໑໒. ຠິກ຺ຂຸປຓາມິຕປຎ຺ໂຫ

໑໒. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ‘ອກ຺ໂກຘໂນ ວິຄຕຂິໂລຫມສ຺ມີ’ຕິ, ປຸນ ຈ ຕຖາຄໂຕ ເຖເຣ ສາຣິປຸຕ຺ຕໂມຄ຺ຄລ຺ລາເນ ສປຣິເສ ປຓາເມສິ, ກິໍ ນຸ ໂຂ, ຠນ຺ເຕ ນາຄເສນ, ຕຖາຄໂຕ ກຸປິໂຕ ປຣິສໍ ປຓາເມສິ, ອຸທາຫຸ ຕຸຏ຺ໂຐ ປຓາເມສິ, ເອຕໍ ຕາວ ຊານາຫິ ອິມໍ ນາມາຕິ? ຍທິ, ຠນ຺ເຕ ນາຄເສນ, ກຸປິໂຕ ປຣິສໍ ປຓາເມສິ, ເຕນ ຫິ ຕຖາຄຕສ຺ສ ໂກໂຘ ອປ຺ປຏິວຕ຺ຕິໂຕ, ຍທິ ຕຸຏ຺ໂຐ ປຓາເມສິ, ເຕນ ຫິ ອວຕ຺ຖຸສ຺ມິໍ ອຊານນ຺ເຕນ ປຓາມິຕາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ອກ຺ໂກຘໂນ ວິຄຕຂິໂລຫມສ຺ມີ’ຕິ, ປຓາມິຕາ ຈ ເຖຣາ ສາຣິປຸຕ຺ຕໂມຄ຺ຄລ຺ລານາ ສປຣິສາ, ຕຎ຺ຈ ປນ ນ ໂກເປນ, ອິຘ, ມຫາຣາຊ, ໂກຈິເທວ ປຸຣິໂສ ມຫາປຖວິຍາ ມູເລ ວາ ຂາຓຸເກ ວາ ປາສາເຓ ວາ ກຐເລ ວາ ວິສເມ ວາ ຠູມິຠາເຄ ຂລິຕ຺ວາ ປຕຕິ, ອປິ ນຸ ໂຂ, ມຫາຣາຊ, ມຫາປຖວີ ກຸປິຕາ ຕໍ ປາເຕຕີ’’ຕິ? ‘‘ນ ຫິ, ຠນ຺ເຕ, ນຕ຺ຖິ ມຫາປຖວິຍາ ໂກໂປ ວາ ປສາໂທ ວາ, ອນຸນຍປ຺ປຏິຆວິປ຺ປມຸຕ຺ຕາ ມຫາປຖວີ, ສຍເມວ ໂສ ອລໂສ ຂລິຕ຺ວາ ປຕິໂຕຕິ. ເອວເມວ ໂຂ, ມຫາຣາຊ, ນຕ຺ຖິ ຕຖາຄຕານໍ ໂກໂປ ວາ ປສາໂທ ວາ, ອນຸນຍປ຺ປຏິຆວິປ຺ປມຸຕ຺ຕາ ຕຖາຄຕາ ອຣຫນ຺ໂຕ ສມ຺ມາສມ຺ພຸທ຺ຘາ, ອຖ ໂຂ ສຍໍ ກເຕເນວ ເຕ ອຕ຺ຕໂນ ອປຣາເຘນ ປຓາມິຕາ.

‘‘ອິຘ ປນ, ມຫາຣາຊ, ມຫາສມຸທ຺ໂທ ນ ມເຕນ ກຸຓເປນ ສໍວສຕິ, ຍໍ ໂຫຕິ ມຫາສມຸທ຺ເທ ມຕໍ ກຸຓປໍ, ຕໍ ຂິປ຺ປເມວ ນິຈ຺ຉຸຠຕິ ຖລໍ ອຸສ຺ສາເຣຕິ. ອປິ ນຸ ໂຂ, ມຫາຣາຊ, ມຫາສມຸທ຺ໂທ ກຸປິໂຕ ຕໍ ກຸຓປໍ ນິຈ຺ຉຸຠຕີ’’ຕິ? ‘‘ນ ຫິ, ຠນ຺ເຕ, ນຕ຺ຖິ ມຫາສມຸທ຺ທສ຺ສ ໂກໂປ ວາ ປສາໂທ ວາ, ອນຸນຍປ຺ປຏິຆວິປ຺ປມຸຕ຺ໂຕ ມຫາສມຸທ຺ໂທ’’ຕິ. ‘‘ເອວເມວ ໂຂ, ມຫາຣາຊ, ນຕ຺ຖິ ຕຖາຄຕານໍ ໂກໂປ ວາ ປສາໂທ ວາ, ອນຸນຍປ຺ປຏິຆວິປ຺ປມຸຕ຺ຕາ ຕຖາຄຕາ ອຣຫນ຺ໂຕ ສມ຺ມາສມ຺ພຸທ຺ຘາ, ອຖ ໂຂ ສຍໍ ກເຕເນວ ເຕ ອຕ຺ຕໂນ ອປຣາເຘນ ປຓາມິຕາ.

‘‘ຍຖາ, ມຫາຣາຊ, ປຖວິຍາ ຂລິໂຕ ປຕີຍຕິ, ເອວໍ ຊິນສາສນວເຣ ຂລິໂຕ ປຓາມີຍຕິ. ຍຖາ, ມຫາຣາຊ, ສມຸທ຺ເທ ມຕໍ ກຸຓປໍ ນິຈ຺ຉຸຠີຍຕິ, ເອວໍ ຊິນສາສນວເຣ ຂລິໂຕ ປຓາມີຍຕິ. ຍໍ ປນ ເຕ, ມຫາຣາຊ, ຕຖາຄໂຕ ປຓາເມສິ, ເຕສໍ ອຕ຺ຖກາໂມ ຫິຕກາໂມ ສຸຂກາໂມ ວິສຸທ຺ຘິກາໂມ ‘ເອວໍ ອິເມ ຊາຕິຊຣາພ຺ຍາຘິມຣເຓຫິ ປຣິມຸຈ຺ຈິສ຺ສນ຺ຕີ’ຕິ ປຓາເມສີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ຠິກ຺ຂຸປຓາມິຕປຎ຺ໂຫ ທ຺ວາທສໂມ.

ປຓາມິຕວຄ຺ໂຄ ຕຕິໂຍ.

ອິມສ຺ມິໍ ວຄ຺ເຄ ທ຺ວາທສ ປຎ຺ຫາ.