໗. ກຸສລາກຸສລສມວິສມປຎ຺ໂຫ

໗. ‘‘ຠນ຺ເຕ ນາຄເສນ ‘ກຸສລກາຣິສ຺ສປິ ອກຸສລກາຣິສ຺ສປິ ວິປາໂກ ສມສໂມ, ອຸທາຫຸ ໂກຈິ ວິເສໂສ ອຕ຺ຖີ’ຕິ? ‘‘ອຕ຺ຖິ, ມຫາຣາຊ, ກຸສລສ຺ສ ຈ ອກຸສລສ຺ສ ຈ ວິເສໂສ, ກຸສລໍ, ມຫາຣາຊ, ສຸຂວິປາກໍ ສຄ຺ຄສໍວຕ຺ຕນິກໍ, ອກຸສລໍ ທຸກ຺ຂວິປາກໍ ນິຣຍສໍວຕ຺ຕນິກ’’ນ຺ຕິ.

‘‘ຠນ຺ເຕ ນາຄເສນ, ຕຸມ຺ເຫ ຠຓຖ ‘ເທວທຕ຺ໂຕ ເອກນ຺ຕກຓ຺ໂຫ, ເອກນ຺ຕກຓ຺ເຫຫິ ຘມ຺ເມຫິ ສມນ຺ນາຄໂຕ, ໂພຘິສຕ຺ໂຕ ເອກນ຺ຕສຸກ຺ໂກ, ເອກນ຺ຕສຸກ຺ເກຫິ ຘມ຺ເມຫິ ສມນ຺ນາຄໂຕ’ຕິ. ປຸນ ຈ ເທວທຕ຺ໂຕ ຠເວ ຠເວ ຍເສນ ຈ ປກ຺ເຂນ ຈ ໂພຘິສຕ຺ເຕນ ສມສໂມ ໂຫຕິ, ກທາຈິ ອຘິກຕໂຣ ວາ. ຍທາ ເທວທຕ຺ໂຕ ນຄເຣ ພາຣາຓສິຍໍ ພ຺ຣຫ຺ມທຕ຺ຕສ຺ສ ຣຎ຺ໂຎ ປຸໂຣຫິຕປຸຕ຺ໂຕ ອໂຫສິ, ຕທາ ໂພຘິສຕ຺ໂຕ ຉວກຈຓ຺ຑາໂລ ອໂຫສິ ວິຊ຺ຊາຘໂຣ, ວິຊ຺ຊໍ ປຣິຊປ຺ປິຕ຺ວາ ອກາເລ ອມ຺ພຜລານິ ນິພ຺ພຕ຺ເຕສິ, ເອຕ຺ຖ ຕາວ ໂພຘິສຕ຺ໂຕ ເທວທຕ຺ຕໂຕ ຊາຕິຍາ ນິຫີໂນ ຍເສນ ຈ ນິຫີໂນ.

‘‘ປຸນ ຈປຣໍ ຍທາ ເທວທຕ຺ໂຕ ຣາຊາ ອໂຫສິ ມຫາ ມຫີປຕິ ສພ຺ພກາມສມງ຺ຄີ, ຕທາ ໂພຘິສຕ຺ໂຕ ຕສ຺ສູປໂຠໂຄ ອໂຫສິ ຫຕ຺ຖິນາໂຄ ສພ຺ພລກ຺ຂຓສມ຺ປນ຺ໂນ, ຕສ຺ສ ຈາຣຸຄຕິວິລາສໍ ອສຫມາໂນ ຣາຊາ ວຘມິຈ຺ຉນ຺ໂຕ ຫຕ຺ຖາຈຣິຍໍ ເອວມໂວຈ ‘ອສິກ຺ຂິໂຕ ເຕ, ອາຈຣິຍ, ຫຕ຺ຖິນາໂຄ, ຕສ຺ສ ອາກາສຄມນໍ ນາມ ກາຣຓໍ ກໂຣຫີ’ຕິ, ຕຕ຺ຖປິ ຕາວ ໂພຘິສຕ຺ໂຕ ເທວທຕ຺ຕໂຕ ຊາຕິຍາ ນິຫີໂນ ລາມໂກ ຕິຣຈ຺ຉານຄໂຕ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ປວເນ ນຏ຺ຐາຍິໂກ, ຕທາ ໂພຘິສຕ຺ໂຕ ມຫາປຖວີ ນາມ ມກ຺ກໂຏ ອໂຫສິ, ເອຕ຺ຖປິ ຕາວ ທິສ຺ສຕິ ວິເສໂສ ມນຸສ຺ສສ຺ສ ຈ ຕິຣຈ຺ຉານຄຕສ຺ສ ຈ, ຕຕ຺ຖປິ ຕາວ ໂພຘິສຕ຺ໂຕ ເທວທຕ຺ຕໂຕ ຊາຕິຍາ ນິຫີໂນ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ໂສຓຸຕ຺ຕໂຣ ນາມ ເນສາໂທ ພລວາ ພລວຕໂຣ ນາຄພໂລ, ຕທາ ໂພຘິສຕ຺ໂຕ ຉທ຺ທນ຺ໂຕ ນາມ ນາຄຣາຊາ ອໂຫສິ. ຕທາ ໂສ ລຸທ຺ທໂກ ຕໍ ຫຕ຺ຖິນາຄໍ ຆາເຕສິ, ຕຕ຺ຖປິ ຕາວ ເທວທຕ຺ໂຕວ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ວນຈຣໂກ ອນິເກຕວາສີ, ຕທາ ໂພຘິສຕ຺ໂຕ ສກຸໂຓ ອໂຫສິ ຕິຕ຺ຕິໂຣ ມນ຺ຕຊ຺ຌາຍີ, ຕທາປິ ໂສ ວນຈຣໂກ ຕໍ ສກຸຓໍ ຆາເຕສິ, ຕຕ຺ຖປິ ຕາວ ເທວທຕ຺ໂຕວ ຊາຕິຍາ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ກລາພຸ ນາມ ກາສິຣາຊາ [ກາສິກຣາຊາ (ກ.)] ອໂຫສິ, ຕທາ ໂພຘິສຕ຺ໂຕ ຕາປໂສ ອໂຫສິ ຂນ຺ຕິວາທີ. ຕທາ ໂສ ຣາຊາ ຕສ຺ສ ຕາປສສ຺ສ ກຸທ຺ໂຘ ຫຕ຺ຖປາເທ ວໍສກຬີເຣ ວິຍ ເຉທາເປສິ, ຕຕ຺ຖປິ ຕາວ ເທວທຕ຺ໂຕ ເຍວ ອຘິກຕໂຣ ຊາຕິຍາ ຈ ຍເສນ ຈ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ວນຈໂຣ, ຕທາ ໂພຘິສຕ຺ໂຕ ນນ຺ທິໂຍ ນາມ ວານຣິນ຺ໂທ ອໂຫສິ, ຕທາປິ ໂສ ວນຈໂຣ ຕໍ ວານຣິນ຺ທໍ ຆາເຕສິ ສທ຺ຘິໍ ມາຕຣາ ກນິຏ຺ຐຠາຕິເກນ ຈ, ຕຕ຺ຖປິ ຕາວ ເທວທຕ຺ໂຕ ເຍວ ອຘິກຕໂຣ ຊາຕິຍາ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ອເຈລໂກ ກາຣມ຺ຠິໂຍ ນາມ, ຕທາ ໂພຘິສຕ຺ໂຕ ປຓ຺ຑຣໂກ ນາມ ນາຄຣາຊາ ອໂຫສິ, ຕຕ຺ຖປິ ຕາວ ເທວທຕ຺ໂຕ ເຍວ ອຘິກຕໂຣ ຊາຕິຍາ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ປວເນ ຊຏິລໂກ, ຕທາ ໂພຘິສຕ຺ໂຕ ຕຈ຺ຉໂກ ນາມ ມຫາສູກໂຣ ອໂຫສິ, ຕຕ຺ຖປິ ຕາວ ເທວທຕ຺ໂຕ ເຍວ ຊາຕິຍາ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ເຈຕີສຸ ສູຣປຣິຈໂຣ ນາມ ຣາຊາ ອໂຫສິ ອຸປຣິ ປຸຣິສມຕ຺ເຕ ຄຄເນ ເວຫາສງ຺ຄໂມ, ຕທາ ໂພຘິສຕ຺ໂຕ ກປິໂລ ນາມ ພ຺ຣາຫ຺ມໂຓ ອໂຫສິ, ຕຕ຺ຖປິ ຕາວ ເທວທຕ຺ໂຕ ເຍວ ອຘິກຕໂຣ ຊາຕິຍາ ຈ ຍເສນ ຈ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ສາໂມ ນາມ, ຕທາ ໂພຘິສຕ຺ໂຕ ຣຸຣຸ ນາມ ມິຄຣາຊາ ອໂຫສິ, ຕຕ຺ຖປິ ຕາວ ເທວທຕ຺ໂຕ ເຍວ ຊາຕິຍາ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ມນຸສ຺ໂສ ອໂຫສິ ລຸທ຺ທໂກ ປວນຈໂຣ, ຕທາ ໂພຘິສຕ຺ໂຕ ຫຕ຺ຖິນາໂຄ ອໂຫສິ, ໂສ ລຸທ຺ທໂກ ຕສ຺ສ ຫຕ຺ຖິນາຄສ຺ສ ສຕ຺ຕກ຺ຂຕ຺ຕຸໍ ທນ຺ເຕ ຉິນ຺ທິຕ຺ວາ ຫຣິ, ຕຕ຺ຖປິ ຕາວ ເທວທຕ຺ໂຕ ເຍວ ໂຍນິຍາ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ສິງ຺ຄາໂລ ອໂຫສິ ຂຕ຺ຕິຍຘມ຺ໂມ, ໂສ ຍາວຕາ ຊມ຺ພຸທີເປ ປເທສຣາຊາໂນ ເຕ ສພ຺ເພ ອນຸຍຸຕ຺ເຕ ອກາສິ, ຕທາ ໂພຘິສຕ຺ໂຕ ວິຘຸໂຣ ນາມ ປຓ຺ຑິໂຕ ອໂຫສິ, ຕຕ຺ຖປິ ຕາວ ເທວທຕ຺ໂຕ ເຍວ ຍເສນ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ຫຕ຺ຖິນາໂຄ ຫຸຕ຺ວາ ລຏຸກິກາຍ ສກຸຓິກາຍ ປຸຕ຺ຕເກ ຆາເຕສິ, ຕທາ ໂພຘິສຕ຺ໂຕປິ ຫຕ຺ຖິນາໂຄ ອໂຫສິ ຍູຖປຕິ, ຕຕ຺ຖ ຕາວ ອຸໂຠປິ ເຕ ສມສມາ ອເຫສຸໍ.

‘‘ປຸນ ຈປຣໍ ຍທາ ເທວທຕ຺ໂຕ ຍກ຺ໂຂ ອໂຫສິ ອຘມ຺ໂມ ນາມ, ຕທາ ໂພຘິສຕ຺ໂຕປິ ຍກ຺ໂຂ ອໂຫສິ ຘມ຺ໂມ ນາມ, ຕຕ຺ຖປິ ຕາວ ອຸໂຠປິ ສມສມາ ອເຫສຸໍ.

‘‘ປຸນ ຈປຣໍ ຍທາ ເທວທຕ຺ໂຕ ນາວິໂກ ອໂຫສິ ປຎ຺ຈນ຺ນໍ ກຸລສຕານໍ ອິສ຺ສໂຣ, ຕທາ ໂພຘິສຕ຺ໂຕປິ ນາວິໂກ ອໂຫສິ ປຎ຺ຈນ຺ນໍ ກຸລສຕານໍ ອິສ຺ສໂຣ, ຕຕ຺ຖປິ ຕາວ ອຸໂຠປິ ສມສມາ ອເຫສຸໍ.

‘‘ປຸນ ຈປຣໍ ຍທາ ເທວທຕ຺ໂຕ ສຕ຺ຖວາໂຫ ອໂຫສິ ປຎ຺ຈນ຺ນໍ ສກຏສຕານໍ ອິສ຺ສໂຣ, ຕທາ ໂພຘິສຕ຺ໂຕປິ ສຕ຺ຖວາໂຫ ອໂຫສິ ປຎ຺ຈນ຺ນໍ ສກຏສຕານໍ ອິສ຺ສໂຣ, ຕຕ຺ຖປິ ຕາວ ອຸໂຠປິ ສມສມາ ອເຫສຸໍ.

‘‘ປຸນ ຈປຣໍ ຍທາ ເທວທຕ຺ໂຕ ສາໂຂ ນາມ ມິຄຣາຊາ ອໂຫສິ, ຕທາ ໂພຘິສຕ຺ໂຕປິ ນິຄ຺ໂຣໂຘ ນາມ ມິຄຣາຊາ ອໂຫສິ, ຕຕ຺ຖປິ ຕາວ ອຸໂຠປິ ສມສມາ ອເຫສຸໍ.

‘‘ປຸນ ຈປຣໍ ຍທາ ເທວທຕ຺ໂຕ ສາໂຂ ນາມ ເສນາປຕິ ອໂຫສິ, ຕທາ ໂພຘິສຕ຺ໂຕປິ ນິຄ຺ໂຣໂຘ ນາມ ຣາຊາ ອໂຫສິ, ຕຕ຺ຖປິ ຕາວ ອຸໂຠປິ ສມສມາ ອເຫສຸໍ.

‘‘ປຸນ ຈປຣໍ ຍທາ ເທວທຕ຺ໂຕ ຂຓ຺ຑຫາໂລ ນາມ ພ຺ຣາຫ຺ມໂຓ ອໂຫສິ, ຕທາ ໂພຘິສຕ຺ໂຕ ຈນ຺ໂທ ນາມ ຣາຊກຸມາໂຣ ອໂຫສິ, ຕທາ ໂສ ຂຓ຺ຑຫາໂລ ເຍວ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ພ຺ຣຫ຺ມທຕ຺ໂຕ ນາມ ຣາຊາ ອໂຫສິ, ຕທາ ໂພຘິສຕ຺ໂຕ ຕສ຺ສ ປຸຕ຺ໂຕ ມຫາປທຸໂມ ນາມ ກຸມາໂຣ ອໂຫສິ, ຕທາ ໂສ ຣາຊາ ສກປຸຕ຺ຕໍ ໂຈຣປປາເຕ ຂິປາເປສິ, ຍໂຕ ກຸໂຕຈິ ປິຕາວ ປຸຕ຺ຕານໍ ອຘິກຕໂຣ ໂຫຕິ ວິສິຏ຺ໂຐຕິ, ຕຕ຺ຖປິ ຕາວ ເທວທຕ຺ໂຕ ເຍວ ອຘິກຕໂຣ.

‘‘ປຸນ ຈປຣໍ ຍທາ ເທວທຕ຺ໂຕ ມຫາປຕາໂປ ນາມ ຣາຊາ ອໂຫສິ, ຕທາ ໂພຘິສຕ຺ໂຕ ຕສ຺ສ ປຸຕ຺ໂຕ ຘມ຺ມປາໂລ ນາມ ກຸມາໂຣ ອໂຫສິ, ຕທາ ໂສ ຣາຊາ ສກປຸຕ຺ຕສ຺ສ ຫຕ຺ຖປາເທ ສີສຎ຺ຈ ເຉທາເປສິ, ຕຕ຺ຖປິ ຕາວ ເທວທຕ຺ໂຕ ເຍວ ອຸຕ຺ຕໂຣ ອຘິກຕໂຣ.

ອຊ຺ເຊຕຣຫິ ອຸໂຠປິ ສກ຺ຍກຸເລ ຊາຍິໍສຸ. ໂພຘິສຕ຺ໂຕ ພຸທ຺ໂຘ ອໂຫສິ ສພ຺ພຎ຺ຎູ ໂລກນາຍໂກ, ເທວທຕ຺ໂຕ ຕສ຺ສ ເທວາຕິເທວສ຺ສ ສາສເນ ປພ຺ພຊິຕ຺ວາ ອິທ຺ຘິໍ ນິພ຺ພຕ຺ເຕຕ຺ວາ ພຸທ຺ຘາລຍໍ ອກາສິ. ກິໍ ນຸ ໂຂ, ຠນ຺ເຕ ນາຄເສນ, ຍໍ ມຍາ ຠຓິຕໍ, ຕໍ ສພ຺ພໍ ຕຖໍ ອຸທາຫຸ ວິຕຖ’’ນ຺ຕິ?

‘‘ຍໍ ຕ຺ວໍ, ມຫາຣາຊ, ພຫຸວິຘໍ ກາຣຓໍ ໂອສາເຣສິ, ສພ຺ພໍ ຕໍ ຕເຖວ, ໂນ ອຎ຺ຎຖາ’’ຕິ. ‘‘ຍທິ, ຠນ຺ເຕ ນາຄເສນ, ກຓ຺ໂຫປິ ສຸກ຺ໂກປິ ສມສມຄຕິກາ ໂຫນ຺ຕິ, ເຕນ ຫິ ກຸສລມ຺ປິ ອກຸສລມ຺ປິ ສມສມວິປາກໍ ໂຫຕີ’’ຕິ? ‘‘ນ ຫິ, ມຫາຣາຊ, ກຸສລມ຺ປິ ອກຸສລມ຺ປິ ສມສມວິປາກໍ ໂຫຕິ, ນ ຫິ, ມຫາຣາຊ, ເທວທຕ຺ໂຕ ສພ຺ພຊເນຫິ ປຏິວິຣຸທ຺ໂຘ, ໂພຘິສຕ຺ເຕເນວ ປຏິວິຣຸທ຺ໂຘ. ໂຍ ຕສ຺ສ ໂພຘິສຕ຺ເຕນ ປຏິວິຣຸທ຺ໂຘ, ໂສ ຕສ຺ມິໍ ຕສ຺ມິໍ ເຍວ ຠເວ ປຈ຺ຈຕິ ຜລໍ ເທຕິ. ເທວທຕ຺ໂຕປິ, ມຫາຣາຊ, ອິສ຺ສຣິເຍ ຐິໂຕ ຊນປເທສຸ ອາຣກ຺ຂໍ ເທຕິ, ເສຕຸໍ ສຠໍ ປຸຎ຺ຎສາລໍ ກາເຣຕິ, ສມຓພ຺ຣາຫ຺ມຓານໍ ກປຓທ຺ຘິກວຓິພ຺ພການໍ ນາຖານາຖານໍ ຍຖາປຓິຫິຕໍ ທານໍ ເທຕິ. ຕສ຺ສ ໂສ ວິປາເກນ ຠເວ ຠເວ ສມ຺ປຕ຺ຕິໂຍ ປຏິລຠຕິ. ກສ຺ເສຕໍ, ມຫາຣາຊ, ສກ຺ກາ ວຕ຺ຕຸໍ ວິນາ ທາເນນ ທເມນ ສໍຍເມນ ອຸໂປສຖກມ຺ເມນ ສມ຺ປຕ຺ຕິໍ ອນຸຠວິສ຺ສຕີຕິ?

‘‘ຍໍ ປນ ຕ຺ວໍ, ມຫາຣາຊ, ເອວໍ ວເທສິ ‘ເທວທຕ຺ໂຕ ຈ ໂພຘິສຕ຺ໂຕ ຈ ເອກໂຕ ອນຸປຣິວຕ຺ຕນ຺ຕີ’ຕິ, ໂສ ນ ຊາຕິສຕສ຺ສ ອຈ຺ຈເຍນ ສມາຄໂມ ອໂຫສິ, ນ ຊາຕິສຫສ຺ສສ຺ສ ອຈ຺ຈເຍນ, ນ ຊາຕິສຕສຫສ຺ສສ຺ສ ອຈ຺ຈເຍນ, ກທາຈິ ກຣຫຈິ ພຫູນໍ ອໂຫຣຕ຺ຕານໍ ອຈ຺ຈເຍນ ສມາຄໂມ ອໂຫສິ. ຍໍ ປເນຕໍ, ມຫາຣາຊ, ຠຄວຕາ ກາຓກຈ຺ຉໂປປມໍ ອຸປທສ຺ສິຕໍ ມນຸສ຺ສຕ຺ຕປ຺ປຏິລາຠາຍ, ຕຖູປມໍ, ມຫາຣາຊ, ອິເມສໍ ສມາຄມໍ ຘາເຣຫິ.

‘‘ນ, ມຫາຣາຊ, ໂພຘິສຕ຺ຕສ຺ສ ເທວທຕ຺ເຕເນວ ສທ຺ຘິໍ ສມາຄໂມ ອໂຫສິ, ເຖໂຣປິ, ມຫາຣາຊ, ສາຣິປຸຕ຺ໂຕ ອເນເກສຸ ຊາຕິສຕສຫສ຺ເສສຸ ໂພຘິສຕ຺ຕສ຺ສ ປິຕາ ອໂຫສິ, ມຫາປິຕາ ອໂຫສິ, ຈູຬປິຕາ ອໂຫສິ, ຠາຕາ ອໂຫສິ, ປຸຕ຺ໂຕ ອໂຫສິ, ຠາຄິເນຍ຺ໂຍ ອໂຫສິ, ມິຕ຺ໂຕ ອໂຫສິ.

‘‘ໂພຘິສຕ຺ໂຕປິ, ມຫາຣາຊ, ອເນເກສຸ ຊາຕິສຕສຫສ຺ເສສຸ ເຖຣສ຺ສ ສາຣິປຸຕ຺ຕສ຺ສ ປິຕາ ອໂຫສິ, ມຫາປິຕາ ອໂຫສິ, ຈູຬປິຕາ ອໂຫສິ, ຠາຕາ ອໂຫສິ, ປຸຕ຺ໂຕ ອໂຫສິ, ຠາຄິເນຍ຺ໂຍ ອໂຫສິ, ມິຕ຺ໂຕ ອໂຫສິ, ສພ຺ເພປິ, ມຫາຣາຊ, ສຕ຺ຕນິກາຍປຣິຍາປນ຺ນາ ສໍສາຣໂສຕມນຸຄຕາ ສໍສາຣໂສເຕນ ວຸຍ຺ຫນ຺ຕາ ອປ຺ປິເຍຫິປິ ປິເຍຫິປິ ສມາຄຈ຺ຉນ຺ຕິ. ຍຖາ, ມຫາຣາຊ, ອຸທກໍ ໂສເຕນ ວຸຍ຺ຫມານໍ ສຸຈິອສຸຈິກລ຺ຍາຓປາປເກນ ສມາຄຈ຺ຉຕິ, ເອວເມວ ໂຂ, ມຫາຣາຊ, ສພ຺ເພປິ ສຕ຺ຕນິກາຍປຣິຍາປນ຺ນາ ສໍສາຣໂສຕມນຸຄຕາ ສໍສາຣໂສເຕນ ວຸຍ຺ຫນ຺ຕາ ອປ຺ປິເຍຫິປິ ປິເຍຫິປິ ສມາຄຈ຺ຉນ຺ຕິ. ເທວທຕ຺ໂຕ, ມຫາຣາຊ, ຍກ຺ໂຂ ສມາໂນ ອຕ຺ຕນາ ອຘມ຺ໂມ ປເຣ ອຘມ຺ເມ ນິໂຍເຊຕ຺ວາ ສຕ຺ຕປຎ຺ຎາສວສ຺ສໂກຏິໂຍ ສຏ຺ຐິ ຈ ວສ຺ສສຕສຫສ຺ສານິ ມຫານິຣເຍ ປຈ຺ຈິ, ໂພຘິສຕ຺ໂຕປິ, ມຫາຣາຊ, ຍກ຺ໂຂ ສມາໂນ ອຕ຺ຕນາ ຘມ຺ໂມ ປເຣ ຘມ຺ເມ ນິໂຍເຊຕ຺ວາ ສຕ຺ຕປຎ຺ຎາສວສ຺ສໂກຏິໂຍ ສຏ຺ຐິ ຈ ວສ຺ສສຕສຫສ຺ສານິ ສຄ຺ເຄ ໂມທິ ສພ຺ພກາມສມງ຺ຄີ, ອປິ ຈ, ມຫາຣາຊ, ເທວທຕ຺ໂຕ ອິມສ຺ມິໍ ຠເວ ພຸທ຺ຘໍ ອນາສາທນີຍມາສາທຍິຕ຺ວາ ສມຄ຺ຄຎ຺ຈ ສງ຺ຆໍ ຠິນ຺ທິຕ຺ວາ ປຖວິໍ ປາວິສິ, ຕຖາຄໂຕ ພຸຊ຺ຌິຕ຺ວາ ສພ຺ພຘມ຺ເມ ປຣິນິພ຺ພຸໂຕ ອຸປຘິສງ຺ຂເຍ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ກຸສລາກຸສລສມວິສມປຎ຺ໂຫ ສຕ຺ຕໂມ.