໗. ຠິກ຺ຂຸສງ຺ຆປຣິຫຣຓປຎ຺ໂຫ

໗. ‘‘ຠນ຺ເຕ ນາຄເສນ, ຠາສິຕມ຺ເປຕໍ ຠຄວຕາ ‘ຕຖາຄຕສ຺ສ ໂຂ, ອານນ຺ທ, ນ ເອວໍ ໂຫຕິ ‘‘ອຫໍ ຠິກ຺ຂຸສງ຺ຆໍ ປຣິຫຣິສ຺ສາມີ’’’ຕິ ວາ, ‘‘ມມຸທ຺ເທສິໂກ ຠິກ຺ຂຸສງ຺ໂຆ’’ຕິ ວາ’ຕິ. ປຸນ ຈ ເມຕ຺ເຕຍ຺ຍສ຺ສ ຠຄວໂຕ ສຠາວຄຸຓໍ ປຣິທີປຍມາເນນ ຠຄວຕາ ເອວໍ ຠຓິຕໍ ‘‘ໂສ ອເນກສຫສ຺ສໍ ຠິກ຺ຂຸສງ຺ຆໍ ປຣິຫຣິສ຺ສຕິ, ເສຍ຺ຍຖາປິ ອຫໍ ເອຕຣຫິ ອເນກສຕໍ ຠິກ຺ຂຸສງ຺ຆໍ ປຣິຫຣາມີ’’ຕິ. ຍທິ, ຠນ຺ເຕ ນາຄເສນ, ຠຄວຕາ ຠຓິຕໍ ‘ຕຖາຄຕສ຺ສ ໂຂ, ອານນ຺ທ, ນ ເອວໍ ໂຫຕິ ‘‘ອຫໍ ຠິກ຺ຂຸສງ຺ຆໍ ປຣິຫຣິສ຺ສາມີ’’ຕິ ວາ, ‘‘ມມຸທ຺ເທສິໂກ ຠິກ຺ຂຸສງ຺ໂຆ’’ຕິ ວາ’ຕິ, ເຕນ ຫິ ອເນກສຕໍ ຠິກ຺ຂຸສງ຺ຆໍ ປຣິຫຣາມີຕິ ຍໍ ວຈນໍ, ຕໍ ມິຈ຺ຉາ. ຍທິ ຕຖາຄເຕນ ຠຓິຕໍ ‘ໂສ ອເນກສຫສ຺ສໍ ຠິກ຺ຂຸສງ຺ຆໍ ປຣິຫຣິສ຺ສຕິ, ເສຍ຺ຍຖາປິ ອຫໍ ເອຕຣຫິ ອເນກສຕໍ ຠິກ຺ຂຸສງ຺ຆໍ ປຣິຫຣາມີ’ຕິ, ເຕນ ຫິ ຕຖາຄຕສ຺ສ ໂຂ, ອານນ຺ທ, ນ ເອວໍ ໂຫຕິ ‘ອຫໍ ຠິກ຺ຂຸສງ຺ຆໍ ປຣິຫຣິສ຺ສາມີ’ຕິ ວາ, ‘ມມຸທ຺ເທສິໂກ ຠິກ຺ຂຸສງ຺ໂຆ’ຕິ ວາຕິ ຕມ຺ປິ ວຈນໍ ມິຈ຺ຉາ, ອຍມ຺ປິ ອຸຠໂຕ ໂກຏິໂກ ປຎ຺ໂຫ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ຕຖາຄຕສ຺ສ ໂຂ, ອານນ຺ທ, ນ ເອວໍ ໂຫຕິ ‘‘ອຫໍ ຠິກ຺ຂຸສງ຺ຆໍ ປຣິຫຣິສ຺ສາມີ’’ຕິ ວາ, ‘‘ມມຸທ຺ເທສິໂກ ຠິກ຺ຂຸສງ຺ໂຆ’’ຕິ ວາ’ຕິ. ປຸນ ຈ ເມຕ຺ເຕຍ຺ຍສ຺ສາປິ ຠຄວໂຕ ສຠາວຄຸຓໍ ປຣິທີປຍມາເນນ ຠຄວຕາ ຠຓິຕໍ ‘ໂສ ອເນກສຫສ຺ສໍ ຠິກ຺ຂຸສງ຺ຆໍ ປຣິຫຣິສ຺ສຕິ, ເສຍ຺ຍຖາປິ ອຫໍ ເອຕຣຫິ ອເນກສຕໍ ຠິກ຺ຂຸສງ຺ຆໍ ປຣິຫຣາມີ’ຕິ. ເອຕສ຺ມິຎ຺ຈ, ມຫາຣາຊ, ປຎ຺ເຫ ເອໂກ ອຕ຺ໂຖ ສາວເສໂສ, ເອໂກ ອຕ຺ໂຖ ນິຣວເສໂສ. ນ, ມຫາຣາຊ, ຕຖາຄໂຕ ປຣິສາຍ ອນຸຄາມິໂກ, ປຣິສາ ປນ ຕຖາຄຕສ຺ສ ອນຸຄາມິກາ. ສມ຺ມຸຕິ, ມຫາຣາຊ, ເອສາ ‘ອຫ’ນ຺ຕິ ‘ມມາ’ຕິ, ນ ປຣມຕ຺ໂຖ ເອໂສ, ວິຄຕໍ, ມຫາຣາຊ, ຕຖາຄຕສ຺ສ ເປມໍ, ວິຄໂຕ ສິເນໂຫ, ‘ມຍ຺ຫ’ນ຺ຕິປິ ຕຖາຄຕສ຺ສ ຄຫຓໍ ນຕ຺ຖິ, ອຸປາທາຍ ປນ ອວສ຺ສໂຍ ໂຫຕິ.

‘‘ຍຖາ, ມຫາຣາຊ, ປຖວີ ຠູມຏ຺ຐານໍ ສຕ຺ຕານໍ ປຕິຏ຺ຐາ ໂຫຕິ ອຸປສ຺ສຍໍ, ປຖວິຏ຺ຐາ ເຈເຕ ສຕ຺ຕາ, ນ ຈ ມຫາປຖວິຍາ ‘ມຍ຺ເຫເຕ’ຕິ ອເປກ຺ຂາ ໂຫຕິ, ເອວເມວ ໂຂ, ມຫາຣາຊ, ຕຖາຄໂຕ ສພ຺ພສຕ຺ຕານໍ ປຕິຏ຺ຐາ ໂຫຕິ ອຸປສ຺ສຍໍ, ຕຖາຄຕຏ຺ຐາ [ຕຖາຄຕປຕິຏ຺ຐາ ເອວ (ສີ.)] ເຈເຕ ສຕ຺ຕາ, ນ ຈ ຕຖາຄຕສ຺ສ ‘ມຍ຺ເຫເຕ’ຕິ ອເປກ຺ຂາ ໂຫຕິ. ຍຖາ ວາ ປນ, ມຫາຣາຊ, ມຫຕິມຫາເມໂຆ ອຠິວສ຺ສນ຺ໂຕ ຕິຓຣຸກ຺ຂປສຸມນຸສ຺ສານໍ ວຸຑ຺ຒິໍ ເທຕິ ສນ຺ຕຕິໍ ອນຸປາເລຕິ. ວຸຏ຺ຐູປຊີວິໂນ ເຈເຕ ສຕ຺ຕາ ສພ຺ເພ, ນ ຈ ມຫາເມຆສ຺ສ ‘ມຍ຺ເຫເຕ’ຕິ ອເປກ຺ຂາ ໂຫຕິ. ເອວເມວ ໂຂ, ມຫາຣາຊ, ຕຖາຄໂຕ ສພ຺ພສຕ຺ຕານໍ ກຸສລຘມ຺ເມ ຊເນຕິ ອນຸປາເລຕິ, ສຕ຺ຖູປຊີວິໂນ ເຈເຕ ສຕ຺ຕາ ສພ຺ເພ, ນ ຈ ຕຖາຄຕສ຺ສ ‘ມຍ຺ເຫເຕ’ຕິ ອເປກ຺ຂາ ໂຫຕິ. ຕໍ ກິສ຺ສ ເຫຕຸ? ອຕ຺ຕານຸທິຏ຺ຐິຍາ ປຫີນຕ຺ຕາ’’ຕິ.

‘‘ສາຘຸ, ຠນ຺ເຕ ນາຄເສນ, ສຸນິພ຺ເພຐິໂຕ ປຎ຺ໂຫ ພຫຸວິເຘຫິ ກາຣເຓຫິ, ຄມ຺ຠີໂຣ ອຸຕ຺ຕານີກໂຕ, ຄຓ຺ຐິ ຠິນ຺ໂນ, ຄຫນໍ ອຄຫນໍ ກຕໍ, ອນ຺ຘກາໂຣ ອາໂລໂກ ກໂຕ, ຠຄ຺ຄາ ປຣວາທາ, ຊິນປຸຕ຺ຕານໍ ຈກ຺ຂຸໍ ອຸປ຺ປາທິຕ’’ນ຺ຕິ.

ຠິກ຺ຂຸສງ຺ຆປຣິຫຣຓປຎ຺ໂຫ ສຕ຺ຕໂມ.