໖. ຉທ຺ທນ຺ຕໂຊຕິປາລາຣພ຺ຠປຎ຺ໂຫ

໖. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ຉທ຺ທນ຺ໂຕ ນາຄຣາຊາ –

‘‘‘ວຘິສ຺ສເມຕນ຺ຕິ ປຣາມສນ຺ໂຕ, ກາສາວມທ຺ທກ຺ຂິ ຘຊໍ ອິສີນໍ;

ທຸກ຺ເຂນ ຜຸຏ຺ຐສ຺ສຸທປາທິ ສຎ຺ຎາ, ອຣຫທ຺ຘໂຊ ສພ຺ຠິ ອວຊ຺ຌຣູໂປ’ຕິ.

‘‘ປຸນ ຈ ຠຓິຕໍ ‘ໂຊຕິປາລມາຓໂວ ສມາໂນ ກສ຺ສປໍ ຠຄວນ຺ຕໍ ອຣຫນ຺ຕໍ ສມ຺ມາສມ຺ພຸທ຺ຘໍ ມຸຓ຺ຑກວາເທນ ສມຓກວາເທນ ອສພ຺ຠາຫິ ຜຣຸສາຫິ ວາຈາຫິ ອກ຺ໂກສິ ປຣິຠາສີ’ຕິ. ຍທິ, ຠນ຺ເຕ ນາຄເສນ, ໂພຘິສຕ຺ໂຕ ຕິຣຈ຺ຉານຄໂຕ ສມາໂນ ກາສາວໍ ອຠິປູຊຍິ, ເຕນ ຫິ ‘ໂຊຕິປາເລນ ມາຓເວນ ກສ຺ສໂປ ຠຄວາ ອຣຫໍ ສມ຺ມາສມ຺ພຸທ຺ໂຘ ມຸຓ຺ຑກວາເທນ ສມຓກວາເທນ ອສພ຺ຠາຫິ ຜຣຸສາຫິ ວາຈາຫິ ອກ຺ກຸຏ຺ໂຐ ປຣິຠາສິໂຕ’ຕິ ຍໍ ວຈນໍ, ຕໍ ມິຈ຺ຉາ. ຍທິ ໂຊຕິປາເລນ ມາຓເວນ ກສ຺ສໂປ ຠຄວາ ອຣຫໍ ສມ຺ມາສມ຺ພຸທ຺ໂຘ ມຸຓ຺ຑກວາເທນ ສມຓກວາເທນ ອສພ຺ຠາຫິ ຜຣຸສາຫິ ວາຈາຫິ ອກ຺ກຸຏ຺ໂຐ ປຣິຠາສິໂຕ, ເຕນ ຫິ ‘ຉທ຺ທນ຺ເຕນ ນາຄຣາເຊນ ກາສາວໍ ປູຊິຕ’ນ຺ຕິ ຕມ຺ປິ ວຈນໍ ມິຈ຺ຉາ. ຍທິ ຕິຣຈ຺ຉານຄເຕນ ໂພຘິສຕ຺ເຕນ ກກ຺ຂຬຂຣກຏຸກເວທນໍ ເວທຍມາເນນ ລຸທ຺ທເກນ ນິວຕ຺ຖໍ ກາສາວໍ ປູຊິຕໍ, ກິໍ ມນຸສ຺ສຠູໂຕ ສມາໂນ ປຣິປກ຺ກຎາໂຓ ປຣິປກ຺ກາຍ ໂພຘິຍາ ກສ຺ສປໍ ຠຄວນ຺ຕໍ ອຣຫນ຺ຕໍ ສມ຺ມາສມ຺ພຸທ຺ຘໍ ທສພລໍ ໂລກນາຍກໍ ອຸທິໂຕທິຕໍ ຊລິຕພ຺ຍາໂມຠາສໍ ປວຣຸຕ຺ຕມໍ ປວຣຣຸຈິຣກາສິກກາສາວມຠິປາຣຸຕໍ ທິສ຺ວາ ນ ປູຊຍິ? ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ຉທ຺ທນ຺ໂຕ ນາຄຣາຊາ ‘ວຘິສ຺ສເມຕນ຺ຕິ…ເປ… ອວຊ຺ຌຣູໂປ’ຕິ. ໂຊຕິປາເລນ ຈ ມາຓເວນ ກສ຺ສໂປ ຠຄວາ ອຣຫໍ ສມ຺ມາສມ຺ພຸທ຺ໂຘ ມຸຓ຺ຑກວາເທນ ສມຓກວາເທນ ອສພ຺ຠາຫິ ຜຣຸສາຫິ ວາຈາຫິ ອກ຺ກຸຏ຺ໂຐ ປຣິຠາສິໂຕ, ຕຎ຺ຈ ປນ ຊາຕິວເສນ ກຸລວເສນ. ໂຊຕິປາໂລ, ມຫາຣາຊ, ມາຓໂວ ອສ຺ສທ຺ເຘ ອປ຺ປສນ຺ເນ ກຸເລ ປຈ຺ຈາຊາໂຕ, ຕສ຺ສ ມາຕາປິຕໂຣ ຠຄິນິຠາຕໂຣ ທາສິທາສເຈຏກປຣິວາຣກມນຸສ຺ສາ ພ຺ຣຫ຺ມເທວຕາ ພ຺ຣຫ຺ມຄຣຸກາ, ເຕ ‘ພ຺ຣາຫ຺ມຓາ ເອວ ອຸຕ຺ຕມາ ປວຣາ’ຕິ ອວເສເສ ປພ຺ພຊິເຕ ຄຣຫນ຺ຕິ ຊິຄຸຈ຺ຉນ຺ຕິ, ເຕສໍ ຕໍ ວຈນໍ ສຸຕ຺ວາ ໂຊຕິປາໂລ ມາຓໂວ ຆຏິກາເຣນ ກຸມ຺ຠກາເຣນ ສຕ຺ຖາຣໍ ທສ຺ສນາຍ ປກ຺ໂກສິໂຕ ເອວມາຫ ‘ກິໍ ປນ ເຕນ ມຸຓ຺ຑເກນ ສມຓເກນ ທິຏ຺ເຐນາ’ຕິ.

‘‘ຍຖາ, ມຫາຣາຊ, ອມຕໍ ວິສມາສຊ຺ຊ ຕິຕ຺ຕກໍ ໂຫຕິ, ຍຖາ ຈ ສີໂຕທກໍ ອຄ຺ຄິມາສຊ຺ຊ ອຸຓ຺ຫໍ ໂຫຕິ, ເອວເມວ ໂຂ, ມຫາຣາຊ, ໂຊຕິປາໂລ ມາຓໂວ ອສ຺ສທ຺ເຘ ອປ຺ປສນ຺ເນ ກຸເລ ປຈ຺ຈາຊາໂຕ, ໂສ ກຸລວເສນ ອນ຺ໂຘ ຫຸຕ຺ວາ [ໂສ ກຸລຊາຕິວເສນ ອນ຺ໂຘ ຠວິຕ຺ວາ (ສ຺ຍາ.)] ຕຖາຄຕໍ ອກ຺ໂກສິ ປຣິຠາສິ.

‘‘ຍຖາ, ມຫາຣາຊ, ຊລິຕປຊ຺ຊລິໂຕ ມຫາອຄ຺ຄິກ຺ຂນ຺ໂຘ ສປ຺ປຠາໂສ ອຸທກມາສຊ຺ຊ ອຸປຫຕປ຺ປຠາເຕໂຊ ສີຕໂລ ກາຬໂກ ຠວຕິ ປຣິປກ຺ກນິຄ຺ຄຸຓ຺ຑິຜລສທິໂສ, ເອວເມວ ໂຂ, ມຫາຣາຊ, ໂຊຕິປາໂລ ມາຓໂວ ປຸຎ຺ຎວາ ສທ຺ໂຘ ຎາຓວິປຸລສປ຺ປຠາໂສ ອສ຺ສທ຺ເຘ ອປ຺ປສນ຺ເນ ກຸເລ ປຈ຺ຈາຊາໂຕ, ໂສ ກຸລວເສນ ອນ຺ໂຘ ຫຸຕ຺ວາ ຕຖາຄຕໍ ອກ຺ໂກສິ ປຣິຠາສິ, ອຸປຄນ຺ຕ຺ວາ ຈ ພຸທ຺ຘຄຸຓມຎ຺ຎາຍ ເຈຏກຠູໂຕ ວິຍ ອໂຫສິ, ຊິນສາສເນ ປພ຺ພຊິຕ຺ວາ ອຠິຎ຺ຎາ ຈ ສມາປຕ຺ຕິໂຍ ຈ ນິພ຺ພຕ຺ເຕຕ຺ວາ ພ຺ຣຫ຺ມໂລກູປໂຄ ອໂຫສີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ຉທ຺ທນ຺ຕໂຊຕິປາລາຣພ຺ຠປຎ຺ໂຫ ຉຏ຺ໂຐ.