ເຕສໍ ປຐມໍ ກມ຺ມຠູມິມນຸສາສຕິ, ນ ຈ ເກນຈິ [ເຕນ (ສີ. ປີ.)] ວິຎ຺ຎຕ຺ຕິມາປຊ຺ຊຕີ’’ຕິ.

‘‘ຠນ຺ເຕ ນາຄເສນ, ‘ວິຎ຺ຎຕ຺ຕິ’ນ຺ຕິ ຍໍ ວເທສິ, ກຕິ ປນ ຕາ ວິຎ຺ຎຕ຺ຕິໂຍ’’ຕິ? ‘‘ທ຺ເວມາ, ມຫາຣາຊ, ວິຎ຺ຎຕ຺ຕິໂຍ ກາຍວິຎ຺ຎຕ຺ຕິ ວຈີວິຎ຺ຎຕ຺ຕິ ຈາຕິ. ຕຕ຺ຖ ອຕ຺ຖິ ກາຍວິຎ຺ຎຕ຺ຕິ ສາວຊ຺ຊາ, ອຕ຺ຖິ ອນວຊ຺ຊາ. ອຕ຺ຖິ ວຈີວິຎ຺ຎຕ຺ຕິ ສາວຊ຺ຊາ, ອຕ຺ຖິ ອນວຊ຺ຊາ.

‘‘ກຕມາ ກາຍວິຎ຺ຎຕ຺ຕິ ສາວຊ຺ຊາ? ອິເຘກຈ຺ໂຈ ຠິກ຺ຂຸ ກຸລານິ ອຸປຄນ຺ຕ຺ວາ ອໂນກາເສ ຐິໂຕ ຐານໍ ຠຎ຺ຊຕິ, ອຍໍ ກາຍວິຎ຺ຎຕ຺ຕິ ສາວຊ຺ຊາ. ຕາຍ ຈ ວິຎ຺ຎາປິຕໍ ອຣິຍາ ນ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ໂອຎ຺ຎາໂຕ ໂຫຕິ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ, ຠິນ຺ນາຊີໂວຕ຺ເວວ ສງ຺ຂໍ ຄຈ຺ຉຕິ.

‘‘ປຸນ ຈປຣໍ, ມຫາຣາຊ, ອິເຘກຈ຺ໂຈ ຠິກ຺ຂຸ ກຸລານິ ອຸປຄນ຺ຕ຺ວາ ອໂນກາເສ ຐິໂຕ ຄລໍ ປຓາເມຕ຺ວາ ໂມຣເປກ຺ຂິຕໍ ເປກ຺ຂຕິ ‘ເອວໍ ອິເມ ປສ຺ສນ຺ຕີ’ຕິ, ເຕນ ຈ ເຕ ປສ຺ສນ຺ຕິ. ອຍມ຺ປິ ກາຍວິຎ຺ຎຕ຺ຕິ ສາວຊ຺ຊາ. ຕາຍ ຈ ວິຎ຺ຎາປິຕໍ ອຣິຍາ ນ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ໂອຎ຺ຎາໂຕ ໂຫຕິ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ, ຠິນ຺ນາຊີໂວຕ຺ເວວ ສງ຺ຂໍ ຄຈ຺ຉຕິ.

‘‘ປຸນ ຈປຣໍ, ມຫາຣາຊ, ອິເຘກຈ຺ໂຈ ຠິກ຺ຂຸ ຫນຸກາຍ ວາ ຠມຸກາຍ ວາ ອງ຺ຄຸຏ຺ເຐນ ວາ ວິຎ຺ຎາເປຕິ, ອຍມ຺ປິ ກາຍວິຎ຺ຎຕ຺ຕິ ສາວຊ຺ຊາ, ຕາຍ ຈ ວິຎ຺ຎາປິຕໍ ອຣິຍາ ນ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ໂອຎ຺ຎາໂຕ ໂຫຕິ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ, ຠິນ຺ນາຊີໂວຕ຺ເວວ ສງ຺ຂໍ ຄຈ຺ຉຕິ.

‘‘ກຕມາ ກາຍວິຎ຺ຎຕ຺ຕິ ອນວຊ຺ຊາ? ອິຘ ຠິກ຺ຂຸ ກຸລານິ ອຸປຄນ຺ຕ຺ວາ ສໂຕ ສມາຫິໂຕ ສມ຺ປຊາໂນ ຐາເນປິ ອຏ຺ຐາເນປິ ຍຖານຸສິຏ຺ຐິໍ ຄນ຺ຕ຺ວາ ຐາເນ ຕິຏ຺ຐຕິ, ທາຕຸກາເມສຸ ຕິຏ຺ຐຕິ, ອທາຕຸກາເມສຸ ປກ຺ກມຕິ. ອຍໍ ກາຍວິຎ຺ຎຕ຺ຕິ ອນວຊ຺ຊາ, ຕາຍ ຈ ວິຎ຺ຎາປິຕໍ ອຣິຍາ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ວຓ຺ຓິໂຕ ໂຫຕິ ຖຸໂຕ ປສຕ຺ໂຖ ສລ຺ເລຂິຕາຈາໂຣ, ປຣິສຸທ຺ຘາຊີໂວຕ຺ເວວ ສງ຺ຂໍ ຄຈ຺ຉຕິ. ຠາສິຕມ຺ເປຕໍ, ມຫາຣາຊ, ຠຄວຕາ ເທວາຕິເທເວນ –

‘ນ ເວ ຍາຈນ຺ຕິ ສປ຺ປຎ຺ຎາ, ຘີໂຣ ຈ ເວທິຕຸມຣຫຕິ [ອຣິຍາ ຄຣຫນ຺ຕິ ຍາຈນໍ (ສີ. ປີ.)];

ອຸທ຺ທິສ຺ສ ອຣິຍາ ຕິຏ຺ຐນ຺ຕິ, ເອສາ ອຣິຍານ ຍາຈນາ’ຕິ.

‘‘ກຕມາ ວຈີວິຎ຺ຎຕ຺ຕິ ສາວຊ຺ຊາ? ອິຘ, ມຫາຣາຊ, ຠິກ຺ຂຸ ວາຈາຍ ພຫຸວິຘໍ ວິຎ຺ຎາເປຕິ ຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາຣໍ, ອຍໍ ວຈີວິຎ຺ຎຕ຺ຕິ ສາວຊ຺ຊາ, ຕາຍ ຈ ວິຎ຺ຎາປິຕໍ ອຣິຍາ ນ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ໂອຎ຺ຎາໂຕ ໂຫຕິ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ, ຠິນ຺ນາຊີໂວຕ຺ເວວ ສງ຺ຂໍ ຄຈ຺ຉຕິ.

‘‘ປຸນ ຈປຣໍ, ມຫາຣາຊ, ອິເຘກຈ຺ໂຈ ຠິກ຺ຂຸ ປເຣສໍ ສາເວນ຺ໂຕ ເອວໍ ຠຓຕິ ‘ອິມິນາ ເມ ອຕ຺ໂຖ’ຕິ, ຕາຍ ຈ ວາຈາຍ ປເຣສໍ ສາວິຕາຍ ຕສ຺ສ ລາໂຠ ອຸປ຺ປຊ຺ຊຕິ, ອຍມ຺ປິ ວຈີວິຎ຺ຎຕ຺ຕິ ສາວຊ຺ຊາ, ຕາຍ ຈ ວິຎ຺ຎາປິຕໍ ອຣິຍາ ນ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ໂອຎ຺ຎາໂຕ ໂຫຕິ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ, ຠິນ຺ນາຊີໂວຕ຺ເວວ ສງ຺ຂໍ ຄຈ຺ຉຕິ.

‘‘ປຸນ ຈປຣໍ, ມຫາຣາຊ, ອິເຘກຈ຺ໂຈ ຠິກ຺ຂຸ ວຈີວິປ຺ຜາເຣນ ປຣິສາຍ ສາເວຕິ ‘ເອວຎ຺ຈ ເອວຎ຺ຈ ຠິກ຺ຂູນໍ ທາຕພ຺ພ’ນ຺ຕິ, ຕຎ຺ຈ ເຕ ວຈນໍ ສຸຕ຺ວາ ປຣິກິຕ຺ຕິຕໍ ອຠິຫຣນ຺ຕິ, ອຍມ຺ປິ ວຈີວິຎ຺ຎຕ຺ຕິ ສາວຊ຺ຊາ, ຕາຍ ຈ ວິຎ຺ຎາປິຕໍ ອຣິຍາ ນ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ໂອຎ຺ຎາໂຕ ໂຫຕິ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ, ຠິນ຺ນາຊີໂວຕ຺ເວວ ສງ຺ຂໍ ຄຈ຺ຉຕິ.

‘‘ນນຸ, ມຫາຣາຊ, ເຖໂຣປິ ສາຣິປຸຕ຺ໂຕ ອຕ຺ຖງ຺ຄເຕ ສູຣິເຍ ຣຕ຺ຕິຠາເຄ ຄິລາໂນ ສມາໂນ ເຖເຣນ ມຫາໂມຄ຺ຄລ຺ລາເນນ ເຠສຊ຺ຊໍ ປຸຈ຺ຉີຍມາໂນ ວາຈໍ ຠິນ຺ທິ, ຕສ຺ສ ເຕນ ວຈີເຠເທນ ເຠສຊ຺ຊໍ ອຸປ຺ປຊ຺ຊິ. ອຖ ເຖໂຣ ສາຣິປຸຕ຺ໂຕ ‘ວຈີເຠເທນ ເມ ອິມໍ ເຠສຊ຺ຊໍ ອຸປ຺ປນ຺ນໍ, ມາ ເມ ອາຊີໂວ ຠິຊ຺ຊີ’ຕິ ອາຊີວເຠທຠຍາ ຕໍ ເຠສຊ຺ຊໍ ປຊຫິ ນ ອຸປຊີວິ. ເອວມ຺ປິ ວຈີວິຎ຺ຎຕ຺ຕິ ສາວຊ຺ຊາ, ຕາຍ ຈ ວິຎ຺ຎາປິຕໍ ອຣິຍາ ນ ປຣິຠຸຎ຺ຊນ຺ຕິ. ໂສ ຈ ປຸຄ຺ຄໂລ ອຣິຍານໍ ສມເຍ ໂອຎ຺ຎາໂຕ ໂຫຕິ ຫີຬິໂຕ ຂີຬິໂຕ ຄຣຫິໂຕ ປຣິຠູໂຕ ອຈິຕ຺ຕີກໂຕ, ຠິນ຺ນາຊີໂວຕ຺ເວວ ສງ຺ຂໍ ຄຈ຺ຉຕິ.

‘‘ກຕມາ ວຈີວິຎ຺ຎຕ຺ຕິ ອນວຊ຺ຊາ? ອິຘ, ມຫາຣາຊ, ຠິກ຺ຂຸ ສຕິ ປຈ຺ຈເຍ ເຠສຊ຺ຊໍ ວິຎ຺ຎາເປຕິ ຎາຕິປວາຣິເຕສຸ ກຸເລສຸ, ອຍໍ ວຈີວິຎ຺ຎຕ຺ຕິ ອນວຊ຺ຊາ, ຕາຍ ຈ ວິຎ຺ຎາປິຕໍ ອຣິຍາ ປຣິຠຸຎ຺ຊນ຺ຕິ, ໂສ ຈ ປຸຄ຺ຄໂລ ອຣິຍານໍ ສມເຍ ວຓ຺ຓິໂຕ ໂຫຕິ ໂຖມິໂຕ ປສຕ຺ໂຖ, ປຣິສຸທ຺ຘາຊີໂວຕ຺ເວວ ສງ຺ຂໍ ຄຈ຺ຉຕິ, ອນຸມໂຕ ຕຖາຄເຕຫິ ອຣຫນ຺ເຕຫິ ສມ຺ມາສມ຺ພຸທ຺ເຘຫິ.

‘‘ຍໍ ປນ, ມຫາຣາຊ, ຕຖາຄໂຕ ກສິຠາຣທ຺ວາຊສ຺ສ ພ຺ຣາຫ຺ມຓສ຺ສ ໂຠຊນໍ ປຊຫິ [ປຊຫຕິ (ກ.)], ຕໍ ອາເວຐນວິນິເວຐນກຑ຺ຒນນິຄ຺ຄຫປ຺ປຏິກມ຺ເມນ ນິພ຺ພຕ຺ຕິ, ຕສ຺ມາ ຕຖາຄໂຕ ຕໍ ປິຓ຺ຑປາຕໍ ປຏິກ຺ຂິປິ ນ ອຸປຊີວີ’’ຕິ.

‘‘ສພ຺ພກາລໍ, ຠນ຺ເຕ ນາຄເສນ, ຕຖາຄເຕ ຠຸຎ຺ຊມາເນ ເທວຕາ ທິພ຺ພໍ ໂອຊໍ ປຕ຺ເຕ ອາກິຣນ຺ຕິ, ອຸທາຫຸ ‘ສູກຣມທ຺ທເວ ຈ ມຘຸປາຍາເສ ຈາ’ຕິ ທ຺ວີສຸ ເຍວ ປິຓ຺ຑປາເຕສຸ ອາກິຣິໍສູ’’ຕິ? ‘‘ສພ຺ພກາລໍ, ມຫາຣາຊ, ຕຖາຄເຕ ຠຸຎ຺ຊມາເນ ເທວຕາ ທິພ຺ພໍ ໂອຊໍ ຄເຫຕ຺ວາ ອຸປຕິຏ຺ຐິຕ຺ວາ ອຸທ຺ຘຏຸທ຺ຘເຏ ອາໂລເປ ອາກິຣນ຺ຕິ.

‘‘ຍຖາ, ມຫາຣາຊ, ຣຎ຺ໂຎ ສູໂທ ຣຎ຺ໂຎ ຠຸຎ຺ຊນ຺ຕສ຺ສ ສູປໍ ຄເຫຕ຺ວາ ອຸປຕິຏ຺ຐິຕ຺ວາ ກພເຬ ກພເຬ ສູປໍ ອາກິຣຕິ, ເອວເມວ ໂຂ, ມຫາຣາຊ, ສພ຺ພກາລໍ ຕຖາຄເຕ ຠຸຎ຺ຊມາເນ ເທວຕາ ທິພ຺ພໍ ໂອຊໍ ຄເຫຕ຺ວາ ອຸປຕິຏ຺ຐິຕ຺ວາ ອຸທ຺ຘຏຸທ຺ຘເຏ ອາໂລເປ ທິພ຺ພໍ ໂອຊໍ ອາກິຣນ຺ຕິ. ເວຣຎ຺ຊາຍມ຺ປິ, ມຫາຣາຊ, ຕຖາຄຕສ຺ສ ສຸກ຺ຂຍວປຸລເກ [ສຸກ຺ຂຍວມູລເກ (ກ.)] ຠຸຎ຺ຊມານສ຺ສ ເທວຕາ ທິພ຺ເພນ ໂອເຊນ ເຕມຍິຕ຺ວາ ເຕມຍິຕ຺ວາ ອຸປສໍຫຣິໍສຸ, ເຕນ ຕຖາຄຕສ຺ສ ກາໂຍ ອຸປຈິໂຕ ອໂຫສີ’’ຕິ. ‘‘ລາຠາ ວຕ, ຠນ຺ເຕ ນາຄເສນ, ຕາສໍ ເທວຕານໍ, ຍາ ຕຖາຄຕສ຺ສ ສຣີຣປ຺ປຏິຊຄ຺ຄເນ ສຕຕໍ ສມິຕໍ ອຸສ຺ສຸກ຺ກມາປນ຺ນາ. ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ຄາຖາຠິຄີຕໂຠຊນກຖາປຎ຺ໂຫ ນວໂມ.