໑໐. ພຸທ຺ຘສພ຺ພຎ຺ຎຸຠາວປຎ຺ໂຫ

໑໐. ‘‘ຠນ຺ເຕ ນາຄເສນ, ຕຸມ຺ເຫ ຠຓຖ ‘ຕຖາຄໂຕ ສພ຺ພຎ຺ຎູ’ຕິ. ປຸນ ຈ ຠຓຖ ‘ຕຖາຄເຕນ ສາຣິປຸຕ຺ຕໂມຄ຺ຄລ຺ລານປ຺ປມຸເຂ ຠິກ຺ຂຸສງ຺ເຆ ປຓາມິເຕ ຈາຕຸເມຍ຺ຍກາ ຈ ສກ຺ຍາ ພ຺ຣຫ຺ມາ ຈ ສຫມ຺ປຕິ ພີຊູປມຎ຺ຈ ວຈ຺ຉຕຣຸຓູປມຎ຺ຈ ອຸປທສ຺ເສຕ຺ວາ ຠຄວນ຺ຕໍ ປສາເທສຸໍ ຂມາເປສຸໍ ນິຊ຺ຌຕ຺ຕໍ ອກໍສູ’ຕິ. ກິໍ ນຸ ໂຂ, ຠນ຺ເຕ ນາຄເສນ, ອຎ຺ຎາຕາ ຕາ ອຸປມາ ຕຖາຄຕສ຺ສ, ຍາຫິ ຕຖາຄໂຕ ອຸປມາຫິ ໂອຣໂຕ ຂມິໂຕ ອຸປສນ຺ໂຕ ນິຊ຺ຌຕ຺ຕໍ ຄໂຕ? ຍທິ, ຠນ຺ເຕ ນາຄເສນ, ຕຖາຄຕສ຺ສ ຕາ ອຸປມາ ອຎ຺ຎາຕາ, ເຕນ ຫິ ພຸທ຺ໂຘ ອສພ຺ພຎ຺ຎູ, ຍທິ ຎາຕາ, ເຕນ ຫິ ໂອກສ຺ສ ປສຍ຺ຫ ວີມໍສາເປກ຺ໂຂ ປຓາເມສິ, ເຕນ ຫິ ຕສ຺ສ ອກາຣຸຎ຺ຎຕາ ສມ຺ຠວຕິ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ສພ຺ພຎ຺ຎູ, ມຫາຣາຊ, ຕຖາຄໂຕ, ຕາຫິ ຈ ອຸປມາຫິ ຠຄວາ ປສນ຺ໂນ ໂອຣໂຕ ຂມິໂຕ ອຸປສນ຺ໂຕ ນິຊ຺ຌຕ຺ຕໍ ຄໂຕ. ຘມ຺ມສ຺ສາມີ, ມຫາຣາຊ, ຕຖາຄໂຕ, ຕຖາຄຕປ຺ປເວທິເຕເຫວ ເຕ ໂອປມ຺ເມຫິ ຕຖາຄຕໍ ອາຣາເຘສຸໍ ໂຕເສສຸໍ ປສາເທສຸໍ, ເຕສຎ຺ຈ ຕຖາຄໂຕ ປສນ຺ໂນ ‘ສາຘູ’ຕິ ອພ຺ຠານຸໂມທິ.

‘‘ຍຖາ, ມຫາຣາຊ, ອິຕ຺ຖີ ສາມິກສ຺ສ ສນ຺ຕເກເນວ ຘເນນ ສາມິກໍ ອາຣາເຘຕິ ໂຕເສຕິ ປສາເທຕິ, ຕຎ຺ຈ ສາມິໂກ ‘ສາຘູ’ຕິ ອພ຺ຠານຸໂມທຕິ, ເອວເມວ ໂຂ, ມຫາຣາຊ, ຈາຕຸເມຍ຺ຍກາ ຈ ສກ຺ຍາ ພ຺ຣຫ຺ມາ ຈ ສຫມ຺ປຕິ ຕຖາຄຕປ຺ປເວທິເຕເຫວ ໂອປມ຺ເມຫິ ຕຖາຄຕໍ ອາຣາເຘສຸໍ ໂຕເສສຸໍ ປສາເທສຸໍ, ເຕສຎ຺ຈ ຕຖາຄໂຕ ປສນ຺ໂນ ‘ສາຘູ’ຕິ ອພ຺ຠານຸໂມທິ.

‘‘ຍຖາ ວາ ປນ, ມຫາຣາຊ, ກປ຺ປໂກ ຣຎ຺ໂຎ ສນ຺ຕເກເນວ ສຸວຓ຺ຓຜຓເກນ ຣຎ຺ໂຎ ອຸຕ຺ຕມງ຺ຄໍ ປສາຘຍມາໂນ ຣາຊານໍ ອາຣາເຘຕິ ໂຕເສຕິ ປສາເທຕິ, ຕສ຺ສ ຈ ຣາຊາ ປສນ຺ໂນ ‘ສາຘູ’ຕິ ອພ຺ຠານຸໂມທຕິ, ຍຖິຈ຺ຉິຕມນຸປ຺ປເທຕິ, ເອວເມວ ໂຂ, ມຫາຣາຊ, ຈາຕຸເມຍ຺ຍກາ ຈ ສກ຺ຍາ ພ຺ຣຫ຺ມາ ຈ ສຫມ຺ປຕິ ຕຖາຄຕປ຺ປເວທິເຕເຫວ ໂອປມ຺ເມຫິ ຕຖາຄຕໍ ອາຣາເຘສຸໍ ໂຕເສສຸໍ ປສາເທສຸໍ, ເຕສຎ຺ຈ ຕຖາຄໂຕ ປສນ຺ໂນ ‘ສາຘູ’ຕິ ອພ຺ຠານຸໂມທິ.

‘‘ຍຖາ ວາ ປນ, ມຫາຣາຊ, ສທ຺ຘິວິຫາຣິໂກ ອຸປຊ຺ຌາຍາຠຕໍ ປິຓ຺ຑປາຕໍ ຄເຫຕ຺ວາ ອຸປຊ຺ຌາຍສ຺ສ ອຸປນາເມນ຺ໂຕ ອຸປຊ຺ຌາຍໍ ອາຣາເຘຕິ ໂຕເສຕິ ປສາເທຕິ, ຕຎ຺ຈ ອຸປຊ຺ຌາໂຍ ປສນ຺ໂນ ‘ສາຘູ’ຕິ ອພ຺ຠານຸໂມທຕິ, ເອວເມວ ໂຂ, ມຫາຣາຊ, ຈາຕຸເມຍ຺ຍກາ ຈ ສກ຺ຍາ ພ຺ຣຫ຺ມາ ຈ ສຫມ຺ປຕິ ຕຖາຄຕປ຺ປເວທິເຕເຫວ ໂອປມ຺ເມຫິ ຕຖາຄຕໍ ອາຣາເຘສຸໍ ໂຕເສສຸໍ ປສາເທສຸໍ, ເຕສຎ຺ຈ ຕຖາຄໂຕ ປສນ຺ໂນ ‘ສາຘູ’ຕິ ອພ຺ຠານຸໂມທິຕ຺ວາ ສພ຺ພທຸກ຺ຂປຣິມຸຕ຺ຕິຍາ ຘມ຺ມໍ ເທເສສີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີຕິ.

ພຸທ຺ຘສພ຺ພຎ຺ຎຸຠາວປຎ຺ໂຫ ທສໂມ.

ສພ຺ພຎ຺ຎຸຕຎາຓວຄ຺ໂຄ ຈຕຸຕ຺ໂຖ.

ອິມສ຺ມິໍ ວຄ຺ເຄ ທສ ປຎ຺ຫາ.