໖. ເມຕ຺ຕາຠາວນານິສໍສປຎ຺ໂຫ

໖. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ‘ເມຕ຺ຕາຍ, ຠິກ຺ຂເວ, ເຈໂຕວິມຸຕ຺ຕິຍາ ອາເສວິຕາຍ ຠາວິຕາຍ ພຫຸລີກຕາຍ ຍານີກຕາຍ ວຕ຺ຖຸກຕາຍ ອນຸຏ຺ຐິຕາຍ ປຣິຈິຕາຍ ສຸສມາຣທ຺ຘາຍ ເອກາທສານິສໍສາ ປາຏິກງ຺ຂາ. ກຕເມ ເອກາທສ? ສຸຂໍ ສຸປຕິ, ສຸຂໍ ປຏິພຸຊ຺ຌຕິ, ນ ປາປກໍ ສຸປິນໍ ປສ຺ສຕິ, ມນຸສ຺ສານໍ ປິໂຍ ໂຫຕິ, ອມນຸສ຺ສານໍ ປິໂຍ ໂຫຕິ, ເທວຕາ ຣກ຺ຂນ຺ຕິ, ນາສ຺ສ ອຄ຺ຄິ ວາ ວິສໍ ວາ ສຕ຺ຖໍ ວາ ກມຕິ [ສຕ຺ຖໍ ກມຕິ (ສ຺ຍາ.) ອ. ນິ. ໑໑.໑໕ ປສ຺ສິຕພ຺ພໍ], ຕຸວຏໍ ຈິຕ຺ຕໍ ສມາຘິຍຕິ, ມຸຂວຓ຺ໂຓ ວິປ຺ປສີທຕິ, ອສມ຺ມູຬ຺ໂຫ ກາລໍ ກໂຣຕິ, ອຸຕ຺ຕຣິໍ ອປ຺ປຏິວິຊ຺ຌນ຺ໂຕ ພ຺ຣຫ຺ມໂລກູປໂຄ ໂຫຕີ’ຕິ. ປຸນ ຈ ຕຸມ຺ເຫ ຠຓຖ ‘ສາໂມ ກຸມາໂຣ ເມຕ຺ຕາວິຫາຣີ ມິຄສງ຺ເຆນ ປຣິວຸໂຕ ປວເນ ວິຈຣນ຺ໂຕ ປີຬິຍກ຺ເຂນ ຣຎ຺ຎາ ວິທ຺ໂຘ ວິສປີເຕນ ສລ຺ເລນ ຕຕ຺ເຖວ ມຸຈ຺ຉິໂຕ ປຕິໂຕ’ຕິ.

‘‘ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ເມຕ຺ຕາຍ ຠິກ຺ຂເວ…ເປ… ພ຺ຣຫ຺ມໂລກູປໂຄ ໂຫຕີ’ຕິ, ເຕນ ຫິ ‘‘ສາໂມ ກຸມາໂຣ ເມຕ຺ຕາວິຫາຣີ ມິຄສງ຺ເຆນ ປຣິວຸໂຕ ປວເນ ວິຈຣນ຺ໂຕ ປີຬິຍກ຺ເຂນ ຣຎ຺ຎາ ວິທ຺ໂຘ ວິສປີເຕນ ສລ຺ເລນ ຕຕ຺ເຖວ ມຸຈ຺ຉິໂຕ ປຕິໂຕ’ຕິ ຍໍ ວຈນໍ, ຕໍ ມິຈ຺ຉາ. ຍທິ ສາໂມ ກຸມາໂຣ ເມຕ຺ຕາວິຫາຣີ ມິຄສງ຺ເຆນ ປຣິວຸໂຕ ປວເນ ວິຈຣນ຺ໂຕ ປີຬິຍກ຺ເຂນ ຣຎ຺ຎາ ວິທ຺ໂຘ ວິສປີເຕນ ສລ຺ເລນ ຕຕ຺ເຖວ ມຸຈ຺ຉິໂຕ ປຕິໂຕ, ເຕນ ຫິ ‘ເມຕ຺ຕາຍ, ຠິກ຺ຂເວ…ເປ… ສຕ຺ຖໍ ວາ ກມຕີ’ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ສຸນິປຸໂຓ ປຣິສຓ຺ໂຫ ສຸຂຸໂມ ຄມ຺ຠີໂຣ, ອປິ ສຸນິປຸຓານໍ ມນຸຊານໍ ຄຕ຺ເຕ ເສທໍ ໂມເຈຍ຺ຍ, ໂສ ຕວານຸປ຺ປຕ຺ໂຕ, ວິຊເຏຫິ ຕໍ ມຫາຊຏາຊຏິຕໍ, ອນາຄຕານໍ ຊິນປຸຕ຺ຕານໍ ຈກ຺ຂຸໍ ເທຫິ ນິພ຺ພາຫນາຍາ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ເມຕ຺ຕາຍ ຠິກ຺ຂເວ…ເປ... ສຕ຺ຖໍ ວາ ກມຕີ’ຕິ. ສາໂມ ຈ ກຸມາໂຣ ເມຕ຺ຕາວິຫາຣີ ມິຄສງ຺ເຆນ ປຣິວຸໂຕ ປວເນ ວິຈຣນ຺ໂຕ ປີຬິຍກ຺ເຂນ ຣຎ຺ຎາ ວິທ຺ໂຘ ວິສປີເຕນ ສລ຺ເລນ ຕຕ຺ເຖວ ມຸຈ຺ຉິໂຕ ປຕິໂຕ, ຕຕ຺ຖ ປນ, ມຫາຣາຊ, ກາຣຓໍ ອຕ຺ຖິ. ກຕມໍ ຕຕ຺ຖ ກາຣຓໍ? ເນເຕ, ມຫາຣາຊ, ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ, ສາໂມ, ມຫາຣາຊ, ກຸມາໂຣ ຆຏໍ ອຸກ຺ຂິປນ຺ໂຕ ຕສ຺ມິໍ ຂເຓ ເມຕ຺ຕາຠາວນາຍ ປມຕ຺ໂຕ ອໂຫສິ.

‘‘ຍສ຺ມິໍ, ມຫາຣາຊ, ຂເຓ ປຸຄ຺ຄໂລ ເມຕ຺ຕໍ ສມາປນ຺ໂນ ໂຫຕິ, ນ ຕສ຺ສ ປຸຄ຺ຄລສ຺ສ ຕສ຺ມິໍ ຂເຓ ອຄ຺ຄິ ວາ ວິສໍ ວາ ສຕ຺ຖໍ ວາ ກມຕິ. ຕສ຺ສ ເຍ ເກຈິ ອຫິຕກາມາ ອຸປຄນ຺ຕ຺ວາ ຕໍ ນ ປສ຺ສນ຺ຕິ, ນ ຕສ຺ມິໍ ໂອກາສໍ ລຠນ຺ຕິ. ເນເຕ, ມຫາຣາຊ, ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ. ອິຘ, ມຫາຣາຊ, ປຸຣິໂສ ສງ຺ຄາມສູໂຣ ອເຠຊ຺ຊກວຈຊາລິກໍ ສນ຺ນຍ຺ຫິຕ຺ວາ ສງ຺ຄາມໍ ໂອຕເຣຍ຺ຍ, ຕສ຺ສ ສຣາ ຂິຕ຺ຕາ ອຸປຄນ຺ຕ຺ວາ ປຕນ຺ຕິ ວິກິຣນ຺ຕິ, ນ ຕສ຺ມິໍ ໂອກາສໍ ລຠນ຺ຕິ, ເນໂສ, ມຫາຣາຊ, ຄຸໂຓ ສງ຺ຄາມສູຣສ຺ສ, ອເຠຊ຺ຊກວຈຊາລິກາເຍໂສ ຄຸໂຓ, ຍສ຺ສ ສຣາ ຂິຕ຺ຕາ ອຸປຄນ຺ຕ຺ວາ ປຕນ຺ຕິ ວິກິຣນ຺ຕິ. ເອວເມວ ໂຂ, ມຫາຣາຊ, ເນເຕ ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ.

‘‘ຍສ຺ມິໍ, ມຫາຣາຊ, ຂເຓ ປຸຄ຺ຄໂລ ເມຕ຺ຕໍ ສມາປນ຺ໂນ ໂຫຕິ, ນ ຕສ຺ສ ປຸຄ຺ຄລສ຺ສ ຕສ຺ມິໍ ຂເຓ ອຄ຺ຄິ ວາ ວິສໍ ວາ ສຕ຺ຖໍ ວາ ກມຕິ. ຕສ຺ສ ເຍ ເກຈິ ອຫິຕກາມາ ອຸປຄນ຺ຕ຺ວາ ຕໍ ນ ປສ຺ສນ຺ຕິ, ຕສ຺ມິໍ ໂອກາສໍ ນ ລຠນ຺ຕິ, ເນເຕ, ມຫາຣາຊ, ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ. ອິຘ ປນ, ມຫາຣາຊ, ປຸຣິໂສ ທິພ຺ພໍ ອນ຺ຕຣຘານໍ ມູລໍ ຫຕ຺ເຖ ກເຣຍ຺ຍ, ຍາວ ຕໍ ມູລໍ ຕສ຺ສ ຫຕ຺ຖຄຕໍ ໂຫຕິ, ຕາວ ນ ອຎ຺ໂຎ ໂກຈິ ປກຕິມນຸສ຺ໂສ ຕໍ ປຸຣິສໍ ປສ຺ສຕິ. ເນໂສ, ມຫາຣາຊ, ຄຸໂຓ ປຸຣິສສ຺ສ, ມູລສ຺ເສໂສ ຄຸໂຓ ອນ຺ຕຣຘານສ຺ສ, ຍໍ ໂສ ປກຕິມນຸສ຺ສານໍ ຈກ຺ຂຸປເຖ ນ ທິສ຺ສຕິ. ເອວເມວ ໂຂ, ມຫາຣາຊ, ເນເຕ ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ.

‘‘ຍສ຺ມິໍ, ມຫາຣາຊ, ຂເຓ ປຸຄ຺ຄໂລ ເມຕ຺ຕໍ ສມາປນ຺ໂນ ໂຫຕິ, ນ ຕສ຺ສ ປຸຄ຺ຄລສ຺ສ ຕສ຺ມິໍ ຂເຓ ອຄ຺ຄິ ວາ ວິສໍ ວາ ສຕ຺ຖໍ ວາ ກມຕິ. ຕສ຺ສ ເຍ ເກຈິ ອຫິຕກາມາ ອຸປຄນ຺ຕ຺ວາ ຕໍ ນ ປສ຺ສນ຺ຕິ, ນ ຕສ຺ມິໍ ໂອກາສໍ ລຠນ຺ຕິ. ເນເຕ, ມຫາຣາຊ, ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ. ຍຖາ ວາ ປນ, ມຫາຣາຊ, ປຸຣິສໍ ສຸກຕໍ ມຫາເລຓມນຸປ຺ປວິຏ຺ຐໍ ມຫຕິມຫາເມໂຆ ອຠິວສ຺ສນ຺ໂຕ ນ ສກ຺ໂກຕິ ເຕມຍິຕຸໍ, ເນໂສ, ມຫາຣາຊ, ຄຸໂຓ ປຸຣິສສ຺ສ, ມຫາເລຓສ຺ເສໂສ ຄຸໂຓ, ຍໍ ມຫາເມໂຆ ອຠິວສ຺ສມາໂນ ນ ຕໍ ເຕເມຕິ. ເອວເມວ ໂຂ, ມຫາຣາຊ, ເນເຕ ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ.

‘‘ຍສ຺ມິໍ, ມຫາຣາຊ, ຂເຓ ປຸຄ຺ຄໂລ ເມຕ຺ຕໍ ສມາປນ຺ໂນ ໂຫຕິ, ນ ຕສ຺ສ ປຸຄ຺ຄລສ຺ສ ຕສ຺ມິໍ ຂເຓ ອຄ຺ຄິ ວາ ວິສໍ ວາ ສຕ຺ຖໍ ວາ ກມຕິ. ຕສ຺ສ ເຍ ເກຈິ ອຫິຕກາມາ ອຸປຄນ຺ຕ຺ວາ ຕໍ ນ ປສ຺ສນ຺ຕິ, ນ ຕສ຺ສ ສກ຺ໂກນ຺ຕິ ອຫິຕໍ ກາຕຸໍ ເນເຕ, ມຫາຣາຊ, ຄຸຓາ ປຸຄ຺ຄລສ຺ສ, ເມຕ຺ຕາຠາວນາເຍເຕ ຄຸຓາ’’ຕິ. ‘‘ອຈ຺ຉຣິຍໍ, ຠນ຺ເຕ ນາຄເສນ, ອພ຺ຠຸຕໍ ຠນ຺ເຕ ນາຄເສນ, ສພ຺ພປາປນິວາຣຓາ ເມຕ຺ຕາຠາວນາ’’ຕິ. ‘‘ສພ຺ພກຸສລຄຸຓາວຫາ, ມຫາຣາຊ, ເມຕ຺ຕາຠາວນາ ຫິຕານມ຺ປິ ອຫິຕານມ຺ປິ, ເຍ ເຕ ສຕ຺ຕາ ວິຎ຺ຎາຓພທ຺ຘາ, ສພ຺ເພສໍ ມຫານິສໍສາ ເມຕ຺ຕາຠາວນາ ສໍວິຠຊິຕພ຺ພາ’’ຕິ.

ເມຕ຺ຕາຠາວນານິສໍສປຎ຺ໂຫ ຉຏ຺ໂຐ.