໑໐. ວຓ຺ຓຠຓນປຎ຺ໂຫ

໑໐. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ‘ມມໍ ວາ, ຠິກ຺ຂເວ, ປເຣ ວຓ຺ຓໍ ຠາເສຍ຺ຍຸໍ, ຘມ຺ມສ຺ສ ວາ, ສງ຺ຆສ຺ສ ວາ ວຓ຺ຓໍ ຠາເສຍ຺ຍຸໍ, ຕຕ຺ຣ ຕຸມ຺ເຫຫິ ນ ອານນ຺ໂທ, ນ ໂສມນສ຺ສໍ, ນ ເຈຕໂສ ອຸປ຺ປິລາວິຕຕ຺ຕໍ ກຣຓີຍ’ນ຺ຕິ ປຸນ ຈ ຕຖາຄໂຕ ເສລສ຺ສ ພ຺ຣາຫ຺ມຓສ຺ສ ຍຖາຠຸຈ຺ເຈ ວຓ຺ເຓ ຠຎ຺ຎມາເນ ອານນ຺ທິໂຕ ສຸມໂນ ອຸປ຺ປິລາວິໂຕ ຠິຍ຺ໂຍ ອຸຕ຺ຕຣິໍ ສກຄຸຓໍ ປກິຕ຺ເຕສິ –

‘‘‘ຣາຊາຫມສ຺ມິ ເສລາຕິ, ຘມ຺ມຣາຊາ ອນຸຕ຺ຕໂຣ;

ຘມ຺ເມນ ຈກ຺ກໍ ວຕ຺ເຕມິ, ຈກ຺ກໍ ອປ຺ປຏິວຕ຺ຕິຍ’ນ຺ຕິ [ມ. ນິ. ໒.໓໙໙].

‘‘ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ມມໍ ວາ, ຠິກ຺ຂເວ, ປເຣ ວຓ຺ຓໍ ຠາເສຍ຺ຍຸໍ, ຘມ຺ມສ຺ສ ວາ ສງ຺ຆສ຺ສ ວາ ວຓ຺ຓໍ ຠາເສຍ຺ຍຸໍ, ຕຕ຺ຣ ຕຸມ຺ເຫຫິ ນ ອານນ຺ໂທ, ນ ໂສມນສ຺ສໍ, ນ ເຈຕໂສ ອຸປ຺ປິລາວິຕຕ຺ຕໍ ກຣຓີຍ’ນ຺ຕິ, ເຕນ ຫິ ເສລສ຺ສ ພ຺ຣາຫ຺ມຓສ຺ສ ຍຖາຠຸຈ຺ເຈ ວຓ຺ເຓ ຠຎ຺ຎມາເນ ອານນ຺ທິໂຕ ສຸມໂນ ອຸປ຺ປິລາວິໂຕ ຠິຍ຺ໂຍ ອຸຕ຺ຕຣິໍ ສກຄຸຓໍ ປກິຕ຺ເຕສີຕິ ຍໍ ວຈນໍ, ຕໍ ມິຈ຺ຉາ. ຍທິ ເສລສ຺ສ ພ຺ຣາຫ຺ມຓສ຺ສ ຍຖາຠຸຈ຺ເຈ ວຓ຺ເຓ ຠຎ຺ຎມາເນ ອານນ຺ທິໂຕ ສຸມໂນ ອຸປ຺ປິລາວິໂຕ ຠິຍ຺ໂຍ ອຸຕ຺ຕຣິໍ ສກຄຸຓໍ ປກິຕ຺ເຕສິ, ເຕນ ຫິ ‘ມມໍ ວາ, ຠິກ຺ຂເວ, ປເຣ ວຓ຺ຓໍ ຠາເສຍ຺ຍຸໍ, ຘມ຺ມສ຺ສ ວາ ສງ຺ຆສ຺ສ ວາ ວຓ຺ຓໍ ຠາເສຍ຺ຍຸໍ, ຕຕ຺ຣ ຕຸມ຺ເຫຫິ ນ ອານນ຺ໂທ, ນ ໂສມນສ຺ສໍ, ນ ເຈຕໂສ ອຸປ຺ປິລາວິຕຕ຺ຕໍ ກຣຓີຍ’ນ຺ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ມມໍ ວາ, ຠິກ຺ຂເວ, ປເຣ ວຓ຺ຓໍ ຠາເສຍ຺ຍຸໍ, ຘມ຺ມສ຺ສ ວາ ສງ຺ຆສ຺ສ ວາ ວຓ຺ຓໍ ຠາເສຍ຺ຍຸໍ, ຕຕ຺ຣ ຕຸມ຺ເຫຫິ ນ ອານນ຺ໂທ, ນ ໂສມນສ຺ສໍ, ນ ເຈຕໂສ ອຸປ຺ປິລາວິຕຕ຺ຕໍ ກຣຓີຍ’ນ຺ຕິ. ເສລສ຺ສ ຈ ພ຺ຣາຫ຺ມຓສ຺ສ ຍຖາຠຸຈ຺ເຈ ວຓ຺ເຓ ຠຎ຺ຎມາເນ ຠິຍ຺ໂຍ ອຸຕ຺ຕຣິໍ ສກຄຸຓໍ ປກິຕ຺ຕິຕໍ –

‘‘‘ຣາຊາຫມສ຺ມິ ເສລາຕິ, ຘມ຺ມຣາຊາ ອນຸຕ຺ຕໂຣ;

ຘມ຺ເມນ ຈກ຺ກໍ ວຕ຺ເຕມິ, ຈກ຺ກໍ ອປ຺ປຏິວຕ຺ຕິຍ’ນ຺ຕິ.

‘‘ປຐມໍ, ມຫາຣາຊ, ຠຄວຕາ ຘມ຺ມສ຺ສ ສຠາວສຣສລກ຺ຂຓໍ ສຠາວໍ ອວິຕຖໍ ຠູຕໍ ຕຈ຺ຉໍ ຕຖຕ຺ຖໍ ປຣິທີປຍມາເນນ ຠຓິຕໍ ‘ມມໍ ວາ ຠິກ຺ຂເວ, ປເຣ ວຓ຺ຓໍ ຠາເສຍ຺ຍຸໍ, ຘມ຺ມສ຺ສ ວາ ສງ຺ຆສ຺ສ ວາ ວຓ຺ຓໍ ຠາເສຍ຺ຍຸໍ, ຕຕ຺ຣ ຕຸມ຺ເຫຫິ ນ ອານນ຺ໂທ, ນ ໂສມນສ຺ສໍ, ນ ເຈຕໂສ ອຸປ຺ປິລາວິຕຕ຺ຕໍ ກຣຓີຍ’ນ຺ຕິ. ຍໍ ປນ ຠຄວຕາ ເສລສ຺ສ ພ຺ຣາຫ຺ມຓສ຺ສ ຍຖາຠຸຈ຺ເຈ ວຓ຺ເຓ ຠຎ຺ຎມາເນ ຠິຍ຺ໂຍ ອຸຕ຺ຕຣິໍ ສກຄຸຓໍ ປກິຕ຺ຕິຕໍ ‘ຣາຊາຫມສ຺ມິ ເສລາຕິ, ຘມ຺ມຣາຊາ ອນຸຕ຺ຕໂຣ’ຕິ ຕໍ ນ ລາຠເຫຕຸ, ນ ຍສເຫຕຸ, ນ ອຕ຺ຕເຫຕຸ, ນ ປກ຺ຂເຫຕຸ, ນ ອນ຺ເຕວາສິກມ຺ຍຕາຍ, ອຖ ໂຂ ອນຸກມ຺ປາຍ ກາຣຸຎ຺ເຎນ ຫິຕວເສນ ເອວໍ ອິມສ຺ສ ຘມ຺ມາຠິສມໂຍ ຠວິສ຺ສຕິ ຕິຓ຺ຓຎ຺ຈ ມາຓວກສຕານນ຺ຕິ, ເອວໍ ຠິຍ຺ໂຍ ອຸຕ຺ຕຣິໍ ສກຄຸຓໍ ຠຓິຕໍ ‘ຣາຊາຫມສ຺ມິ ເສລາຕິ, ຘມ຺ມຣາຊາ ອນຸຕ຺ຕໂຣ’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ວຓ຺ຓຠຓນປຎ຺ໂຫ ທສໂມ.