໑໑. ອຫິໍສານິຄ຺ຄຫປຎ຺ໂຫ

໑໑. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ‘ອຫິໍສຍໍ ປຣໍ ໂລເກ, ປິໂຍ ໂຫຫິສິ ມາມໂກ’ຕິ. ປຸນ ຈ ຠຓິຕໍ ‘ນິຄ຺ຄຓ຺ເຫ ນິຄ຺ຄຫາຣຫໍ, ປຄ຺ຄຓ຺ເຫ ປຄ຺ຄຫາຣຫ’ນ຺ຕິ. ນິຄ຺ຄໂຫ ນາມ, ຠນ຺ເຕ ນາຄເສນ, ຫຕ຺ຖຈ຺ເຉໂທ ປາທຈ຺ເຉໂທ ວໂຘ ພນ຺ຘນໍ ກາຣຓາ ມາຣຓໍ ສນ຺ຕຕິວິໂກປນໍ, ນ ເອຕໍ ວຈນໍ ຠຄວໂຕ ຍຸຕ຺ຕໍ, ນ ຈ ຠຄວາ ອຣຫຕິ ເອຕໍ ວຈນໍ ວຕ຺ຕຸໍ. ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ອຫິໍສຍໍ ປຣໍ ໂລເກ, ປິໂຍ ໂຫຫິສິ ມາມໂກ’’ຕິ, ເຕນ ຫິ ‘‘ນິຄ຺ຄຓ຺ເຫ ນິຄ຺ຄຫາຣຫໍ, ປຄ຺ຄຓ຺ເຫ ປຄ຺ຄຫາຣຫ’’ນ຺ຕິ ຍໍ ວຈນໍ, ຕໍ ມິຈ຺ຉາ. ຍທິ ຕຖາຄເຕນ ຠຓິຕໍ ‘‘ນິຄ຺ຄຓ຺ເຫ ນິຄ຺ຄຫາຣຫໍ, ປຄ຺ຄຓ຺ເຫ ປຄ຺ຄຫາຣຫ’’ນ຺ຕິ, ເຕນ ຫິ ‘‘ອຫິໍສຍໍ ປຣໍ ໂລເກ, ປິໂຍ ໂຫຫິສິ ມາມໂກ’’ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ອຫິໍສຍໍ ປຣໍ ໂລເກ, ປິໂຍ ໂຫຫິສິ ມາມໂກ’ຕິ, ຠຓິຕຎ຺ຈ ‘ນິຄ຺ຄຓ຺ເຫ ນິຄ຺ຄຫາຣຫໍ, ປຄ຺ຄຓ຺ເຫ ປຄ຺ຄຫາຣຫ’ນ຺ຕິ. ‘ອຫິໍສຍໍ ປຣໍ ໂລເກ, ປິໂຍ ໂຫຫິສິ ມາມໂກ’ຕິ ສພ຺ເພສໍ, ມຫາຣາຊ, ຕຖາຄຕານໍ ອນຸມຕໍ ເອຕໍ, ເອສາ ອນຸສິຏ຺ຐິ, ເອສາ ຘມ຺ມເທສນາ, ຘມ຺ໂມ ຫິ, ມຫາຣາຊ, ອຫິໍສາລກ຺ຂໂຓ, ສຠາວວຈນໍ ເອຕໍ. ຍໍ ປນ, ມຫາຣາຊ, ຕຖາຄໂຕ ອາຫ ‘ນິຄ຺ຄຓ຺ເຫ ນິຄ຺ຄຫາຣຫໍ, ປຄ຺ຄຓ຺ເຫ ປຄ຺ຄຫາຣຫ’ນ຺ຕິ, ຠາສາ ເອສາ, ອຸທ຺ຘຕໍ, ມຫາຣາຊ, ຈິຕ຺ຕໍ ນິຄ຺ຄເຫຕພ຺ພໍ, ລີນໍ ຈິຕ຺ຕໍ ປຄ຺ຄເຫຕພ຺ພໍ. ອກຸສລໍ ຈິຕ຺ຕໍ ນິຄ຺ຄເຫຕພ຺ພໍ, ກຸສລໍ ຈິຕ຺ຕໍ ປຄ຺ຄເຫຕພ຺ພໍ. ອໂຍນິໂສ ມນສິກາໂຣ ນິຄ຺ຄເຫຕພ຺ໂພ, ໂຍນິໂສ ມນສິກາໂຣ ປຄ຺ຄເຫຕພ຺ໂພ. ມິຈ຺ຉາປຏິປນ຺ໂນ ນິຄ຺ຄເຫຕພ຺ໂພ, ສມ຺ມາປຏິປນ຺ໂນ ປຄ຺ຄເຫຕພ຺ໂພ. ອນຣິໂຍ ນິຄ຺ຄເຫຕພ຺ໂພ ອຣິໂຍ ປຄ຺ຄເຫຕພ຺ໂພ. ໂຈໂຣ ນິຄ຺ຄເຫຕພ຺ໂພ, ອໂຈໂຣ ປຄ຺ຄເຫຕພ຺ໂພ’’ຕິ.

‘‘ໂຫຕຸ, ຠນ຺ເຕ ນາຄເສນ, ອິທານິ ຕ຺ວໍ ປຈ຺ຈາຄໂຕສິ ມມ ວິສຍໍ, ຍມຫໍ ປຸຈ຺ຉາມິ, ໂສ ເມ ອຕ຺ໂຖ ອຸປຄໂຕ. ໂຈໂຣ ປນ, ຠນ຺ເຕ ນາຄເສນ, ນິຄ຺ຄຓ຺ຫນ຺ເຕນ ກຖໍ ນິຄ຺ຄເຫຕພ຺ໂພ’’ຕິ? ‘‘ໂຈໂຣ, ມຫາຣາຊ, ນິຄ຺ຄຓ຺ຫນ຺ເຕນ ເອວໍ ນິຄ຺ຄເຫຕພ຺ໂພ, ປຣິຠາສນີໂຍ ປຣິຠາສິຕພ຺ໂພ, ທຓ຺ຑນີໂຍ ທຓ຺ເຑຕພ຺ໂພ, ປພ຺ພາຊນີໂຍ ປພ຺ພາເຊຕພ຺ໂພ, ພນ຺ຘນີໂຍ ພນ຺ຘິຕພ຺ໂພ, ຆາຕນີໂຍ ຆາເຕຕພ຺ໂພ’’ຕິ. ‘‘ຍໍ ປນ, ຠນ຺ເຕ ນາຄເສນ, ໂຈຣານໍ ຆາຕນໍ, ຕໍ ຕຖາຄຕານໍ ອນຸມຕ’’ນ຺ຕິ? ‘‘ນ ຫິ, ມຫາຣາຊາ’’ຕິ. ‘‘ກິສ຺ສ ປນ ໂຈໂຣ ອນຸສາສນີໂຍ ອນຸມໂຕ ຕຖາຄຕານ’’ນ຺ຕິ? ‘‘ໂຍ ໂສ, ມຫາຣາຊ, ຆາຕີຍຕິ, ນ ໂສ ຕຖາຄຕານໍ ອນຸມຕິຍາ ຆາຕີຍຕິ, ສຍໍກເຕນ ໂສ ຆາຕີຍຕິ, ອປິ ຈ ຘມ຺ມານຸສິຏ຺ຐິຍາ ອນຸສາສີຍຕິ, ສກ຺ກາ ປນ, ມຫາຣາຊ, ຕຍາ ປຸຣິສໍ ອກາຣກໍ ອນປຣາຘໍ ວີຖິຍໍ ຈຣນ຺ຕໍ ຄເຫຕ຺ວາ ຆາຕຍິຕຸ’’ນ຺ຕິ? ‘‘ນ ສກ຺ກາ, ຠນ຺ເຕ’’ຕິ. ‘‘ເກນ ກາຣເຓນ, ມຫາຣາຊາ’’ຕິ? ‘‘ອກາຣກຕ຺ຕາ, ຠນ຺ເຕ’’ຕິ. ‘‘ເອວເມວ ໂຂ, ມຫາຣາຊ, ນ ໂຈໂຣ ຕຖາຄຕານໍ ອນຸມຕິຍາ ຫຎ຺ຎຕິ, ສຍໍກເຕນ ໂສ ຫຎ຺ຎຕິ, ກິໍ ປເນຕ຺ຖ ອນຸສາສໂກ ກິຎ຺ຈິ ໂທສໍ ອາປຊ຺ຊຕີ’’ຕິ? ‘‘ນ ຫິ ຠນ຺ເຕ’’ຕິ. ‘‘ເຕນ ຫິ, ມຫາຣາຊ, ຕຖາຄຕານໍ ອນຸສິຏ຺ຐິ ສມ຺ມານຸສິຏ຺ຐິ ໂຫຕີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ອຫິໍສານິຄ຺ຄຫປຎ຺ໂຫ ເອກາທສໂມ.