໕. ພຸທ຺ຘອວິເຫຐກປຎ຺ໂຫ

໕. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ‘ປຸພ຺ເພ ວາຫໍ ມນຸສ຺ສຠູໂຕ ສມາໂນ ສຕ຺ຕານໍ ອວິເຫຐກຊາຕິໂກ ອໂຫສິ’ນ຺ຕິ. ປຸນ ຈ ຠຓິຕໍ ‘ໂລມສກສ຺ສໂປ ນາມ ອິສິ ສມາໂນ ອເນກສເຕ ປາເຓ ຆາຕຍິຕ຺ວາ ວາຊເປຍ຺ຍໍ ມຫາຍຎ຺ຎໍ ຍຊີ’ຕິ. ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ປຸພ຺ເພ ວາຫໍ ມນຸສ຺ສຠູໂຕ ສມາໂນ ສຕ຺ຕານໍ ອວິເຫຐກຊາຕິໂກ ອໂຫສິ’ນ຺ຕິ, ເຕນ ຫິ ‘ໂລມສກສ຺ສເປນ ອິສິນາ ອເນກສເຕ ປາເຓ ຆາຕຍິຕ຺ວາ ວາຊເປຍ຺ຍໍ ມຫາຍຎ຺ຎໍ ຍຊິຕ’ນ຺ຕິ ຍໍ ວຈນໍ, ຕໍ ມິຈ຺ຉາ. ຍທິ ‘ໂລມສກສ຺ສເປນ ອິສິນາ ອເນກສເຕ ປາເຓ ຆາຕຍິຕ຺ວາ ວາຊເປຍ຺ຍໍ ມຫາຍຎ຺ຎໍ ຍຊິຕໍ’, ເຕນ ຫິ ‘ປຸພ຺ເພ ວາຫໍ ມນຸສ຺ສຠູໂຕ ສມາໂນ ສຕ຺ຕານໍ ອວິເຫຐກຊາຕິໂກ ອໂຫສິ’ນ຺ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ປຸພ຺ເພ ວາຫໍ ມນຸສ຺ສຠູໂຕ ສມາໂນ ສຕ຺ຕານໍ ອວິເຫຐກຊາຕິໂກ ອໂຫສິ’ນ຺ຕິ, ‘ໂລມສກສ຺ສເປນ ອິສິນາ ອເນກສເຕ ປາເຓ ຆາຕຍິຕ຺ວາ ວາຊເປຍ຺ຍໍ ມຫາຍຎ຺ຎໍ ຍຊິຕໍ’, ຕຎ຺ຈ ປນ ຣາຄວເສນ ວິສຎ຺ຎິນາ, ໂນ ສເຈຕເນນາ’’ຕິ.

‘‘ອຏ຺ຐິເມ, ຠນ຺ເຕ ນາຄເສນ, ປຸຄ຺ຄລາ ປາຓໍ ຫນນ຺ຕິ. ກຕເມ ອຏ຺ຐ? ຣຕ຺ໂຕ ຣາຄວເສນ ປາຓໍ ຫນຕິ, ທຸຏ຺ໂຐ ໂທສວເສນ ປາຓໍ ຫນຕິ, ມູຬ຺ໂຫ ໂມຫວເສນ ປາຓໍ ຫນຕິ, ມານີ ມານວເສນ ປາຓໍ ຫນຕິ, ລຸທ຺ໂຘ ໂລຠວເສນ ປາຓໍ ຫນຕິ, ອກິຎ຺ຈໂນ ຊີວິກຕ຺ຖາຍ ປາຓໍ ຫນຕິ, ພາໂລ ຫສ຺ສວເສນ [ອຎ຺ຎາຓວເສນ (ກ. ສີ.)] ປາຓໍ ຫນຕິ, ຣາຊາ ວິນຍນວເສນ ປາຓໍ ຫນຕິ. ອິເມ ໂຂ, ຠນ຺ເຕ ນາຄເສນ, ອຏ຺ຐ ປຸຄ຺ຄລາ ປາຓໍ ຫນນ຺ຕິ. ປາກຕິກໍ ເຍວ, ຠນ຺ເຕ ນາຄເສນ, ໂພຘິສຕ຺ເຕນ ກຕ’’ນ຺ຕິ. ‘‘ນ, ມຫາຣາຊ, ປາກຕິກໍ ໂພຘິສຕ຺ເຕນ ກຕໍ, ຍທິ, ມຫາຣາຊ, ໂພຘິສຕ຺ໂຕ ປກຕິຠາເວນ ໂອນເມຍ຺ຍ ມຫາຍຎ຺ຎໍ ຍຊິຕຸໍ, ນ ຍິມໍ ຄາຖໍ ຠເຓຍ຺ຍ –

‘‘‘ສສມຸທ຺ທປຣິຍາຍໍ, ມຫິໍ ສາຄຣກຸຓ຺ຑລໍ;

ນ ອິຈ຺ເຉ ສຫ ນິນ຺ທາຍ, ເອວໍ ເສຍ຺ຫ [ສຍ຺ຫ (ສີ. ປີ.)] ວິຊານຫີ’ຕິ.

‘‘ເອວໍວາທີ, ມຫາຣາຊ, ໂພຘິສຕ຺ໂຕ ສຫ ທສ຺ສເນນ ຈນ຺ທວຕິຍາ ຣາຊກຎ຺ຎາຍ ວິສຎ຺ຎີ ອໂຫສິ ຂິຕ຺ຕຈິຕ຺ໂຕ ຣຕ຺ໂຕ ວິສຎ຺ຎິຠູໂຕ ອາກຸລາກຸໂລ ຕຸຣິຕຕຸຣິໂຕ ເຕນ ວິກ຺ຂິຕ຺ຕຠນ຺ຕລຸຬິຕຈິຕ຺ເຕນ ມຫຕິມຫາປສຸຆາຕຄລຣຸຫິຣສຎ຺ຈຍໍ ວາຊເປຍ຺ຍໍ ມຫາຍຎ຺ຎໍ ຍຊິ.

‘‘ຍຖາ, ມຫາຣາຊ, ອຸມ຺ມຕ຺ຕໂກ ຂິຕ຺ຕຈິຕ຺ໂຕ ຊລິຕມ຺ປິ ຊາຕເວທໍ ອກ຺ກມຕິ, ກຸປິຕມ຺ປິ ອາສີວິສໍ ຄຓ຺ຫາຕິ, ມຕ຺ຕມ຺ປິ ຫຕ຺ຖິໍ ອຸເປຕິ, ສມຸທ຺ທມ຺ປິ ອຕີຣທສ຺ສິໍ ປກ຺ຂນ຺ທຕິ, ຈນ຺ທນິກມ຺ປິ ໂອຬິຄລ຺ລມ຺ປິ ໂອມທ຺ທຕິ, ກຓ຺ຏກາຘານມ຺ປິ ອຠິຣຸຫຕິ, ປປາເຕປິ ປຕຕິ, ອສຸຈິມ຺ປິ ຠກ຺ເຂຕິ, ນຄ຺ໂຄປິ ຣຖິຍາ ຈຣຕິ, ອຎ຺ຎມ຺ປິ ພຫຸວິຘໍ ອກິຣິຍໍ ກໂຣຕິ. ເອວເມວ ໂຂ, ມຫາຣາຊ, ໂພຘິສຕ຺ໂຕ ສຫ ທສ຺ສເນນ ຈນ຺ທວຕິຍາ ຣາຊກຎ຺ຎາຍ ວິສຎ຺ຎີ ອໂຫສິ ຂິຕ຺ຕຈິຕ຺ໂຕ ຣຕ຺ໂຕ ວິສຎ຺ຎິຠູໂຕ ອາກຸລາກຸໂລ ຕຸຣິຕຕຸຣິໂຕ, ເຕນ ວິກ຺ຂິຕ຺ຕຠນ຺ຕລຸຬິຕຈິຕ຺ເຕນ ມຫຕິມຫາປສຸຆາຕຄລຣຸຫິຣສຎ຺ຈຍໍ ວາຊເປຍ຺ຍໍ ມຫາຍຎ຺ຎໍ ຍຊິ.

‘‘ຂິຕ຺ຕຈິຕ຺ເຕນ, ມຫາຣາຊ, ກຕໍ ປາປໍ ທິຏ຺ຐຘມ຺ເມປິ ນ ມຫາສາວຊ຺ຊໍ ໂຫຕິ, ສມ຺ປຣາເຍ ວິປາເກນປິ ໂນ ຕຖາ. ອິຘ, ມຫາຣາຊ, ໂກຈິ ອຸມ຺ມຕ຺ຕໂກ ວຊ຺ຌມາປຊ຺ເຊຍ຺ຍ, ຕສ຺ສ ຕຸມ຺ເຫ ກິໍ ທຓ຺ຑໍ ຘາເຣຖາ’’ຕິ? ‘‘ໂກ, ຠນ຺ເຕ, ອຸມ຺ມຕ຺ຕກສ຺ສ ທຓ຺ໂຑ ຠວິສ຺ສຕິ, ຕໍ ມຍໍ ໂປຖາເປຕ຺ວາ ນີຫຣາເປມ, ເອໂສວ ຕສ຺ສ ທຓ຺ໂຑ’’ຕິ. ‘‘ອິຕິ ໂຂ, ມຫາຣາຊ, ອຸມ຺ມຕ຺ຕກສ຺ສ ອປຣາເຘ ທຓ຺ໂຑປິ ນ ຠວຕິ, ຕສ຺ມາ ອຸມ຺ມຕ຺ຕກສ຺ສ ກເຕປິ ນ ໂທໂສ ຠວຕິ ສເຕກິຈ຺ໂຉ. ເອວເມວ ໂຂ, ມຫາຣາຊ, ໂລມສກສ຺ສໂປ ອິສິ ສຫ ທສ຺ສເນນ ຈນ຺ທວຕິຍາ ຣາຊກຎ຺ຎາຍ ວິສຎ຺ຎີ ອໂຫສິ ຂິຕ຺ຕຈິຕ຺ໂຕ ຣຕ຺ໂຕ ວິສຎ຺ຎິຠູໂຕ ວິສຏປຍາໂຕ ອາກຸລາກຸໂລ ຕຸຣິຕຕຸຣິໂຕ, ເຕນ ວິກ຺ຂິຕ຺ຕຠນ຺ຕລຸຬິຕຈິຕ຺ເຕນ ມຫຕິມຫາປສຸຆາຕຄລຣຸຫິຣສຎ຺ຈຍໍ ວາຊເປຍ຺ຍໍ ມຫາຍຎ຺ຎໍ ຍຊິ. ຍທາ ຈ ປນ ປກຕິຈິຕ຺ໂຕ ອໂຫສິ ປຏິລທ຺ຘສ຺ສຕິ, ຕທາ ປຸນເທວ ປພ຺ພຊິຕ຺ວາ ປຎ຺ຈາຠິຎ຺ຎາໂຍ ນິພ຺ພຕ຺ເຕຕ຺ວາ ພ຺ຣຫ຺ມໂລກູປໂຄ ອໂຫສີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ພຸທ຺ຘອວິເຫຐກປຎ຺ໂຫ ປຎ຺ຈໂມ.