໓. ສງ຺ຆາຏິກຓ຺ຓສຸຕ຺ຕໍ

໙໒. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ສງ຺ຆາຏິກຓ຺ເຓ ເຈປິ, ຠິກ຺ຂເວ, ຠິກ຺ຂຸ ຄເຫຕ຺ວາ ປິຏ຺ຐິໂຕ ປິຏ຺ຐິໂຕ ອນຸພນ຺ໂຘ ອສ຺ສ ປາເທ ປາທໍ ນິກ຺ຂິປນ຺ໂຕ, ໂສ ຈ ໂຫຕິ ອຠິຊ຺ຌາລຸ ກາເມສຸ ຕິພ຺ພສາຣາໂຄ ພ຺ຍາປນ຺ນຈິຕ຺ໂຕ ປທຸຏ຺ຐມນສງ຺ກປ຺ໂປ ມຸຏ຺ຐສ຺ສຕິ ອສມ຺ປຊາໂນ ອສມາຫິໂຕ ວິພ຺ຠນ຺ຕຈິຕ຺ໂຕ ປາກຕິນ຺ທ຺ຣິໂຍ; ອຖ ໂຂ ໂສ ອາຣກາວ ມຍ຺ຫໍ, ອຫຎ຺ຈ ຕສ຺ສ. ຕໍ ກິສ຺ສ ເຫຕຸ? ຘມ຺ມຎ຺ຫິ ໂສ, ຠິກ຺ຂເວ, ຠິກ຺ຂຸ ນ ປສ຺ສຕິ. ຘມ຺ມໍ ອປສ຺ສນ຺ໂຕ ນ ມໍ ປສ຺ສຕິ [ມໍ ນ ປສ຺ສຕິ (ສ຺ຍາ.)].

‘‘ໂຍຊນສເຕ ເຈປິ ໂສ, ຠິກ຺ຂເວ, ຠິກ຺ຂຸ ວິຫເຣຍ຺ຍ. ໂສ ຈ ໂຫຕິ ອນຠິຊ຺ຌາລຸ ກາເມສຸ ນ ຕິພ຺ພສາຣາໂຄ ອພ຺ຍາປນ຺ນຈິຕ຺ໂຕ ອປທຸຏ຺ຐມນສງ຺ກປ຺ໂປ ອຸປຏ຺ຐິຕສ຺ສຕິ ສມ຺ປຊາໂນ ສມາຫິໂຕ ເອກຄ຺ຄຈິຕ຺ໂຕ ສໍວຸຕິນ຺ທ຺ຣິໂຍ; ອຖ ໂຂ ໂສ ສນ຺ຕິເກວ ມຍ຺ຫໍ, ອຫຎ຺ຈ ຕສ຺ສ. ຕໍ ກິສ຺ສ ເຫຕຸ? ຘມ຺ມໍ ຫິ ໂສ, ຠິກ຺ຂເວ, ຠິກ຺ຂຸ ປສ຺ສຕິ; ຘມ຺ມໍ ປສ຺ສນ຺ໂຕ ມໍ ປສ຺ສຕີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ອນຸພນ຺ໂຘປິ ເຈ ອສ຺ສ, ມຫິຈ຺ໂຉ ຈ ວິຆາຕວາ;

ເອຊານຸໂຄ ອເນຊສ຺ສ, ນິພ຺ພຸຕສ຺ສ ອນິພ຺ພຸໂຕ;

ຄິທ຺ໂຘ ໂສ ວີຕເຄຘສ຺ສ, ປສ຺ສ ຍາວຎ຺ຈ ອາຣກາ.

‘‘ໂຍ ຈ ຘມ຺ມມຠິຎ຺ຎາຍ, ຘມ຺ມມຎ຺ຎາຍ ປຓ຺ຑິໂຕ;

ຣຫໂທວ ນິວາເຕ ຈ, ອເນໂຊ ວູປສມ຺ມຕິ.

‘‘ອເນໂຊ ໂສ ອເນຊສ຺ສ, ນິພ຺ພຸຕສ຺ສ ຈ ນິພ຺ພຸໂຕ;

ອຄິທ຺ໂຘ ວີຕເຄຘສ຺ສ, ປສ຺ສ ຍາວຎ຺ຈ ສນ຺ຕິເກ’’ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຕຕິຍໍ.