໘. ອເຠຊ຺ຊປຣິສປຎ຺ໂຫ

໘. ‘‘ຠນ຺ເຕ ນາຄເສນ, ຕຸມ຺ເຫ ຠຓຖ ‘ຕຖາຄໂຕ ອເຠຊ຺ຊປຣິໂສ’ຕິ, ປຸນ ຈ ຠຓຖ ‘ເທວທຕ຺ເຕນ ເອກປ຺ປຫາຣໍ ປຎ຺ຈ ຠິກ຺ຂຸສຕານິ ຠິນ຺ນານີ’ຕິ. ຍທິ, ຠນ຺ເຕ ນາຄເສນ, ຕຖາຄໂຕ ອເຠຊ຺ຊປຣິໂສ, ເຕນ ຫິ ເທວທຕ຺ເຕນ ເອກປ຺ປຫາຣໍ ປຎ຺ຈ ຠິກ຺ຂຸສຕານິ ຠິນ຺ນານີຕິ ຍໍ ວຈນໍ, ຕໍ ມິຈ຺ຉາ. ຍທິ ເທວທຕ຺ເຕນ ເອກປ຺ປຫາຣໍ ປຎ຺ຈ ຠິກ຺ຂຸສຕານິ ຠິນ຺ນານິ, ເຕນ ຫິ ‘ຕຖາຄໂຕ ອເຠຊ຺ຊປຣິໂສ’ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ຄມ຺ຠີໂຣ ທຸນ຺ນິເວຐິໂຍ, ຄຓ຺ຐິໂຕປິ ຄຓ຺ຐິຕໂຣ, ເອຕ຺ຖາຍໍ ຊໂນ ອາວໂຏ ນິວຸໂຕ ໂອວຸໂຕ ປິຫິໂຕ ປຣິໂຍນທ຺ໂຘ, ເອຕ຺ຖ ຕວ ຎາຓພລໍ ທສ຺ເສຫິ ປຣວາເທສູ’’ຕິ.

‘‘ອເຠຊ຺ຊປຣິໂສ, ມຫາຣາຊ, ຕຖາຄໂຕ, ເທວທຕ຺ເຕນ ຈ ເອກປ຺ປຫາຣໍ ປຎ຺ຈ ຠິກ຺ຂຸສຕານິ ຠິນ຺ນານິ, ຕຎ຺ຈ ປນ ເຠທກສ຺ສ ພເລນ, ເຠທເກ ວິຊ຺ຊມາເນ ນຕ຺ຖິ, ມຫາຣາຊ, ອເຠຊ຺ຊໍ ນາມ. ເຠທເກ ສຕິ ມາຕາປິ ປຸຕ຺ເຕນ ຠິຊ຺ຊຕິ, ປຸຕ຺ໂຕປິ ມາຕຣາ ຠິຊ຺ຊຕິ, ປິຕາປິ ປຸຕ຺ເຕນ ຠິຊ຺ຊຕິ, ປຸຕ຺ໂຕປິ ປິຕຣາ ຠິຊ຺ຊຕິ, ຠາຕາປິ ຠຄິນິຍາ ຠິຊ຺ຊຕິ, ຠຄິນີປິ ຠາຕຣາ ຠິຊ຺ຊຕິ, ສຫາໂຍປິ ສຫາເຍນ ຠິຊ຺ຊຕິ, ນາວາປິ ນານາທາຣຸສງ຺ຆຏິຕາ ອູມິເວຄສມ຺ປຫາເຣນ ຠິຊ຺ຊຕິ, ຣຸກ຺ໂຂປິ ມຘຸກປ຺ປສມ຺ປນ຺ນຜໂລ ອນິລພລເວຄາຠິຫໂຕ ຠິຊ຺ຊຕິ, ສຸວຓ຺ຓມ຺ປິ ຊາຕິມນ຺ຕໍ [ຊາຕຣູປມ຺ປິ (ສີ.)] ໂລເຫນ ຠິຊ຺ຊຕິ. ອປິ ຈ, ມຫາຣາຊ, ເນໂສ ອຘິປ຺ປາໂຍ ວິຎ຺ຎູນໍ, ເນສາ ພຸທ຺ຘານໍ ອຘິມຸຕ຺ຕິ, ເນໂສ ປຓ຺ຑິຕານໍ ຉນ຺ໂທ ‘ຕຖາຄໂຕ ເຠຊ຺ຊປຣິໂສ’ຕິ. ອປິ ເຈຕ຺ຖ ກາຣຓໍ ອຕ຺ຖິ, ເຍນ ກາຣເຓນ ຕຖາຄໂຕ ວຸຈ຺ຈຕິ ‘ອເຠຊ຺ຊປຣິໂສ’ຕິ. ກຕມໍ ເອຕ຺ຖ ກາຣຓໍ? ຕຖາຄຕສ຺ສ, ມຫາຣາຊ, ກເຕນ ອທາເນນ ວາ ອປ຺ປິຍວຈເນນ ວາ ອນຕ຺ຖຈຣິຍາຍ ວາ ອສມານຕ຺ຕຕາຍ ວາ ຍໂຕ ກຸໂຕຈິ ຈຣິຍໍ ຈຣນ຺ຕສ຺ສປິ ປຣິສາ ຠິນ຺ນາຕິ ນ ສຸຕປຸພ຺ພໍ, ເຕນ ກາຣເຓນ ຕຖາຄໂຕ ວຸຈ຺ຈຕິ ‘ອເຠຊ຺ຊປຣິໂສ’ຕິ. ຕຍາເປຕໍ, ມຫາຣາຊ, ຎາຕພ຺ພໍ ‘ອຕ຺ຖິ ກິຎ຺ຈິ ນວງ຺ເຄ ພຸທ຺ຘວຈເນ ສຸຕ຺ຕາຄຕໍ, ອິມິນາ ນາມ ກາຣເຓນ ໂພຘິສຕ຺ຕສ຺ສ ກເຕນ ຕຖາຄຕສ຺ສ ປຣິສາ ຠິນ຺ນາ’ຕິ? ‘‘ນຕ຺ຖິ ຠນ຺ເຕ, ໂນ ເຈຕໍ ໂລເກ ທິສ຺ສຕິ ໂນປິ ສຸຍ຺ຍຕິ. ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ອເຠຊ຺ຊປຣິສປຎ຺ໂຫ ອຏ຺ຐໂມ.

ອເຠຊ຺ຊວຄ຺ໂຄ ທຸຕິໂຍ.

ອິມສ຺ມິໍ ວຄ຺ເຄ ອຏ຺ຐ ປຎ຺ຫາ.