໖. ອປຸຎ຺ຎປຎ຺ໂຫ

໖. ‘‘ຠນ຺ເຕ ນາຄເສນ, ຕຸມ຺ເຫ ຠຓຖ ‘ໂຍ ອຊານນ຺ໂຕ ປາຓາຕິປາຕໍ ກໂຣຕິ, ໂສ ພລວຕຣໍ ອປຸຎ຺ຎໍ ປສວຕີ’ຕິ. ປຸນ ຈ ຠຄວຕາ ວິນຍປຎ຺ຎຕ຺ຕິຍາ ຠຓິຕໍ ‘ອນາປຕ຺ຕິ ອຊານນ຺ຕສ຺ສາ’ຕິ. ຍທິ, ຠນ຺ເຕ ນາຄເສນ, ອຊານິຕ຺ວາ ປາຓາຕິປາຕໍ ກໂຣນ຺ໂຕ ພລວຕຣໍ ອປຸຎ຺ຎໍ ປສວຕິ, ເຕນ ຫິ ‘ອນາປຕ຺ຕິ ອຊານນ຺ຕສ຺ສາ’ຕິ ຍໍ ວຈນໍ, ຕໍ ມິຈ຺ຉາ. ຍທິ ອນາປຕ຺ຕິ ອຊານນ຺ຕສ຺ສ, ເຕນ ຫິ ‘ອຊານິຕ຺ວາ ປາຓາຕິປາຕໍ ກໂຣນ຺ໂຕ ພລວຕຣໍ ອປຸຎ຺ຎໍ ປສວຕີ’ຕິ ຕມ຺ປິ ວຈນໍ ມິຈ຺ຉາ. ອຍມ຺ປິ ອຸຠໂຕ ໂກຏິໂກ ປຎ຺ໂຫ ທຸຣຸຕ຺ຕໂຣ ທຸຣຕິກ຺ກໂມ ຕວານຸປ຺ປຕ຺ໂຕ, ໂສ ຕຍາ ນິພ຺ພາຫິຕພ຺ໂພ’’ຕິ.

‘‘ຠາສິຕມ຺ເປຕໍ, ມຫາຣາຊ, ຠຄວຕາ ‘ໂຍ ອຊານນ຺ໂຕ ປາຓາຕິປາຕໍ ກໂຣຕິ, ໂສ ພລວຕຣໍ ອປຸຎ຺ຎໍ ປສວຕີ’ຕິ. ປຸນ ຈ ວິນຍປຎ຺ຎຕ຺ຕິຍາ ຠຄວຕາ ຠຓິຕໍ ‘ອນາປຕ຺ຕິ ອຊານນ຺ຕສ຺ສາ’ຕິ. ຕຕ຺ຖ ອຕ຺ຖນ຺ຕຣໍ ອຕ຺ຖິ. ກຕມໍ ອຕ຺ຖນ຺ຕຣໍ? ອຕ຺ຖິ, ມຫາຣາຊ, ອາປຕ຺ຕິ ສຎ຺ຎາວິໂມກ຺ຂາ, ອຕ຺ຖິ ອາປຕ຺ຕິ ໂນສຎ຺ຎາວິໂມກ຺ຂາ. ຍາຍໍ, ມຫາຣາຊ, ອາປຕ຺ຕິ ສຎ຺ຎາວິໂມກ຺ຂາ, ຕໍ ອາປຕ຺ຕິໍ ອາຣພ຺ຠ ຠຄວຕາ ຠຓິຕໍ ‘ອນາປຕ຺ຕິ ອຊານນ຺ຕສ຺ສາ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ອປຸຎ຺ຎປຎ຺ໂຫ ຉຏ຺ໂຐ.